དེ་རིང་སྔ་དྲོའི་ཆུ་ཚོད་ ༨།༤༠ ཙམ་གྱི་ཐོག དྷ་ཤོད་ཀྱི་ཨིམ་སི་ཌི་ཚོགས་ཁང་(MCD Hall)དུ། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་ཆེན་ཐེངས་ ༡༦ པ་དབུ་འཛུགས་གནང་ཡོད་པ་དང་། ཚོགས་ཆེན་དབུ་འབྱེད་ཀྱི་མཛད་སྒོའི་ཐོག་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་དམིགས་བསལ་སྐུ་མགྲོན་བཀའ་ཟུར་ཀིརྟི་རིན་པོ་ཆེ་མཆོག སྤྱི་འཐུས་ཚོགས་གཞོན་ཨཅརྱ་ཡེ་ཤེས་ཕུན་ཚོགས་ལགས། དེ་བཞིན། དྷ་ས་ས་གནས་མགོ་འཛིན་དང་ས་གནས་གྲོས་ཚོགས་ཀྱི་ཚོགས་གཙོ། དྷ་སའི་གཞུང་འབྲེལ་མ་ཡིན་པའི་ཚོགས་སྐྱིད་དང་རང་དབང་ཅན་གྱི་སྡེ་ཚན་ཁག་གི་སྐུ་ཚབ་རྣམ་པ། གཞན། དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཚོགས་གཞོན་གྱིས་གཙོས་དབུས་རྒྱུན་ལས་ཐོག་པ་དང་ཟུར་པ། གཞོན་ནུའི་ས་གནས་ཁག་ ༤༠ ནས་སྐུ་ཚབ་ ༡༣༠ ལྷག་བཅས་ཚོགས་བཅར་གནང་འདུག
མཛད་སྒོའི་ཐོག་བོད་བསྟན་སྲིད་ཆེད་བོད་ཕྱི་ནང་གཉིས་ནས་རང་ལུས་མེར་སྲེག་གནང་མཁན་རྒྱལ་གཅེས་དཔའ་བོ་དཔའ་མོ་རྣམས་ཀྱི་སྙིང་སྟོབས་ལ་ཡི་རང་གུས་འདུད་མཚོན་སླད། ཁོང་རྣམ་པར་རྒྱལ་གཅེས་དཔའ་བོའི་གཟེངས་རྟགས་ཕུལ་བ་གཞོན་ནུའི་སྤྱི་ཁྱབ་ཚོགས་གཙོ་བསྟན་འཛིན་འཇིགས་མེད་ལགས་ཀྱིས་ཚབ་ཞུས་ཏེ་བླངས་བ་དང་། དེ་ནས་གཞོན་ལྷན་ས་གནས་རྒྱུན་ལས་སྔ་རྗེས་ཁྱོན་ལོ་ངོ་ ༡༥ ལྷག་གནང་མཁན་ལས་བྱེད་རྣམ་པ་དང་། ས་གནས་རྩེ་ཕུད་གསུམ་ལ་གཟེངས་རྟགས་གསོལ་རས་ཕུལ་བ་དང་། དེ་བཞིན། འཛིན་རིམ་གསུམ་པ་ནས་དྲུག་པ་བར་གྱི་རྩོམ་ཡིག་འགྲན་སྡུར་གྱི་རྩེ་ཕུད་སློབ་མ་ ༣ དང་། འཛིན་རིམ་བདུན་པ་ནས་དགུ་པ་བར་གྱི་རྩོམ་ཡིག་འགྲན་སྡུར་ཀྱི་རྩེ་ཕུད་སློབ་མ་ ༣། འཛིན་རིམ་བཅུ་པ་ནས་བཅུ་གཉིས་བར་གྱི་རྩོམ་ཡིག་འགྲན་སྡུར་གྱི་རྩེ་ཕུད་སློབ་མ་ ༣། མཐོ་སློབ་ཁག་གི་རྩོམ་ཡིག་འགྲན་སྡུར་གྱི་རྩེ་ཕུད་ ༣ བཅས་ལ་བྱ་དགའ་ཕུལ། གཞན་ཡང་། བོད་བསྟན་སྲིད་ཆེད་སྐུ་ལུས་མེར་སྲེག་གནང་མཁན་སྐལ་བཟང་དབང་འདུས་ལགས་དང་རྡོ་རྗེ་ཚེ་རིང་ལགས་གཉིས་ཀྱི་སྙིང་སྟོབས་དང་རྒྱལ་ཞེན་ལ་ཡི་རང་གུས་འདུད་མཚོན་ཆེད་རང་བཙན་གཟེངས་རྟགས་ཕུལ་སོང་བ་དང་། དེ་བཞིན་འདི་ལོའི་རྒྱ་བལ་འབྲུག་ནང་གི་འཛིན་རིམ་བཅུ་གཉིས་ཀྱི་བོད་ཡིག་ཡིག་རྒྱུགས་ཨང་དང་པོ་ཐོབ་མཁན་མོན་གྷོ་གཏན་སློབ་ཀྱི་སློབ་མ་བདེ་ཆེན་བཟང་མོ་ལགས་དང་བསྟན་འཛིན་མགོན་པོ་ལགས་གཉིས་ལ་རྒྱལ་བའི་བཀའ་དྲིན་རྗེས་དྲན་གྱི་གཟེངས་རྟགས་ཕུལ་བ་དང་། མཇུག་ཏུ་བལ་ཡུལ་ནང་ས་ཡོམ་ཤུགས་ཆེན་བྱུང་སྐབས་བལ་ཡུལ་དུ་ཡོད་པའི་སྐུ་ཚབ་དོན་གཅོད་ཀྱི་དབུས་བལ་ཡུལ་གྱི་བོད་མི་ཚོས་སྤྱི་ཚོགས་ཞབས་ཞུའི་ཕྱག་ལས་ཧ་ཅང་ཡག་པོ་གནང་བར་ཆེད་བསྟོད་མཚོན་སླད། འདི་ལོའི་གཞོན་ནུའི་སྤྱི་ཚོགས་ཞབས་ཞུའི་གཟེངས་རྟགས་བལ་ཡུལ་དོན་གཅོད་དང་བལ་ཡུལ་བོད་མི་ཡོངས་ལ་ཕུལ་སོང་།
མཛད་སྒོའི་ཐོག་དམིགས་བསལ་སྐུ་མགྲོན་བཀའ་ཟུར་ཀིརྟི་རིན་པོ་ཆེ་མཆོག་ནས་བླངས་དོར་གྱི་བཀའ་སློབ་གནང་དོན། ང་ཚོའི་ཚོགས་པ་ག་འདྲ་ཞིག་ཡིན་ནའང་རྡོག་རྩ་གཅིག་ཏུ་སྒྲིལ་དགོས་པ་དེ་གལ་ཆེ་ཤོས་རེད་བསམ་གྱི་འདུག རྡོག་རྩ་ཆིག་སྒྲིལ་མེད་ན་ཚོགས་པའི་ལས་དོན་བརླག་འགྲོ་བ་དང་། ཚོགས་པ་དེ་ནུས་མེད་ཆགས་འགྲོ་བར་བརྟེན་ནང་ཁུལ་དུ་རྡོག་རྩ་ཆིག་སྒྲིལ་བྱེད་དགོས་པ་དེ་དཔེ་གལ་ཆེན་པོ་རེད། ནང་ཁུལ་དུ་མཐུན་ལམ་ཡོང་བ་ཞིག་གི་ཐོག་ཤུགས་སྐྱོན་པ་ཡིན་ན། ཏན་ཏན་ནང་ཁུལ་ལ་ཤུགས་འབྱུང་རྒྱུ་ཡོད་པ་རེད་བསམ་གྱི་འདུག ཕྱི་ལོག་ལ་བསྡད་དེ་ཁྱོད་དང་ང་ཞེས་ཕན་ཚུན་མཁྲེགས་པོ་བྱས་ནས་སྡོད་པ་དེ་རྒྱ་མི་གུང་ཁྲན་གྱི་ལས་ཀ་རེད། རྒྱ་མི་གུང་ཁྲན་གྱིས་ཕྱོགས་གཅིག་རྒྱལ་དགོས་པ་དང་། ཕྱོགས་གཅིག་ཕམ་དགོས་ཀྱི་ཡོད་པས་མཁྲེགས་པོ་སྡོད་རེས་བྱེད་པ་རེད། ཡིན་ནའང་། ང་ཚོ་དེ་འདྲ་མ་ཡིན་པར་ནང་ཁུལ་ལ་སྐད་ཆ་བཤད་རེས་བྱས་ཏེ་ནང་ཁུལ་ལ་འགྲིག་པོ་བཟོ་དགོས་པ་རེད། ༧རྒྱལ་བ་རིན་པོ་ཆེས་དབུ་མའི་ལམ་གསུང་གི་ཡོད་པ་རེད། དབུ་མའི་ལམ་དེ་ང་རང་ཚོ་ནང་ཁུལ་ལ་ག་དུས་ཡིན་ནའང་བེད་སྤྱོད་གཏོང་དགོས། ནང་ཁུལ་དབུ་མའི་ལམ་བེད་སྤྱོད་བཏང་སྟེ་སྐད་ཆ་བཤད་རེས་བྱས་ནས་འགྲིག་པ་བཟོ་དགོས་པ་དེ་དབུ་མའི་ལམ་གྱི་གཙོ་བོ་ཞིག་རེད། ང་ཚོའི་ཆོལ་ཁ་ཡིན་ན་རེད། ཆོས་ལུགས་ཡིན་ནའང་རེད། ག་རེ་ཡིན་ནའང་རྡོག་རྩ་ཆིག་སྒྲིལ་དགོས་པ་རེད་མ་གཏོགས་སྣང་བ་གང་དྲན་བྱས་ནས་དབྱེ་བ་འདྲ་པོ་མང་པོ་ཕྱིན་པ་ཡིན་ན་ང་ཚོའི་ནུས་སྟོབས་ཉམས་འགྲོ་བ་རེད། དེར་བརྟེན་ང་ཚོས་ནུས་པ་གཅིག་ཏུ་སྒྲིལ་དགོས་པ་དེ་གལ་ཆེ་ཤོས་རེད་འདུག ཅེས་གསུངས་སོང་།
ཡང་ཁོང་གིས། ༧རྒྱལ་བ་རིན་པོ་ཆེ་དགོངས་པ་འཚོམ་དང་མ་འཚོམ་དང་། ཐུགས་ཕམ་བྱུང་དང་མ་བྱུང་གི་གནས་ཚུལ་མིན་པར་ཁོང་གི་བཀའ་དྲིན་མ་བརྗེད་པའི་ཐོག་ནས་ཁོང་གི་བསླབ་བྱ་རྣམས་ལག་ལེན་བསྟར་དགོས་ཀྱི་ཡོད་པ་དང་། མ་འོངས་པར་༧རྒྱལ་བ་རིན་པོ་ཆེ་སྐུ་མ་བཞུགས་པའི་སྐབས་ཤིག་བྱུང་བ་ཡིན་ནའང་། ཁོང་གི་བསླབ་བྱ་རྣམས་ང་ཚོས་ལག་ལེན་བསྟར་དགོས་ཀྱི་ཡོད་པས་དེ་གཙོ་བོ་སེམས་ལ་འཛིན་དགོས་སྐོར་གསུངས་སོང་།
སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་ནས་བོད་ནང་གི་ཛ་དྲག་གནས་སྟངས་ངོ་སྤྲོད་དང་སྦྲགས་གསུངས་དོན། བོད་ནང་གི་བོད་མི་ཚོ་དཀའ་ངལ་ལས་སྐྱབས་ཐུབ་པ་ཞིག་དང་། བོད་ནང་གི་གནས་སྟངས་དེ་ཚོ་རང་དགར་མ་བཞག་པར་རྒྱལ་སྤྱིའི་སྡིངས་ཆའི་སྒང་སླེབ་ཐུབ་པ་དང་། བསླེབས་པ་ཙམ་མ་ཟད་སེམས་འགུལ་ཐེབས་ཐུབ་པ་ཞིག་དང་། བོད་ནང་གི་དཀའ་ངལ་ཐོག་སྐད་ཆ་བཤད་ཐུབ་པ་ཞིག་ང་ཚོས་བཟོ་དགོས་ཀྱི་ཡོད་པ་རེད། དེ་འདྲ་ཡིན་དུས། བོད་ཀྱི་གཞོན་ནུ་ལྷན་ཚོགས་ལྟ་བུར་མཚོན་པ་ཡིན་ན། ལས་འགུལ་ཤུགས་ཆེན་པོ་སྤེལ་གྱི་ཡོད་པ་དང་། སྤེལ་བ་ཙམ་དུ་མ་ཟད་ལས་འགུལ་དེ་ཚོར་རྒྱལ་སྤྱིའི་ནང་ལོགས་ནས་གདེང་འཇོག་ཆེན་པོ་བཞག་སྟེ་སེམས་འགུལ་ཐེབས་ཐུབ་པ་དེ་འདྲ་བྱུང་ཡོད་པ་རེད། དེ་བཞིན་ང་ཚོ་བཙན་བྱོལ་གྱི་ནང་ལོགས་ལ་ཡིན་ནའང་དབུས་སའི་རྒྱུན་ལས་རྣམ་པས་སྐུ་ལས་བསྐྱོན་ཏེ། སྤྱི་ཚོགས་བདེ་དོན་གྱི་གནས་སྟངས་ཐོག་ལའང་ཞབས་ཞུ་ཞུ་ཡི་ཡོད་པ་རེད། གཞོན་ནུ་ལྷན་ཚོགས་ཀྱི་སྒྲིག་འཛུགས་མགོ་བཙུགས་ནས་ད་ལྟའི་བར་དུ་ལོ་ ༥༠ ལ་ཉེ་བ་ཆགས་འགྲོ་ཡི་ཡོད་པ་དང་། དེའི་རིང་ལ་དབུས་སའི་རྒྱུན་ལས་ཀྱི་ཕྱག་ལས་གནང་མཁན་གྱི་ནང་ནས་ལྷག་བསམ་དང་ཀུན་སློང་ལ་འགྱུར་བ་མེད་པའི་ཐོག་ནས་ཕྱག་ལས་མཐའ་འཁྱོལ་བ་ཙམ་མ་ཟད། ད་ལྟའི་བོད་མིའི་སྒྲིག་འཛུགས་ལ་ཞབས་ཞུ་ཞུ་མཁན་བཀའ་བློན་རྣམ་པའི་ནང་དུ་ཡིན་ན་འདྲ། སྤྱི་འཐུས་ནང་དུ་ཡིན་ནའང་འདྲ། ལས་བྱེད་ནང་ལོགས་ལ་ཡིན་ནའང་རེད་རིམ་པ་མང་པོར་ཕེབས་བསྡད་ཡོད་པ་དང་། དེ་ཚོའི་གྲས་རྣམས་ལྷག་བསམ་དང་རྒྱལ་སྤྱིའི་གནས་སྟངས་ཐོག་གང་ལ་གང་འཚམ་གྱིས་མཁྱེན་རྟོགས་ཡོད་མཁན། ནུས་པ་ཐོན་ཐུབ་མཁན་གྱི་མི་སྣ་སྐྱེད་སྲིང་བྱས་ཡོད་པ་རེད། དེ་འདྲ་ཡིན་དུས་གཞོན་ནུ་ལྷན་ཚོགས་ཀྱི་སྒྲིག་འཛུགས་འདི་རྩ་ཆེན་པོ་ཞིག་དང་གལ་ཆེན་པོ་ཞིག་ཡིན་ལ། དེ་ཚོས་ཕྱག་ལས་གནང་བཞག་པ་དེ་ཚོར་ང་ཚོས་དགའ་བ་སྒོམ་དགོས་པའི་གནས་སྟངས་ཤིག་ཆགས་བསྡད་ཡོད་པ་རེད། ཅེས་གསུངས་སོང་།
ཡང་ཁོང་གིས། སྤྱི་ཚོགས་ནང་བསམ་ཚུལ་མ་འདྲ་བ་དང་ལས་འགུལ་མ་འདྲ་བ་ཡོང་ཆོག་གི་ཡོད་སྟབས། གཅིག་གིས་གཅིག་ལ་གུས་ཞབས་དང་བརྩི་བཀུར་ཞུ་དགོས་ལ། གནས་སྟངས་ག་རེ་ཡིན་ནའང་བོད་མི་རིགས་ལ་ཕན་པ་ཞིག་དང་། བོད་ཀྱི་མ་འོངས་པར་ཕན་པ་ཞིག་ཡིན་ན་དེ་ལ་ཞབས་འདེགས་གནང་ཐུབ་པ་ཞིག་ལ་ང་ཚོས་འབད་བརྩོན་བྱེད་དགོས་པ་དེ་གནད་འགག་ཅིག་ཆགས་ཀྱི་ཡོད་པར་བརྟེན། དབུ་མའི་ལམ་གྱི་ཐོག་ནས་བོད་མིའི་སྒྲིག་འཛུགས་ཀྱི་ལངས་ཕྱོགས་དང་མཐུན་པ། ༧སྐྱབས་མགོན་རིན་པོ་ཆེའི་དགོངས་གཞི་དང་མཐུན་པའི་ཞབས་འདེགས་གང་ལེགས་ཞུ་ཐུབ་ན་བརྒྱན་ཡིན་སྐོར་གསུངས་སོང་།
མཛད་སྒོའི་ཐོག་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་བསྟན་འཛིན་འཇིགས་མེད་ལགས་ཀྱིས། དབུས་རྒྱུན་སྐབས་བཅོ་ལྔ་པས་རྩིས་ལེན་སྐབས་གཅིག་ནས་སྒྲིག་འཛུགས་ནང་གི་ས་གནས་ཁ་ཤས་ཤིག་ཕྱིར་ཐོན་པ་དང་། སྤྱི་ཚོགས་ནང་རང་བཙན་རྩོད་པ་དང་། རང་བཙན་བཤད་པ་ཡིན་ན་༧རྒྱལ་བ་རིན་པོ་ཆེའི་བཀའ་དང་འགལ་གྱི་ཡོད་པ་རེད་ཟེར་བའི་གནས་སྟངས་ཆགས་ཡོད་པ། དེ་བཞིན་རང་ལུས་མེར་སྲེག་གི་གཙོས་པའི་བོད་ནང་གི་གནས་སྟངས་ཧ་ཅང་ཛ་དྲག་ཅིག་གི་འོག་ཡོད་སྐབས་དབུས་རྒྱུན་རྣམས་འོས་འདེམས་བྱུང་ཡོད་ཀྱང་། ལྷག་བསམ་བརྟན་པོས་བོད་ནང་གི་དཀའ་ངལ་སེམས་ལ་བཞག་སྟེ་མཐར་ཐུག་གི་དམིགས་ཡུལ་ལ་དོ་ཁུར་བླངས་བར་བརྟེན། ད་ལྟའི་ཆར་བོད་ཀྱི་གཞོན་ནུ་ལྷན་ཚོགས་ཀྱི་སྒྲིག་འཛུགས་བརྟན་པོ་དང་ཧྲ་ཏག་ཏག་ཡོད་ཅེས་ཞུ་ཐུབ་ཀྱི་ཡོད་ལ། འདས་པའི་ལོ་གསུམ་ནང་དབུས་སྤྱི་ཁྱབ་རྒྱུན་ལས་རྣམ་པས་འབད་བརྩོན་ཡོད་རྒུ་རྩལ་སྤུག་བྱས་ཏེ། ས་གནས་ཁག་བརྒྱད་སྒྲིག་འཛུགས་ནས་ཕྱིར་ཐོན་པ་དེའི་ནང་ནས་ས་གནས་གཞོན་ནུ་གཉིས་དབུས་སྤྱི་ཁྱབ་རྒྱུན་ལས་ཁང་གི་ཁོངས་སུ་ཆིག་སྒྲིལ་བྱས་ཏེ་ཕྱིར་བསླེབས་ཡོད་པ་དང་། ཐེངས་འདིའི་ཚོགས་ཆེན་ཐོག་མོན་གྷོ་ས་གནས་གཞོན་ནུ་དང་སྦང་ལོར་ས་གནས་གཞོན་ནུ་མཉམ་ཞུགས་བྱས་ཡོད་པ་དེར་ཐུགས་རྗེ་ཆེ་ཞུ་རྒྱུ་དང་། ཚོགས་ཆེན་ནང་མཉམ་ཞུགས་གནང་བ་དེ་བཟང་སྤྱོད་ཀྱི་རྣམ་པ་ཞིག་ལ་ངོས་འཛིན་བྱེད་བཞིན་ཡོད་ལ། དེ་མིན་ཐེངས་འདིའི་ཚོགས་ཆེན་ཐོག་ནེའུ་ཡོག་དང་ནེའུ་ཇར་སི་ས་གནས་གཞོན་ནུའི་སྐུ་ཚབ་ཀྱང་མཉམ་ཞུགས་གནང་ཡོད་སྐོར་དང་། འདས་པའི་ཉམས་མྱོང་ལ་གཞིགས་ན་ཆིག་སྒྲིལ་དེ་སྟོབས་ཤུགས་ཡིན་པ་དང་། ཁ་འཐོར་ནས་སྡོད་པ་དེ་ཕམ་ཉེས་ཤིག་ཡིན་པ་གསལ་པོ་ཡིན་སྟབས། མ་འོངས་པར་འཐབ་རྩོད་གནས་དགོས་པ་དང་། འཐབ་རྩོད་གནས་པར་སྒྲིག་འཛུགས་ཧྲ་ཏག་ཏག་དགོས་པ་དེ་གལ་ཆེན་པོ་ཡིན་སྟབས། སོ་སོ་སྒེར་ལས་སྒྲིག་འཛུགས་གལ་ཆེན་པོ་རྩི་བ་དང་། སྒྲིག་འཛུགས་ལས་འཐབ་རྩོད་གལ་ཆེན་པོ་རྩི་རྒྱུ་དེ་གལ་ཆེན་ཞེ་དྲག་ཡིན་སྐོར་བརྗོད་སོང་།
ཡང་ཁོང་གིས། ཉིན་དྲུག་གི་ཚོགས་ཆེན་རིང་གཙོ་བོ་བོད་ནང་གི་གནད་དོན་ཐོག་ལ་བགྲོ་གླེང་གནང་རྒྱུ་ཡིན་ལ། ལམ་ག་གསར་པ་དང་འཆར་གཞི་གསར་པ་ཅི་དགོས་ཐོག་བསམ་ཚུལ་གསར་པ་ཡོང་བར་རེ་བ་བྱེད་ཀྱི་ཡོད་པ་དང་། དེ་བཞིན། སྲིད་སྤྱིའི་འོས་བསྡུའི་སྒྲིག་གཞི་བསྐྱར་བཅོས་ཐད་ཚོགས་བཅར་བ་རྣམས་ཀྱིས་བགྲོ་གླེང་བྱས་ཏེ་བོད་མིའི་སྒྲིག་འཛུགས་ལ་བསམ་ཚུལ་འབུལ་རྒྱུ་དང་། ལྷག་པར་དུ་ཐེངས་འདིའི་ཚོགས་ཆེན་གྱི་ཉིན་མཐའ་མར་དབུས་རྒྱུན་གསར་འདེམས་བྱ་རྒྱུ་ཡིན་ལ། དབུས་རྒྱུན་ཟེར་དུས་སྒྲིག་འཛུགས་དེའི་ངོ་གདོང་དེ་ཆགས་བསྡད་ཡོད་སྟབས། ཚོགས་བཅར་བ་རྣམ་པས་ཚོགས་ཆེན་གྱི་ཉིན་དང་པོ་ནས་བཟུང་དབུས་རྒྱུན་ཚད་ལྡན་ཞིག་འོས་འདེམས་ཡོང་བར་དོ་སྣང་སྤྲད་དེ་གྲ་སྒྲིག་ཨང་གསར་དགོས་སྐོར་བརྗོད་སོང་།
ཐེངས་འདིའི་ཚོགས་ཆེན་དེ་རིང་ཕྱི་ཚེས་ ༢༩ ནས་ཕྱི་ཟླ་ ༩ ཚེས་ ༣ ཉིན་བར་དུ་འཚོགས་བཞིན་ཡོད་པ་དང་། ཚོགས་ཆེན་ཐོག་གཞོན་ནུའི་དབུས་ས་གཉིས་ཀྱི་ལས་བསྡོམས་དང་རྩིས་ཁྲར་ཞིབ་བཤེར་གནང་རྒྱུ་དང་། ཚོགས་ཆེན་སྐབས་ ༡༥ པའི་གྲོས་ཆོད་ཁག་ལ་ཞིབ་བཤེར་དང་འབྲེལ་མཇུག་སྐྱོང་ཡོང་ཐབས། དེ་བཞིན། བོད་རང་བཙན་སླར་གསོའི་ལས་འགུལ་ཁག་སྔར་ལྷག་ནུས་སྟོབས་གོང་འཕེལ་གཏོང་ཕྱོགས་དང་། རྒྱ་གཞུང་གིས་བོད་ཀྱི་ངོ་བོ་དང་ཁོག་ཡུག་ལ་ཉེན་ཚབས་ཆེ་བའི་ལས་གཞི་སྤེལ་པར་གདོང་ལེན་བྱ་ཕྱོགས་ཇི་དགེ། པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་གཙོས་པའི་བོད་ཀྱི་ཆབ་སྲིད་བཙོན་པ་རྣམས་མྱུར་ཏུ་ཀློད་གྲོལ་ཡོང་ཆེད་དང་། རང་ལུས་མེར་སྲེག་གནང་མཁན་རྣམ་པའི་གཙོས་རྒྱལ་གཅེས་དཔའ་བོ་དཔའ་མོ་ཚོའི་མངོན་འདོད་དང་ཞལ་ཆེམས་སྒྲུབ་ཐབས་ཅི་དགེ། གཞན་ཡང་། ༧གོང་ས་མཆོག་གི་སྐུ་ཕྱྭ་དང་བོད་ཀྱི་ཆོས་དང་རིག་གཞུང་གཅེས་འཛིན། དམངས་གཙོའི་གོ་རྟོགས་སྤེལ་ཕྱོགས། སྤྱི་ཚོགས་ཞབས་ཞུའི་ལས་དོན། དེ་བཞིན། གཞོན་ནུའི་སྒྲིག་འཛུགས་སྲ་བརྟན་གཏོང་ཐབས་བཅས་ཀྱི་ཐོག་བགྲོ་གླེང་གནང་བཞིན་ཡོད་འདུག
གསར་འགོད་པ། པདྨ་མཚོ།
