བློ་བཟང་སྨོན་ལམ་ལགས་ཀྱིས་གསར་ཐོན་བཅས་དངོས་རྩིས་འཕྲུལ་འདི་རིགས་ང་ཚོའི་སྤྱི་ཚོགས་འཚོ་བའི་ནང་ཧ་ཅང་གལ་ཆེན་པོ་ཆགས་ཀྱི་ཡོད་སྟབས་ང་ཚོས་དེའི་སྐོར་གྱི་རིག་གནས་ཤེས་བྱ་སྦྱོང་རྒྱུ་གལ་ཆེན་པོ་ཡིན་ཟེར།
དེ་རིང་སྔ་དྲོའི་ཆུ་ཚོད་ ༡༢།༣༠ སྟེང་ལྷ་སྤྱི་ཚོགས་ཞབས་ཞུ་དང་ཤེས་ཡོན་ལྟེ་གནས་ཁང་གི་ཚོགས་ཁང་དུ་<<གློག་ཀླད་ཚན་རྩལ་>>ཞེས་པའི་དཔེ་དེབ་ཅིག་དཔར་བསྐྲུན་དབུ་འབྱེད་གནང་སོང་ལ། སྐུ་མགྲོན་གཙོ་བོར་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་འགན་འཛིན་བློ་བཟང་སྨོན་ལམ་ལགས་ཕེབས་འདུག
མཛད་སྒོའི་ཐོག་མར་ལྷ་སྤྱི་ཚོགས་ཞབས་ཞུ་དང་ཤེས་ཡོན་ལྟེ་གནས་ཁང་གི་དྲ་ཚིགས་ཇུས་འགོད་པ་སངས་རྒྱས་རྡོ་རྗེ་ལགས་ནས་ཁོས་ཕྱོགས་སྒྲིག་གནང་བའི་<<གློག་ཀླད་ཚན་རྩལ་>>ཞེས་པའི་ཆེད་དེབ་དེའི་སྐོར་ངོ་སྤྲོད་གནང་རྗེས། སྐུ་མགྲོན་གཙོ་བོ་བློ་བཟང་སྨོན་ལམ་ལགས་ཀྱིས། ད་ལྟའི་དུས་རབས་ཉེར་གཅིག་པའི་ནང་ཚན་རྩལ་རིག་གནས་དང་འབྲེལ་བའི་ཐོན་རྫས་གསར་བ་མང་པོ་འཕེལ་བཞིན་ཡོད་སྟབས། མི་ཚང་མ་དེའི་ནང་འཁོར་བསྡད་ཡོད་པ་རེད། དཔེར་ན། ཕྱི་ལོ་ ༢༠༡༣ ལོར་སྡོམ་རྩིས་བྱས་པ་ལྟར་ན། འཛམ་གླིང་སྒང་འདིར་གསར་ཐོན་དངོས་པོ་མི་གྲངས་ལས་བརྒལ་ཏེ། དངོས་ཟོག་ཐོན་གཉེར་ཁང་མང་པོས་བཟོ་བསྐྲུན་བྱས་པའི་ཁ་པར་ལྟ་བུ་ཡིན་ན། མི་གྲངས་ ༡༠༠ ནང་ཁ་པར་ ༩༧ ཟིན་གྱི་ཡོད་འདུག དེ་བཞིན། ང་ཚོ་བོད་པ་ཡིན་ནའང་མི་གྲངས་ ༡༠༠ ནང་ཁ་པར་དགུ་བཅུ་གོ་གྲངས་ཤིག་ཡོད་ཀྱི་རེད།
སྤྱིར་བཏང་ཀློག་གླད་དང་ཁ་པར་སོགས་གསར་ཐོན་བཅས་དངོས་རྩིས་འཕྲུལ་འདི་རིགས་ང་ཚོའི་སྤྱི་ཚོགས་འཚོ་བའི་ནང་ཧ་ཅང་གལ་ཆེན་པོ་ཆགས་ཀྱི་ཡོད་སྟབས། ང་ཚོས་དེའི་སྐོར་གྱི་རིག་གནས་ཤེས་བྱ་སྦྱོང་རྒྱུ་གལ་ཆེན་པོ་རེད་ལ། དེ་ཡང་གཙོ་བོ་སློབ་གསོའི་ལྟེ་གནས་སློབ་གྲྭ་ཁག་ནང་ངེས་པར་དུ་དེང་གི་ཚན་རྩལ་རིག་པའི་ཤེས་ཡོན་སློབ་གསོ་གཏན་འབེབས་དང་། སློབ་གཉེར་གནང་དགོས་ཀྱི་ཡོད་པ་རེད། ང་ཚོར་དེ་འདྲ་མེད་པའི་རྐྱེན་གྱིས་གཞུང་སྒེར་གང་ཡིན་ཡང་ལས་ཀ་མང་པོ་ཞིག་གི་ཐོག་དཀའ་ངལ་འཕྲད་ཀྱི་ཡོད་རེད། མགོ་སེར་ཚོ་ཡིན་ན་དང་ཐོག་ཞྭ་མོ་དཀར་པོ་གོན་པ་དང་རྗེས་སུ་ཞྭ་མོ་ནག་པོ་གོན་པ་རེད། བོད་པ་ཚོ་ཡིན་ན་དང་ཐོག་ཞྭ་མོ་ནག་པོ་གོན་པ་དང་དེའི་རྗེས་ཞྭ་མོ་དཀར་པོ་གོན་པ་རེད་ཅེས་པའི་བཤད་སྲོལ་ཞིག་འདུག་ཅིང་། དེའི་གོ་དོན་ནི་མགོ་སེར་ཚོས་དང་ཐོག་ཟ་ཁང་ལས་ཀ་ལས་ཞོར་དུ་སློབ་གཉེར་གནང་རྗེས་གཙུག་ལག་རམ་འབྱོམས་པའི་ཞྭ་ནག་པོ་དེ་གོན་པ་དང་། བོད་པ་ཚོས་དང་ཐོག་གཙུག་ལག་རམ་འབྱམས་པའི་ཞྭ་ནག་པོ་དེ་གོན་དང་རྗེས་སུ་ཟ་ཁང་གི་ལས་ཀ་བྱེད་ཀྱི་ཡོད་པར་བཤད་པ་རེད། དེ་དངོས་གནས་འདྲ་བོ་འདུག སྤྱིར་སློབ་སྦྱོང་མ་ཤེས་ན་ནི་མི་སྐྱོན་མོད་མོད། སློབ་སྦྱོང་ཡོད་པའི་བོད་མི་བརྒྱ་ཆ་ ༨༠ ཕྱི་རྒྱལ་དུ་འགྲོ་རྒྱུར་སྔམ་དྲགས་པ་དང་། ཕྱི་རྒྱལ་དུ་ཐོན་དུས་སོ་སོའི་སློབ་སྦྱོང་གང་ཡོད་བརྟེན་ནས་ཟ་ཁང་གི་ལས་གཡོག་ལྟ་བུ་ཞོར་ལས་བྱེད་ཀྱིན་ཡོད་པ་རེད། དེར་བརྟེན། གོང་དུ་བཤད་པའི་ཞྭ་མོ་དཀར་པོ་གྱོན་པའི་བཤད་རྒྱུན་དེ་བདེན་པ་འདྲ་ཞིག་ཆགས་ཀྱི་ཡོད་པ་རེད། དེ་བས་ང་ཚོ་མི་སུ་དང་སུ་ཡིན་ཡང་། སོ་སོའི་མི་ཚེ་དམིགས་འདུན་དང་དགའ་ཕྱོགས་གང་ཡིན་པ་དེ་ཅིས་ཀྱང་རྒྱུན་འཁྱོངས་གནང་རྒྱུ་གལ་ཆེན་པོ་རེད། ཅེས་སོགས་བརྗོད་སོང་།
མཇུག་ཏུ། སངས་རྒྱས་རྡོ་རྗེ་ལགས་ཀྱིས་གསར་འགོད་པར་བརྗོད་དོན། ངས་ཕྱོགས་བསྒྲིགས་བྱས་པའི་དཔེ་དེབ་འདིའི་ནང་དྲ་ཚིགས་ཀྱི་སྤྱི་ཤེས་དང་། དྲ་ཚིགས་བཟོ་སྟངས་ངོ་སྤྲོད། གློག་ཀླད་ཀྱི་སྤྱི་ཤེས། སྤྱི་བཏང་གི་ཤེས་བྱ། གློག་ཀླད་དང་འབྲེལ་བའི་མིང་ཚིག་ཅེས་ས་བཅད་ལྔ་ཡོད་ཅིང་། དེའི་ནང་ནས་གཙོ་བོ་དེ་དྲ་གནས་མིང་བྱང་གི་སྐོར་ཡིན་པ་དང་། ངས་ད་ལྟའི་བར་ཁྱོན་དྲ་ཚིགས་ ༢༠ ལྷག་ཇུས་འགོད་བྱས་མྱོང་ཡོད་ལ། མ་འོངས་པར་མུ་མཐུད་རང་གི་དགའ་མོས་ལྟར་རང་རེའི་སྤྱི་ཚོགས་ནང་རྩིས་འཕྲུལ་དང་དྲ་ཚིགས་རིག་གནས་ཤེས་བྱའི་ཐད་ནས་ཞབས་འདེགས་ཞུ་འདོད་ཡོད་སྐོར་བརྗོད་སོང་།
<<གློག་ཀླད་ཚན་རྩལ་>>ཞེས་པའི་དཔེ་དེབ་འདིའི་ནང་ས་བཅད་ ༥ དང་། ལེའུ་ཚན་ ༡༣༦ དང་ཤོས་ངོས་ ༡༤༤ གྲུབ་པའི་གློག་ཀླད་ཀྱི་སྤྱི་ཤེས་དང་དྲ་ཚིགས་བཟོ་སྟངས་སྐོར་གྱི་དཔེ་དེབ་ཅིག་ཡིན་ཞིང་། རྩོམ་པ་པོ་སངས་རྒྱས་རྡོ་རྗེ་ལགས་ཀྱིས་འདས་པའི་མི་ལོ་ཁ་ཤས་རིང་བསགས་པའི་རང་ཉིད་ཀྱི་ཉམས་མྱོང་རྣམས་ལས་ཞོར་ཡིག་ཐོག་ཏུ་འཁོད་དེ་དཔར་དུ་བསྐྲུན་པ་ཞིག་ཡིན་འདུག
གསར་འགོད་པ། པདྨ་རྒྱལ།
དུས་རབས་ཀྱི་འགྲོས་དང་མཐུན་ཞིང་ད་ལྟའི་སྤྱི་ཚོགས་ཀྱི་འཚོ་བ་དང་བར་ཐག་ཧ་ཅང་ཉེ་བའི་དེབ་འདི་འདྲ་ཞིག་བྲིས་པར་ཐུགས་རྗེ་ཆེ་དང་འཚམས་འདྲི་བཀྲིས་བདེ་ལགས་གྲངས་མེད་ཞུ། དེབ་འདི་གང་ནས་རག་གི་ཡོད་མེད་ཤེས་མཁན་རེ་ཡོད་ན་ངོ་སྤྲོད་རེ་གནང་རོགས་ ཤིན་ཏུ་བཀླག་སྙིང་འདོད་ ཁ་དྲོ་
སྐུ་ཞབས་སངས་རྒྱས་རྡོ་རྗེ་ལགས་ལ་་་རྗེས་སུ་ཡི་རང་དང་འཚམས་འདྲིའི་བཀྲིས་བདེ་ལེགས་ཡོད། རིང་མིན་ཁོང་གི་དཔེ་དེབ་དེ་མཇལ་བའི་རེ་བ་བཅངས་ཏེ་ཡོད།།
དཔེ་དེབ་འདི་ནི་་་བརྡ་འཕྲིན་དང་ཚན་རྩལ་ཆེས་ཆེར་བདོ་བའི་དེང་གི་དུས་སུ་ལེགས་སྐྱེས་ཤིག་ཡིན་པ་སྨྲོས་མེད་རེད།། བཀྲིས་བདེ་ལེཊ།།