ཁ་སང་ཁྱུང་མཆུ་རྫོང་ཟངས་དཀར་ཡུལ་ཚོའི་འབྲོག་པ་ཚོས་ཡུལ་སྐོར་ལྟེ་གནས་ཀྱིས་འབྲོག་མང་གི་དཔལ་འབྱོར་འཕར་སྣོན་ལ་ཕན་ཐོགས་མེད་པ་མ་ཟད། ཁོར་ཡུག་ལ་གནོད་སྐྱོན་བཟོ་བཞིན་ཡོད་པར་ངོ་རྒོལ་བྱས་འདུག
རྔ་བ་ཁུལ་ཁྱུང་མཆུ་རྫོང་ཁྱུང་ཆེན་རིག་གནས་ཡུལ་སྐོར་ཐོན་ལས་གོང་སྤེལ་ཚད་ཡོད་འགན་འཁྲི་ཁེ་ལས་ཁང་ཟེར་བ་ཞིག་གིས། རྫོང་སྲིད་གཞུང་རྒྱབ་རྩར་བཟུང་ནས་ཁྱུང་མཆུ་རྫོང་ཟངས་དཀར་སྨད་ཀྱི་འོམ་ཐང་ཟེར་བ་བཙན་འཕྲོག་བྱས་ཏེ་ཡུལ་སྐོར་སྣེ་ལེན་གྱི་ལྟེ་གནས་ཤིག་བཙུགས་ཡོད་པ་དང་། ལྟེ་གནས་དེའི་ཡོང་འབབ་ཡོད་ཚད་ཁེ་ལས་ཁང་རང་གིས་ཁྱུར་མིད་བཏང་བ་མ་ཟད། འབྲོག་པའི་རྩྭ་ཐང་དང་རང་བྱུང་རྒྱུག་ཆུ་ལ་འབག་བཙོག་ཆེན་པོ་བཟོ་བཞིན་ཡོད་སྟབས། ཁ་སང་ས་གནས་འབྲོག་པ་ཚོས་༼ཁྲིམས་མཐུན་གྱིས་ས་ཆ་ཉོ་ཚོང་བྱེད་པ་ནི་འདྲ་མཉམ་ཡིན།༽ཟེར་བ་སོགས་ཀྱི་འཕྲེད་དར་བཟུང་སྟེ། གཞུང་ལམ་སྟེང་དུ་བང་སྒྲིག་ནས་ཞི་བའི་ངོ་རྒོལ་བྱས་ཡོད་འདུག
འདི་གའི་གསར་འགོད་པས་དྷ་སར་གནས་སྡོད་ཕ་ཡུལ་ཟངས་དཀར་ནས་ཡིན་པ་ཞིག་ལ་སྐད་ཆ་དྲིས་པར་ཁོང་གིས། གནས་ཚུལ་དེ་བདེན་པ་ཡིན་ལ། ཕྱི་ལོ་ ༢༠༡༢ ལོར་སྒེར་གྱི་ཁེ་ལས་ཁང་ཞིག་གིས་ལས་གཞི་དེ་མགོ་བཙུགས་ཡོད་པ་དང་། མང་ཚོགས་ཀྱི་ས་ཆའི་ཐོག་བཙུགས་པའི་ཡུལ་སྐོར་སྣེ་ལེན་གྱི་ལྟེ་གནས་དེས་མང་ཚོགས་ཀྱི་ཡོང་འབབ་སོགས་ལ་ཁེ་ཕན་ཅི་ཡང་མེད་པ་མ་ཟད། ཁོར་ཡུག་ལ་གནོད་སྐྱོན་ཐེབས་ཀྱི་ཡོད་སྟབས། མང་ཚོགས་ཀྱིས་ཁོར་ཡུག་སྲུང་སྐྱོབ་དང་མང་ལ་ཁེ་ཕན་དགོས་པའི་རེ་འདུན་བཏོན་ཏེ་ངོ་རྒོལ་བྱས་ཡོད་ལུགས་དང་། ད་ལྟ་ལས་འགུལ་མཚམས་འཇོག་བྱས་ཡོད་མེད་སོགས་ཀྱི་གནས་ཚུལ་གསལ་པོ་ཤེས་རྟོགས་ཐུབ་ཀྱི་མེད་སྐོར་བརྗོད་བྱུང་།
ཡང་ཁོང་གིས་གནས་ཚུལ་མཁོ་སྤྲོད་གནང་བ་ལྟར་ན། ཟངས་དཀར་ཡུལ་ཚོ་ནི་ཁྱུང་མཆུ་རྫོང་ཁོངས་ཀྱི་རྩྭ་ཆུ་འཛོམས་པའི་འབྲོག་སྡེ་ཆེ་ཤོས་ཤིག་ཡིན་ལ། དབྱར་གྱི་དུས་སུ་མེ་ཏོག་དཀར་སེར་དམར་ལྗང་གིས་ཡོངས་སུ་བརྒྱན་ཏེ་ཧ་ཅང་མཛེས་སྡུག་ལྡན་པ་ཞིག་ཡིན་སྟབས། ཡུལ་སྐོར་སྤྲོ་འཆམ་པ་ཤིན་ཏུ་མང་པོ་ཡོང་གི་ཡོད་པ་རེད། ཡིན་ནའང་། ས་གནས་མང་ཚོགས་ཀྱི་དཔལ་འབྱོར་ཐད་དེ་ཙམ་གྱིས་ཕན་ཐོགས་བྱུང་མེད་པ་མ་ཟད། ཕྱི་ཕྱོགས་ནས་ཡོང་བའི་ཡུལ་སྐོར་བ་དང་སྒེར་འཁོར་བཏང་ནས་ཡོང་མཁན་ཇེ་མང་དུ་ཕྱིན་པ་དང་བསྟུན། ཁོར་ཡུག་ལ་འབག་བཙོག་དང་གནོད་སྐྱོན་ཐེབས་པར་བརྟེན། གཅིག་ནས་རང་བྱུང་སྐྱེས་ཁམས་ལ་སྲུང་སྐྱོབ་ཐུབ་པ་དང་། གཉིས་ནས་ས་གནས་དེ་གའི་མང་ཚོགས་ཀྱི་ཡོང་འབབ་འཕར་སྣོན་ཐུབ་པར་ཁ་གཡར་ཏེ། ཕྱི་ལོ་ ༢༠༡༢ ལོར་ཁྱུང་མཆུ་རྫོང་སྲིད་གཞུང་གི་ཆོག་མཆན་འོག་འོམ་ཐང་མེ་ཏོག་ཞིང་ཁམས་མཛེས་ལྗོངས་ཁུལ་ཞེས་བོད་ལུགས་གུར་ཁང་དང་ཤིང་ཕུབ་སྤྲོ་ཁང་ཆིག་སྟོང་། མི་ཉིས་སྟོང་ཙམ་ཤོང་བའི་མཚོ་ཐོག་ཟ་ཁང་སོགས་བཙུགས་ཡོད་པ་མ་ཟད། རླངས་འཁོར་འཇོག་ས་རྒྱ་ཆེན་པོ་ཞིག་བཅས་གསར་དུ་བཙུགས་ཡོད་འདུག
ཁྱུང་ཆེན་རིག་གནས་ཡུལ་སྐོར་ཐོན་ལས་གོང་སྤེལ་ཚད་ཡོད་འགན་འཁྲི་ཁེ་ལས་ཁང་ཟེར་བ་དེའི་འགན་འཛིན་ཨ་མཆོག་འདོད་ཁོ་ཟེར་བར་རྒྱ་ནག་དབུས་རླུང་འཕྲིན་ཁང་གི་བོད་སྐད་སྡེ་ཚན་ནས་བཅར་འདྲི་བྱེད་སྐབས། ཁེ་ལས་ཁང་དེས་ས་ཉུང་ཙམ་དང་འཛུགས་སྐྲུན་ཉུང་ཙམ། སྲུང་སྐྱོབ་མང་ཙམ་བྱས་ཏེ། རང་བྱུང་ཁོར་ཡུག་དང་མི་ཆོས་རིག་གནས་བཅས་ལ་གནོད་འཚེ་མ་ཕོག་པ་ཞིག་བྱ་རྒྱུ་ནི་ཁེ་ལས་ཁང་དེའི་ཐོག་མཐའ་བར་གསུམ་དུ་རྒྱུན་འཁྱོངས་བྱེད་དགོས་པའི་རྩ་དོན་ཡིན་ལ། རྒྱལ་ཁབ་ཀྱི་རིམ་པ་དང་པོའི་མཛེས་ལྗོངས་ཁུལ་གྱི་མིང་གནས་ལེན་པར་བརྩོན་ལེན་བྱེད་བཞིན་ཡོད་སྐོར་བརྗོད་འདུག
གསར་འགོད་པ། པདྨ་མཚོ།
