མ་འོངས་པར་བོད་ཀྱི་གསོ་བ་རིག་པ་དང་རྒྱ་གར་ཚེ་ཡི་རིག་བྱེད་གཉིས་ཀྱི་ཐོག་ཞིབ་འཇུག་གནང་མཁན་ཆེད་ལས་མི་སྣ་སྐྱེད་སྲིང་ཆེད་རྒྱ་གར་དབུས་གཞུང་ནས་ངོས་ལེན་ཡོད་པའི་རྒྱ་གར་ཚེ་ཡི་རིག་བྱེད་ཀྱི་སློབ་གཉེར་ཁང་དུ་བོད་རིགས་སློབ་མ་གཉིས་ལ་ཞབས་བཀྱག་ཟུར་འཇོག་ཡོང་ཐབས་གནང་རྒྱུ་ཡིན་འདུག
བོད་ཀྱི་གསོ་བ་རིག་པའི་ལྷན་ཚོགས་ཀྱི་ཚོགས་ཐེངས་ ༢༦ པ་ཟླ་འདིའི་ཕྱི་ཚེས་ ༡༠ ནས་ ༡༤ བར་དུ། བཞུགས་སྒར་དྷ་ས་བོད་ཀྱི་གསོལ་མགྲོན་ཁང་གི་ཚོགས་ཁང་བར་མའི་ནང་ཚོགས་ཡོད་པ་དང་། ཁ་སང་ཕྱི་དྲོར་ཚོགས་འདུ་མཇུག་བསྡུས་ཏེ་ཚོགས་ཐེངས་འདིའི་ཐོག་གཏན་འབེབས་བྱུང་བའི་གྲོས་ཆོད་གཙོ་བོ་ཁག་ ༧ གསལ་བསྒྲགས་གནང་སོང་། ལྷན་ཚོགས་སྐབས་ ༥ པའི་ཚོགས་གཙོ་རག་རྡོ་བློ་བཟང་བསྟན་འཛིན་ལགས་ནས་རབ་འབྱམས་པ་དང་འབུམ་རམས་པ། འཚོ་བྱེད་སློབ་གཔོན་བཅས་སྔར་སྲོལ་བོད་ཀྱི་གསོ་བ་རིག་པའི་སྨན་པའི་ཤེས་ཚད་གནས་རིམ་རྣམས་དེང་དུས་འཛམ་གླིང་རང་བཞིན་གྱི་འགྲོ་སྟངས་ལྟར་གཏན་འབེབས་གནང་རྒྱུ་དེ་སྐབས་ ༥ པའི་ལས་འཆར་གལ་ཆེ་ཤོས་ཤིག་ཏུ་རྩི་བཞིན་ཡོད་སྐོར་བརྗོད་སོང་།
མཇུག་བསྡོམས་ཐོག་བོད་མི་མང་སྤྱི་འཐུས་ཚོགས་གཞོན་ཨ་ཅཱརྱ་ཡེ་ཤེས་ཕུན་ཚོགས་ལགས་ནས་ལྷན་ཚོགས་ཀྱི་རྒྱུན་ལས་ཚོགས་མི་རྣམས་ལ་ལམ་སྟོན་གསུང་བཤད་གནང་སོང་བ་དང་། སྐབས་དེར་ཁོང་གིས་རྒྱ་གར་གྱི་སྲིད་འཛིན་ཟུར་པ་ལྕམ་པར་ཊི་བྷ་པཱ་ཊིལ་(Pratibha Patil)མཆོག་ནས་ཀྱང་བོད་སྨན་སྐོར་མཁྱེན་རྟོགས་བྱུང་ཡོད་པ་མ་ཟད། གྲོས་ཚོགས་འཐུས་མི་དམ་པ་མོ་ཧན་སིན་ (Mohan singh)ལགས་ལའང་ངེས་པར་དུ་བོད་སྨན་མཆོད་དགོས་པའི་ལམ་སྟོན་གནང་ཡོད་པ་དང་། དེ་བཞིན་བླ་སྨན་པ་ཡེ་ཤེས་དོན་ལྡན་ལགས་ཀྱི་འབྲས་སྐྲན་(Cancer)སྨན་བཅོས་སྐད་གྲགས་ཆེན་པོ་ཡིན་སྟབས། རྒྱ་གར་གྱི་ཕྱོགས་མཐའ་གང་ས་ནས་གནད་ཡོད་མི་སྣ་མང་པོ་བཞུགས་སྒར་དྷ་རམ་ས་ལར་བོད་སྨན་བསྟེན་དུ་ཡོང་བཞིན་ཡོད་པ་ལྟར་བོད་སྨན་རྒྱ་གར་ནང་སྐད་གྲགས་ཆེན་པོ་ཆགས་ཡོད་སྐོར་དང་། བོད་པའི་སྨན་པ་ཚོའི་ངོས་ནས་བོད་ཀྱི་གསོ་བ་རིག་པ་གཅིག་པུར་ཐུགས་སྣང་གནང་བ་ཙམ་མིན་པར་བོད་ཀྱི་རིག་གནས་སྤྱི་དང་འབྲེལ་ཏེ། བོད་ཀྱི་གསོ་བ་རིག་པ་ལག་ལེན་རྒྱུན་སྐྱོང་གནང་ཐུབ་ན་ཕན་དགེ་ཆེ་སྐོར་སོགས་གསུངས་སོང་།
ལྷན་ཚོགས་སྐབས་ལྔ་པའི་ཚོགས་གཙོ་རག་རྡོ་བློ་བཟང་བསྟན་འཛིན་ལགས་ཀྱིས། ཚོགས་ཐེངས་འདིའི་ཐོག་གྲོས་གཞི་ཁག་མང་པོའི་ཐོག་བགྲོ་གླེང་གནང་བ་བརྒྱུད། བོད་ཀྱི་གསོ་བ་རིག་པའི་ལྷན་ཚོགས་ཀྱིས་སྣེ་འཁྲིད་དེ་གསོ་རིག་སློབ་གཉེར་ཁང་ཐུན་མོང་ནས་འཆར་ལོའི་ཕྱི་ཟླ ་༡༡ ཚེས་༡༢ ནས་ ༡༤ བར་རྒྱལ་སྤྱིའི་བོད་ཀྱི་གསོ་བ་རིག་པའི་བགྲོ་གླེང་ཚོགས་ཆེན་ཐེངས་གསུམ་པ་འཚོག་གཏན་འཁེལ་ཡོད་པ་དང་། མ་འོངས་པར་བོད་ཀྱི་གསོ་བ་རིག་པ་དང་རྒྱ་གར་ཚེ་ཡི་རིག་བྱེད་གཉིས་ཐོག་ཉམས་ཞིབ་བྱ་རྒྱུའི་ཐད་ཆེད་ལས་མི་སྣ་གསོ་སྐྱོང་དགོས་པས། ལྷན་ཚོགས་ནས་རྒྱ་གར་དབུས་གཞུང་ནས་ངོས་ལེན་ཡོད་པའི་རྒྱ་གར་ཚེ་ཡི་རིག་བྱེད་ཀྱི་སློབ་གཉེར་ཁང་ནང་བོད་རིགས་སློབ་མ་གཉིས་ལ་ཞབས་སྟེགས་ཟུར་འཇོག་ཐོབ་ཐབས་ཀྱི་ལས་འཆར་གཏན་འཁེལ་བྱུང་བ། དེ་བཞིན། རྒྱ་གར་དབུས་ཨཱ་ཡུ་ཤའི་བློན་ཆེན་ལས་ཁུངས་ནས་རོགས་དངུལ་ཞུས་ཐོབ་བཞིན་འཆར་ལོའི་ཕྱི་ཟླ་ ༣ ཚེས་༡༣ ནས་ ༡༨ བར་བཞུགས་སྒར་དྷ་རམ་ས་ལར་གསོ་རིག་སྨན་པ་རྣམས་ཀྱི་ཤེས་ཡོན་གོང་སྤེལ་གྱི་ཟབ་འཁྲིད་ཞིག་སྐོང་ཚོགས་གནང་གཏན་འཁེལ་བ།
གཞན་ཡང་། ལྷན་ཚོགས་ཀྱི་ཁྲིམས་སྒྲིག་དགོངས་དོན་ལྟར་ཕྱི་ལོ་༢༠༡༦།༡༧ ལོར་བོད་ཀྱི་སྨན་རྩིས་མཐོ་སློབ་ཁང་དང་བོད་ཀྱི་སྨན་རྩིས་ཁང་གི་སྨན་སྦྱོར་ཁང། དེ་བཞིན་ཝཱ་ཎ་བོད་ཀྱི་གཙུག་ལག་སློབ་གཉེར་ཁང་གི་གསོ་རིག་སྡེ་ཚན། གཡུ་ཐོག་སྙིང་ཐིག་སྨན་སྦྱོར་ཁང་དང་བོད་དང་ཧི་མཱ་ལ་ཡའི་སྔོ་སྦྱོར་བཅས་ལ་རྟོག་ཞིབ་གནང་རྒྱུ་དང་། བོད་ཀྱི་གསོ་བ་རིག་པའི་ལྷན་ཚོགས་ཀྱི་ཚོགས་མི་གཅིག་རྒྱ་གར་དབུས་སྨན་གྱི་ལྷན་ཚོགས་ཀྱི་ཚོགས་མིར་གཞུང་འབྲེལ་ཐད་བསྐོས་ཡོང་ཆེད། འབྲེལ་ཡོད་ཁག་ཅིག་ནས་རྒྱབ་གཉེར་ཞུས་ཐོག་ལྷན་ཚོགས་ནས་གང་མགྱོགས་རྒྱ་གར་དབུས་སའི་ལས་ཁུངས་ཀྱི་གནད་ཡོད་མི་སྣར་ངོ་བཅར་ཞུ་ཡིག་འབུལ་རྒྱུ། དེ་བཞིན། དྷ་རམ་ས་ལའི་ཨཱ་ཡུ་ཤའི་རྫོང་གི་སྨན་ཁང་དུ་བོད་ཀྱི་གསོ་བ་རིག་པའི་སྒོ་བསྟེན་སྨན་ཁང་ཞིག་འདི་ལོའི་ཕྱི་ཟླ་ ༡༡ ནང་གསར་འཛུགས་དང་། བོད་ཀྱི་གསོ་བ་རིག་པའི་སྨན་པའི་ཤེས་ཚད་གནས་རིམ་རབ་འབྱམས་པ་དང་འབུམ་རམས་པ། འཚོ་བྱེད་སློབ་དཔོན་ཞེས་པའི་སྔ་རབས་ཀྱི་འགྲོ་སྟངས་དེ། དེང་དུས་ཀྱི་ཤེས་ཡོན་སྒྲོམ་གཞིའི་ནང་ཏག་ཏག་མ་བསྡད་པ་དང་གོ་བརྡ་མ་འཇགས་པ་མང་པོ་ཡོང་གི་ཡོད་སྟབས། བོད་ཀྱི་གསོ་བ་རིག་པའི་སྨན་པའི་ཤེས་ཚད་གནས་རིམ་དེ། འཛམ་གླིང་རང་བཞིན་ཅན་གྱི་འགྲོ་སྟངས་ནང་བཞིན་གཏན་འབེབ་གནང་རྒྱུ་དེ་གལ་ཆེ་ཤོས་སུ་རྩི་ཡི་ཡོད་པ་ལྟར། འཆར་ལོའི་ཕྱི་ཟླ་ ༣ ནང་ཆེད་ལས་མི་སྣ་གདན་འདྲེན་ཞུས་ཏེ་ཚོགས་འདུ་བསྐོང་རྒྱུ་བཅས་ཐག་གཅོད་བྱུང་ཡོད་སྐོར་བརྗོད་སོང་།
གསར་འགོད་པ། པདྨ་མཚོ།
