ད་ལྟའི་བར་ཨ་རུ་ན་ཅལ་མངའ་སྡེ་ནས་བོད་མི་ ༧༨༩ ཁེ་ན་ཌར་འབྱོར་ཟིན་ཡོད་པ་དང་མི་རིང་བར་བོད་མི་ ༡༡ གཏོང་རྒྱུ་རེད་འདུག
དེ་ཡང་ཕྱི་ལོ་ ༢༠༡༡ ཟླ་ ༣ ནས་བཟུང་ཨ་རུ་ན་ཅལ་མངའ་སྡེའི་བོད་མིའི་གཞིས་གྲོང་མེའོ་ཆོས་འཕེལ་གླིང་དང་ཏེ་ཛུ་དར་རྒྱས་གླིང་། ཀྲུ་གྲིང་དང་འབུམ་ལ་བསྟན་འཛིན་གླིང་བཅས་གཞིས་ཆགས་ཁག་ ༤ ནས་བོད་མི་ ༡༠༠༠ ཁེ་ན་ཌར་གཞིས་སྤོར་གཏོང་བའི་ལས་གཞི་མགོ་བཙུགས་ཏེ། རིམ་པ་བྱས་ནས་བོད་མི་མང་པོ་ཁེ་ན་ཌར་གནས་སྤོར་བཏང་ཡོད་སྟབས། འདི་གའི་གསར་འགོད་པས་ནང་སྲིད་ལས་ཁུངས་ཀྱི་འབྲེལ་ཡོད་ལས་བྱེད་དངོས་འགྲུབ་འོད་ཟེར་ལགས་སུ། ད་ལྟ་གཞིས་སྤོར་གྱི་ལས་གཞི་ག་འདྲ་ཆགས་ཡོད་མེད་དྲིས་པར་ཁོང་གིས། རྩ་བའི་བོད་མི་ཆིག་སྟོང་ཁེ་ན་ཌར་གཏོང་བའི་གནས་སྟངས་ཤིག་རེད། ད་ལྟའི་ཆར་བོད་མི་ ༧༨༩ ཕར་ལ་འགྲོ་ཚར་རེད། དེའི་སྒང་ལ་ཉེ་ཆར་བསྐྱར་དུ་བོད་མི་ ༡༨༥ ལ་བཅར་འདྲི་དང་གཟིགས་པོའི་གནས་སྟངས་ལ་བརྟག་དཔྱད་བྱས་ཚར་ཡོད། དེར་བརྟེན་ད་ལྟའི་གནས་སྟངས་ལ་བལྟས་ན། སྙན་ཞུ་བརྒྱབ་ཚར་མཁན་ཕལ་ཆེར་ ༡༠༠༨ ཙམ་འདུག དེའི་ནང་ལོགས་ནས་ཁོ་རང་ཚོར་ཞིབ་འཇུག་བྱས་ཏེ་མ་ཚུད་པ་དེ་འདྲ་ཡོང་སྲིད་པ་རེད། དེ་ཡང་ཁོ་ཚོའི་ཡིག་ཆར་ཞིབ་འཇུག་དང་གཟིགས་པོར་བརྟག་དཔྱད་བྱས་པའི་གནས་སྟངས་ལ་ཞིབ་འཇུག་བྱེད་དགོས་པའི་གནས་སྟངས་ཤིག་ཆགས་བསྡད་ཡོད། ཅེས་ཟེར།
ད་ལྟའི་བར་བོད་མི་ག་ཚོད་གཞིས་སྤོར་བཏང་ཟིན་ཡོད་པ་དང་། ཕར་ནས་ཁོ་ཚོའི་གནས་སྟངས་ག་འདྲ་ཆགས་ཡོད་དྲིས་པར། ད་ལྟའི་བར་བོད་མི་ ༧༨༩ འགྲོ་ཚར་རེད། ད་ལོའི་ཕྱི་ཟླ་ ༩ པ་ནས་ ༡༠ པའི་ནང་བོད་མི་ ༡༡ འགྲོ་གི་ཡོད་པས། ད་ལྟའི་བར་གཞིས་སྤོར་དུ་བཏང་བ་ཁྱོན་བོད་མི་ ༨༠༠ ཏག་ཏག་ཆགས་ཀྱི་ཡོད་པ་དང་། ཕར་ལ་འགྲོ་ཚར་མཁན་ཚོའི་གནས་སྟངས་ག་འདྲ་ཆགས་ཡོད་མེད་དེ་ང་ཚོས་གསལ་བོར་ཤེས་མ་སོང་། ཞེས་དང་། དེ་སྔོན་མི་གྲངས་ ༡༡༠ ཡི་ས་མིག་སྟོང་པར་བཞག་ཡོད་པ་དེའི་སྐོར་ལ་ཁོང་གིས། སྔོན་མ་རྒྱན་མ་བརྒྱབ་པའི་ས་མིག་ ༡༡༠ ཡོད་པ་དེའི་གྲས་ཀྱི་ ༡༠ གསར་དུ་སྐྱེ་རྒྱུའི་ཕྲུ་གུའི་ཆེད་དུ་བཞག་པ་རེད། ཡིན་ནའང་། ད་ལྟའི་བར་ཕྲུ་གུ་ ༢༢ སྐྱེས་ཡོད་པ་དང་། ད་ལྟ་ས་མིག་ ༡༡༠ ནང་ཆ་ཚང་བདམས་ཚར་བ་རེད། དེ་ཡང་ཕར་ཕྱོགས་ཁེ་ན་ཌར་ཕྱག་ལས་གནང་མཁན་ཉི་མ་རྡོ་རྗེ་ལགས་ནས་འདི་གར་ཆེད་ཞུས་དོན་ཚན་ཁག་ ༤ སྤྲད་པ་དེ་གཞིར་བཟུང་གིས་སྔོན་མ་འོས་ཤོག་ནང་མ་ཚུད་པ་ཚོ་བདམས་ཡོད་པ་རེད། ཡིན་ནའང་དོན་ཚན་དེ་དག་ནང་ཆ་རྐྱེན་གཙོ་བོ་ག་རེ་བཏོན་ཡོད་པ་རེད་ཟེར་ན། ཕྱི་རྒྱལ་དུ་སྤུན་མཆེད་མེད་མཁན་དང་། གཞིས་སྤོར་སྔོན་མའི་ནང་སྤུན་མཆེད་མེད་མཁན། དངོས་གནས་དཀའ་ངལ་ཡོད་མཁན་དེ་ཚོའི་ནང་ལོགས་ནས་འདེམས་དགོས་ཀྱི་ཡོད་སྐོར་གསལ་བསྒྲགས་བྱས་ཡོད་པ་རེད། དེ་གཞིར་བཟུང་གིས་ས་གནས་སོ་སོ་ནས་ས་གནས་མགོ་འཛིན་བརྒྱུད་བདམས་བཞག་ཡོད་པ་དང་། དེའི་སྙན་ཞུ་ཆ་ཚང་ང་ཚོས་ཕུལ་ཚར་བ་ཡིན། ཞེས་བརྗོད་བྱུང་།
རྒྱན་ཐོབ་ཚར་བ་རྣམས་ཕར་གཏོང་མ་ཐུབ་པའི་དཀའ་ངལ་འཕྲད་ཀྱི་ཡོད་མེད་ཐད་ཁོང་གིས། ད་ལྟའི་བར་གཟུགས་པོའི་ནད་གཞིའི་རྐྱེན་གྱིས་ལྷག་བསྡད་པ་དེ་འདྲ་གཅིག་ཀྱང་ཡོད་པ་མ་རེད། གང་ཡིན་ཟེར་ན། གློ་ནད་ཚད་རིམ་གསུམ་པ་དེ་འདྲ་ཡོད་པ་ཡིན་ན། ཟླ་ ༦ རིང་སྨན་བཅོས་ཀྱི་དུས་ཚོད་སྤྲོད་ཀྱི་ཡོད་པ་དང་། ཟླ་ ༦ ཆ་ཚང་ཚར་ཏེ་ཁེ་ན་ཌ་གཞུང་གི་སྨན་པ་ཚོས་འགྲིག་གི་འདུག་ལབ་པ་ཡིན་ན། ཕར་གཏོང་རྐྱང་བྱེད་ཀྱི་ཡོད་པ་རེད། ཡིན་ནའང་ནང་གི་དཀའ་ངལ་གྱི་རྐྱེན་པས་གཞིས་སྤོར་ཕྱིར་འཐེན་བྱེད་མཁན་དེ་འདྲ་བྱུང་ཡོད་པ་རེད། ང་ཚོའི་དཀའ་ངལ་གཞན་གཅིག་སྟེ་སྐྱབས་བཅོལ་ལག་དེབ་རེད། གང་ཡིན་ཟེར་ན། ཁེ་ན་ཌར་འགྲོ་བའི་ཆ་རྐྱེན་ནང་ཕྱི་ལོ་ ༢༠༡༠ ཟླ་ ༡༢ ཚེས་ ༡༨ སྔོན་ནས་ས་གནས་དེ་ག་རང་སྡོད་མཁན་དང་། མ་འོངས་མུ་མཐུད་སྡོད་མཁན་ཚོ་ཁེ་ན་ཌར་གཏོང་གི་ཡིན་ཞེས་བརྗོད་ཡོད་པ་རེད། དེར་བརྟེན་ཁ་ཤས་ཀྱིས་སྐྱབས་བཅོལ་ལག་དེབ་ས་གནས་དེ་ག་རང་ནས་མ་ཡིན་པར་དྷ་རམ་ས་ལ་ལྟ་བུ་ཕྱི་ལོགས་ནས་བཟོས་ཡོད་སྟབས། དེ་ལ་དཀའ་ངལ་ཅུང་འཕྲད་ཀྱི་ཡོད་པ་རེད། ཡིན་ནའང་ད་ལྟའི་བར་ཕྱིར་འཐེན་བྱས་བཞག་པ་དེ་འདྲ་གཅིག་གཉིས་ཤིག་མ་གཏོགས་ཡོད་པ་མ་རེད། ཅེས་ཟེར།
འདི་ལོའི་ཕྱི་ཟླ་ ༥ པ་བར་གཞིས་སྤོར་ལས་གཞི་མཇུག་སྒྲིལ་ཐུབ་དགོས་སྐོར་བརྗོད་པ་དེའི་ཐད་ཁོང་གིས། ཕྱི་ལོ་ ༢༠༡༦ ཕྱི་ཟླ་ ༥ ཚེས་ ༡༡ བར་ཞེས་པ་དེ་ཕར་ཕྱོགས་ཁེ་ན་ཌར་གཞིས་སྤོར་ལས་གཞིའི་མགོ་འཁྲིད་མཁན་བོད་རིགས་ཚོགས་པ་དང་དབུས་བོད་མིའི་སྒྲིག་འཛུགས་གཉིས་བར་གྲོས་ཆོད་ཅིག་བཞག་ཡོད་པ་དེ་རེད། གྲོས་ཆོད་དེའི་ནང་ཕྱི་ལོ་ ༢༠༡༦ ཕྱི་ཟླ་ ༥ ཚེས་ ༡༡ ནང་ལོགས་ལ་སྙན་ཞུ་ཆ་ཚང་ཕ་གའི་ཁེ་ན་ཌའི་གཞུང་ཚབ་ཁང་ལ་འབྱོར་ཚར་བ་བྱེད་དགོས་ཀྱི་ཡོད་པ་རེད། དེ་ང་ཚོས་ཆ་ཚང་ཕུལ་ཚར་ཡོད། དེ་ནས་རིམ་པས་གཏོང་རྒྱུ་དེ་ཁོ་རང་ཚོའི་ལས་འགན་རེད། ཅེས་བརྗོད་བྱུང་།
གསར་འགོད་པ། པདྨ་རྒྱལ།
