དེ་རིང་སྔ་དྲོའི་ཆུ་ཚོད་ ༩།༣༠ ཡོལ་ཙམ་དུ། དྷ་ས་མཉམ་སྤྲོ་ཁང་(Club house)གི་ཡང་སྟེང་ཚོགས་ཁང་དུ། བོད་ཀྱི་བུད་མེད་ལྷན་ཚོགས་བཙན་བྱོལ་ནང་བསྐྱར་དུ་བཙུགས་ཏེ་ལོ་ངོ་ ༣༢ ཧྲིལ་པོ་འཁོར་བའི་དུས་དྲན་མཛད་སྒོ་ཚོགས་སོང་བ་དང་། མཛད་སྒོའི་ཐོག་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཞོན་ཨཅརྱ་ཡེ་ཤེས་ཕུན་ཚོགས་ལགས་དང་། དམིགས་བསལ་སྐུ་མགྲོན་བཙུན་མའི་ལས་འཆར་གྱི་འགན་འཛིན་དང་བུད་མེད་ལྷན་ཚོགས་ཀྱི་སློབ་སྟོན་པ་བཀའ་ཟུར་རིན་ཆེན་མཁའ་འགྲོ་ལགས། བོད་མི་མང་སྤྱི་འཐུས་ཡེ་ཤེས་སྒྲོལ་མ་ལགས། དེ་བཞིན་ཧིན་བོད་མཛའ་འབྲེལ་ཚོགས་པའི་ཚོགས་གཙོ་སྐུ་ཞབས་ཨ་ཇེ་སིན་མོང་གོ་ཊི་ཡ་ལགས། གཞན་ཡང་། དྷ་ས་ས་གནས་མགོ་འཛིན་ཟླ་བ་རིན་ཆེན་ལགས་དང་། དྷ་ས་ཁུལ་གྱི་གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ་རྣམ་པ་དང་། དེ་བཞིན་བོད་ཀྱི་བུད་མེད་ལྷན་ཚོགས་དབུས་ས་གཉིས་ཀྱི་རྒྱུན་ལས་དང་ཚོགས་མི་བཅས་མི་གྲངས་ ༡༥༠ ཡས་མས་འཛོམས་འདུག
དམིགས་བསལ་སྐུ་མགྲོན་བཀའ་ཟུར་རིན་ཆེན་མཁའ་འགྲོ་ལགས་ཀྱིས་མཛད་སྒོ་དང་འབྲེལ་བའི་གསུང་བཤད་གནང་སྐབ། བོད་པའི་ལུགས་སྲོལ་བྱས་ན་ང་ཚོ་རྒན་འཁོགས་ཡིན། ཁུག་ཀྱོག་ལ་ཁུ་སིམ་པོ་བྱས་ནས་འཇོག་རོགས་གནང་ཟེར་བ་ཞིག་ཡོད་པ་རེད། ཡིན་ནའང་། ང་རང་གིས་བསམ་པ་ཡིན་ན་ང་ཚོ་རྒན་འཁོགས་ཡིན་ཞེས་ཕར་སྡོད་པ་དང་། ཆུང་ཆུང་ཡིན་ཟེར་ནས་གུ་ཡང་བྱེད་པའི་དུས་ཚོད་ཅིག་རྩ་བ་ཉིད་ནས་མ་རེད་བསམ་གྱི་འདུག རྒྱུ་མཚན་གང་ཡིན་ཞུས་ན། ང་ཚོས་རྟག་པར་བོད་ནང་གི་གནས་སྟངས་སྐོར་ལ་བཀའ་མང་པོ་གནང་གི་ཡོད་པ་དང་། ད་ལྟ་གོང་དུ་བཀའ་གནང་བ་ལྟར་བོད་ནང་རང་ལུས་མེར་བསྲེགས་བཏང་བ་དང་འབྲོག་པའི་འཚོ་བར་དཀའ་ངལ་ཡོད་པ་སོགས་ཚང་མས་མཁྱེན་གྱི་ཡོད་པ་རེད། དེ་བཞིན་བཙན་བྱོལ་ནང་ཆ་བཞག་པ་ཡིན་ནའང་། འདས་པའི་ལོ་ ༥༠ ལྷག་གི་ནང་༸རྒྱལ་བ་རིན་པོ་ཆེའི་ལམ་སྟོན་འོག་མི་རབས་རྒན་པ་མང་པོ་ཞིག་གིས་སྐུ་ལས་ཞེ་དྲགས་བསྐྱོན་ཡོད་པ་རེད། ང་བུད་མེད་ལྷན་ཚོགས་ཀྱི་ཚོགས་མི་རྒན་པ་ཞིག་ཡིན་པའི་ཆ་ནས་སེམས་ནང་གང་ཡོད་པ་དེ་ཞུས་པ་ཡིན་ན། ང་ཚོས་བཙན་བྱོལ་ནང་ཕྱག་ལས་ག་རེ་གནང་བ་ཡིན་ནའང་དེ་ལ་ཡིད་ཆེས་ཀྱི་ཐོག་ནས་གནང་དགོས་ཀྱི་འདུག ལུས་ངག་ཡིད་གསུམ་གྱི་ཡིད་ཆེས་ཡོད་པ་དང་སོ་སོའི་རྒྱལ་ཁབ་ལ་ཤ་ཚ་ཡོད་པའི་ཐོག་ནས་གནང་དགོས་ཀྱི་འདུག་མ་གཏོགས་གནང་གི་ཡོད་པ་འདྲ་བོ་དང་། གནང་གི་མེད་པ་འདྲ་བོ་བྱས་ཏེ་སོ་སོའི་མིང་དང་ཁེ་ཕན་ལ་བལྟས་ནས་བྱེད་ཀྱི་ཡོད་པ་འདྲ་བོ་ཞིག་འདུག དེ་འདྲ་བྱས་ན་རྒྱལ་ཁབ་ཅིག་གི་རྩ་དོན་འགྲུབ་རྒྱུ་ཁག་པོ་རེད་འདུག ཅེས་གསུངས་སོང་།
ཡང་མོས་བོད་ཀྱི་བུད་མེད་ཚོས་བོད་ཀྱི་ཆོས་དང་རིག་གཞུང་། སྐད་ཡིག ཡ་རབས་བཟང་སྤྱོད་སོགས་ཀྱི་ཐོག་འགན་འཁུར་ཆེན་པོ་ལེན་དགོས་ལ། དེ་ཚོར་འགན་ལེན་མ་ཐུབ་པ་ཡིན་ན་རྒྱ་ཆེ་ས་ཡི་ཕྱག་ལས་མི་འགྲུབ་པ་མ་ཟད། སོ་སོའི་ལག་འོག་ཏུ་ཡོད་པའི་ལས་ཀ་རྣམས་ཀྱང་ཤོར་སོང་ཚེ་ཕངས་པོ་ཡིན་སྟབས། བོད་ཀྱི་བུད་མེད་ཚོས་ནང་གི་ལས་ཀ་རྣམས་འཐུས་མ་ཤོར་བའི་ཐོག་ནས་ཕྱིའི་ལས་ཀ་ལའང་ལྷག་བསམ་རྣམ་དག་དང་མངོན་ལྐོག་རྒྱབ་མདུན་མེད་པར་ཧུར་ཐག་བྱས་ཏེ། ཆེན་པོ་ཞིག་མ་འཇོན་པ་ཡིན་ནའང་མི་ཚེའི་ནང་འགྱོད་པ་མེད་པ་ཞིག་བྱེད་གལ་ཆེ་སྐོར་གསུངས་སོང་།
དེའི་རྗེས་ཧིན་བོད་མཛའ་འབྲེལ་ཚོགས་པའི་ཚོགས་གཙོ་ཨ་ཇེ་སིན་མོང་གོ་ཊི་ཡ་ལགས་ཀྱིས། རྒྱའི་བཙན་གནོན་འོག་ཕྱི་ལོ་ ༡༩༥༩ ལོར་བོད་པ་རྒྱ་གར་ནང་བཙན་བྱོལ་དུ་ཐོག་མར་འབྱོར་སྐབས། བོད་པས་ནཱ་མཱ་སི་དེ་(Namaste)ལབ་ཤེས་ཀྱི་མེད་པ་དང་། རྒྱ་གར་བས་བཀྲ་ཤིས་བདེ་ལེགས་ཙམ་ཡང་ལབ་ཤེས་ཀྱི་མེད་ཀྱང་། དང་ཐོག་ནས་གྲོགས་པོ་(Dosti) ཞེས་བོས་ཏེ་ད་ལྟའི་བར་དུ་གྲོགས་པོ་བྱས་ནས་༸གོང་ས་མཆོག་དང་བོད་མི་ཚོ་དྷ་རམ་ས་ལར་གནས་སྡོད་བྱེད་བཞིན་ཡོད་པ་དེས། ས་གནས་རྒྱ་གར་བའི་དཔལ་འབྱོར་ཡར་རྒྱས་སུ་འགྲོ་བར་ཕན་ཐོགས་ཆེན་པོ་བྱུང་བར་བཀའ་དྲིན་ཞུ་བཞིན་ཡོད་སྐོར་དང་། བོད་ཀྱི་བུད་མེད་ལྷན་ཚོགས་ནས་རྒྱ་གར་བུད་མེད་ཀྱི་ལྷན་ཚོགས་ཁག་དང་འབྲེལ་ལམ་ཡག་པོ་འཛིན་དགོས་པ་ཧ་ཅང་གལ་ཆེན་ཡིན་སྐོར་སོགས་བརྗོད་སོང་།
མཇུག་ཏུ་སྐུ་མགྲོན་གཙོ་བོ་སྤྱི་འཐུས་ཚོགས་གཞོན་ཨཅརྱ་ཡེ་ཤེས་ཕུན་ཚོགས་ལགས་ཀྱིས། དབུས་བོད་ཀྱི་བུད་མེད་ལྷན་ཚོགས་ཀྱི་གསུང་བཤད་དང་། དམངས་གཙོའི་དུས་ཆེན་ཉིན་མོར་བཀའ་སྤྱི་གཉིས་ནས་གསུང་བཤད་སྒྲོག་སྦྱངས་གནང་ཡོད་པ་དང་། ཆབ་སྲིད་ཀྱི་རྩ་འཛིན་ཡིག་ཆ་དེ་ང་ཚོས་གལ་ཆེ་ཤོས་ཏུ་བརྩི་དགོས་ཀྱི་ཡོད་པ་རེད། དེ་བཞིན་སྒྲིག་འཛུགས་སོ་སོ་དང་ཚོགས་པ་སོ་སོ་ནས་གསུང་བཤད་སྒྲོག་སྦྱངས་ཞུ་ཡི་ཡོད་པ་ལྟར། དེ་རིང་འདིར་དབུས་བོད་ཀྱི་བུད་མེད་ལྷན་ཚོགས་ཀྱི་རྒྱབ་ལྗོངས་དང་ལས་དོན། ལྷག་པར་དུ་ང་རང་ཚོའི་འཐབ་རྩོད་ཀྱི་ཆབ་སྲིད་ངོ་བོ་གང་ཡིན་པ་དེར་གསུང་བཤད་ཀྱི་ནང་དོན་ཚན་ལྔ་ཅན་ཞིག་བཀོད་ཡོད་པ་དང་། དེ་ཡང་ང་ཚོ་ཆབ་སྲིད་ཀྱི་སྐྱབས་བཅོལ་བ་ཞིག་ཡིན་སྟབས། ང་ཚོས་འབོད་སྐུལ་ཞུ་ས་དང་རྒྱབ་སྐྱོར་ཞུ་ས་དེ་འཛམ་གླིང་རྒྱལ་སྤྱི་མ་གཏོགས་གཞན་སུ་གང་མེད་པར་བརྟེན། འབོད་སྐུལ་དོན་ཚན་དེ་ཚོ་ཞེ་དྲགས་རྣོ་ངར་ལྡན་པ་དང་དོན་དང་ལྡན་པ་ཞིག་རེད། ཡིན་ནའང་། དོན་ཚན་དེ་ཚོ་ཡིག་འབྲུའི་ངོ་བོའི་སྒང་ནས་ལྷག་པ་མ་ཡིན་པར་མ་འོངས་པར་ཡིག་ཆ་དེ་ཚོ་གཞིར་བཞག་སྟེ་འགུལ་སྐྱོད་ཐེབས་པ་ཞིག་དགོས་རེད། དེ་ཚོ་འཛམ་གླིང་ཡོང་ཁྱབ་ཏུ་ཕྱིན་རྗེས་ལམ་སང་འབྲས་བུ་སོན་རྒྱུ་ཡོད་པ་མ་རེད་ཀྱང་། དེ་ཚོ་རྩ་འཛིན་གྱི་ཡིག་ཆ་ཞིག་གི་ངོ་བོར་འཛིན་པའི་ཐོག་ནས་དོན་ཕན་གང་ཐུབ་ཐུབ་ཅིག་སོན་པར་འབད་བརྩོན་གནང་དགོས་པ་རེད། ཅེས་དང་། ཡང་ཁོང་གིས་བབ་བརླིང་བརྟན་གསུམ་གྱི་ཐོག་ནས་ལས་ཀ་བྱས་པ་ཡིན་ན་གྲུབ་འབྲས་ཐོན་ཐུབ་ལ། གཞན་གྱི་མཐོང་དང་མཉམ་ཞུགས་ཀྱང་རང་བཞིན་གྱིས་ཡོང་གི་ཡོད་སྐོར་དང་། རྒྱལ་ཁབ་གཞན་དང་བསྡུར་ན་བོད་ཀྱི་བུད་མེད་ཀྱི་འཐབ་རྩོད་དང་ལས་ཀའི་ངོ་བོ་ལོགས་ཀ་ཡིན་ལ། ལས་འགན་སོགས་རྦད་དེ་ཆེ་བ་ཡོད་སྐོར་གསུངས་སོང་།
མཛད་སྒོའི་ཐོག་བོད་དབྱིན་གཉིས་ཀྱི་ཐོག་ནས་དུས་དྲན་གྱི་གསར་འགོད་བསྒྲགས་གཏམ་སྒྲོག་སྦྱངས་གནང་བའི་ནང་དུ་འཛམ་གླིང་རྒྱལ་ཁབ་ཁག་གི་དབུ་འཁྲིད་རྣམ་པ་དང་བོད་དོན་རྒྱབ་སྐྱོར་ཚོགས་པ་ཚོར་ཛ་དྲག་གི་འབོད་སྐུལ་དོན་ཚན་ ༥ བྱས་ཡོད་པའི་དང་པོ་ནི། རྒྱ་ནག་ལ་ནན་སྐུལ་དང་གནོན་ཤུགས་ཐོག་༸གོང་ས་ཏཱ་ལའི་བླ་མ་སྐུ་ཕྲེང་བཅུ་བཞི་པ་ཆེན་པོ་མཆོག་གིས་གྲོས་མཐུན་བཏོན་གནང་བའི་དབུ་མའི་ལམ་གྱི་ཐོག་བཙན་བྱོལ་དབུས་བོད་མིའི་སྒྲིག་འཛུགས་དང་ལྷན་དུ་ཡང་བསྐྱར་བཀའ་མོལ་འགོ་འཛུགས་ཡོང་བ་ཞུ་རྒྱུ།
གཉིས། རྒྱའི་བཙོན་ཁང་ནང་ལོ་ངོ་ ༢༡ རིང་ལྷག་པའི་༸པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་ད་ལྟ་གར་ཡོད་མི་ཤེས་པ་དེ་ཉིད་གང་མྱུར་གྲོལ་དཀྲོལ་ཡོང་ཆེད། མཉམ་སྦྲེལ་རྒྱལ་ཚོགས་ཀྱི་ཚོགས་ཆུང་ནས་རྒྱ་ནག་ལ་གནོན་ཤུགས་སྤྲོད་གནང་ཡོང་བའི་འབོད་སྐུལ་ཞུ་རྒྱུ་ཡིན། འོན་ཀྱང་གཞུང་འབྲེལ་དང་གཞུང་འབྲེལ་མིན་པའི་ཚོགས་སྡེ་མང་པོས་ཞུ་འབོད་དང་གནོན་ཤུགས་ཐེངས་མང་གནང་ཡང་། རྒྱའི་དབང་འཛིན་པ་ཚོས་དེ་ལ་ཡ་ལན་སྤྲད་མེད། བོད་ཀྱི་བུད་མེད་ལྷན་ཚོགས་ཀྱིས་བསྐྱར་དུ་རྒྱའི་དབང་འཛིན་པ་ཚོ་ལ་ནན་སྐུལ་ཞུ་རྒྱུར་གནད་དོན་དེ་འགྲོ་བ་མིའི་ཐོབ་ཐང་གི་གནད་དོན་ཡིན་པའི་ཆ་ནས་ཁོང་ཚོ་ལ་དྲག་གནོན་མི་བྱེད་པར་ཞི་དུལ་དུ་གྱུར་བ་གནང་རོགས་ཞུ་རྒྱུ་ཡིན།
གསུམ། རྒྱ་ནག་གཞུང་གི་གནོན་ཤུགས་འོག་བོད་ཤར་ཕྱོགས་གསེར་རྟ་རྫོང་ཁུངས་བླ་རུང་སྒར་གྱི་དགོན་པས་གྲྭ་ཤག་ཧ་ལས་པའི་མང་པོ་གཏོར་བཤིག་གི་དཀའ་ངལ་དང་། དེར་བརྟེན་གྲྭ་བཙུན་རྣམས་རང་སྲོག་གཅོད་རྒྱུའི་གནས་སྟངས་ཧ་ཅང་ཛ་དྲག་བྱུང་རྐྱེན་ལ་བོད་ཀྱི་བུད་མེད་ལྷན་ཚོགས་ནས་མཉམ་འབྲེལ་རྒྱལ་ཚོགས་དང་། འཛམ་གླིང་ནང་གི་དཔོན་རིགས་ཚོ་ལ་ཛ་དྲག་གི་མཚམས་འཇོག་དགོས་པའི་ནན་སྐུལ་ཤུགས་ཆེན་ཞུ་ཡི་ཡོད།
བཞི། མཉམ་འབྲེལ་རྒྱལ་ཚོགས་ལ་ནན་སྐུལ་ཞུ་རྒྱུར་རྒྱ་ནག་གཞུང་ནས་བོད་ཀྱི་ཆབ་སྲིད་བཙོན་པ་ཡོངས་རྫོགས་གང་མགྱོགས་ཀློད་དཀྲོལ་ཡོང་བ་ཞུ་རྒྱུ་ཡིན།
ལྔ། ད་བར་རྒྱ་གཞུང་གི་བྱ་སྤྱོད་ལ་ཞི་དུལ་དུ་གྱུར་རྒྱུའི་མཉམ་འབྲེལ་རྒྱལ་ཚོགས་ནས་ངེས་པར་དུ་ཕྱག་བསྟར་ཡོང་བའི་འབོད་སྐུལ་ཤུགས་ཆེ་ཞུ་རྒྱུ་ཡིན་པ་བཅས་རེད།
གསར་འགོད་པ། པདྨ་མཚོ།
༅༅། བཤད་རྒྱུ་མང་པོ་བཤད་སོང། འགོ་གཙོ་བར་ནས་བཤད་སོང།
ཕན་འབྲས་དངོས་སུ་འདོན་རྒྱུ། ཤིན་ཏུ་རང་ནི་མི་འདུག་
ཚོགས་ནས་ལྔ་བཅུ་ཕྱིན་སོང། བཤད་ནས་དྲུག་བཅུ་ཕྱིན་སོང།
ཕན་མེད་སྟོང་བཤད་ཇི་བཤད། དུས་ཚོད་འཕྲོ་བརླག་ཡིན་འགྲོ།
བུད་མེད་ཐོབ་ཐང་།ཁྱོ་ག་གཉིས་གསུམ་ཡང་འཚོལ་མཆོག་གི་འདུག་ལ།ཁ་ཆེ་ལྟར་གདོང་ལ་ཡིན་ཅི་རས་ཀྱི་སྦས་ཡང་དགོས་ཀྱི་མི་འདུག
གཞུང་དང་སྒྲིག་འཛུགས་ཁག་ལ་ལས་ཞུ་མཆོག་པ་མ་ཟད།འོས་ཤོགནང་སྤྱི་འཐུས་དང་བཀའ་བློན་ལས་ཁུར་ཡང་བྱ་མཆོག་གི་འདུག
དེ་ག་རེ་མི་འདུག་ཟེར་གྱི་ཡོག་རེད།རྒྱགས་དྲག་གི་ཡོག་རེད།སྐྱིད་དྲགས་ཀྱི་ཡོག་རེད།
གཞན་དེ་མིན་བྱ་རྒྱུ་དང་ལབ་རྒྱུ་གང་མི་འདུག་གམ།
གོང་གསལ་རྒྱལ་ཚོགས་སོགས་ལ་འབོད་བསྐུལ་དོན་ཚན་ལྔ་ལས་དོན་ཚན་གསུམ་པའི་ནང་མ་ཡིག་ནང་དེ་ག་རང་ཡིན་དང་གསར་ཤོག་ནང་འགོད་སྐབས་གང་ཡིན་མ་ཤེས་ཀྱང་་་་བླ་རུང་སྒར་གྱི་དགོན་པས་གྲྭ་ཤག་ཧ་ལས་པའི་མང་པོ་གཏོར་བཤིག་གི་དཀའ་ངལ་དང་། ་་ཞེས་གཏོར་མཁན་དགོན་པ་ཡིན་བཟོ་ལྟབུ་དང་ཡང་་་་གྲྭ་བརྩུན་མང་པོས་རང་སྲོག་གཅོད་རྒྱུའི་གནས་སྟངས་ཧ་ཅང་ཛ་དྲག་བྱུང་རྐྱེན་་་ཐད་སྐབས་འདིར་བརྩུན་མ་གསུམ་ལས་གྲྭ་བས་རང་སྲོག་གཅད་པའི་གནས་ཚུལ་མ་ཐོས་པས་ཚོགས་པ་ཆེ་གྲལ་ན་ཡོད་པ་ཞིག་གི་གྲོས་ཆོད་ནང་འདི་བཞིན་འགོད་པ་ནི་རྒྱུན་དུ་ཐུགས་སྣང་མེད་པའམ་ཞེན་པས་མིན་ནམ་གང་ཡིན་མ་ཤེས།།