གཞོན་ནུའི་སྒྲིག་གཞི་མང་མོས་ཀྱིས་རང་སོར་བཞག་འདུག

བོད་ཀྱི་གཞོན་ནུ་ལྷན་ཚོགས་ཀྱི་ཚོགས་ཆེན་ཐོག་སྒྲིག་གཞི་དོན་ཚན་བཞི་པའི་ནང་གསེས་དང་པོ་དང་བཞི་པ་བསྐྱར་བཅོས་ཐོག་བགྲོ་གླེང་གནང་བརྒྱུད་མང་མོས་ཀྱིས་རང་སོར་འཇོག་རྒྱུ་གཏན་འབེབས་བྱུང་འདུག

བོད་ཀྱི་གཞོན་ནུ་ལྷན་ཚོགས་ཀྱི་ཚོགས་ཆེན་ཐེངས་ ༡༥ པའི་ཐོག་གྲོས་ཆོད་གཏན་འབེབས་བྱུང་བ་ལྟར། ཐེངས་འདིའི་ཚོགས་ཆེན་ཐོག་བོད་ཀྱི་གཞོན་ནུ་ལྷན་ཚོགས་ཀྱི་སྒྲིག་གཞི་དོན་ཚན་བཞི་པའི་ནང་གསེས་དང་པོ་སྟེ། གཞིས་བྱེས་བོད་མི་ཡོངས་ཀྱི་བློ་གཏད་རེ་ཡུལ་གཅིག་ཉིད་༸གོང་ས་༸སྐྱབས་མགོན་ཆེན་པོའི་དབུ་ཁྲིད་ལམ་སྟོན་ཡང་དག་མུན་སེལ་འོག་ཤར་བསྐྱོད་བྱ་རྒྱུ་གཞི་རྩར་བཟུང་ཐོག བོད་གཞུང་འབངས་ཀྱི་སྤྱི་དོན་ལ་ལྷག་བསམ་འཁུར་ལེན་རྨང་གཞིར་འཁྱེར་བ་ཞེས་པ་དེ། གཞིས་བྱེས་བོད་མི་ཡོངས་ཀྱི་བློ་གཏོད་རེ་བཅོལ་ཞུ་ཡུལ་གཅིག་ཉིད་འདི་ཕྱི་ཚེ་རབས་གཏན་གྱི་སྐྱབས་གནས་དང་བཀྲིན་གྱི་བདག་ཉིད་ཆེན་པོ་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་དུས་རྟག་ཏུ་སྤྱི་བོའི་གཙུག་ཏུ་བཀུར་ཞིང་། བོད་ཀྱི་སྤྱི་དོན་ལ་ལྷག་བསམ་འཁུར་ལེན་རྨང་གཞིར་འཁྱེར་རྒྱུ་ཞེས་བསྐྱར་བཅོས་དང་། ནང་གསེས་བཞི་པ་གཞིས་བྱེས་རྒྱ་ཆེའི་བོད་མི་མང་ནས་བོད་རང་བཙན་གྱི་དམིགས་ཡུལ་ངེས་ཅན་ཞིག་བཟུང་སྟེ་དགྲ་བོར་རྒོལ་འཛིང་གི་ལས་འགུལ་དཔེ་བསྔགས་ཀྱི་གནས་སུ་ཡོད་པ་དེ་དག་སྒྲུབ་ཆེད་དཀའ་ངལ་དྭང་ལེན་གྱིས་རང་སྲོག་ཚུན་ལའང་ལྟོས་མེད་ཀྱིས་མདུན་སྐྱོད་བྱ་རྒྱུ་ཞེས་པ་དེ། བོད་ཀྱི་གཞོན་ནུ་ལྷན་ཚོགས་ནས་ཆོལ་གསུམ་གཅིག་ཏུ་སྒྲིལ་བའི་བོད་རང་བཙན་སླར་གསོའི་འཐབ་རྩོད་མུ་མཐུད་བྱ་རྒྱུ་དང་། མ་འོངས་བོད་མིའི་དཀའ་རྙོག་འགྲིག་འཇགས་ཀྱི་མཚམས་སུ་སླེབ་སྐབས། ༧གོང་ས་སྐྱབས་མགོན་ཆེན་པོ་མཆོག་གི་བཀའ་སློབ་དགོངས་དོན་གཞིས་བྱེས་བོད་མི་མང་ཚོགས་ཀྱིས་མཐའ་མའི་ཐག་གཅོད་ཇི་བྱུང་ལ་གུས་བརྩི་རྒྱབ་སྐྱོར་ཞུ་རྒྱུ་ཞེས་བསྐྱར་བཅོས་རགས་ཟིན་ཚོགས་ཐོག་ཏུ་ཕུལ་ཏེ། ཚོགས་བཅར་བ་རྣམས་ཀྱིས་ཉིན་ཕྱེད་ཙམ་གྱི་རིང་གནད་དོན་དེ་གཉིས་ཀྱི་ཐོག་བགྲོ་གླེང་གནང་བ་བརྒྱུད་སྔ་མའི་ཚིག་དོན་རང་སོར་འཇོག་རྒྱུར་མང་མོས་གཏན་འབེབས་བྱུང་།

དེ་སྔོན་གོང་གི་གནད་དོན་གཉིས་ཀྱི་ཐོག་ནས་ས་གནས་ཁག་བརྒྱད་གཞོན་ནུའི་སྒྲིག་ཁུངས་ནས་ཕྱིར་ཐོན་ཡོད་པ་དང་། ཉེ་སྔོན་མོན་གྷོ་ས་གནས་དང་སྦང་ལོར་ས་གནས་གཞོན་ནུ་གཉིས་ཕྱིར་སྒྲིག་ཁུངས་སུ་འཛུལ་ཡོད་པ་ལྟར། ཚོགས་བཅར་བ་མོན་གྷོ་ས་གནས་གཞོན་ནུའི་དྲུང་ཆེ་བསྟན་འཛིན་དགེ་ལེགས་ལགས་སུ། སྒྲིག་གཞི་བསྐྱར་བཅོས་ཀྱི་གྲོས་གཞི་གྲོས་འཆར་དེ་ལག་བསྟར་གཏན་འབེབས་མ་ཐུབ་པར་དགོངས་ཚུལ་ཅི་ཡོད་དྲིས་པར་ཁོང་གིས། མོན་གྷོ་བསྐྱར་བཅོས་ཀྱི་གྲོས་གཞི་གྲོས་འཆར་ཟགས་པ་དེར་བློ་ཕམ་དང་སྦྲགས། ཐག་གཅོད་དེར་འདོད་པ་ཁྱོན་ནས་མ་བྱུང་། ཞེས་བརྗོད་བྱུང་།

དེ་བཞིན་ནིའོ་ཡོག་དང་ནིའུ་ཇར་སི་ས་གནས་གཞོན་ནུའི་ཚོགས་གཙོ་བསྟན་འཛིན་སྐལ་ལྡན་ལགས་ལ་དགོངས་ཚུལ་ཅི་ཡོད་དྲིས་པར། དང་ཐོག་སྒྲིག་གཞི་དོན་ཚན་བཞི་པའི་ནང་གསེས་དང་པོར་བསྐྱར་བཅོས་དང་། ནང་གསེས་བཞི་པ་དེ་རང་སོར་གནས་ཐུབ་ན་བསམ་ཡོད་ཀྱང་། དམངས་གཙོའི་འགྲོ་ལུགས་ཡང་དག་ཅིག་གི་ཐོག་ནས་ནང་གསེས་དང་པོ་དང་བཞི་པ་གཉིས་ཀ་རང་སོར་འཇོག་རྒྱུ་མང་མོས་ཐག་གཅོད་གནང་ཟིན་པ་དེར་རྒྱབ་སྐྱོར་ཡོད་པ་དང་། མ་འོངས་པར་སྒྲིག་གཞི་བསྐྱར་བཅོས་འདི་ཡང་བསྐྱར་ཕལ་ཆེར་འཁུར་ཡོང་མི་དགོས་སྐོར་བརྗོད་བྱུང་།

ཐེངས་འདིའི་ཚོགས་ཆེན་ཐོག་གྲོས་ཆོད་དོན་ཚན་དགུ་བཞག་ཡོད་པའི་གྲོས་ཆོད་དོན་ཚན་གསུམ་པ་བོད་ཀྱི་གཞོན་ནུ་ལྷན་ཚོགས་ཀྱི་དམིགས་ཡུལ་དང་འབྲེལ་བའི་ཆབ་སྲིད་ལས་འགུལ་སྤེལ་ཕྱོགས་ཇི་དགེའི་སྐོར།
ཀ༽ བོད་ཀྱི་གཞོན་ནུ་ལྷན་ཚོགས་ཀྱི་དམིགས་ཡུལ་གཞིར་བཞག་ཐོག བོད་རང་བཙན་སླར་གསོའི་ལས་འགུལ་ཁག་སྔར་ལྷག་ནུས་སྟོབས་གོང་འཕེལ་གཏོང་ཕྱོགས། དེ་བཞིན་རྒྱ་གཞུང་གིས་མི་སེར་སྤེལ་བའི་ངན་ཇུས་དང་། གཏེར་ཁ་སྔོག་འདོན་སོགས་བོད་ཀྱི་ངོ་བོ་དང་ཁོར་ཡུག་ལ་ཉེན་ཚབ་ཆེ་བའི་ལས་གཞི་སྤེལ་བཞིན་པར་གཞོན་ལྷན་ནས་གདོང་ལེན་བྱ་ཕྱོགས་ཇི་དགེའི་སྐོར་ལ།

༡༽ བོད་ཀྱི་གཞོན་ནུ་ལྷན་ཚོགས་སྤྱི་ཁྱབ་དབུས་རྒྱུན་ལས་ཁང་གིས་བོད་རང་བཙན་ཡིན་པའི་ཁུངས་ལྡན་ལོ་རྒྱུས་ངོ་སྤྲོད་དང་། བོད་རང་བཙན་འཐབ་རྩོད་ཀྱི་ལས་འགུལ་སྤེལ་ཕྱོགས། དེ་བཞིན་རྒྱལ་ཞེན་དང་མི་རིགས་རིང་ལུགས་ཀྱི་བསམ་བློ་གོང་མཐོར་གཏང་རྒྱུ་བཅས་ཀྱི་ཟབ་སྦྱོང་གནང་རྒྱུ།

༢༽ རྒྱ་དམར་གཞུང་གིས་བོད་ནང་གཏེར་ཁ་སྔོག་འདོན་དང་ཤིང་ནགས་གཅོད་བྲེག གཙང་པོ་ཁ་བསྒྱུར། ཆུ་བོ་སྦག་བཙོག་སོགས་ཁོར་ཡུག་ལ་གཏོར་སྐྱོན་ཚབས་ཆེན་གཏོང་བཞིན་པར་གཞོན་ལྷན་དབུས་ས་གཉིས་ནས་བོད་ཀྱི་ཁོར་ཡུག་སྲུང་སྐྱོབ་ཆེད་གསར་གཏོད་ཀྱི་ལས་འགུལ་སྤེལ་རྒྱུ།

ཁ༽ དགྲ་བོ་རྒྱ་ནག་གི་བཙོན་ཁང་དུ་ཡོད་པའི་༸ཀུན་གཟིགས་པན་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གི་གཙོས་པའི་ཆབ་སྲིད་བཙོན་པ་ཡོངས་རྫོགས་གློད་གྲོལ་ཡོང་ཆེད་དང་། ལྷག་པར་བོད་རྒྱལ་ཁབ་ཀྱི་དོན་དུ་རང་ལུས་མེར་བསྲེགས་གནང་མཁན་རྣམ་པ་གཙོས་རྒྱལ་གཅེས་དཔའ་བོ་དཔའ་མོ་ཚོའི་མངོན་འདོད་དང་། ཞལ་ཆེམས་སྒྲུབ་ཐབས་ཇི་དགེའི་སྐོར།

༡༽ དགྲ་བོ་རྒྱ་དམར་གྱི་བཙོན་ཁང་དུ་ཡོད་པའི་༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གི་གཙོས་པའི་བོད་ཀྱི་ཆབ་སྲིད་བཙོན་པ་ཡོངས་རྫོགས་གློད་གྲོལ་ཡོང་ཆེད་ཉིན་གཅིག་དུས་གཅིག་ཏུ་དབུས་ས་ཐོུང་གིས་གཞི་རྒྱ་ཆེ་བའི་ལས་འགུལ་སྤེལ་རྒྱུ།

༢༽ བོད་རྒྱལ་ཁབ་ཀྱི་དོན་དུ་རང་ལུས་མེར་བསྲེགས་གནང་མཁན་རྣམ་པས་གཙོས་རྒྱལ་གཅེས་དཔའ་བོ་དཔའ་མོ་ཚོའི་མངོན་འདོད་དང་། ཞལ་ཆེམས་བསྒྲུབ་ཐབས་སུ་རྒྱལ་སྤྱིའི་སྲིད་གཞུང་ཁག་དང་གྲོས་ཚོགས་འཐུས་མི་ཁག་ལ་དབུས་ས་གཉིས་ནས་ཞུ་གཏུག་ལས་འགུལ་སྤེལ་རྒྱུ།

༣༽ རྒྱ་དམར་གཞུང་གིས་ཆབ་སྲིད་ཀྱི་དགོས་མཁོའི་འོག་ངོས་འཛིན་བྱས་པའི་པཎ་ཆེན་སྐུ་ཕྲེང་བཅུ་པའི་ཡང་སྲིད་ཡིན་ཟེར་བ་དེར་བོད་ཀྱི་གཞོན་ནུ་ལྷན་ཚོགས་ཀྱིས་ངོས་ལེན་རྩ་བ་ནས་མེད་པའི་གསལ་བསྒྲགས་སྔོན་སོང་ལྟར། ད་ཐེངས་ཀྱི་ཚོགས་ཆེན་འདིའི་ཐོག་ནས་ཀྱང་དེར་ངོས་ལེན་རྩ་བ་ནས་མེད་པ་གསལ་སྟོན་དང་ནན་བརྗོད་བྱ་རྒྱུ་ཡིན།

བོད་ཀྱི་གཞོན་ནུ་ལྷན་ཚོགས་ཀྱི་དམིགས་ཡུལ་དང་འབྲེལ་བའི་ཆབ་སྲིད་ལས་འགུལ་སྤེལ་ཕྱོགས་ཇི་དགེའི་སྐོར།

ཀ༽ བོད་ཀྱི་གཞོན་ནུ་ལྷན་ཚོགས་ཀྱི་དམིགས་ཡུལ་གཞིར་བཞག་ཐོག །བོད་རང་བཙན་སླར་གསོའི་ལས་འགུལ་ཁག་སྔར་ལྷག་ནུས་སྟོབས་གོང་འཕེལ་གཏོང་ཕྱོགས། དེ་བཞིན་རྒྱ་གཞུང་གིས་མི་སེར་སྤེལ་བའི་ངན་ཇུས་དང་། གཏེར་ཁ་སྔོག་འདོན་སོགས་བོད་ཀྱི་ངོ་བོ་དང་ཁོར་ཡུག་ལ་ཉེན་ཚབ་ཆེ་བའི་ལས་གཞི་སྤེལ་བཞིན་པར་གཞོན་ལྷན་ནས་གདོང་ལེན་བྱ་ཕྱོགས་ཇི་དགེའི་སྐོར།

དེ་བཞིན་གྲོས་གཞི་དོན་ཚན་བཞི་པ་༸ གོང་ས་མཆོག་གི་སྐུ་ཕྱྭའི་སྐོར།

ཀ ༽ བོད་མིའི་འདི་ཕྱི་གཉིས་ཀྱི་སྐྱབས་གནས་༸ སྤྱི་ནོར་ ༸ གོང་ས་སྐྱབས་མགོན་ཆེན་པོ་མཆོག་གི་སྐུ་ཕྱྭ་ནི་བོད་ཀྱི་ནུས་སྟོབས་དང་། བོད་མིའི་ཆིག་སྒྲིལ། བདེ་སྐྱིད་ཀྱི་གཞི་རྩར་སོང་། གཞོན་ལྷན་ནས་དེ་འབྲེལ་ལས་དོན་ཞུ་ཕྱོགས་ཇི་དགེའི་སྐོར།

༡༽ རྒྱ་གར་དབུས་སའི་གཞུང་དང་དབུས་བོད་མིིའི་སྒྲིག་འཛུགས་ཀྱི་བདེ་སྲུང་ལྷན་ཁང་སོགས་འབྲེལ་ཡོད་རྒྱལ་ཁབ་ཁག་ནས་༸ རྒྱལ་བའི་སྐུ་ཕྱྭའི་སྲུང་སྐྱོབ་ཐད་ཐུགས་ཁུར་ཆེ་བཞེས་གནང་བར་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་ཆེན་འདིའི་ཐོག་ནས་བཀའ་དྲིན་རྗེས་དྲན་གྱི་ཡི་རངས་བསྔགས་བརྗོད་དང་། སྔར་ལྷག་འགན་འཁུར་དམ་དོན་གནང་སྐྱོང་ཡོང་བའི་འབོད་སྐུལ་ཞུ་སྙན་འབུལ་རྒྱུ།

༢༽ ༸སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་མི་མང་འདུ་འཛོམས་ཆེ་བའི་མཛད་སྒོ་ཁག་ལ་ཆིབས་བསྒྱུར་སྐྱོང་སྐབས་དང་། གསུང་ཆོས་སོགས་བཀྲིན་སྩོལ་སྐབས་བོད་ཀྱི་གཞོན་ནུ་ལྷན་ཚོགས་ཀྱི་དབུས་སའི་རྒྱུན་ལས་དང་། ཚོགས་མི་རྣམས་ནས་སྐུ་ཕྱྭའི་སྲུང་སྐྱོབ་ཆེད་དགོས་མཁོ་ཅི་མཆིས་ལ་འགན་ཁུར་ཞབས་ཞུ་སྔར་ལྷག་ལྷོད་མེད་བསྒྲུབ་རྒྱུ།

ཁ༽ དོལ་རྒྱལ་རྗེས་འབྲངས་པ་ཉུང་ཤས་ཀྱིས་དགྲ་བོ་རྒྱ་དམར་དང་ངན་འབྲེལ་གྱི་སྐུའི་སྲུང་སྐྱོབ་ལ་ཉེན་ཚབས་ཆེ་བར་གདོང་ལེན་བྱ་ཕྱོགས་ཇི་དགེའི་སྐོར།

༡༽ ས་གནས་གཞོན་ལྷན་ཁག་ནས་མཁས་དབང་གདན་ཞུས་ཀྱིས་མི་མང་ནང་དོལ་རྒྱལ་གྱི་གནད་དོན་ཐོག་གསལ་བཤད་དང་གོ་རྟོགས་སྤེལ་རྒྱུ།

༢༽ གཞོན་ལྷན་དབུས་ས་གཉིས་ནས་ཧི་མ་ལ་ཡའི་ཁུལ་གྱི་ནང་པའི་མི་མང་ལ་དོལ་རྒྱལ་གནད་དོན་སྐོར་ལམ་སྟོན་གསལ་བཤད་ཀྱི་ཡིག་ཆ་གང་མང་འགྲེམ་སྤེལ་དང་གོ་རྟོགས་སྤེལ་རྒྱུ།

དེ་བཞིན་གྲོས་གཞི་དོན་ཚན་བརྒྱད་པ་གཞོན་ནུའི་སྒྲིག་འཛུགས་སྲ་བརྟན་སྐོར།
ཀ༽ གཞོན་ལྷན་སྒྲིག་འཛུགས་མུ་མཐུད་སྲ་བརྟན་རྒྱུན་སྐྱོང་ཆེད་དབུས་ས་གཉིས་ནས་འགན་འཁུར་ལས་དོན་བྱ་ཕྱོགས་ཇི་དགེའི་སྐོར།

༡༽ དབུས་སྤྱི་ཁྱབ་རྒྱུན་ལས་ནས་ས་གནས་གཞོན་ནུ་ཁག་ལ་ངེས་པར་དུ་འཚམས་གཟིགས་བྱ་རྒྱུ་དང་། ཉམས་ཆག་སོང་བའི་ས་གནས་ཁག་ཡར་རྒྱས་གཏོང་ཐབས་བྱ་རྒྱུ།

༢ ༽ དབུས་ས་གཉིས་ནས་བོད་དོན་འཐབ་རྩོད་ཀྱི་ལས་འགུལ་ཁག་སྔར་ལྷག་ཚགས་ཚུད་གོང་འཕེལ་ཡོང་ཐབས་སུ་དཔལ་འབྱོར་འདུ་འགོད་ཀྱི་ལས་དོན་ཐོག་ཤུགས་སྣོན་འཕར་མ་རྒྱག་རྒྱུ།

ཁ༽ སྒྲིག་གཞི་སྐྱར་བཅོས། སྒྲིག་གཞི་ལེ་ཚན་བཞི་པའི་ནང་གསེས་ ༡༽དང་༤༽བཅས་ཀྱི་སྐོར།

བོད་ཀྱི་གཞོན་ནུ་ལྷན་ཚོགས་ཀྱི་སྒྲིག་གཞི་ལེ་ཚན་བཞི་པའི་ནང་གསེས་ ༡༽ དང་ ༤༽ པའི་ཐོག་གྲོས་བསྡུར་ལྷག་པོར་གནང་བ་བརྒྱུད་སྐྱར་བཅོས་མི་དགོས་པ་མང་མོས་ཐག་གཅོད་བྱུང་བ་བཅས་རེད་ལ། དེ་བཞིན་ཆོས་དང་རིག་གཞུང་གཅེས་འཛིན་དང་། སྤྱི་ཚོགས་ཞབས་ཞུ་སོགས་ཀྱི་ཐོག་དབུས་ས་གཉིས་ནས་སྔར་ལྷག་འབད་བརྩོན་གནང་རྒྱུ་ཡིན་སྐོར་གྲོས་ཆོད་བཞག་འདུག

གསར་འགོད་པ། པདྨ་མཚོ།