རྒྱ་ནག་གི་ཚང་འཛོམས་གྲོས་ཚོགས་ཐེངས་ ༦ པ་མགོ་འཛུགས་བྱས་པ་དང་བསྟུན་ཞིང་ཆེན་ཁག་ ༢༥ ཙམ་ནས་ཡོང་བའི་འབྲེལ་ཡོད་ཁྱིམ་མི་ ༣༡༩ ཡིས་ཞི་ཅིན་ཕིན་ལ་ཞུ་ཡིག་ཅིག་བསྐུར་ཏེ། འགྲོ་བ་མིའི་ཐོབ་ཐང་གི་ཁྲིམས་རྩོད་པ་དང་དོགས་ཡོད་ཉེས་ཅན་སོགས་མི་གྲངས་ ༧༠༩ འཛིན་བཟུང་བྱས་ཡོད་པ་ཀློད་གྲོལ་དགོས་པའི་རེ་སྐུལ་བྱས་འདུག
ཁ་སང་ཕྱི་ཚེས་ ༢༤ ཉིན་རྒྱ་ནག་གི་རྒྱལ་ས་པེ་ཅིན་དུ། སྐབས་བཅོ་བརྒྱད་པའི་རྒྱ་ནག་དབུས་རྒྱུན་ལས་ལྷན་ཁང་གི་ཚང་འཛོམས་གྲོས་ཚོགས་ཐེངས་ ༦ པ་མགོ་འཛུགས་ཀྱིས་ཉིན་གྲངས་ ༣ རིང་འཚོགས་བཞིན་ཡོད་པ་དང་། རྒྱ་ནག་གཞུང་འབྲེལ་དྲ་ལམ་ཁག་ཏུ། ཐེངས་འདིའི་ཚོགས་ཆེན་ཐོག་ཏང་གི་སྒྲིག་ཁྲིམས་དོ་ནན་གྱི་གལ་ཆེའི་གནད་དོན་ཐོག་ཕྱོགས་ཡོངས་ནས་ཞིབ་འཇུག་བྱས་ཏེ། ༼གནས་བབ་གསར་པའི་འོག་ཏང་ནང་ཁུལ་གྱི་ཆབ་སྲིད་འཚོ་བའི་སྐོར་གྱི་ཚད་འཛིན་འགའ་ཞིག༽དང་། ༼ཏང་ནང་ཁུལ་གྱི་ལྟ་སྐུལ་སྲོལ་ཡིག༽ཟེར་བའི་ཁྲིམས་སྒྲིག་ཡིག་ཆ་གཉིས་ལ་ཏང་ཕྱི་ནང་གི་ཁྱབ་ཁོངས་ངེས་ཅན་ནང་བསམ་འཆར་བསྡུ་ལེན་གྱིས་བསྐྱར་བཅོས་གཏན་འབེབས་བྱ་རྒྱུ་ཡིན་སྐོར་བསྒྲགས་ཡོད་པ་དང་། རྒྱ་ནག་གི་གནད་དོན་དབྱེ་ཞིབ་པ་ཚོས། ཞི་ཅིན་ཕིན་གྱིས་ཏང་གི་ཁྲིམས་སྒྲིག་དོ་ནན་གྱི་དར་ཆའི་འོག་ནས་རང་ཉིད་ཀྱི་ཁེ་དབང་སྔར་ལས་རྒྱ་སྐྱེད་ཤུགས་སྣོན་བྱེད་པར་འབད་བརྩོན་བྱེད་བཞིན་ཡོད་པ་དང་། ཐེངས་འདིའི་ཚོགས་ཆེན་ཐོག་ཏུའང་ཞི་ཅིན་ཕིན་གྱི་དབང་ཆ་སྔར་ལས་ཤུགས་ཆེ་རུ་འགྲོ་རྒྱུ་ཡིན་སྐོར་རྗོད་ཀྱི་འདུག
ཚོགས་ཆེན་མགོ་འཛུགས་ཐོག ཞི་ཅིན་ཕིན་དང་ཝང་ཅི་ཧྲན་གཉིས་ཀྱི་སྟག་དང་སྦྲང་མ་མཉམ་རྡུང་གི་ལས་འགུལ་ཁྲོད། འདས་པའི་ལོ་གསུམ་རིང་ཉུང་མཐར་དཔོན་རིགས་ས་ཡ་གཅིག་ལ་ཞིབ་བཤེར་འདྲི་རྩད་བྱས་ཡོད་པ་དང་། དེ་བཞིན་རྒྱ་ནག་གི་ལྐོག་ཟ་རུལ་སུངས་བ་རྒྱལ་སྤྱིའི་ཐོག་རྗེས་འདེད་རྩད་གཅོད་གཏོང་བའི་ལས་འགུལ་འོག ཕྱི་རྒྱལ་ཁག་ཏུ་བྲོས་བྱོལ་ཕྱིན་པའི་དོགས་ཡོད་ཉེས་ཅན་ཁྱོན་ ༤༠༩ འཛིན་བཟུང་བྱེད་ཐུབ་ཡོད་སྐོར་བསྒྲགས་འདུག
ཚོགས་ཆེན་གྱི་ཉིན་དང་པོ་དང་བསྟུན། རྒྱ་ནག་གི་ཞིང་ཆེན་ཁག་ ༢༥ ཙམ་ནས་ཡོང་བའི་གནོད་ཐེབས་འབྲེལ་ཡོད་ཁྱིམ་མི་ ༣༡༩ ཡིས་སྲིད་འཛིན་ཞི་ཅིན་ཕིན་ལ་ཞུ་ཡིག་ཅིག་བསྐུར་ཏེ། རྒྱ་གཞུང་གིས་འཛིན་བཟུང་བྱས་པའི་དོགས་ཡོད་ཉེས་ཅན་དང་ཁོང་ཚོའི་ཁྱིམ་མི། དེ་བཞིན་འགྲོ་བ་མིའི་ཐོབ་ཐང་གི་ཁྲིམས་རྩོད་པ་བཅས་མི་གྲངས་ ༧༠༩ ཡི་གནད་དོན་ཐད་འཕྲལ་དུ་སྲིད་གཞུང་གི་ནོར་འཁྲུལ་ལེགས་བཅོས་བྱས་ཏེ། དྲང་བདེན་གྱི་ལམ་ནས་བཀག་ཉར་འོག་ཡོད་པ་ཚང་མ་ཀློད་གྲོལ་གཏོང་དགོས་པའི་རེ་སྐུལ་བྱས་ཡོད་པ་དང་སྦྲགས། རྒྱ་གཞུང་གིས་མི་སྣ་འཛིན་བཟུང་དང་གཅར་རྡུང་མནར་གཅོད། བརྒྱུད་ལམ་ལ་བཀག་སྡོམ། ཁྲིམས་འགལ་གྱི་བྱ་སྤྱོད་སྤེལ་བཞིན་པ་དེར་ཚད་མེད་སྐོར་འགྲེལ་བརྗོད་བྱས་འདུག
དེ་སྔོན་རྒྱ་ནག་གཞུང་ཕྱོགས་ནས་བསྒྲགས་པ་ལྟར་ན། ཨ་རི་དང་ཁེ་ན་ཌ། སི་པིན། ཐའེ་ལན་ཌི། ཐའེ་ཝན། ཨ་ཧྥ་རི་ཁའི་རྒྱལ་ཁབ་ཁག་ཅིག་བཅས་ཁྱོན་རྒྱལ་ཁབ་ ༥༦ ནང་རྒྱ་ནག་གི་ལྐོག་ཟ་རུལ་སུངས་བ་རྗེས་འདེད་རྩད་གཅོད་བྱེད་བཞིན་ཡོད་པ་དང་། རྒྱ་ནག་དང་མཉམ་དུ་ཉེས་ཅན་རྩིས་སྤྲོད་ཀྱི་ཆོད་ཡིག་ཡོད་པའི་རྒྱལ་ཁབ་ཁག་ཅིག་ནས་དོགས་ཡོད་ཉེས་ཅན་རྩིས་སྤྲོད་བྱེད་སྐབས། སྲོག་ཁྲིམས་མི་གཅོད་པ་ཁས་ལེན་དགོས་པའི་ཆ་རྐྱེན་བཏོན་ཡོད་ཀྱང་། ཁྲིམས་ཀྱི་གཏན་འབེབས་ལྟར། ཉེན་རྟོག་ཁང་གིས་ཆེས་མཐོའི་ཁྲིམས་ཁང་ལ་གནས་ཚུལ་ཡར་ཞུ་བྱེད་དགོས་པ་དང་། ཆེས་མཐོའི་ཁྲིམས་ཁང་གིས་ཐག་གཅོད་བྱས་རྗེས། ཕྱི་འབྲེལ་ལྷན་ཁང་གིས་རྒྱལ་ཁབ་ཀྱི་མགྲིན་ཚབ་པ་བྱས་ཏེ་ཁས་ལེན་བྱེད་དགོས་སྐོར་བརྗོད་ཡོད་པ་རེད།
གསར་འགོད་པ། པདྨ་མཚོ།
