ཁ་སང་ཨ་རིའི་ཕོ་བྲང་དཀར་པོ་རུ་བོད་མིའི་སྐྱབས་མགོན་༧གོང་ས་མཆོག་དང་ཨ་རིའི་སྲིད་འཛིན་ཨོ་བྷ་མ་རྣམ་གཉིས་མཇལ་འཕྲད་གནང་རྗེས་ཨ་རིའི་ཕོ་བྲང་དཀར་པོའི་ངོས་ནས་གསལ་བསྒྲགས་ཤིག་སྤེལ་ཏེ། ཨ་རིའི་གཞུང་གིས་བོད་རང་བཙན་ལ་རྒྱབ་སྐྱོར་བྱེད་ཀྱི་མེད་པར། བོད་དེ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཆ་ཤས་ཤིག་ཡིན་པའི་ལངས་ཕྱོགས་བཟུང་ཡོད་པ་དང་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་ཡོད་སྐོར་སོགས་འཁོད་འདུག
ཁ་སང་སྔ་དྲོའི་ཆུ་ཚོད་ ༡༠།༡༨ སྟེང་བོད་མིའི་སྐྱབས་མགོན་༧གོང་ས་མཆོག་དང་ཨ་རིའི་སྲིད་འཛིན་ཨོ་བྷ་མ་རྣམ་གཉིས་ཕོ་བྲང་དཀར་པོའི་ནང་ཆུ་ཚོད་ཕྱེད་ཀའི་རིང་མཇལ་འཕྲད་བཀའ་མོལ་གནང་བའི་རྗེས་ལ། ཨ་རིའི་ཕོ་བྲང་དཀར་པོས་གསལ་བསྒྲགས་ཤིག་སྤེལ་ཡོད་པ་འདིར་བོད་བསྒྱུར་ཞུས་ཡོད། “ སྲིད་འཛིན་ཨོ་བྷ་མས་༧གོང་ས་ཏཱ་ལའི་བླ་མ་མཆོག་གིས་ཟླ་ ༦ ཚེས་ ༡༢ ཉིན་ཨོར་ལན་ཊོ་ནང་བྱུང་བའི་མི་གསོད་དོན་རྐྱེན་ལ་ཐུགས་གསོ་གནང་རྒྱུ་དང་ལེན་གནང་བ་དང་། སྲིད་འཛིན་ཨོ་བྷ་མས་༧གོང་ས་ཏཱ་ལའི་བླ་མ་མཆོག་གི་བསམ་ཤེས་གུས་བརྩི་དང་བྱམས་བརྩེ་གོང་སྤེལ་གྱི་འབད་བརྩོན་ལ་བསྔགས་བརྗོད་ཡི་རངས་གནང་བ་རེད། ༧གོང་ས་ཏཱ་ལའི་བླ་མ་དང་སྲིད་འཛིན་ཨོ་བྷ་མ་རྣམ་གཉིས་ནས་རྒྱ་ནག་མི་དམངས་སྤྱིན་མཐུན་རྒྱལ་ཁབ་ནང་གི་བོད་མིའི་གནས་སྟངས་ཐད་བཀའ་མོལ་གནང་བ་དང་། སྲིད་འཛིན་ཨོ་བྷ་མས་བོད་མིའི་ཐུན་མོང་མ་ཡིན་པའི་ཆོས་ལུགས་རིག་གཞུང་དང་སྐད་ཡིག་རིག་གནས་མི་ཉམས་རྒྱུན་འཛིན་དང་། རྒྱ་ནང་གི་བོད་མིའི་འགྲོ་བ་མིའི་ཐོབ་ཐང་སྲུང་སྐྱོང་བཅས་ཀྱི་ཐད་ལ་རྒྱབ་སྐྱོར་ཤུགས་ཆེན་གནང་ཡོད་པ་དང་། སྲིད་འཛིན་ཨོ་བྷ་མས་༧གོང་ས་ཏཱ་ལའི་བླ་མས་བཏོན་པའི་འཚེ་མེད་ཞི་བདེ་དང་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་ཡོད་སྐོར་བརྗོད་ཡོད་པ་རེད།
སྲིད་འཛིན་ཨོ་བྷ་མས་བོད་རྒྱའི་དཀའ་རྙོག་སེལ་ཐབས་སུ་རྒྱ་ནག་གི་དབང་འཛིན་དཔོན་རིགས་ཚོས་དོགས་གཞིའི་དངངས་འཚབ་ཉུང་དུ་བཏང་སྟེ། ཏཱ་ལའི་བླ་མ་དང་ཁོང་གི་སྐུ་ཚབ་ལྷན་དུ་མང་དོན་མཚུངས་པའི་འབྲེལ་མོལ་ཡོང་ཐབས་སུ་རེ་སྐུལ་ཞུས་ཡོད་པ་དང་། དེ་བཞིན། སྲིད་འཛིན་ཨོ་བྷ་མས་ཨ་རིའི་གཞུང་ནས་བོད་རང་བཙན་ལ་རྒྱབ་སྐྱོར་གནང་གི་མེད་པར། བོད་དེ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཆ་ཤས་ཡིན་པའི་ལངས་ཕྱོགས་རྒྱུན་འཁྱོང་བྱེད་ཀྱིན་ཡོད་པ་ནན་གྱིས་བརྗོད་ཡོད་པ་དང་། ༧གོང་ས་ཏཱ་ལའི་བླ་མ་མཆོག་ནས་ཁོང་གིས་བོད་རང་བཙན་རྩོད་ཀྱི་མེད་པར་རྒྱ་ནག་གཞུང་དང་ཁོང་གི་སྐུ་ཚབ་གཉིས་དབར་གྱི་འབྲེལ་མོལ་བསྐྱར་གསོ་ཡོང་བའི་རེ་བ་གནང་གི་ཡོད་སྐོར་གསུངས་ཡོད་པ་རེད།
༧གོང་ས་ཏཱ་ལའི་བླ་མ་དང་སྲིད་འཛིན་ཨོ་བྷ་མ་རྣམ་གཉིས་ནས་ཨ་རྒྱ་གཉིས་བར་གྱི་འབྲེལ་ལམ་ཡར་རྒྱས་དང་མཐུན་འགྲིག་ཡོང་བའི་གལ་ཆེན་རང་བཞིན་ཐད་མོས་མཐུན་གནང་ཡོད།
སྲིད་འཛིན་ཨོ་བྷ་མས་དེང་གི་གནམ་གཤིས་འགྱུར་ལྡོག་གི་དཀའ་རྙོག་ཐད་༧གོང་ས་མཆོག་གིས་དབུ་ཁྲིད་གནང་བཞིན་པའི་ངོས་འཛིན་གྱི་ཐོག་ནས། ༧གོང་ས་ཏཱ་ལའི་བླ་མས་གོ་ལའི་ཚ་དྲོད་ཉུང་དུ་གཏང་ཕྱོགས་དང་། ཧི་མ་ལ་ཡའི་གངས་རི་དང་བོད་མཐོ་སྒང་གི་རང་བྱུང་ཁོར་ཡུག་སྲུང་སྐྱོབ་བཅས་ཀྱི་གོ་རྟོགས་སྤེལ་ཐབས་སུ་འབད་བརྩོན་གནང་བཞིན་ཡོད་པར་རྒྱབ་སྐྱོར་ཡོད་སྐོར་བརྗོད་ཡོད་པ་རེད།” ཅེས་འཁོད་འདུག
གཞན། དེ་རིང་ནེའུ་ཡོག་དུས་གསར་ཁང་གིས་སྤེལ་བའི་གནས་ཚུལ་ནང་། ཨ་རིའི་སྲིད་འཛིན་ཨོ་བྷ་མ་དང་༧གོང་ས་ཏཱ་ལའི་བླ་མ་རྣམ་གཉིས་ཨ་རིའི་ཕོ་བྲང་དཀར་པོའི་ནང་མཇལ་འཕྲད་གནང་རྒྱུའི་ཐད། པེ་ཅིན་གཞུང་གིས་ཕྱིའི་རྒྱལ་ཁབ་ཀྱི་དབུ་ཁྲིད་ཚོ་༧གོང་ས་ཏཱ་ལའི་བླ་མར་མཇལ་འཕྲད་མི་ཆོག་པའི་གནོན་ཤུགས་སྤྲད་དེ། ༧གོང་ས་ཏཱ་ལའི་བླ་མས་བོད་རང་བཙན་རྩོད་བཞིན་ཡོད་ལུགས་བརྗོད་ཡོད། ༧གོང་ས་ཏཱ་ལའི་བླ་མས་བོད་དང་བོད་མིའི་ངོ་བོ་སྲུང་སྐྱོབ་གནང་འདོད་ཡོད་སྐོར་གསུང་གི་ཡོད་པ་རེད། རེས་གཟའ་ལྷག་པའི་ཉིན་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ལ་ཁཱང་གིས་བོད་ཀྱི་ལས་དོན་དེ་རྒྱ་ནག་ནང་ཁུལ་གྱི་གནད་དོན་ཞིག་ཡིན་སྟབས། ཕྱིའི་རྒྱལ་ཁབ་ཁག་གིས་ཐེ་ཇུས་བྱེད་པའི་ཐོབ་ཐང་མེད། ཏཱ་ལའི་བླ་མས་ཆོས་གོས་གྱོན་ནས་རྒྱལ་སྤྱིའི་སྡིངས་ཆའི་སྟེང་དུས་ཡུན་བོར་རྒྱ་ནག་ཁ་བྲལ་གཏོང་བའི་ལས་འགུལ་སྣེ་འཁྲིད་བྱེད་ཀྱིན་ཡོད་པ་རེད་ཅེས་བཤད་ཡོད་སྐོར་འཁོད་འདུག
གནས་ཚུལ་འདིའི་ནང་མུ་མཐུད་དུ། པེ་ཅིན་གཞུང་གི་འཁོན་ལན་ལ་ཞེད་དེ་ཕྱིའི་རྒྱལ་ཁབ་ཁག་གི་དབུ་ཁྲིད་ཚོ་༧གོང་ས་ཏཱ་ལའི་བླ་མར་མཇལ་འཕྲད་མཁན་ཇེ་ཉུང་ལ་འགྲོ་བཞིན་ཡོད། ཕྱི་ལོ་ ༢༠༡༢ ལོར་དབྱིན་ཇིའི་སྲིད་བློན་ཁ་མི་རོན་ (Cameron) ༧གོང་ས་ཏཱ་ལའི་བླ་མར་ཐུག་འཕྲད་བྱས་རྗེས། རྒྱ་ནག་གིས་དབྱིན་གཞུང་ལ་ངོ་རྒོལ་དང་གཞུང་འབྲེལ་སྐོར་སྐྱོད་ཕྱིར་འཐེན་བྱས་ཡོད་པ་དང་། དེ་ནས་ལོ་གསུམ་རྗེས་སུ་༧གོང་ས་ཏཱ་ལའི་བླ་མ་མཆོག་ཡང་བསྐྱར་དབྱིན་ཡུལ་དུ་སྐྱོད་སྐབས། སྐུ་ཞབས་ཁ་མི་རོན་ཁོང་དང་མཇལ་འཕྲད་གནང་རྒྱུར་གཡོལ་བ་རེད། ༧གོང་ས་ཏཱ་ལའི་བླ་མ་མཆོག་གིས་དེ་ནི་དབྱིན་རྒྱ་གཉིས་བར་གྱི་ཚོང་འབྲེལ་ཐོག་གི་སེམས་ཁྲལ་ཞིག་ཆགས་པའི་དགོངས་ཚུལ་བཏོན་པ་རེད། ཡིན་ནའང་ཕོ་བྲང་དཀར་པོའི་ངོས་ནས་གནད་དོན་དེ་དག་ལ་མ་ལྟོས་པར། ཨ་རིའི་གཞུང་གི་དཔོན་རིགས་ཚོ་མུ་མཐུད་དུ་༧གོང་ས་ཏཱ་ལའི་བླ་མར་མཇལ་འཕྲད་གནང་བཞིན་ཡོད། སྐུ་ཞབས་ཨོ་བྷ་མས་སྲིད་དབང་འཁུར་ཡུན་རིང་ཁོ་རྒྱུ་མཚན་དུ་མའི་ཐོག་ནས་༧གོང་ས་ཏཱ་ལའི་བླ་མར་མཇལ་འཕྲད་གནང་ཡོད་པ་དང་། ལྷག་པར་དུ་ཕྱི་ལོ་ ༢༠༡༤ ནང་མཇལ་འཕྲད་གནང་བ་རེད། སྤྱིར་བཏང་གཞུང་ཐོག་ནས་སྲིད་འཛིན་ཨོ་བྷ་མ་དང་༧གོང་ས་ལ་ཏཱ་ལའི་བླ་མ་མཆོག་གཉིས་མཇལ་འཕྲད་གནང་མེད་ནའང་། ཕྱི་ལོ་ ༢༠༡༥ ལོར་རྒྱལ་ཝ་ཤིན་ཊོན་དུ་ཚུགས་པའི་རྒྱལ་ཡོངས་གསོལ་འདེབས་ཞོགས་ཟས་ (National Prayer Breakfast) སྟེང་ཁོང་རྣམ་པ་གཉིས་མཉམ་ཞུགས་གནང་ཡོད་པ་རེད། ཐེངས་སྔོན་མའི་ཐུག་འཕྲད་སྐབས། ཕོ་བྲང་དཀར་པོའི་པར་བ་མ་གཏོགས་རྒྱལ་སྤྱིའི་གསར་འགོད་པར་མཇལ་འཕྲད་སྐོར་གྱི་གནས་ཚུལ་དང་ཐ་ན་པར་ཡང་ལེན་དུ་བཅུག་མེད།
ཕོ་བྲང་དཀར་པོའི་གསར་འགོད་ཚོགས་དྲུང་ཨེར་ནེ་སི་ཊི་ (Earnest) ཡིས་སྐབས་དེའི་མཇལ་འཕྲད་ནི་གཞུང་འབྲེལ་མ་ཡིན་པའི་མཇལ་འཕྲད་ཅིག་ཡིན་པ་དང་། སྲིད་འཛིན་ཨོ་བྷ་མ་སྒེར་ངོས་ནས་༧གོང་ས་ཏཱ་ལའི་བླ་མ་དང་ཁོང་གི་གསུང་ཆོས་ལ་མོས་གུས་ཆེ་ཞིང་། སྲིད་འཛིན་ཨོ་བྷ་མས་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་། སྐད་ཡིག་རིག་གནས་མི་ཉམས་རྒྱུད་འཛིན་ཐད་རྒྱབ་སྐྱོར་གནང་གི་ཡོད་སྟབས། ཁོང་ཐེངས་འདིར་ཏཱ་ལའི་བླ་མ་དང་མཇལ་འཕྲད་གནང་བ་རེད།
དེ་སྔོན་༧གོང་ས་མཆོག་གི་སྐོར་སྐྱོད་སྐབས་སུ་ཨ་རིའི་གཞུང་གིས་བོད་ཐོག་འཛིན་པའི་སྲིད་ཇུས་ལ་འགྱུར་བ་གང་ཡང་ཕྱིན་མེད་དེ། ཨ་རིའི་གཞུང་གིས་བོད་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཆ་ཤས་ཡིན་པའི་སྲིད་ཇུས་རྒྱུན་འཁྱོངས་གནང་གི་ཡོད་པ་ལས། ཨ་རིའི་གཞུང་ནས་བོད་རང་བཙན་ལ་རྒྱབ་སྐྱོར་གནང་གི་མེད་སྐོར་བརྗོད་ཡོད་པ་རེད། ཅེས་སོགས་འཁོད་འདུག
དེ་རིང་ཡ་ཧོ་གསར་ལམ་དུ་ཐོན་པའི་གནས་ཚུལ་ཞིག་གི་ནང་། རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ལུ་ཁང་གིས་ཨ་རིའི་དབུ་ཁྲིད་ཚོས་བོད་རང་བཙན་ལ་རྒྱབ་སྐྱོར་བྱེད་ཀྱི་མེད་པ་དང་ཁ་བྲལ་བའི་ལས་འགུལ་ལ་རྒྱབ་སྐྱོར་གནང་གི་མེད་པ་སོགས་ལམ་ཁ་ག་རེ་ཐོག་ནས་ཏཱ་ལའི་བླ་མར་མཇལ་འཕྲད་བྱས་ནའང་། དེས་ཨ་རིའི་གཞུང་གིས་བོད་རྒྱ་ནག་གི་ཆ་ཤས་ཡིན་པའི་ཁ་དན་རྡོག་རོལ་བཏང་བ་རེད་ལ། དེས་ཨ་རྒྱའི་ཐུན་མོང་གི་ཁེ་ཕན་དང་མཉམ་ལས་ཐད་དོ་ཕོག་བཟོ་ངེས་རེད་ཅེས་དང་། ད་རེབ་ཀྱི་མཇལ་འཕྲད་འདི་ནི་༧གོང་ས་མཆོག་དང་སྲིད་འཛིན་ཨོ་བྷ་མ་རྣམ་གཉིས་བར་གྱི་མཇལ་འཕྲད་ཐེངས་བཞི་བ་དེ་ཆགས་ཀྱི་ཡོད་སྐོར་སོགས་འཁོད་འདུག
གསར་འགོད་པ། པདྨ་རྒྱལ་གྱིས་བསྒྱུར་སྒྲིག་བྱས།
