སྲིད་སྐྱོང་མཆོག་ནས་དབུ་མའི་ལམ་གྱི་སྲིད་བྱུས་འཛིན་དགོས་པའི་རྒྱུ་རྐྱེན་ལྔ་ཡོད་པ་དག་ནི་རྒྱ་དཀར་ནག་གཉིས་དང་རྒྱལ་སྤྱིའི་སྤྱི་ཚོགས། བོད་ཕྱི་ནང་གཉིས་ཀྱི་རྒྱ་ཆེའི་མི་མང་བཅས་ཡིན་སྐོར་བརྗོད་སོང་།
དེ་རིང་སྔ་དྲོའི་ཆུ་ཚོད་ ༡༠ བའི་སྟེང་གངས་སྐྱིད་གཉའ་ཁྲི་ཚོགས་ཁང་དུ་སྐབས་ ༡༦ པའི་བོད་མི་མང་སྤྱི་གསར་པ་རྣམས་ལ་བཙན་བྱོལ་བོད་མིའི་སྒྲིག་འཛུགས་དང་ཁྲིམས་སྒྲིག་ཁག་གི་ཟབ་སྦྱོང་ཞིག་འགྲོ་བཞིན་པའི་ཐོག སྲིད་སྐྱོང་བློ་བཟང་སེང་གེ་མཆོག་ནས་དབུ་མའི་ལམ་གྱི་སྲིད་བྱུས་ཀྱི་དགོས་དམིགས་དང་རྒྱུ་རྐྱེན་ཁག་ལྔ། དེ་བཞིན་བོད་རྒྱ་འབྲེལ་གྱི་བྱུང་རིམ་དང་རྒྱབ་ལྗོངས་སོགས་ངོ་སྤྲོད་གནང་སོང་།
ཟབ་སྦྱོང་གི་ཐོག་མར་སྲིད་སྐྱོང་མཆོག་ནས་དབུ་མའི་ལམ་གྱི་དགོས་དམིགས་སྐོར་ལ། དབུ་མའི་ལམ་གྱི་སྲིད་བྱུས་འཛིན་དགོས་པའི་རྒྱུ་རྐྱེན་ལྔ་ཡོད་པ་དང་། དེ་དག་ནི་རྒྱ་དཀར་ནག་གཉིས་དང་རྒྱལ་སྤྱིའི་སྤྱི་ཚོགས། བོད་ཕྱི་ནང་གཉིས་ཀྱི་རྒྱ་ཆེའི་མི་མང་བཅས་ཡིན་པ་དང་། རྒྱུ་རྐྱེན་ལྔ་དང་འབྲེལ་བའི་ཐོག་ནས་མཐུན་སྒྲིལ་ཟེར་ན་རེད། འགལ་ཟླ་ཟེར་ནའང་རེད། དེ་ལ་བརྟེན་ནས་དབུ་མའི་ལམ་གྱི་སྲིད་བྱུས་འགྲུབ་དང་མི་འགྲུབ་དེ་གཙོ་བོ་རེད། བོད་མིའི་སྒྲིག་འཛུགས་ཀྱི་ལངས་ཕྱོགས་ག་རེ་ཡིན་པ་དང་། འཕྲལ་ཕུགས་རྒྱང་གསུམ་གྱི་སྲིད་ཇུས་ཀྱི་ཐབས་ཤེས་ག་རེ་ཡོད་ཅེས་ལབ་པ་ཡིན་ན། ངས་ནམ་རྒྱུན་ལྔ་དང་ལྔ་བཅུ་ཞེས་འགྲེལ་བཤད་རྒྱག་གི་ཡོད་པ། ལྔ་དེ་ལོ་ལྔ་དང་ལྔ་བཅུ་དེ་ལོ་ལྔ་བཅུ་བཅས་ཡིན། ལོ་ལྔ་ཞེས་པ་དེ་སྲིད་སྐྱོང་དང་བཀའ་ཤག་གི་ལས་ཡུན་ལོ་ལྔ་རེད། རྣམ་པ་ཚོ་སྤྱི་འཐུས་ཀྱི་ལས་ཡུན་ལོ་ལྔ་རེད། ལོ་ལྔ་ནང་ཆབ་སྲིད་ཀྱི་དགོས་འདུན་དང་དམིགས་ཡུལ། འབད་བརྩོན་གཙོ་བོ་དེ་དབུ་མའི་ལམ་གཞིར་བཞག་པའི་ཐོག་ནས་མིང་དོན་མཚུངས་པའི་རང་སྐྱོང་རག་རྒྱུ་དེ་རེད། དེ་ལ་བོད་རྒྱ་འབྲེལ་མོལ་བརྒྱུད་༧གོང་ས་མཆོག་གི་སྐུ་ཚབ་དང་རྒྱ་ནག་གཞུང་གི་སྐུ་ཚབ་རྣམས་ཕར་ཚུར་བཀའ་མོལ་གནང་བའི་ཐོག་ནས་མིང་དོན་མཚུངས་པའི་རང་སྐྱོང་རག་རྒྱུ་དེ་རེད། དེ་ང་ཚོ་བཀའ་ཤག་དང་གྲོས་ཚོགས་གང་ཡིན་ཡང་ང་ཚོའི་ཆབ་སྲིད་ཀྱི་རྩ་ཆེ་ཤོས་དེ། འདས་པའི་མི་ལོ་ ༥༠ རིང་ང་ཚོ་བཙན་བྱོལ་ནང་ལྷག་པ་རེད། གལ་སྲིད་ད་དུང་མི་ལོ་ ༥༠ ནང་བཙན་བྱོལ་དུ་ལྷག་པ་ཡིན་ན། མི་ལོ་ ༥༠ ནང་བོད་མིའི་སྒྲིག་འཛུགས་འདི་འཚོ་ཐུབ་དགོས་པ་དང་། འཚོ་བ་མ་ཟད་ནུས་པ་འཕེལ་ཐུབ་དགོས་པ། ནུས་པ་འཕེལ་ཐུབ་པ་ནས་རྒྱུན་གནས་ཐུབ་པ་དགོས་ཀྱི་ཡོད་པ་རེད། རྒྱུན་གནས་ཐུབ་པ་ཡིན་ན་མི་ལོ་ ༥༠ ནང་རྒྱ་ནག་ལ་འགྱུར་བ་འགྲོ་ཡིན་ཡིན་པ་དང་། འགྱུར་བ་འགྲོ་བ་ཡིན་ན་ང་ཚོ་བོད་མིར་རྨང་གཞི་ཞིག་རག་གི་རེད། དེར་བརྟེན་ངས་ལྔ་དང་ལྔ་བཅུ་གཉིས་ཀར་རྒྱལ་ཁ་འཐོབ་པའི་དམིགས་ཡུལ་དང་རེ་བ་བཅངས་ཡོད། དེ་ཡང་ང་ཚོས་མི་ལོ་ ༥ ལ་འབོད་བརྩོན་བྱེད་པ་ནང་བཞིན་མི་ལོ་ ༥༠ རིང་འབོད་བརྩོན་བྱེད་དགོས་ཀྱི་ཡོད་པ་རེད། གང་ཡིན་ཟེར་ན། རྒྱ་ནག་གཞུང་གིས་བོད་མིའི་སྒྲིག་འཛུགས་འདི་རྩ་གཏོར་ནུས་མེད་བཟོ་ཐབས་སུ་འབད་བརྩོན་བྱེད་ཀྱིན་ཡོད་པ་རེད། དེར་བརྟེན་ང་ཚོས་མི་ལོ་ལྔ་དང་ལྔ་བཅུ་གཉིས་ནང་འབད་བརྩོན་བྱེད་དགོས་ཀྱི་ཡོད་པ་རེད། རྒྱ་ནག་གི་མཐོང་ལམ་ནས་བོད་མིའི་སྒྲིག་འཛུགས་འདི་དངོས་གནས་རྒྱུན་ཐུབ་པ་ཞིག་བྱུང་ན། རྒྱལ་སྤྱི་གཙོས་པའི་རྒྱ་གར་ཡིན་ནའང་ང་ཚོར་རྒྱབ་སྐྱོར་གནང་གི་རེད། རྒྱབ་སྐྱོར་གནང་བའི་རེ་བ་ཅི་ཙམ་ཡོད་ན། བོད་མི་ཚོར་མིང་དོན་མཚུངས་པའི་རང་སྐྱོང་རག་གི་རེད། ཅེས་གསུངས་སོང་།
ཡང་སྲིད་སྐྱོང་མཆོག་གིས་ངས་འདིར་ཞུ་དོན་གཙོ་བོ་དེ་ཐའེ་ཝན་ནི་རྒྱལ་ཁབ་ཅིག་ཆགས་པའི་ཆ་རྐྱེན་ཆ་ཚང་ཡོད་པ་རེད་ལ། ཆབ་སྲིད་ཀྱི་ལྟ་གྲུབ་ཐོག་ནས་རྒྱལ་ཁབ་ཟེར་དུས་གཞུང་དང་ས་ཡོད་པ། རྒྱལ་མཚམས་དང་མི་འབོར་ཡོད་པ། རྒྱལ་ཁབ་ཀྱི་བདག་དབང་ཡོད་དགོས་སྐོར་བཤད་ཡོད་པ་རེད། དེར་བརྟེན་ཐའེ་ཝན་ལ་གཞུང་དང་མི་འབོར། ས་མཚམས་སོགས་ཡོད་ནའང་། བདག་དབང་ཡོད་མེད་དེ་རྩོད་གཞི་ཆགས་བསྡད་ཡོད་པ་རེད། བདག་དབང་ཟེར་དུས། རྒྱལ་ཁབ་ཅིག་རྒྱལ་ཁབ་གཞན་ཞིག་གིས་ངོས་འཛིན་བྱས་པ་དེ། རྒྱལ་ཁབ་དེའི་བདག་དབང་ངོས་འཛིན་བྱས་པ་རེད། ཕྱི་ལོ་ ༡༩༦༩ ལོར་ཐའེ་ཝན་ལ་རྒྱལ་ཁབ་ཀྱི་བདག་དབང་ཡོད་པར་ངོས་འཛིན་མཁན་རྒྱལ་ཁབ་ཁག་ ༧༡ དང་ད་ཆར་རྒྱལ་ཁབ་ ༢༡ ལྷག་ཡོད་པ་རེད། ཐའེ་ཝན་ལ་བདག་དབང་ཡོད་ཟེར་དུས། དེ་རྩོད་ཆོག་གི་ཡོད་པ་རེད། མཐུན་རྐྱེན་དེ་དག་ཡོད་བཞིན་དུ། ཐའེ་ཝན་དམངས་གཙོ་ཡར་ཐོན་ཚོགས་པ་ཡིན་ན་རེད། གོ་མིན་ཏང་སྲིད་གཞུང་ཡིན་ན་རེད། ད་ལྟའི་སྲིད་འཛིན་གསར་བ་ལྕམ་ཚའེ་ཡེན་ཝན་ཡིན་ན་རེད། ད་ལྟའི་གནས་བབ་རང་འཇགས་ཡིན་ཟེར་བ་མ་གཏོགས་ཐའེ་ཝན་ལ་རང་བཙན་དགོས་ཞེས་ཤོད་ཐུབ་ཀྱི་ཡོད་པ་མ་རེད། དེར་བརྟེན་ང་ཚོ་བོད་མིའི་སྒྲིག་འཛུགས་ནས་རང་བཙན་བརྩད་པ་ཡིན་ན། ག་འདྲ་ཆགས་ཀྱི་རེད་ཅེས་ཤོད་ཀྱི་ཡོད་པ་རེད། གང་ཡིན་ཟེར་ན། ཐའེ་ཝན་གྱི་གནས་སྟངས་ལ་ལྟོས་དང་། ཐའེ་ཝན་རྒྱལ་ཁབ་ཡིན་པ་དང་བདག་དབང་ཡོད་པ། ཆ་རྐྱེན་ཆ་ཚང་ཡོད་པ་རེད། ཡོད་བཞིན་དུ་ཁོ་ཚོས་རང་བཙན་རྩོད་ཐུབ་ཀྱི་མི་འདུག་གཱ། རང་བཙན་ཡིན་དང་རང་བཙན་དགོས་ཞེས་ཤོད་ཐུབ་ཀྱི་མི་འདུག་གཱ། ཨ་རིའི་གཞུང་གིས་ཐའེ་ཝན་མཚོ་འགག་གི་བདེ་འཇགས་སྲུང་སྐྱོབ་ཐོག་འགྲོ་གྲོན་ཨ་སྒོར་ཐེར་འབུམ་ ༡༠ ལྷག་གི་མཐུན་འགྱུར་གནང་རྒྱུ་བྱས་ཡོད་པ་རེད། ང་ཚོ་བོད་མིའི་སྒྲིག་འཛུགས་ཀྱི་ལོ་གཅིག་གི་དངུལ་རྩིས་ནང་ཨ་སྒོར་ས་ཡ་ཉི་ཤུ་རྩ་གྲངས་ཤིག་རེད། མ་ཟད་དོན་གཅོད་ཐོག་ནས་ཀྱང་ང་ཚོ་ཡོང་གི་མི་འདུག་གཱ། ཐའེ་ཝན་ལ་རྒྱལ་ཁབ་ ༥༧ གྱི་ནང་སྐུ་ཚབ་ལས་ཁུངས་ ༩༢ དང་། ཐའེ་ཝན་ནང་ཕྱིའི་རྒྱལ་ཁབ་ཁག་གི་གཞུང་ཚབ་ཁང་ ༦༥ ཆེད་བཙུགས་བྱས་ཡོད་པ་རེད། ང་ཚོར་ད་ཆར་དོན་གཅོད་ཁག་ ༡༢ ཡོད་པ་དང་། དེ་ཡང་ཕྱིའི་རྒྱལ་ཁབ་ཁག་ནང་གཞུང་འབྲེལ་མིན་པའི་ཚོགས་པའི་རྣམ་པ་འདྲ་མིན་སྣ་ཚོགས་ཐོག་བཙུགས་བཞག་ཡོད་པ་རེད། འདི་ག་དྷ་རམ་ས་ལར་ལུང་པ་གཞན་གཅིག་གི་ལས་ཁུངས་ཀྱང་ཡོད་པ་མ་རེད། ཐའེ་ཝན་གྱིས་རང་བཙན་རྩོད་ཐུབ་ཀྱི་མེད་དུས། ང་ཚོ་བོད་མིའི་སྒྲིག་འཛུགས་ཀྱིས་བོད་རང་བཙན་ག་འདྲ་ཞིག་རྩོད་ཐུབ་པ་རེད། སྔོན་ཆད་ཁྲིན་ཧྲི་པིན་གྱི་སྐབས་སུ་ཐའེ་ཝན་གྱི་བཅའ་ཁྲིམས་ཁ་ཤས་འགྱུར་བ་གཏོང་དུས། ཀློག་དེབ་ནང་ཐའེ་ཝན་རང་བཙན་ཡིན་པའི་ལོ་རྒྱུས་འབྲི་གི་ཡིན་ཟེར་བ་དང་། གྲོས་ཚོགས་ནང་བཀའ་འཁྲོལ་མ་རག་བའི་རྙོག་དྲ་ཞེ་དྲགས་བྱུང་བ་རེད། ཐའེ་ཝན་མཚོ་འགག་གི་ཕྱི་སྐྱོད་ལག་དེབ་ནང་རྒྱ་ནག་སྤྱི་མཐུན་རྒྱལ་ཁབ་ཞེས་པ་དེ་ཐའེ་ཝན་སྤྱི་མཐུན་རྒྱལ་ཁབ་ཅེས་པའི་ཐ་སྙད་དེ་ཙམ་ཡང་བསྒྱུར་ཐུབ་མེད་པ་རེད།
ཉེ་ཆར་ཐའེ་ཝན་སྲིད་འཛིན་ཚའེ་ཡེན་ཝན་དམངས་གཙོ་ཚོགས་པའི་འོས་མིའི་མིང་ཐོག་ནས་ཨ་རིར་སླེབས་ཐུབ་ཡོད་པ་དང་། ཕོ་བྲང་དཀར་པོ་དང་ཕྱི་སྲིད་ལས་ཁུངས་ཀྱི་གནད་ཡོད་མི་སྣར་མཇལ་འཕྲད་བྱས་ཡོད་པ་རེད། ཚའེ་ཡེན་ཝན་ཨ་རིའི་རྒྱལ་ས་ཝ་ཞིན་ཊོན་དུ་ཕེབས་པ་རེད། ཡིན་ནའང་ཁོང་མོ་ཐའེ་ཝན་གྱི་སྲིད་འཛིན་ཆགས་རྗེས། ཨ་རིར་ཕེབས་ཆོག་གི་ཡོད་པ་མ་རེད། གལ་ཏེ་ཐའེ་ཝན་སྲིད་འཛིན་ལྷོ་ཨ་རིར་ཕེབས་པར་ཆ་བཞག་ན། ཐའེ་ཝན་ནས་གནམ་གྲུ་འཕུར་ཏེ་ལོ་སི་ཨན་རྗི་ལིར་སྡོད་དགོས་ཚེ། ཁྲིམས་ཐོག་ནས་ཆོག་མཆན་ཞུས་ཏེ། གནམ་གྲུ་བསྡད་ནས་སྣུམ་བླུག་ཆོག་གི་རེད། ཡིན་ནའང་གནམ་གྲུར་སྣུམ་བླུག་རྗེས་འགྲོ་དགོས་ཀྱི་ཡོད་པ་རེད། ཨ་རིའི་སར་འགྲོ་ཆོག་གི་ཡོད་པ་མ་རེད། དེ་བཞིན་ཐའེ་ཝན་མཚོ་འགག་རྒྱལ་ཁབ་ཅིག་ཡིན་ནའང་། འཛམ་གླིང་མཉམ་འབྲེལ་རྒྱལ་ཚོགས་དང་། འཛམ་གླིང་ཉོ་འཚོང་སྒྲིག་འཛུགས་དང་འཛམ་གླིང་འཕྲོད་བསྟེན་སྒྲིག་འཛུགས་སོགས་ནང་འཛུལ་ཞུགས་ཐུབ་མེད་པ་མ་ཟད། ཐའེ་ཝན་གྱི་མགོ་ཁྲིད་ཚོ་ཨ་རི་གཙོས་པའི་ཕྱིའི་རྒྱལ་ཁབ་ཁག་ནང་སྐོར་སྐྱོད་ཐུབ་ཀྱི་ཡོད་པ་མ་རེད་ཅེས་དང་།
ཡང་ཁོང་གིས་རྒྱ་དཀར་ནག་གི་འབྲེལ་ལམ་ཡིན་ནའང་། ཕྱི་ལོ་ ༡༩༥༤ ཟླ་ ༤ ཚེས་ ༢༩ བསླབ་པ་བཞིའི་གྲོས་ཆོད་ཞེས་པ་བཞག་ཅིང་། དེའི་ནང་རྒྱལ་ཁབ་ཕན་ཚུན་གྱི་མངའ་ཁོངས་བདག་དབང་ཐད་ཐུན་མོང་གི་བརྩི་འཇོག་དགོས་པ་དང་། ཕན་ཚུན་ལ་བཙན་འཛུལ་མི་ཆོག་པ། འདྲ་མཉམ་དང་ཐུན་མོང་གི་ཁེ་ཕན། ཞི་བདེ་མཉམ་གནས། དེ་བཞིན་རྒྱ་གར་དབྱིན་གཞུང་དང་རྒྱ་གར་གྱི་བོད་ཐོག་འཛིན་པའི་གནས་བབ་ཐད་ནས། སྲིད་བློན་ནི་ཧ་རུ་ཡིས་(Nehru)རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་བོད་ལྗོངས་ཞེས་དང་། སྲིད་བློན་བ་རྗེ་བྷ་ཡིས་(Vajpayee)རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཆ་ཤས་སུ་གྲུབ་པའི་བོད་ལྗོངས་ཞེས་ངོས་འཛིན་བྱས་ཡོད་པ་རེད། རྒྱལ་སྤྱིའི་སྤྱི་ཚོགས་ཀྱི་ངོས་ནས་ཕྱི་ལོ་ ༢༠༡༡ ལོ་ནས་ ༢༠༡༤ བར་བོད་མིའི་སྒྲིག་འཛུགས་ཀྱི་དབུ་མའི་ལམ་གྱི་སྲིད་བྱུས་དང་བོད་རྒྱ་འབྲེལ་མོལ་ཐད་ལ་མོས་མཐུན་དང་རྒྱབ་སྐྱོར་གནང་མུས་ཡིན་པ་རེད། ཅེས་གསུངས་སོང་།
སྲིད་སྐྱོང་མཆོག་ནས་བོད་རྒྱ་འབྲེལ་མོལ་གྱི་བྱུང་རིམ་དང་དེའི་རྒྱབ་ལྗོངས་སྐོར་ལ། ཕྱི་ལོ་ ༡༩༧༡ ལོར་བོད་རྒྱ་གཉིས་དབར་ཐད་ཀའི་འབྲེལ་ལམ་འགོ་ཚུགས་པ་ནས་བཟུང་ཕན་ཚུན་དབར་གཞུང་འབྲེལ་དང་གཞུང་འབྲེལ་མིན་པའི་འབྲེལ་ལམ་ཐེངས་ ༣༠ ཙམ་བྱུང་ཡོད་པ་དང་། བོད་མིའི་རྩ་དོན་ཁག་ནི་ལོ་རྒྱུས་ཀྱི་ཆ་ནས་བོད་རྒྱ་ནག་གི་ཆ་ཤས་སུ་ཁས་ལེན་ཐབས་མེད་པ་དང་། ཆོས་དང་། མི་རིགས། སྐད་ཡིག ས་བབ་ཁོར་ཡུག ལོ་རྒྱུས་བཅས་ཀྱི་ཆ་ནས་བོད་ལ་གཞན་དང་མི་འདྲ་བའི་དམིགས་བསལ་ཁྱད་ཆོས་ཡོད་པ་དང་། བོད་མིའི་ཐུན་མོང་མ་ཡིན་པའི་ཁྱད་ཆོས་དེ་དག་སྲུང་སྐྱོབ་བྱ་ཆེད་རང་སྲིད་རང་བདག་གི་ཐོབ་ཐང་དང་། བོད་རིགས་ཡོངས་རྫོགས་གཅིག་གྱུར་དགོས་པ། བོད་དོན་བདེན་མཐའ་གསལ་ཆེད་འཚེ་མེད་ཞི་བའི་ཐབས་ལམ་འབའ་ཞིག་ལ་བསྟེན་རྒྱུ་བཅས་ཡིན་ཞིང་། རྒྱ་ཕྱོགས་ཀྱི་རྩ་དོན་ཁག་ནི་རྒྱལ་ཁབ་ཀྱི་བདག་དབང་དང་བརྟན་ལྷིང་ལ་གུ་ཡངས་བྱེད་ཐབས་མེད་པ་དང་། མི་རིགས་ ༥༦ འདྲ་མཉམ་དང་མཐུན་སྒྲིལ་དགོས་པ། རྩ་ཁྲིམས་ཀྱི་རྒྱ་ལས་འགལ་མི་ཆོག་པ། གྲངས་ཉུང་མི་རིགས་ལ་རང་ཁྱིམ་རང་བདག་དང་རང་སྲིད་རང་སྐྱོང་གི་ཐོབ་ཐང་ཡོད་པ་བཅས་རེད། འབྲེལ་མོལ་ཐེངས་ ༩ པའི་མཇུག་འབྲས་ནི། བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་དང་དེའི་འགྲེལ་བརྗོད། བོད་རིགས་ཡོངས་རྫོགས་གཅིག་གྱུར་དགོས་པ་དང་རང་སྐྱོང་མིང་དོན་མཚུངས་པ་དགོས་པ། རང་སྐྱོང་བྱེད་རྒྱུའི་གནད་དོན་བཅུ་གཅིག་སོགས་ཡིན་ཞིང་། ད་ལྟའི་བར་བོད་རྒྱ་འབྲེལ་མོལ་གྱི་སྡོམ་ཚིག་ག་རེ་བསྐྱོན་ཡོད་པ་རེད་ཟེར་ན། མིང་དོན་མཚུངས་པའི་རང་སྐྱོང་འགྲུབ་མ་སོང་། མ་ཟད་འབྲེལ་མོལ་ནས་ཞི་མོལ་ཡང་ཆགས་མ་སོང་ཞེས་ཡོངས་གྲགས་སུ་བརྗོད་ཀྱི་ཡོད་པ་ལྟར། ད་ཆར་བོད་རྒྱའི་འབྲེལ་མོལ་ཆད་ཡོད་ནའང་། ཚོགས་མི་ ༢༠ ལས་གྲུབ་པའི་བོད་རྒྱ་འབྲེལ་མོལ་ལས་དོན་ཚོགས་ཆུང་ཞིག་བརྒྱུད་ལོ་བཞིན་བོད་རྒྱ་འབྲེལ་མོལ་སྐོར་ལ་བགྲོ་གླེང་ཚོགས་འདུ་འཚོགས་མུས་ཡིན་པ་ལྟར། ད་ལོའི་ཕྱི་ཟླ་ ༧ ནང་བོད་རྒྱ་འབྲེལ་མོལ་ལས་དོན་ཚོགས་ཆུང་གི་ཚོགས་འདུ་བསྐོང་འཆར་ཡོད། ཅེས་སོགས་གསུངས་སོང་།
མཇུག་ཏུ་དྲི་བ་དྲིས་ལན་གྱི་སྐབས་སུ། ང་ཚོའི་སྤྱི་ཚོགས་ནང་རང་བཙན་དང་དབུ་མའི་ལམ་གྱི་ལངས་ཕྱོགས་འཛིན་མཁན་ཁག་གཉིས་བྱུང་ཡོད་ནའང་། ༧གོང་ས་མཆོག་གཙོས་པའི་བོད་མིའི་ཆིག་སྒྲིལ་དང་རྩ་དོན་ལ་མ་གནོད་པའི་ཐོག་ནས་རང་བཙན་དང་དབུ་མའི་ལམ་གང་ཡིན་ཡང་། དེ་གླེང་སློང་བྱེད་པར་བོད་མི་ཚོར་རང་དབང་ཡོད་པ་རེད། ཡིན་ནའང་༧གོང་ས་མཆོག་ལ་མཚན་སྨད་དང་བོད་མིའི་སྒྲིག་འཛུགས་ལ་གཞི་མེད་སྐྱོན་བརྗོད་བྱས་ན་དེ་བོད་ཀྱི་རྩ་དོན་ལ་གནོད་ཀྱི་ཡོད་སྟབས། དེ་འགྲིག་གི་ཡོད་པ་མ་རེད། ཅེས་སོགས་གསུངས་སོང་།
གསར་འགོད་པ། པདྨ་རྒྱལ།
