༧གོང་ས་མཆོག་ཅེག་སྤྱི་མཐུན་རྒྱལ་ཁབ་ནང་ཆིབས་བསྒྱུར་བསྐྱངས་ཏེ་ཡུལ་དེའི་རིག་གཞུང་བློན་ཆེན་དང་གྲོས་ཚོགས་འཐུས་མིའི་ཕེབས་བསུའི་འོག་རིག་གཞུང་ལས་ཁུངས་དང་ཆོས་ལུགས་བགྲོ་གླེང་བཅས་སུ་ཕེབས་ཡོད་འདུག
ཟླ་འདིའི་ཚེས་ ༡༨ ཉིན། བོད་མིའི་སྐྱབས་མགོན་༧གོང་ས་མཆོག་ཅེག་སྤྱི་མཐུན་རྒྱལ་ཁབ་ཀྱི་རྒྱལ་ས་ཕིརེག་ནང་། ཡུལ་དེའི་རིག་གཞངུ་བློན་ཆེན་སྐུ་ཞབས་ཌནེ་ཧར་མེན་(Daniel Herman)མཆོག་དང་གྲོས་ཚོགས་འཐུས་མི་ཁག་ཅིག་དང་མཇལ་འཕྲད་གནང་ཡོད་པ་དང་། དེའི་རྗེས་ཆོས་ལུགས་ཀྱི་རྣམ་བཞག་ཅེས་པའི་བགྲོ་གླེང་ཐོག་དབུ་བཞུགས་གནང་ཡོད་པ་རེད། བགྲོ་གླེང་ཚོགས་འདུ་དེ་སྟེང་གཞུང་གི་གནད་ཡོད་མི་སྣ་དང་རྩོམ་པ་པོ་དང་གསར་འགོད་པ་གྲགས་ཆེན་སོགས་མི་གྲངས་ ༡༥༠ ཙམ་ཚོགས་བཅར་གནང་ཡོད་འདུག
སྐབས་དེར་རིག་གཞུང་བློན་ཆེན་མཆོག་གིས་སྤྱིར་ང་རང་ལ་མཚོན་ན་གཞི་རྩ་ཇིའུ་མི་རིགས་ཀྱི་ཁྱིམ་ཚང་ཞིག་ཏུ་སྐྱེས་ཡང་ངས་རོམ་གྱི་ཡེ་ཤུ་རྣམ་དག་ཆོས་ལུགས་ལ་དད་པ་བྱེད་བཞིན་ཡོད། ང་རང་དེ་སྔ་ཅེག་ཀོ་སུ་ལོ་ཝ་ཀི་ཡའི་ནང་འཚར་ལོངས་བྱེད་སྐབས། ཆོས་ཀྱིས་ངའི་བསམ་བློའི་ནང་རང་དབང་གི་ཚོར་བ་ཞིག་སྟེར་བྱུང་། ཚོར་བ་དེས་ཕྱིས་སུ་ངས་ཆབ་སྲིད་ལས་དོན་བྱེད་སྐབས་སྙིང་སྟོབས་ཀྱི་གཞི་རྩ་ཞིག་ཏུ་གྱུར་སོང་། ཞེས་བརྗོད་ཡོད་འདུག
དེའི་རྗེས་༸གོང་ས་མཆོག་གིས་བཀའ་སློབ་བསྩལ་དོན། ངོས་རང་འགྲོ་བ་མི་ཞིག་ཡིན་པའི་ཆ་ནས་གཞན་ལ་བདེ་སྐྱིད་སྐྲུན་ཐབས་བྱེད་བཞིན་ཡོད། སེམས་འཁྲུག་ནས་བསྡད་ན་ཕྱི་དངོས་པོའི་མཐུན་རྐྱེན་ཇི་ཙམ་སྦྱར་ཡང་སེམས་ནང་ཞི་བདེ་ཡོང་བ་བཟོ་མི་ཐུབ། དེ་ལས་ལྡོག་སྟེ་གལ་ཏེ་སེམས་ལ་ཞི་བདེ་ལྷིང་འཇགས་ཡོད་ཚེ་ལུས་ལ་ན་ཟུག་བྱུང་ཡང་སེམས་དེ་ཙམ་མི་འཁྲུག འདས་པའི་ལོ་ངོ་ ༣༠ ཙམ་གྱི་རིང་ངོས་ཀྱིས་ཚན་རིག་པ་དང་ལྷན་བགྲོ་གླེང་ཤུགས་ཆེ་བྱས་པ་ཡིན། སྐབས་དེར་ཚན་རིག་པ་ཚོས་བརྟག་དཔྱད་ཀྱི་ལམ་ནས་གཞི་རྩའི་འགྲོ་བ་མིའི་ལྷན་སྐྱེས་ཀྱི་རང་བཞིན་ནི་བྱམས་བརྩེ་ལྡན་པ་ཞིག་ཡིན་སྐོར་གསུངས་པ་དེ་ངོས་ཀྱིས་རེ་བའི་འབྱུང་ཁུངས་ལྟ་བུར་བརྩི་བཞིན་ཡོད།
ཕྱོགས་གཅིག་ནས་ཆོས་ལུགས་གཙོ་ཆེ་བ་ཚང་མས་བྱམས་བརྩེའི་བསླབ་བྱ་གསུང་གི་ཡོད། འོན་ཀྱང་ཕྱོགས་གཞན་ཞིག་ནས་བརྗོད་ན། མི་ཐེར་འབུམ་གཅིག་ལྷག་གིས་ཆོས་ལ་དེ་ཙམ་ཡིད་ཆེས་བྱེད་ཀྱི་མེད། དེར་བརྟེན། བྱམས་བརྩེ་སོགས་ནང་གཤིས་རྒྱུས་དང་འབྲེལ་བའི་བཟང་པོའི་རིན་ཐང་དེ་དག་གོང་མཐོར་གཏོང་ཐབས་ཆེད་ཐབས་ལམ་གཞན་ཞིག་བརྒྱུད་ནས་གོ་དཀོན་སློབ་གསོ་སྤྲོད་ཐབས་བྱེད་དགོས། ཞེས་སོགས་ཀྱི་བཀའ་སློབ་བསྩལ་ཡོད་འདུག
