དགུ་བཅུ་གསུམ་ལས་འགུལ་ཚོགས་པའི་ཚོགས་གཙོ་ཨ་ཚོགས་ཀླུ་མཁར་བྱམས་ཀྱིས་ད་ཆར་རྒྱ་ནག་གཞུང་ལ་ཁ་གཏད་གཅོག་པའི་ལག་ཆ་ཆེ་ཤོས་དེ་རང་ལུས་མེར་སྲེག་གནང་མཁན་ཚོའི་སྙིང་སྟོབས་དང་ཆབ་སྲིད་བཙོན་ཟུར་རྣམས་ཀྱི་སེམས་ཤུགས་ཡིན་སྐོར་གསུངས་སོང་།
དེ་རིང་སྔ་དྲོའི་ཆུ་ཚོད་ ༩ ཐོག་དྷ་ས་ནོར་བུ་གསོལ་མགྲོན་ཁང་གི་ཚོགས་ཁང་དུ་བོད་ཀྱི་དགུ་བཅུ་གསུམ་ལས་འགུལ་ཚོགས་པ་དབུ་བརྙེས་ཏེ་མི་ལོ་ཉེར་ལྔ་འཁོར་བ་དང་། དེ་བཞིན་དགུ་བཅུ་གསུམ་ལས་འགུལ་ཚོགས་པའི་ཉིན་གཉིས་རིང་གི་ཚོགས་ཆེན་ཐེངས་བདུན་པ་བཅས་མགོ་འཛུགས་གནང་སོང་བ་དང་། སྐུ་མགྲོན་གཙོ་བོར་བོད་མི་མང་སྤྱི་འཐུས་ཚོགས་གཞོན་ཨཱ་ཅརྱ་ཡེ་ཤེས་ཕུན་ཚོགས་ལགས་དང་དམིགས་བསལ་སྐུ་མགྲོན་དུ་བཀའ་ཟུར་རིན་ཆེན་མཁའ་འགྲོ་ལགས་གཉིས་ཀྱི་གཙོས་པའི་གཞུང་དང་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་དང་བོད་ཀྱི་ཆབ་སྲིད་བཙོན་ཟུར་ཁག་ཅིག་བཅས་འཛོམས་འདུག
མཛད་སྒོའི་ཐོག་མར་སྐུ་མགྲོན་གཙོ་བོ་ལགས་ནས་<<དཀར་མཛེས་རྫོང་དུ་ཞི་རྒོལ་>>ཞེས་པའི་དེབ་ཅིག་དབུ་འབྱེད་གནང་དང་། དམིགས་བསལ་སྐུ་མགྲོན་ལགས་ནས་བོད་ཀྱི་ཆབ་སྲིད་བཙོན་ཟུར་སྟག་སྣ་འཇིགས་མེད་བཟང་པོའི་ལོ་རྒྱུས་རི་མོའི་བརྙན་དེབ་<<སྟག་སྣ་འཇིགས་མེད་བཟང་པོའི་མི་ཚེའི་ལོ་རྒྱུས་སྙིང་བསྡུས་>>ཞེས་པ་ཞིག་དབུ་འབྱེད་གནང་སོང་།
དགུ་བཅུ་གསུམ་ལས་འགུལ་ཚོགས་པའི་ཚོགས་གཙོ་ཨ་ཚོགས་ཀླུ་མཁར་བྱམས་ལགས་ཀྱིས་ཚོགས་པའི་ལངས་ཕྱོགས་དབུ་མའི་ལམ་ལ་བསྒྱུར་ཏེ་ཕན་ཐོགས་བྱུང་ཡོད་མེད་སྐོར་བརྗོད་དོན། དགུ་བཅུ་གསུམ་ལས་འགུལ་ཚོགས་པའི་ལངས་ཕྱོགས་དེ་སྐབས་སྔོན་མར་མང་མོས་ཀྱི་ཐོག་ནས་དབུ་མའི་ལམ་ལ་བསྒྱུར་བ་དང་། དེ་ལ་འགྱུར་ཚར་བའི་རྗེས་སུ་གནང་བའི་ཕྱག་ལས་གཅིག་དེ་ཕྱི་ལོ་ ༢༠༡༤ ལོར་བོད་རང་བཙན་དང་དབུ་མའི་ལམ་གྱི་བརྗོད་གཞི་ཞིག་གི་ཐོག་ནས་དྷ་རམ་ས་ལར་ཚོགས་པ་ཁག་དང་མཉམ་དུ་ལས་འགུལ་སྤེལ་གྱི་མིན་པ་དང་། སུམ་བཅུའི་དུས་དྲན་ནང་མཉམ་ཞུགས་བྱ་རྒྱུ་མིན་ཞེས་པ་དེ་རེད། དེ་མ་གཏོགས་དགུ་བཅུ་གསུམ་ལས་འགུལ་ཚོགས་པ་དེ་དབུ་མའི་ལམ་ལ་བསྒྱུར་ནས་རྒྱ་ནག་གཞུང་ཕྱོགས་ནས་ཡ་ལན་ཞིག་སྤྲོད་དགོས་ཀྱི་ཡོད་ནའང་། དགུ་བཅུ་གསུམ་ལས་འགུལ་ཚོགས་པའི་ལྟ་བ་ལངས་ཕྱོགས་དབུ་མའི་ལམ་ལ་བསྒྱུར་བ་དེས་ཕན་ཐོགས་གང་ཡང་བྱུང་མེད་པ་དང་། དགུ་བཅུ་གསུམ་ལས་འགུལ་ཚོགས་པའི་ལྟ་བ་ལངས་ཕྱོགས་བསྒྱུར་བ་དེ་ལ་བརྟེན་ནས། རྒྱ་ནག་གཞུང་གིས་བོད་ནང་གི་ཆབ་སྲིད་བཙོན་པ་གཅིག་ཀྱང་ཀློད་གྲོལ་བཏང་མེད་པ་དང་། དེ་བཞིན་འགྱུར་བ་དེ་ལ་བརྟེན་ནས་རྒྱ་ནག་གཞུང་གིས་སྐྱབས་མགོན་རིན་པོ་ཆེ་མཆོག་ལ་མཚན་སྨད་བྱེད་པ་དེ་ཡང་མཚམས་བཞག་མེད་པ་དང་། ཁོ་རང་མ་བསླེབས་པའི་སྔོན་གྱི་དགུ་བཅུ་གསུམ་གྱི་ལས་གཞིའི་ལས་ཤོག་ཆ་ཚང་ངོས་ལ་བོད་རང་བཙན་ཞེས་བྲིས་ཡོད་པ་དང་། བརྒྱད་བཅུ་གྱ་བདུན་གྱ་བརྒྱད་གྱ་དགུའི་སྔོན་ལ་བོད་རང་བཙན་གྱི་ལྟ་བ་ལངས་ཕྱོགས་ཡོད་མཁན་རྐྱང་རྐྱང་གིས་ཚོགས་པ་དེ་བཙུགས་ཏེ་ལས་འགུལ་སྤེལ་ནས་ཡོང་བ་དང་། ད་ཆར་བཙན་བྱོལ་སྤྱི་ཚོགས་ཀྱི་སྲིད་ཇུས་དང་། དེ་འདྲའི་འགྱུར་བ་ཞིག་གི་དབང་གིས་དགུ་བཅུ་གསུམ་གྱི་ལྟ་བ་ལངས་ཕྱོགས་ལའང་འགྱུར་བ་ཕྱིན་ཡོད་པ་དང་། དེ་ལ་བརྟེན་ནས་བཙོན་བྱོལ་སྤྱི་ཚོགས་ནང་ལ་ཕན་ཐོགས་ཡོད་མེད་མི་གསལ་བ་དང་། རྒྱ་ནག་གཞུང་ཕྱོགས་ནས་དགུ་བཅུ་གསུམ་ལས་འགུལ་ཚོགས་པ་དང་འབྲེལ་བའི་ཡ་ལ་བཙུགས་ནས་བཙོན་ཁང་ནང་བཅུག་བཞག་པའི་ཆབ་སྲིད་བཙོན་པ་གཅིག་ཀྱང་ཀློད་མེད་པ་དང་། ད་སྐབས་རྒྱ་ནག་གཞུང་གིས་བོད་ཀྱི་ཆབ་སྲིད་བཙོན་པ་མང་པོ་ཞིག་བཙོན་ཁང་ནང་བཅུག་ཡོད་པ་ཧ་ལམ་སྟོང་ཕྲག་གཉིས་ལྷག་ཡོད་སྐོར་དང་། རྒྱ་ནག་གཞུང་ཕྱིའི་རྣམ་པའི་ཐོག་ནས་སྟོབས་ཤུགས་ཆེན་པོ་ཡོད་པའི་རྣམ་པ་ཞིག་ཡོད་ཀྱང་། བོད་མི་ཚོ་རང་དབང་རང་བཙན་གྱི་ཉིན་མོ་ཞིག་ཤར་ཐུབ་པའི་སེམས་ཤུགས་མ་ཆགས་པར་བསྡད་པ་ཡིན་ན། ད་ལྟ་རྒྱ་ནག་གཞུང་གི་ནང་ཁུལ་རྙོག་ཟིང་ལ་བལྟས་ཡོང་ན་སྲ་བརྟན་དུ་གནས་ཐབས་མེད་པ་ཞིག་གསལ་པོ་མཐོང་གི་ཡོད་པ་དང་། ང་ཚོས་ཆབ་བཙོན་པའི་ལོ་རྒྱུས་ལ་ཞིབ་འཇུག་བྱ་རྒྱུ་གལ་ཆེན་པོ་ཡིན་ལ། རྒྱ་ནག་གཞུང་ལ་ཁ་གཏད་གཅོག་པའི་ལག་ཆ་གཙོ་བོ་དེ་རང་ལུས་མེར་སྲེག་གནང་མཁན་ཚོའི་སྙིང་སྟོབས་དང་། ཆབ་སྲིད་བཙོན་ཟུར་རྣམས་ཀྱི་སེམས་ཤུགས་བཅས་ཡིན་སྐོར་སོགས་བརྗོད་སོང་།
དམིགས་བསལ་སྐུ་མགྲོན་བཀའ་ཟུར་རིན་ཆེན་མཁའ་འགྲོ་ལགས་ནས། ང་ཚོས་སོ་སོའི་མི་ཚེ་རྫོགས་རག་པར་དུ་བོད་ཀྱི་རྩ་དོན་ཐོག་ཧུར་ཐག་འབད་ཐག་བྱེད་དགོས་པ་དང་། ང་ཚོའི་སྤྱི་ཚོགས་ནང་དངོས་གནས་དྲང་གནས་དབུ་མའི་ལམ་གྱི་ཐོག་ལ་གོམ་པ་སྐྱོན་གྱི་ཡོད་པ་ལྟར། དབུ་མའི་ལམ་གྱི་ཐོག་ཕེབས་ནས་ད་ལྟའི་བར་གྲུབ་འབྲས་ག་རེ་སོན་ཡོད་པ་དང་། གྲུབ་འབྲས་གང་ཐོན་པ་དེའི་ཐོག་ལ་ག་རེ་བྱེད་དགོས་ཀྱི་འདུག་བལྟས་པ་ཡིན་ན། བོད་རྒྱ་ཞི་མོལ་དགོས་པ་དེ་ཞེ་དྲགས་གལ་ཆེན་པོ་ཡིན་པ་དང་། དེའི་ཐོག་ལ་ཞེ་དྲགས་བཤད་བསྡད་པ་ཡིན་ན། ཆབ་སྲིད་ཀྱི་སྐད་ཆ་འདྲ་བོ་ཆགས་འགྲོ་གི་ཡོད་པ་དང་། དེ་ཡང་ཁ་ནས་བཤད་པ་ཙམ་ལས་ལག་ལེན་མ་བསྟར་བ་ཡིན་ན། དེ་ལ་གྲུབ་འབྲས་འཐོན་གྱི་མེད་པ་དང་། དེ་བཞིན། ང་ཚོ་གཞན་གྱི་རོགས་དངུལ་ཁོ་ནར་མི་བརྟེན་པར་སོ་སོའི་རྐང་པའི་ཐོག་ནས་ལངས་ཐུབ་དགོས་པ་གལ་ཆེན་པོ་ཡིན་པ་དང་། ནང་གི་ཕ་མ་དང་སྤུན་མཆེད་སུ་ཡིན་ནའང་། ང་རང་ཚོའི་བོད་ཡིག་བོད་སྐད་ལ་ཐུགས་སྣང་གནང་རྒྱུ་ཧ་ཅང་གལ་འགངས་ཆེན་པོ་ཡིན་པ་དང་། གཞུང་འབྲེལ་མིན་པའི་ཚོགས་པ་ཁག་ཚང་མ་མཉམ་འབྲེལ་དང་མཐུན་སྒྲིལ་སྒོས་བོད་ཀྱི་རྩ་དོན་ཐོག་ཕྱག་ལས་གནང་དགོས་པའང་གལ་ཆེན་པོ་ཡིན་པ་དང་། མི་སྒེར་དང་ཚོགས་སྡེ་གང་ཡིན་ཡང་། སོ་སོའི་སེམས་ནང་དམ་ཚིག་བརྟན་པོ་ཡོད་པ་ཡིན་ན། ལས་དོན་ག་རེ་བསྒྲུབ་ཀྱང་དེ་ལ་དོན་འབྲས་འཐོན་སྐོར་སོགས་གསུངས་སོང་།
དེའི་རྗེས་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཞོན་ཨ་ཅརྱ་ཡེ་ཤེས་ཕུན་ཚོགས་ལགས་ནས། པཎ་ཆེན་སྐུ་ཕྲེང་བཅུ་བ་མཆོག་གི་མཛད་རྗེས་དང་ཁོང་གི་ཡང་སྲིད་པཎ་ཆེན་ཆུང་སྲིད་རིན་པོ་ཆེ་མཆོག་གི་ད་ལྟའི་གནས་སྟངས་ཀྱིས་མཚོན་པའི་བོད་ཀྱི་ཆབ་སྲིད་བཙོན་ཟུར་རྣམས་ཀྱི་སྐོར་ལ། བོད་ཀྱི་དགུ་བཅུ་གསུམ་ལས་འགུལ་ཚོགས་པ་དེ་བོད་མིའི་སྒྲིག་འཛུགས་ཀྱི་ཁྱབ་ཁོངས་ནང་གི་སྒྲིག་འཛུགས་ཤིག་ཡིན་པའི་ཆ་ནས། ང་ཚོའི་སྤྱི་ཚོགས་ནང་མ་འགྲིག་པ་ག་འདྲ་ཞིག་ཡོང་གི་ཡོད་ནའང་། དེ་ལ་འགན་ལེན་ཡོད་བསམ་པའི་ཐོག་ནས་འགལ་སྐྱོན་ཡོ་བསྲང་བྱེད་དགོས་སྐོར་དང་། རྒྱལ་སྤྱིའི་བཙོན་ཟུར་སྒྲིག་འཛུགས་ནང་ང་ཚོར་གོ་སྐབས་ག་རེ་ཡོད་པ་དེ་གཞི་ལ་བཞག་ནས་དགུ་བཅུ་གསུམ་ལས་འགུལ་ཚོགས་པའི་ནང་གྲོས་ཆོད་བཞག་པ་ཡིན་ན། རྒྱ་ནག་དང་བོད་རིགས་མི་མང་གང་ཡིན་ཡང་། དེ་ལ་མིག་ཆེན་པོས་ལྟ་དགོས་པ་ཞིག་དང་ཨམ་ཆོག་ཀྲོང་ཀྲོང་གིས་ཉན་དགོས་པ་ཞིག འཛམ་བུ་གླིང་གི་ཆབ་སྲིད་བཙན་ཟུར་ཚོ་ཡིན་ནའང་། བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཆབ་སྲིད་བཙོན་ཟུར་གྱི་གྲོས་ཆོད་དེ་མིག་དཔེར་ལྟ་ས་ཞིག་བཟོ་དགོས་ཀྱི་ཡོད་པ་དང་། སྤྱིར་བཏང་སྒྲིག་འཛུགས་ཤིག་ཚུགས་རྒྱུ་དེ་ལས་སླ་པོ་ཡིན་ནའང་། དེའི་འཛིན་སྐྱོང་རྒྱུན་གནས་སྲ་བརྟན་ཡོང་རྒྱུ་ཁག་པོ་ཞེ་དྲགས་ཡོད་སྟབས། སྒྲིག་འཛུགས་ཀྱི་དམིགས་ཡུལ་གཞིར་བཟུང་གིས་གནས་དགོས་པ་དང་། དྲང་ཚུགས་དང་རང་ཚུགས་བརྟན་པོ་མེད་ན། སྤྱི་ཚོགས་ནང་གཞན་མགོ་ཐོན་རྒྱུ་ཕར་ཞོག་རང་མགོ་ཡང་འཐོན་རྒྱུ་ཁག་པོ་ཡིན་པ་དང་། དེ་བཞིན་དགུ་བཅུ་གསུམ་ལས་འགུལ་ཚོགས་པའི་ངོས་ནས། རྒྱ་ནག་གི་བཙོན་ཁང་ནང་ཡོད་པའི་བོད་ཀྱི་ཆབ་སྲིད་བཙོན་པ་རྣམས་ལ་ག་འདྲ་སྙོབ་ཐབས་བྱེད་རྒྱུ་དང་ཁོང་ཚོའི་ནང་མི་ཚོར་ལྟ་རྟོག་ག་འདྲ་བྱེད་རྒྱུ། བཙན་བྱོལ་དུ་འབྱོར་བའི་ཆབ་སྲིད་བཙོན་ཟུར་ཚོས་བོད་ཀྱི་ཆབ་སྲིད་བཙོན་པ་རྣམས་ཀྱི་གནས་སྟངས་རྒྱལ་སྤྱིའི་ཐོག་ག་འདྲ་ཞིག་ཁྱབ་བསྒྲགས་བྱེད་དགོས་མིན་བཅས་ཀྱི་ཐོག་ལ་ལས་ཀ་བྱེད་ཐུབ་དགོས་པ་དང་། བོད་ཀྱི་ཆབ་སྲིད་བཙོན་པའི་གནས་སྟངས་དངོས་མཚོན་པའི་འགྲེམས་སྟོན་ཁང་དང་དྲ་ཐོག་ནས་ཁྱབ་བསྒྲགས་རྒྱ་སྐྱེད་གཏོང་ཐབས་སོགས་ཀྱི་ཐོག་ལའང་འབད་བརྩོན་གནང་དགོས་པ་མ་གཏོགས། དགུ་བཅུ་གསུམ་ལས་འགུལ་ཚོགས་པའི་ངོས་ནས་གྲོས་ཆོད་རྫིག་པོ་དང་རྣམ་གྲངས་མང་པོ་བཞག་པ་ཙམ་མིན་པར། དེ་ལག་ལེན་དོན་འཁྱོལ་གནང་རྒྱུ་གལ་ཆེན་པོ་ཡིན་སྐོར་སོགས་གསུངས་སོང་།
གསར་འགོད་པ། པདྨ་རྒྱལ།
༅༅། གསུངས་རྒྱུ་མང་པོ་གསུངས་སོང། སྔར་བཞིན་ཤ་སྟག་བཤད་སོང།
གྲུབ་འབྲས་འདི་ཡིན་ཐོན་རྒྱུ་མེད། ཐབས་ཤེས་འདི་ཡིན་བཤད་རྒྱུ་མེད།
གང་བཤད་ཁ་སྟོང་ལག་སྟོང་རེད།