ཉོན་མོངས་ཀྱི་གཉེན་པོར་མ་ཕྱིན་ན་སངས་རྒྱས་པའི་ཆོས་དེ་མིང་དོན་མཚུངས་པ་མ་རེད།

དེ་རིང་སྔ་དྲོའི་ཆུ་ཚོད་ ༨།༣༠ སྟེང་བཞུགས་སྒར་ཐེག་ཆེན་གཙུག་ལག་ཁང་དུ་སེང་གྷ་པོར་བོད་ཀྱི་ནང་བསྟན་ལྟེ་གནས་ཁང་ (Singapore Tibetan Buddhism Centre) གི་གོ་སྒྲིག་འོག ༧གོང་ས་མཆོག་གིས་དེ་རིང་ཚེས་ ༢༩ ནས་ཟླ་རྗེས་མའི་ཕྱི་ཚེས་ ༡ ཉིན་བར། སྔ་དྲོའི་ཆུ་ཚོད་ ༨།༣༠ ནས་ཉིན་གུང་ཆུ་ཚོད་ ༡ བར་ལྷོ་ཨེ་ཤ་ཡའི་ནང་པའི་ཡུལ་གྲུ་ཁག་གཙོས་པའི་འཛམ་གླིང་ཤར་ནུབ་ནས་ཕེབས་པའི་དད་ལྡན་སེར་སྐྱ་མི་མང་ལ་ལོ་སྔོན་མའི་གསུང་ཆོས་ཀྱི་འཕྲོས་དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་དབུ་མ་རིན་ཆེན་ཕྲེང་བའི་ལེའུ་གཉིས་པ་ནས་གསུང་ཆོས་དབུ་འཛུགས་གནང་སོང་།

གསུང་ཆོས་གོ་སྒྲིག་ཚོགས་ཆུང་གི་འགན་འཛིན་ལྕམ་ཝི་ནི་ (Wee Nee) ལགས་ཀྱིས་འགྲེན་བརྗོད་གནང་དོན་ལྟར་ན། ད་ལོའི་གསུང་ཆོས་ཐོག་ཝེ་ཋི་ནམ་དང་ཧྥེ་ལེ་ཕེན། མ་ལེ་ཞི་ཡ་དང་སེན་གྷ་པོར། ཐའེ་ཝན་དང་རྒྱ་ནག ཀོ་རི་ཡ་སོགས་ནས་ཕེབས་པའི་དད་ལྡན་ཆོས་ཞུ་བ་མི་གྲངས་ ༡༡༠༠ དང་བོད་རིགས་གཙོས་པའི་འཛམ་གླིང་ཤར་ནུབ་ནས་ཕེབས་པའི་སེར་སྐྱ་མི་མང་ ༥༠༠༠ ལྷག་བཅས་ཁྱོན་ཆོས་ཞུ་བ་ ༦༡༠༠ ལྷག་འཛོམས་ཡོད་པ་དང་། ཉིན་རྒྱབ་ཆུ་ཚོད་ ༢ ནས་ ༦ བར་སེང་གྷ་པོར་གྱི་ཕྱི་ལུགས་སྨན་བཅོས་ཞབས་ཞུ་ཁང་ཞིག་གིས་ནད་པ་ཉམ་ཐག་ཚོར་རིན་མེད་ཐོག་ནད་གཞིར་བརྟག་དཔྱད་དང་སྨན་བཅོས་བྱེད་ཀྱི་ཡིན་འདུག

གསུང་ཆོས་དབུ་འཛུགས་ཐོག་༧གོང་ས་མཆོག་གིས་ཆོས་ཞུ་བ་ཚོར་འཚམས་འདྲི་དང་འབྲེལ། ད་རེབ་འཛམ་གླིང་ཤར་ནུབ་ཀྱི་ནང་བའི་ཡུལ་གྲུ་ཁག་མང་པོ་ཞིག་གི་མི་མང་འདིར་འཛོམས་ཡོད་པ་རེད། དེ་རིང་ང་ཚོ་འདིར་འཛོམ་རྒྱུ་དེ་ལོ་ཤས་གོང་ནས་མགོ་བཙུགས་པ་རེད། ལོ་རེ་ནས་ལོ་རེར་ནང་ཆོས་ལ་དོ་སྣང་བྱེད་མཁན་མང་དུ་འགྲོ་བ་དང་། ང་ཚོ་འཛོམ་རྒྱུ་ཡང་མང་དུ་འགྲོ་བའི་བཟོ་འདྲ་བོ་ཞིག་འདུག དེ་རིང་འདིར་མི་ཕོན་ཆེན་པོ་ཞིག་ཕེབས་འདུག ཁྱེད་རང་ཚོ་འགྲིམ་འགྲུལ་དང་བཞུགས་ས་གང་ཅིའི་ཐོག་ནས་སྐུ་ངལ་ཡོད་པ་རེད་དེ། ཡིན་ནའང་ཁྱེད་རང་ཚོས་ནང་ཆོས་ལ་དོ་སྣང་ཆེན་པོ་གནང་སྟེ་འདི་ལྟར་ཕེབས་པ་རེད། ངོས་ཀྱིས་ཁྱེད་རང་ཚོ་ཚང་མར་འཚམས་འདྲི་ཞུ་རྒྱུ་ཡིན། ཞེས་གསུངས་སོང་།

དེའི་རྗེས་༧གོང་ས་མཆོག་གིས་དད་ལྡན་མི་མང་ལ་ནང་ཆོས་ངོ་སྤྲོད་གནང་དོན། ངོས་ཀྱིས་ནམ་རྒྱུན་ནང་ཆོས་ངོ་སྤྲོད་བྱེད་རྒྱུ་དེ་གལ་ཆེན་པོར་བརྩི་བཞིན་ཡོད། ནང་ཆོས་ངོ་འཕྲོད་ནས་ནང་ཆོས་ཉམས་སུ་ལེན་པ་ཞེས་རིམ་པ་གཉིས་བྱས་ནས་ཤོད་ཀྱི་ཡོད། ད་རེབ་འདིར་ནང་ཆོས་ངོ་སྤྲོད་དང་ལག་ལེན་གྱི་རིམ་པ་གཉིས་ཏེ། མགོན་པོ་ཀླུ་སྒྲུབ་ཀྱིས་མཛད་པའི་དབུ་མ་རིན་ཆེན་ཕྲེང་བའི་སྐོར་རེད། མགོན་པོ་ཀླུ་སྒྲུབ་རྒྱ་གར་འཕགས་པའི་ཡུལ་གྱི་མཁས་པའི་དབང་པོ་མང་པོ་ཞིག་གིས་གཙུག་ཏུ་བཀུར་བ་ཞིག་ཆགས་ཡོད། དེའི་རྒྱུ་མཚན་ཤེར་ཕྱིན་གྱི་བརྗོད་བྱ་དངོས་དོན་སྟོང་ཉིད་ཀྱི་རིམ་པ་དང་སྦས་དོན་དངོས་དོན་གྱི་རིམ་པ་ཞེས་གཉིས་དང་། དངོས་དོན་སྟོང་ཉིད་ཀྱི་རིམ་པའི་སྐོར་དེ་ཀླུ་སྒྲུབ་ལ་སྐབས་སུ་བབ་པ་ཞིག་ཡིན་སྟབས། ཀླུ་སྒྲུབ་ཀྱིས་རིག་ཚོགས་དྲུག་ལ་སོགས་པ་མཛད་པ་རེད།

ཤེར་ཕྱིན་གྱི་དངོས་དོན་སྟོང་ཉིད་ཀྱི་རིམ་པ་དེ་རྩལ་འདོན་བྱས་ནས་གཏན་ལ་ཕབ་པ་ཞིག་རེད། དེ་འདྲའི་ཤེར་ཕྱིན་གྱི་དངོས་དོན་སྟོང་ཉིད་ཀྱི་རིམ་པའི་སྐོར་དེ་མཁས་པ་གྲུབ་ཐོབ་སྨྲ་བའི་རྣམ་དཔྱོད་ཀྱི་ཐོག་ནས་ལྟ་གྲུབ་དེ་འདྲ་གསུངས་པ་ཙམ་མ་ཡིན་པར། ང་རང་ཚོ་འཕུང་བྱེད་དེ་ཉོན་མོངས་ཡིན་སྟབས། ཆོས་ཆོས་སུ་སོང་བ་ཞིག་དང་། ལྷག་པར་དུ་སངས་རྒྱས་པའི་ཆོས་སངས་རྒྱས་པའི་ཆོས་སུ་སོང་བ་ཞིག་ཡོང་བ་ལ་དངོས་དང་བརྒྱུད་པའི་སྒོ་ནས་ཉོན་མོངས་ཀྱི་གཉེན་པོར་འགྲོ་བ་ཞིག་དང་། ཉོན་མོངས་ཀྱི་ཤུགས་ཆུང་དུ་གཏོང་བ་དང་། ཉོན་མོངས་ཀྱི་མགོ་མནན་ཏེ་རིམ་གྱིས་ཉོན་མོངས་འཇོམ་ཐུབ་པ་ཞིག་དགོས་ཀྱི་ཡོད། དེ་ལ་ཆོས་དཀོན་མཆོག་ཟེར་གྱི་ཡོད་པ་རེད། ཉོན་མོངས་ཀྱི་གཉེན་པོར་མ་ཕྱིན་ན་སངས་རྒྱས་པའི་ཆོས་དེ་མིང་དོན་མཚུངས་པ་ཞིག་ཆགས་ཀྱི་ཡོད་པ་མ་རེད། དེར་བརྟེན། སྟོང་པ་ཉིད་ཀྱི་ལྟ་བའི་སྐོར་དེ་ཤེར་ཕྱིན་གྱི་དངོས་བསྟན་གྱི་བརྗོད་བྱ་རེད་ལ། དེའི་སྐོར་རྩལ་དུ་བཏོན་ནས་ཀླུ་སྒྲུབ་ཀྱིས་འགྲེལ་བཤད་ཞིབ་ཕྲ་བསྐྱོན་ཡོད་པ་དེ་གཙོ་བོ་དབུ་མ་རྩ་བ་ཤེས་རབ་རེད། དབུ་མ་རྩ་བ་ཤེས་རབ་རྒྱ་ཡིག་ནང་སྔ་མོ་ནས་བསྒྱུར་ཡོད་པ་རེད་ལ། དཔལ་ལྡན་ཟླ་བ་གྲགས་པའི་དབུ་མ་འཇུག་པ་ལ་སོགས་པ་དེ་ཚོའི་གྲས་མང་པོ་ཞིག་རྒྱ་ཡིག་ནང་ཡོད་པ་རེད། དེར་བརྟེན། རྒྱ་ཡིག་དང་འབྲེལ་བ་ཡོད་མཁན་ཕལ་ཆེར་ཀོ་རི་ཡ་དང་ཝེ་ཋི་ནམ། ཉི་ཧོང་སོགས་རྩ་བ་ཤེས་རབ་དང་འབྲེལ་བ་ཆགས་ཡོད།

བོད་ཡིག་ནང་མགོན་པོ་ཀླུ་སྒྲུབ་དེ་རྒྱལ་བ་གཉིས་པ་ལྟ་བུར་བརྩིས་བསྡད་ཡོད། དེ་ཁོང་གི་གཞུག་ལ་བལྟས་ནའང་དངོས་གནས་རྒྱལ་བ་གཉིས་པ་ལྟ་བུ་ཆགས་བསྡད་ཡོད་པ་རེད། དེ་འདྲ་ཡིན་དུས་གཙོ་བོ་ཀླུ་སྒྲུབ་རིག་ཚོགས་དྲུག་ཟེར་ནས་གཙོ་བོ་རྩ་བ་ཤེས་རབ་རེད། དེ་ནས་ཕར་འཕྲོས་ཏེ་སྟོང་ཉིད་བདུན་བཅུ་པ་སོགས་རེད། སྟོང་ཉིད་ཀྱི་ལྟ་བ་དེ་ཐམས་ཅད་མཁྱེན་པའི་གོ་འཕངས་བསྒྲུབ་པའི་ཐབས་ཙམ་དུ་མ་ཟད། ཐར་བའི་གོ་འཕངས་བསྒྲུབ་པ་ལའང་སྟོང་ཉིད་ཀྱི་ལྟ་བ་དགོས་པ་རེད་ཅེས་རིག་པ་དྲུག་བཅུ་པའི་ནང་གསུངས་ཡོད་པ་རེད། དེ་ནས་ནམ་རྒྱུན་ཡང་ལུགས་ཀྱི་བསྟན་བཅོས་ཞེས་དེ་འདྲ་གསུང་ཚུལ་ཡོད། དབུ་མ་རིན་ཆེན་ཕྲེང་བ་དེ་རྒྱལ་པོ་ཞིག་ལ་གདམས་པའི་སྤྲིངས་པའི་འཕྲིན་ཡིག་གི་བཟོ་འདྲ་བོ་ཞིག་ཆགས་བསྡད་ཡོད་པ་རེད། དེའི་ལེའུ་དང་པོ་དེ་མངོན་མཐོ་བསྒྲུབ་པའི་ཐབས་དང་ངེས་ལེགས་བསྒྲུབ་པའི་ཐབས་ཞེས་དེ་གཉིས་གསལ་བོ་བྱས་ནས་གསུངས་ཡོད་པ་རེད། དེ་གཏིང་ཟབ་པོ་ཞེ་དྲགས་འདུག དེའི་གཤམ་དུ་བསླབ་བྱ་མང་པོ་ཡོད་པ་རེད། དེའི་གཤམ་དུ་བྱང་ཆུབ་སེམས་ཀྱི་ཉམས་ལེན་སྐོར་སྟོན་གྱི་ཡོད། དེར་བརྟེན། ངོས་ཀྱིས་གཞུང་དེ་ཁྱབ་ཆེན་པོ་འདྲ་བོ་བྱུང་ན་ཕན་ཐོགས་ཡོང་གི་རེད་དྲན་བསྡད་ཡོད། རིན་ཆེན་ཕྲེང་བ་ན་ནིང་ནས་མགོ་བཙུགས་ཏེ་ལེའུ་དང་པོ་དེ་ཟིན་ནས་ད་ལྟ་ལེའུ་གཉིས་པ་ནས་མར་སྟོན་རྒྱུ་རེད་དེ། ད་རེས་འདིར་ཁྱེད་རང་ཚོའི་མང་པོ་ཞིག་ཐེངས་དང་པོ་ཡིན་པའི་བཟོ་འདྲ་བོ་འདུག དེ་བས་དབུ་མ་རིན་ཆེན་ཕྲེང་བའི་མགོ་ནས་མར་ཞུས་ན་དྲན་བྱུང་། བརྗོད་བྱ་གཙོ་ཆེ་བ་ཁག་རོམ་ཙམ་ཞུས་ནས་འགྲོ་དགོས། ཞེས་གསུངས་ཏེ་གསུང་ཆོས་མགོ་འཛུགས་གནང་སོང་།

གསར་འགོད་པ། པདྨ་རྒྱལ།