ང་ཚོ་འགྲིག་བསྡད་ཡོད་བསམ་སྟེ་ཆོག་ཤེས་དང་སྣང་བ་དག་ནས་མ་སྡོད་ཨཱ།

ཁ་སང་ཕྱི་ཚེས་ ༦ ཉིན་རྒྱ་གར་ལྷོ་ཕྱོགས་འབྲས་སྤུངས་དགོན་དུ། ༧གོང་ས་མཆོག་ཕྱི་ལུགས་ཀྱི་དགུང་གྲངས་ ༨༡ ལ་ཕེབས་པའི་སྐུའི་འཁྲུངས་སྐར་དུས་ཆེན་དང་། ཕྱི་ལོ་ ༡༩༦༦ ལོར་མོན་གྷོ་འདོད་རྒུ་གླིང་བོད་མིའི་གཞིས་ཆགས་བཙུགས་ཏེ་ལོ་ངོ་ཧྲིན་པོ་ ༥༠ འཁོར་བའི་དུས་དྲན་གཉིས་མཉམ་དུ་སྲུང་གཙི་ཞུས་ཡོད་པ་དང་། ༧སྐུའི་འཁྲུངས་སྐར་དང་སྟབས་བསྟུན་དགེ་ལུགས་ཡོངས་ཀྱི་༧རྒྱལ་བའི་བརྟན་བཞུགས་དང་བཀའ་དྲིན་རྗེས་དྲན་ཚོགས་ཆུང་གིས། ལོ་ཧྲིལ་པོ་གཅིག་རིང་༧རྒྱལ་བའི་བཀའ་དྲིན་རྗེས་དྲན་ཞུས་བའི་མཇུག་བསྡོམས་བརྟན་བཞུགས་འདེགས་འབུལ་ཞུས་འདུག

འཁྲུངས་སྐར་མཛད་སྒོའི་ཐོག་༧གོང་ས་མཆོག་ནས་བཀའ་སློབ་གསུང་བཤད་གནང་སྐབས། གོང་དུ་སྲིད་སྐྱོང་དང་གྲོས་ཚོགས་ཀྱི་ཚོགས་གཙོས་གསུང་བཤད་ཞེ་དྲགས་ཡག་པོ་གནང་སོང་། དངོས་ཡོད་གནས་ཚུལ་ཁ་ཡོད་ལག་ཡོད་འདྲ་ཆག་ཆག་དང་ཡག་ཡག་ཞེ་དྲགས་བཤད་པ་མིན་པར་དངོས་ཡོད་གནས་ཚུལ་འགྲེལ་བཤད་བརྒྱབ་སྟེ་ཞེ་དྲགས་ཡག་པོ་བྱུང་སོང་། དེ་ཚང་མས་བློ་ལ་བཞག་སྟེ་གཟབ་གཟབ་བྱོས། སྐབས་རེར་ང་ཚོ་ཡར་རྒྱས་འདྲ་པོ་དགའ་རབ་ཕྱིན་པའི་སྐབས་སུ་ལྷོད་གཡང་དུ་སོང་སྟེ་འཐུས་ཤོར་འགྲོ་བ་དེ་འདྲ་ཡོང་མི་སྲིད་པ་མ་རེད། དེར་བརྟེན་ང་ཚོས་ག་དུས་ཡིན་ནའང་གང་ནས་འཐུས་ཤོར་གྱི་འདུག གྲྭ་ས་གྲྭ་ཚང་ཡིན་ནའང་སློབ་གཉེར་དང་འགྲིག་ལམ་ཀུན་སྤྱོད་སོགས་གང་ཅིའི་ཐོག་ལ་འཐུས་ཤོར་ག་འདྲ་འགྲོ་ཡི་འདུག་དེར་གཟབ་གཟབ་བྱོས། མི་མང་དཀྱུས་མ་ཡིན་ནའང་དེ་དེ་བཞིན་གྱིས་དོ་སྣང་ཡག་པོ་བྱེད་དགོས་པ་རེད། སློབ་གྲྭའི་སློབ་སྦྱོང་དང་འཕྲོད་བསྟེན་ཐོག་ལས་ཀ་བྱེད་མཁན་ཚོས་ང་ཚོ་འགྲིག་བསྡད་ཡོད་བསམ་སྟེ། ཆོག་ཤེས་འདྲ་པོ་དང་སྣང་བ་དག་ནས་མ་བསྡད་པར་སྐྱོན་ཆ་ག་རེ་འདུག་དང་མི་འདུག་ཡིད་གཟབ་བྱེད་དགོས་པ་རེད། ཅེས་གསུངས་འདུག

ཡང་ཁོང་གིས་གཞོན་སྐྱེས་ཚོར་བཀའ་སློབ་གནང་དོན། སློབ་ཕྲུག་ཚོ་ང་ཚོའི་མ་འོངས་པའི་སོན་རྩ་འདྲ་པོ་རེད། མི་རབས་རྒན་པ་རྣམས་ག་ལེར་ག་ལེར་རྫོགས་འགྲོ་ཡི་རེད། ཁོང་ཚོའི་རྗེས་ཡར་མཐུད་ཡོང་མཁན་དེ་དགེ་འདུན་པ་གཞོན་པ་དང་སློབ་གྲྭའི་སློབ་ཕྲུག་ཁྱེད་རང་ཚོ་རེད། བོད་ཀྱི་ཆོས་དང་རིག་གཞུང་ཟེར་བ་དེ་མི་རབས་ནས་མི་རབས་སུ་འཛིན་དགོས་པའི་སྐད་ཆ་ཞིག་རེད་མ་གཏོགས་མི་རབས་གཅིག་གི་སྐད་ཆ་མ་རེད། དེ་མི་རབས་ནས་མི་རབས་སུ་འཛིན་མཁན་དེ་ཁྱེད་རང་ཚོ་གཞོན་སྐྱེས་ཚོ་རེད། གང་ལྟར་བོད་ཀྱི་སངས་རྒྱས་པའི་ཆོས་ཟེར་དུས་ཚིག་དེའི་གོ་བ་ཆ་ཚང་བསླེབས་ཐུབ་མེད་པ་འདྲ་པོ་འདུག་པས། ངས་སངས་རྒྱས་པའི་ལྟ་གྲུབ་ཅེས་བཤད་ཀྱི་ཡོད། དེ་བཞིན་ང་ཚོའི་སློབ་གྲྭ་ཁག་གི་དགེ་རྒན་ལ་ང་ཚོས་སྔོན་མ་ནས་ཆོས་དགེ་ཆོས་དགེ་ཟེར་གྱི་ཡོད་པ་རེད། ཁ་སང་ང་ཚོར་ལྟ་གྲུབ་སློབ་དཔོན་ཞེས་མིང་བཏགས་ན་ཡག་པོ་ཡོད་པའི་སྐད་ཆ་བྱུང་། གང་ལྟར་སློབ་གྲྭའི་ནང་གི་ཆོས་དགེ་ཟེར་ན་མིན་འདུག་འགྲེལ་བཤད་རྒྱག་མཁན་ཚོས་སངས་རྒྱས་ཆོས་ཚོགས་མ་འགྲེལ་བཤད་འདྲ་བརྒྱབ། གཞན་དོན་གྱི་འགྲེལ་བཤད་འདྲ་བརྒྱབ་པ་དེ་མིན་པར་སངས་རྒྱས་པའི་ཆོས་ཀྱི་གཞི་རྩའི་ལྟ་གྲུབ་ག་འདྲ་ཡིན་པ་དེ་ཚོ་འགྲེལ་བཤད་རྒྱག་དགོས་པ་རེད། ངས་པཎ་གྲུབ་བཅུ་བདུན་གྱི་གསོལ་འདེབས་བྲིས་པ་དེའི་ནང་གཞི་བདེན་གཉིས་ཀྱི་རྣམ་བཞག་ཤེས་པའི་སྒང་ནས་བདེན་བཞིའི་རྣམ་བཞག་དེ་ཤེས་པ་བྱས། དེ་ལ་བརྟེན་ནས་ཆོས་དཀོན་མཆོག་ངོ་འཕྲོད། དེ་ལ་བརྟེན་ནས་སྟོན་པ་སངས་རྒྱས་ངོ་འཕྲོད། སྐྱོབ་པ་དགེ་འདུན་ངོ་འཕྲོད། དེ་འདྲ་བྱས་ནས་སྐྱབས་འགྲོ་ངོ་སྤྲོད་བྱེད་དགོས་པ་རེད་མ་གཏོགས་ལོ་ཉིས་སྟོང་དྲུག་བརྒྱའི་གོང་དུ་སངས་རྒྱས་མི་འདྲ་བ་ཞེ་དྲགས་ཤིག་བྱོན་པ་རེད་ཟེར་བ་འདྲ་པོ་དང་། དེས་གསུངས་པའི་སངས་རྒྱས། དེས་གསུངས་པའི་ཆོས་ཞེས་ཡག་པོ་བྱས་ཏེ་འགོག་ལམ་དང་བཅས་པའི་ཆོས་དཀོན་མཆོག་ག་རེ་ག་རེ་ཡིན་པ་དེ་མ་ཤེས་པར་ཆོས་ཞེས་ལབ་དུས། ཧ་ལམ་པོ་ཏི་ལ་འཛུམ་མོ་བཙུགས་པ་འདྲ་པོ་བྱས་པ་ཡིན་ན་འགྲིག་གི་ཡོད་པ་མ་རེད། ཅེས་སོགས་གསུངས་འདུག

གསར་འགོད་པ། པདྨ་མཚོ།