པདྨ་མཁའ་འགྲོ་ཨ་རུ་ནཱ་ཅལ་མངའ་སྡེ་སྤྱི་ཁྱབ་བློན་ཆེན་དུ་བདམས།

དེ་རིང་སྔ་དྲོར་ཨ་རུ་ནཱ་ཅལ་མངའ་སྡེའི་ཡུལ་སྐོར་སྤྲོ་འཆམ་བློན་ཆེན་པདྨ་མཁའ་འགྲོ་མཆོག་མངའ་སྡེའི་སྤྱི་ཁྱབ་བློན་ཆེན་དུ་བདམས་འཐོན་བྱུང་བའི་ལས་འཁུར་དམ་འབུལ་ཞུས་ཡོད་འདུག

དེ་རིང་རྒྱ་གར་གྱི་བརྒྱུད་ལམ་ཁག་ནང་གནས་ཚུལ་འཐོན་གསལ་ལྟར་ན། ཁ་སང་ཚེས་ ༡༦ ཉིན་རྒྱ་གར་བྱང་ཤར་ཨ་རུ་ནཱ་ཅལ་མངའ་སྡེའི་ཡུལ་སྐོར་སྤྲོ་འཆམ་དང་ཆུའི་ཐོན་ཁུངས་བློན་ཆེན་པདྨ་མཁའ་འགྲོ་མཆོག་མངའ་སྡེའི་གྲོས་ཚོགས་ཀྱི་ཀཱང་རི་སི་ཚོགས་པའི་དབུ་ཁྲིད་ལ་རྒྱལ་ཁ་ཐོབ་སྟེ། དེ་རིང་ཚེས་ ༡༧ ཉིན་གྱི་སྔ་དྲོར་ཨ་རུ་ན་ཅཱལ་མངའ་སྡེའི་རྒྱལ་ས་ཨི་ཊ་ན་གྷར་དུ། མངའ་སྡེའི་སྤྱི་ཁྱབ་བློན་ཆེན་གྱི་ལས་འཁུར་བཞེས་པའི་དམ་འབུལ་ཞུས་ཡོད་པ་དང་། ཁོང་མངའ་སྡེ་སྤྱི་ཁྱབ་བློན་ཆེན་སྐབས་དགུ་བ་ཡིན་ཞིང་། ད་ལྟ་རང་ལོ་ ༣༧ ཡིན་སྟབས་མངའ་སྡེའི་སྤྱི་ཁྱབ་བློན་ཆེན་ལོ་ན་ཆུང་ཤོས་དེ་ཆགས་ཡོད་འདུག

པདྨ་མཁའ་འགྲོ་མཆོག་ནི་དེ་སྔའི་ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་ཆེན་ཟུར་པ་འདས་པོ་དམ་པ་རྡོ་རྗེ་མཁའ་འགྲོ་མཆོག་གི་བུ་ཡིན་པ་དང་། ཁོང་ཕ་བུ་གཉིས་བོད་མིའི་སྐྱབས་མགོན་༧རྒྱལ་བ་རིན་པོ་ཆེ་མཆོག་དང་བོད་མིའི་སྒྲིག་འཛུགས་བཅས་ལ་འབྲེལ་ལམ་ཧ་ཅང་ཡག་པོ་འཛིན་མཁན་ཞིག་ཡིན་ཞིང་། རྡོ་རྗེ་མཁའ་འགྲོ་མཆོག་ ༢༠༡༡ ལོར་གནམ་གྲུའི་དོན་རྐྱེན་འོག་འདས་གྲོངས་སུ་ཕྱིན་ཡོད།

པདྨ་མཁའ་འགྲོ་ཕ་བུ་གཉིས་ནི་ཕྱི་ལོ་ ༢༠༡༢ ལོར་གནས་མཆོག་རྡོ་རྗེ་གདན་དུ་༧གོང་ས་མཆོག་གིས་དཔལ་དུས་ཀྱི་འཁོར་ལོའི་དབང་ཆེན་གནང་སྐབས་ཀྱི་སྦྱིན་བདག་གཙོ་བོ་ཡིན་པ་དང་། སྐབས་དེར་འདི་གའི་གསར་འགོད་པས་པདྨ་མཁའ་འགྲོ་མཆོག་ལ་བཅར་འདྲི་ཞུས་པའི་དུམ་བུ་ཞིག་གཤམ་དུ་བཀོད་ཡོད།

དྲི་བ། ཉིད་ཀྱི་ཡབ་དམ་པ་རྡོ་རྗེ་མཁའ་འགྲོ་མཆོག་༧གོང་ས་མཆོག་ལ་དད་གུས་ཆེན་པོ་ཡོད་པ་མ་ཟད། ༢༠༠༨ ལོར་བོད་ནང་དོན་རྐྱེན་བྱུང་སྐབས་ངྷ་རམ་ས་ལར་བཅར་བ་སོགས་བོད་མི་མང་དང་བོད་དོན་ལའང་ཤ་ཚ་ཡོད་མཁན་ཞིག་རེད། ཁྱེད་རང་གིས་བོད་མི་དང་བོད་པའི་རྩ་དོན་ཐོག་ལངས་ཕྱོགས་གང་འདྲ་འཛིན་གྱི་ཡོད་དམ།

ལན། ང་རང་གི་ཡབ་དམ་པར་མཚོན་ན་བོད་མི་མང་ལ་ཤ་ཚ་རྒྱབ་སྐྱོར་ཆེན་པོ་ཡོད་པ་ངས་གསལ་བོ་ཤེས་ཀྱི་ཡོད། དེ་ཆབ་སྲིད་ཀྱི་དགོས་མཁོ་དང་མི་སྒེར་གྱི་ཁེ་ཕན་དེ་འདྲ་ཁྱོན་ནས་མ་རེད། སེམས་གཏིང་ནས་བོད་མི་མང་ལ་དགའ་ཞེན་ཡོད་པ་རེད། ཁོ་རང་གིས་བོད་མི་ཚོར་ག་རེ་གནང་ཐུབ་པ་དེ་གནང་བ་རེད། མ་གཞི་ང་རང་གིས་ཡབ་དམ་པའི་དགོངས་གཞི་དང་ལས་དོན་གལ་ཆེན་དག་རྒྱུན་སྐྱོང་རྒྱུའི་དམ་བཅའ་ཡོད་ལ། ང་རང་སྒེར་ངོས་ནས་ཀྱང་བོད་མི་མང་ལ་རྒྱབ་སྐྱོར་རོགས་རམ་གང་ཐུབ་པ་དེ་བྱ་རྒྱུའི་ཆོད་སེམས་སྔོན་མ་ནས་ཡོད། ཨ་རུ་ན་ཅལ་ཕྱོགས་སུ་བོད་པའི་གཞས་ཆགས་ཁག་ ༤ ཙམ་ཡོད་པ་རེད། ང་རང་ལས་དོན་ཞིག་གི་ཞོར་དུ་ཏེ་ཛུ་བོད་མིའི་གཞས་ཆགས་སུ་ཕྱིན་ཏེ་གཞས་ཆགས་ཀྱི་མགོ་བར་ཆེད་དུ་ཐུག་པ་ཡིན། གཞས་ཆགས་ནང་དཀའ་ངལ་ག་རེ་ཡོད་མེད་དྲིས་སྐབས། ཁོ་རང་གིས་འཐུང་ཆུའི་སྐོར་གྱི་དཀའ་ངལ་ཞིག་ལབ་སོང་། ཁྲོན་པ་བརྐོ་དགོས་ཀྱི་ཡོད་པ་འདྲ། ངས་དེ་ལ་ཧིན་སྒོར་འབུམ་བཞི་ ༤༠༠༠༠༠ སྤྲད་པ་ཡིན། རྗེས་སུ་ཁོང་གིས་ཁྲོན་པ་བརྐོས་ཏེ་འབུམ་ ༢ ཙམ་ལས་ཕྱིན་མ་སོང་ཟེར། དངུལ་ལྷག་པ་དེ་དག་ཀྱང་ང་ལ་ཕྱིར་སློག་མི་དགོས། སློབ་གྲྭ་དང་གཞས་ཆགས་ཀྱི་དཀའ་ངལ་ཐོག་གཏོང་རོགས་ཞེས་བཤད་ཡོད། གཞས་ཆགས་གཞན་དག་ལའང་སོ་སོ་སྒེར་ཡིན་ན་འདྲ་ལ། གཞུང་ཡིན་ནའང་འདྲ། རོགས་པ་ག་རེ་བྱ་དགོས་ཀྱང་ནུས་པ་ཡོད་ཚད་འདོན་དགོས་བསམ་ཡོད། བོད་ནས་གསར་དུ་སྐྱབས་བཅོལ་ལ་ཡོང་མཁན་ཚོར་ཡང་རོགས་པ་ག་འདྲ་ཞིག་བྱ་ཐུབ་ན་བསམ་ནས་སེམས་ལ་ཐེངས་ཁ་ཤས་དྲན་སོང་། ཡིན་ནའང་ད་སྔ་རོགས་པ་དེ་འདྲ་བྱས་མྱོང་མེད། ཁ་སང་བཀའ་བློན་ཁྲི་པ་བློ་བཟང་སེང་གེ་ལའང་ཐུག་སོང་། ཁོ་རང་མ་འོངས་པར་ཨ་རུ་ན་ཅལ་དུ་ཕེབས་རྒྱུའི་འཆར་གཞི་ཞིག་ཡོད་པ་འདྲ། ང་རང་སྒེར་དང་གཞུང་གང་ནས་རོགས་རམ་དགོས་ཀྱང་གསུངས་དང་འབད་བརྩོན་ཞུ་ངེས་ཡིན་ཞེས་ཁས་ལེན་ཞུས་ཡོད།  ༼   བཅར་འདྲི་ཧྲིལ་བོ་ཀློག་འདོད་ན་འདིར་གནོན། ༽

གསར་འགོད་པ། དོན་འགྲུབ་བཀྲ་ཤིས།