གྲོགས་པོ་རེད། ཟ་མ་མ་རེད།

༼ ཅི་ཕྱིར་རྒྱ་ནག་གིས་ཁྱི་ཤའི་དུས་སྟོན་མཚམས་འཇོག་བྱ་འདོད་བྱེད་ཀྱི་ཡོད་དམ། ༽

ཨེ་ཌེམ་(Adam)གྱིས་དབྱིན་ཡིག་ནང་བརྩམས།
ལ་དྭགས་ནས་འགྱུར་མེད་ཚེ་རིང་གིས་བསྒྱུར།

ལོ་ལྟར་དབྱར་གྱི་ཉི་མ་ལྡོག་པའི་ཚེ། རྒྱ་ནག་ཤར་ལྷོའི་ཕྱོགས་སུ་ཡོད་པའི་ཡུ་ལིན་(Yulin)གྱི་མི་ཚོས། ཁྱི་ཤ་ཚོང་མཁན་རྣམས་ཀྱིས་ཁྱི་ཤའི་ཁྲོམ་ར་ཁྱབ་གདལ་ཡོང་བའི་དོན་དུ་དུས་སྟོན་གོ་སྒྲིག་བྱེད་པ་དེར་མཉམ་ཞུགས་བྱེད་ཀྱི་ཡོད། ད་ཆ་ཁྱི་ཤའི་ཁྲོམ་ར་དེ་ཉིད་གཞི་རྒྱ་ཆུང་དུ་འགྲོ་ཡི་ཡོད་པ་དེས། རྒྱ་མི་མང་པོར་བློ་བཟོད་མི་བདེ་བ་ཆགས་ཡོད།།

རིགས་རྒྱུད་དང་ཆེ་ཆུང་སྣ་ཚོགས་ཅན་གྱི་ཁྱི་མང་པོ་ཤིན་ཏུ་ཆུང་བའི་གཟེབ་ཏུ་བཅུག་པ་དང་། གསོད་དུས་གཅར་རྡུང་བྱེད་པའི་བརྙན་པར་སྐྱི་གཡའ་བ་མང་དག་ཅིག་ཡུ་ལིན་(Yulin)ནས་ཕྱི་ཕྱོགས་སུ་དེང་དུས་འཐོན་བཞིན་ཡོད་པ་དེ་དག་ནི། རྒྱལ་སྤྱིའི་འགྲོ་ལུགས་དང་མི་མཐུན་པ་ཆགས་ཀྱི་ཡོད་པ་དེ་ས་གནས་སྲིད་གཞུང་གིས་མཁྱེན་རྟོགས་མེད་པ་ཞིག་ཆགས་ཡོད།

ཁྱི་དེ་དག་ནི་རྒྱ་མི་ཉུང་ཤས་ཤིག་དང་། འཛམ་གླིང་ནང་མི་གྲངས་ས་ཡ་མང་པོའི་གྲོགས་པོ་དང་། མཉམ་དུ་འགྲོ་འདུག་བྱེད་མཁན་གྱི་སེམས་ཅན་ཞིག་ཡིན་པ་ལས། བཟའ་རྒྱུ་ཞིག་དང་ཚུལ་མིན་མཐོང་ཆུང་བྱེད་ས་ཞིག་ནམ་ཡང་མིན། རོགས་སྐྱོར་བྱེད་མི་ཞིག་གིས། ཡུ་ལིན་(Yulin)ས་གནས་སྲིད་གཞུང་གིས་རང་ཉིད་འདི་ལྟར་འཇིགས་སུ་རུང་བའི་ངང་ཚུལ་དེ་དང་ཐག་རིང་ལ་གནས་ཐབས་ཆེད། ཁྱི་བཤའ་རྒྱུ་དང་ཁྱི་ཤ་འཚོང་བའི་བྱ་བ་མང་ཆེ་བ་ཁང་པའི་སྦུག་དང་། མཚན་མོའི་དུས་སུ་བྱེད་ཀྱི་འདུག་ཅེས་བཤད། འོན་ཀྱང་ད་དུས་ཡུ་ལིན་(Yulin)ས་གནས་སྲིད་གཞུང་གིས་སྔར་ལས་ལྷག་པའི་ཁྱི་ཤའི་དུས་སྟོན་རྩ་བ་ནས་མེད་པར་བཟོ་རྒྱུར་གོམ་པ་མདུན་སྤོས་བྱ་དགོས་པ་འགྱུར་ཡོད།།

ཁྱི་བཤའ་སའི་ཁང་པའི་ནང་ལ་ཁྱི་རེ་རེའི་མྱངས་དང་མྱོང་བཞིན་པའི་སྡུག་བསྔལ་དེ། གཞན་ཞིག་ལ་བརྗོད་རྒྱུར་ཤིན་ཏུ་དཀའ་བའི་གནས་ཤིག་རེད། ང་སྔ་ལོ་ཡུ་ལིན་(Yulin)ལ་ཕྱིན། ཁྱི་ཤའི་ཁྲོམ་རར་བསྐྱོད། རྒྱུན་གཏན་མཚན་གྱི་དགུང་ལ་སྐྱི་གཡའ་བའི་ཁྱི་བཤའ་སའི་ཁང་པར་གནས་ཚུལ་ལ་བརྟག་ཞིབ་བྱས། ཁྱི་རྣམས་ནི་སྐྱབས་མེད་མགོན་མེད་དང་། ནད་ཀྱིས་མནར་བ། ངལ་ཞིང་དུབ་པ། བཀྲེས་ཤིང་སྐོམ་པ་ཤ་སྟག་རེད། དེ་དག་བཤའ་བའི་སྔ་རོལ་དུ་དབྱེ་འབྱེད་མེད་པར་གཅར་རྡུང་བྱེད།

ཁྱི་ཁ་ཤས་ཀྱི་སྐེ་ལ་སྐེ་ཐག་དཀྲིས་ནས་ཡོད། དེ་ནི་གཞན་གྱི་གཅེས་ཉར་བྱེད་པའི་ཁྱི་ཡིན་འདུག དེ་ཚོ་རང་གི་སྡོད་གནས་དང་ཁ་ཐག་རིང་པོར་གྱུར། རྒྱུན་དུ་རང་གི་བློ་ཡིད་ཚིམས་པར་བྱེད་པ་དང་བརྩེ་ཞིང་སྐྱོང་བར་བྱེད་པའི་མིའམ། མཉམ་དུ་འགྲོ་འདུག་བྱེད་རོགས་ཀྱི་གྲོགས་དང་བྲལ། དེ་དག་ནི་ངས་ཡིད་ལ་རང་དབང་མེད་པར་འཁོར་བའི་བག་ཆགས་ཤིག་ཡིན།།

ཡིད་སྐྱོ་དགོས་པ་ཞིག་ལ། འདི་ལྟ་བུའི་སྣང་བརྙན་དེ་ཁྱི་ཤའི་ཁྲོམ་ར་ཕལ་ཆེ་བར་ཡོད། ཡུ་ལིན་(Yulin)ནི་རྒྱ་ནག་ཁྱི་ཤའི་ཁྲོམ་རའི་ཁྲོད་ཀྱི་ཆ་ཤས་ཆུང་ཆུང་ཞིག་ལས་མཚོན་གྱི་མེད། ཕྱི་ལོ་ ༢༠༡༤ ལོའི་ཁྱི་ཤའི་ཚོང་ལས་ཚན་པའི་སྙན་ཐོ་ལྟར་ན། ལོ་ལྟར་ལོ་རེ་རེའི་ནང་རྒྱ་ནག་གཅིག་པུའི་ནང་ཁྱི་ས་ཡ་བཅུ་བཤས་ཀྱི་ཡོད་པ་བརྗོད་ཡོད།།

རྒྱལ་ཁབ་མཐའ་དག་གི་ནང་ལ་ཁྱི་ཤ་བཀོལ་སྤྱོད་བྱེད་ཀྱི་ཡོད། འོན་ཀྱང་ས་ཁྱོན་ཡངས་པའི་རྒྱ་ནག་གི་རྒྱལ་ཁབ་ནང་། ཁྱི་ཤའི་ཚོང་ལས་གཉེར་སྟངས་ནི་གདུག་རྩུབ་ཀྱི་རང་བཞིན་ཆེ་བ་ཞིག་རེད། ཁྱི་རྣམས་བཤའ་ར་བར་མི་ལི་སྟོང་ཕྲག་མང་པོར་འོར་འདྲེན་བྱེད་རིང་། ཚ་གདུང་དང་མནར་གཅོད་ཡང་ཡང་མྱོང་དགོས་པ་དང་། འགྲུལ་བསྐྱོད་མཐོང་ཆེན་མེད་པའི་དོས་སྐྱེལ་རླངས་འཁོར་རེ་རེས་ཁྱི་བརྒྱ་ཕྲག་ཁ་ཤས་ཤིན་ཏུ་ཆུང་བའི་ལྕགས་སྐུད་ཀྱིས་སླས་པའི་གཟེབ་ཀྱི་ནང་ལ་འཚང་ཀ་ཤིག་ཤིག་བྱས་ནས་བླུགས་ཏེ་འོར་འདྲེན་བྱེད། སྤྱི་ཚོགས་དང་བླང་ཞབས་ཞུ་བ་མང་པོས་མཁྱེན་རྟོགས་བྱུང་བ་ལྟར་ན། འགྲུལ་ཞུགས་སྐབས་ཁ་ཟས་དང་ཆུ་མི་སྤྲོད་པ། ཁྱི་རྣམས་བཤའ་རར་འབྱོར་སྐབས་ནད་མནར་དང་རྨས་སྐྱོན་ཆགས་པ། སེམས་གཅོང་དུ་གྱུར་བའམ་ཤི་བའི་གནས་སྟངས་ཡོང་གི་ཡོད། །

འདི་ནི་སྙིང་རྗེ་བའི་ཡུལ་ཡིན་པ་ཙམ་དུ་མ་ཟད། རྒྱ་ནག་ཏུ་ཁྲིམས་དང་མི་མཐུན་པའི་གནད་དོན་ཞིག་ཀྱང་རེད། རྒྱ་ནག་གི་བཟའ་བཅའི་བདེ་འཇགས་ཀྱི་སྒྲིག་སྲོལ་ནང་། གཅོང་ནད་ཅན་གྱི་སེམས་ཅན་གྱི་ཤའི་རིགས་ཚོང་གཉེར་དང་བགོ་འགྲེམས་བྱེད་པ་དང་། ཡོང་རྐྱེན་ཆ་རྒྱུས་མེད་པའི་ཤ་ཕྱིར་བཙོང་བྱེད་པ་ནི། ཁྲིམས་ཀྱི་རྩ་དོན་དང་འགལ་བ་ཞིག་རེད། རྒྱ་ནག་དུ་ཁྱི་འོར་འདྲེན་བྱེད་པར་གཞུང་ཕྱོགས་ཀྱི་ཁྲིམས་སྲོལ་ནང་ཁྱི་རེ་རེའི་ཡོང་ཁུངས་ཇི་ཆགས་ཡིན་མིན་གྱི་མཐོང་མཆན་ལག་འཁྱེར་དགོས་པ་རེད། ད་དུང་ང་ཚོས་འགྲེལ་བརྗོད་མ་བྱས་པ་ཞིག་ནི། འོར་འདྲེན་བྱེད་པའི་ཁྱིའི་ཁྲོད་ནས་མང་པོ་ཞིག་ནི་གཞན་གྱི་གཅེས་ཉར་སེམས་ཅན་ཡིན་པར་ཡིད་ཆེས་བྱེད་ཀྱིན་ཡོད། །

དོས་སྐྱེལ་རླངས་འཁོར་ནི་ཚོང་ལས་ཀྱི་གནད་འགག་ཅིག་རེད།

རྒྱ་ནག་ནང་གི་ལས་འགུལ་སྤེལ་མཁན་མང་པོས་དོས་སྐྱེལ་རླངས་འཁོར་བཀག་འགོག་བྱ་རྒྱུ་ནི། ཚོང་ལས་དེ་ཉིད་མཚམས་འཇོག་བྱ་བྱེད་ཀྱི་ཐབས་ཤེས་ཤིག་ཡིན་པ་ཤེས་ཀྱི་ཡོད། ཁྱི་སྐྱེལ་འདྲེན་བྱེད་པའི་དོས་སྐྱེལ་རླངས་འཁོར་ཉུང་ཉུང་ཞིག་ལ་ཚད་ལྡན་གྱི་ཆོག་མཆན་ཡིག་ཆ་ཡོད་པ་ལས། གཞན་མང་དག་ཅིག་ལ་དེ་ལྟར་མེད།།

འཛིན་སྐྱོང་ཀྱིས་དོས་སྐྱེལ་རླངས་འཁོར་འགྲུལ་བཞུད་ལ་ལྟ་རྟོག་དོ་ནན་ཐུབ་ཚེ། དེས་ཁྱི་ཤའི་ཚོང་ལས་གཉེར་མཁན་ལ་འགོག་རྐྱེན་བྱུང་ནས་སྐྱེལ་འདྲེན་གྱི་བྱ་བ་འདོར་དགོས་པ་ཆགས་ཀྱི་རེད། ཐབས་བྱུས་དེ་ནི་རྒྱ་ནག་དུད་འགྲོ་སྲུང་སྐྱོབ་ཚོགས་པ། ཁྲིམས་རྩོད་པའི་དུད་འགྲོ་སྲུང་སྐྱོབ་ཚོགས་པ་དང་། རྒྱལ་སྤྱིའི་ཕན་གྲོགས་ཚོགས་པ་བཅས་མཉམ་སྦྲེལ་གྱི་སྒོ་ནས་སྤེལ་བ་ཞིག་རེད་འདུག།

གཞུང་གི་འཛིན་སྐྱོང་མི་སྣས་ལས་དོན་སྤེལ་སྐབས། རྒྱ་ནག་དུད་འགྲོ་སྲུང་སྐྱོབ་ཚོགས་པའི་དང་བླང་ཚོགས་མིས་ཀྱང་དོས་སྐྱེལ་རླངས་འཁོར་བཀག་འགོག་གི་བྱ་བར་དངོས་སུ་ཞུགས་ནས། ཁྱི་རྣམས་ལ་བཟའ་ཆས་དང་། འཐུང་ཆུ། དེ་བཞིན་ཕྱུགས་ནད་བཅོས་ཐབས་ཀྱི་མཐུན་རྐྱེན་བཅས་སྤྲོད་ཀྱི་ཡོད།།

འཛིན་སྐྱོང་དང་མཉམ་དུ་འགྲིག་འཇགས་ཀྱི་གྲོས་སྡུར་ལྷོད་མེད་བྱས་རྗེས། མཐར་དོས་སྐྱེལ་རླངས་འཁོར་གྱི་ཁ་ལོ་བས་ལས་དོན་འདི་མཚམས་འཇོག་བྱ་རྒྱུ་དང་། དང་བླང་ལས་འགུལ་སྤེལ་མཁན་གྱི་ལག་ལ་བྱུང་བའི་ཁྱི་རྣམས་ཉེན་སྲུང་འཐུས་ཚང་ལྡན་པའི་འོག དགོས་ངེས་ཀྱི་འདུག་གནས་གསར་བཟོ་དང་། སྔར་གྱི་བདག་པོ་དང་སླར་ཡང་མཉམ་འཛོམས་ཡོང་བ་བཅས་བྱས། ཕྱི་ལོ་ ༢༠༡༤ ཟླ་ ༠༨ ཚེས་ ༠༣ ནས་ད་ལྟ་བར་ཁྱོན་དོས་སྐྱེལ་རླངས་འཁོར་ ༢༢ ཙམ་དང་། ཁྱི་སྟོང་ཕྲག་བཅུ་ཙམ་ཉེན་ཁ་ལས་སྐྱོབ་ཐུབ་པ་བྱུང་ཡོད།།

རྒྱལ་སྤྱིའི་སྤྱི་ཚོགས་ནས་མི་གྲངས་ས་ཡ་བཅུ་གཅིག་གིས་འཇིགས་སུ་རུང་བའི་ཁྱི་ཤ་ཚོང་གཉེར་གྱི་ལས་དོན་མཚམས་འཇོག་དགོས་པའི་མཚན་རྟགས་བསྐྱོན་ནས། རྒྱ་ནག་གཞུང་དང་ཡུ་ལིན་(Yulin)ས་གནས་སྲིད་གཞུང་ལ་གནོན་ཤུགས་སྤྲད་ཡོད།

ཡུ་ལིན་(Yulin)གྱི་ཁྱི་ཤ་མཚམས་འཇོག་དགོས་པ་གྲངས་ལས་འདས་པའི་མི་གྲངས་ས་ཡ་མང་པོས་སྤྱི་ཚོགས་དྲ་རྒྱ་ཁག་གི་ནང་ལ་བསམ་ཚུལ་རྗོད་ཀྱི་ཡོད་པ་ཤེས་རྟོགས་བྱུང་། དེའི་ཁྲོད་དུ་གྲགས་ཅན་གྱི་མི་སྣ་ཀིལླི་ཨོས་བོར་ནི་( Kelly Osbourne)དང་། རི་ཀི་གིར་ཝཱེས་( Ricky Gervais )དང་། ཁཱ་རེ་ཧྥི་ཤར་ (Carrie Fisher)བཅས་ཀྱིས་དབྱིན་ཇིའི་རྒྱལ་ས་ལ་ཡོད་པའི་རྒྱ་ནག་གི་གཞུང་ཚབ་ལས་ཁུངས་སུ་ཁྱི་ཤ་མཚམས་འཇོགས་དགོས་པའི་ཞུ་སྙན་ཞིག་འདས་ཟིན་པའི་གཟའ་འཁོར་སྔོན་མའི་ནང་ལ་ཕུལ་ཡོད།།

ཨ་རིའི་གྲོང་ཁྱེར་ཝ་ཤིན་ཊོན་(Washington)དུ་ཕྷོ་ལོ་རི་ཊ་(Florida)ཡི་སྐུ་ཚབ་ཨེལ་སཱི་ཧས་ཏིང་(Alcee Hastings) གྱིས་ཨ་རིའི་གྲོས་ཚོགས་ཀྱི་ཁྱི་ཤ་ཚོང་གཉེར་བྱེད་མི་ཆོག་པའི་གྲོས་ཆོད་ངོ་སྤྲོད་བྱས་ཡོད།།

ང་སླར་ཡང་འདི་ལོ་ཡུ་ལིན་(Yulin)ལ་བསྐྱོད་རྒྱུ་ཡིན། ཇི་ཙམ་དངོས་སུ་དཀའ་སྡུག་ལ་གདོང་ལེན་བྱེད་དགོས་ཆགས་ཀྱང་། ངས་འཇིགས་ཡེར་བའི་ཁྱི་ཤའི་དུས་སྟོན་དེ་དུས་གཏན་དུ་མཚམས་འཇོག་མ་ཐུབ་ཀྱི་བར་གདོང་ལེན་བྱ་རྒྱུ་ཡིན།།

མཆན། ཀ༽ Adam Parascandola ནི་དུད་འགྲོ་ཉེན་སྲུང་ཚོགས་པའི་ཚོགས་གཙོ་དང་། རྒྱལ་སྤྱིའི་སྤྱི་ཚོགས་རྐྱེན་ངན་ཕན་བདེ་ཚོགས་པ(Crisis Response for Humane Society International)ཡི་ཚོགས་གཙོ་ཡིན། ཕྱི་ལོ་ ༢༠༡༥ ལོར་ཁོང་ཡུ་ལིན་(Yulin)ཁྱི་ཤའི་དུས་སྟོན་ལ་བསྐྱོད་མྱོང་ཡོད།

ཁ༽ ཀློག་པ་པོ་ཚོས་གོང་འཁོད་བརྗོད་བྱར་ཁ་གསལ་མེད་པ་དང་། ཐེ་ཚོམ་གྱི་རིགས་བྱུང་ཚེ། གཤམ་གྱི་འབྲེལ་ཐག་དེའི་བརྒྱུད་ནས། དབྱིན་ཡིག་གི་མ་རྩོམ་དེར་གཟིགས་པར་ཞུས།

ག༽ མ་རྩོམ་གྱི་འབྲེལ་ཐག edition.cnn.com/2016/06/19/opinions/china-yulin-dog-meat-festival-outrage/index.html