ཕྱི་ཟླ་ ༡༡ ཚེས་ ༢༠ ལྷ་བབ་དུས་ཆེན་ཉིན་རྒྱ་གར་ལྷོ་ཕྱོགས་དཔལ་ལྡན་འབྲས་དཀར་སྤུངས་བའི་ཆོས་སྡེ་རུ་གླིང་མཆོག་སྤྲུལ་རིན་པོ་ཆེ་མཆོག་གིས་དགེ་བཤེས་མཚན་རྟགས་བཞེས་པའི་རྟེན་འབྲེལ་མཛད་སྒོ་ཚོགས་ཡོད་པ་རེད།
ཐེངས་འདིའི་མཛད་སྒོའི་སྟེང་འཇམ་མགོན་རྒྱལ་བའི་གདུང་འཚོབ་དགའ་ལྡན་ཁྲི་པ་རྗེ་བཙུན་བློ་བཟང་བསྟན་འཛིན་མཆོག་དང་། རྩེ་རྣམ་རྒྱལ་གྲྭ་ཚང་གི་མཁན་པོ་ཁྲོམ་ཐོག་རིན་པོ་ཆེ་མཆོག དགའ་ལྡན་ཕོ་བྲང་གི་སྐུ་ཚབ་དྲུང་ཆེ་བློ་བཟང་སྤྱིན་པ་མཆོག བོད་མིའི་སྒྲིག་འཛུགས་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག དེ་བཞིན། གདན་ས་གྲྭ་ཚང་ཁག་གི་མཁན་སྤྲུལ་དགེ་བཤེས་དང་། གཞུང་འབྲེལ་མིན་པའི་ཚོགས་སྡེ་ཁག་གི་སྐུ་ཚབ། གཞིས་ཆགས་ཁག་གི་མི་མང་བཅས་སེར་སྐྱ་མི་མང་ ༡༠༠༠ ལྷག་འདུ་འཛོམས་བྱུང་ཡོད་འདུག
ཉིན་དེའི་ཞོགས་པར་གླིང་མཆོག་སྤྲུལ་རིན་པོ་ཆེ་མཆོག་གིས་འབྲས་སྤུངས་བླ་སྤྱིའི་ཚོགས་ཆེན་འདུ་ཁང་དུ་དགེ་བཤེས་མཚན་རྟགས་བཞེས་རྗེས། འདུས་མང་ཡོངས་ཀྱིས་ཁ་བཏགས་བསྒྲོན་འབུལ་ཞུས་ཏེ་བསྙེན་བཀུར་ཞུས་ཡོད་པ་དང་། དེའི་རྗེས་བློ་གསལ་གླིང་གི་འདུ་ཁང་གསར་པའི་ནང་དམ་འཇོག་གི་མཛད་སྒོ་དངོས་གཞི་ཚོགས་ཏེ་སྐུ་མགྲོན་རྣམ་པའི་གཏམ་བཤད་གནང་ཡོད་པ་རེད།
ཚེས་ ༢༡ ཉིན་གྱི་སྔ་དྲོར་བློ་གསལ་གླིང་གི་འདུས་མང་ཡོངས་ཀྱིས་མཆོག་སྤྲུལ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་དང་ཆེ་བསྟོད་གཟེངས་རྟགས་ཤིག་ཀྱང་ཕུལ་ཡོད་པ་རེད།
གླིང་མཆོག་སྤྲུལ་སྐུ་ཕྲེང་བདུན་པ་བསྟན་འཛིན་ལུང་རྟོགས་འཕྲིན་ལས་ཆོས་འཕགས་མཆོག་ནི། ༡༩༨༥ ཟླ་ ༡༡ ཚེས་ ༡༨ ཉིན་འཕགས་ཡུལ་དྷ་རམ་ས་ལར་ཡབ་ཚེ་དབང་བཟང་པོ་དང་ཡུམ་བྲག་ནག་པ་སྐལ་བཟང་ཆོས་སྒྲོན་གཉིས་ཀྱི་སྲས་སུ་སྐུ་འཁྲུངས་ཤིང་། ༧གོང་ས་རྒྱལ་བ་རིན་པོ་ཆེ་མཆོག་དང་གནས་ཆུང་ཆོས་རྒྱལ་ཆེན་པོ་གཉིས་ཀྱིས་སྐུ་གོང་མའི་ཡང་སྲིད་འཁྲུལ་མེད་དུ་ངོས་འཛིན་མཛད་དེ། ༡༩༨༧ ལོར་སྐུ་གོང་མའི་གདན་ཁྲིར་ཁྲི་འདོན་དང་མཁས་མང་བློ་གསལ་གླིང་དུ་ཆོས་བཞུགས་གནང་། ༧གོང་ས་སྐྱབས་མགོན་ཆེན་པོ་མཆོག་གི་མདུན་ནས་དགེ་བསྙེན་དང་རབ་བྱུང་དགེ་ཚུལ་བཅས་ཀྱི་བསྙེན་རྫོགས་བསླབ་སྡོམ་རིམ་པར་བཞེས་ཤིང་། དགེ་བའི་བཤེས་གཉེན་ཆེན་པོ་འདན་མ་བློ་ཆོས་རིན་པོ་ཆེ་དང་གླིང་གུང་འབར་ཆེ་ཚང་རིན་པོ་ཆེ། མཁས་པའི་དབང་བོ་ཕ་ར་དགེ་བཤེས་རྣམ་རྒྱལ་དབང་ཆེན། དཔེ་ཐུབ་དགེ་བཤེས་ཐུབ་བསྟན་རབ་རྒྱས་རྣམས་ཡོངས་འཛིན་དུ་བསྟེན་ཏེ་བསྡུས་གྲྭ་བློ་རྟགས་ནས་གསན་སྦྱོང་གི་དབུ་འཛུགས་མཛད་ནས་གཞུང་ཆེན་ཁག་ལ་གསན་བསམ་གྲུབ་ཏེ། འདི་ལོའི་ཕྱི་ཟླ་ ༡༡ ཚེས་ ༢༠ ཉིན་དགེ་བཤེས་དམ་འཇོག་དང་འབྲེལ་དགེ་བཤེས་མཚན་བཏགས་བཞེས་གནང་མཛད་ཡོད་པ་རེད།
ཡོངས་འཛིན་གླིང་མཆོག་སྤྲུལ་རིན་པོ་ཆེ་མཆོག་གི་སྐུ་ཕྲེང་རིམ་བྱོན་ནི། སྐུ་ཕྲེང་དང་པོ་དགའ་ལྡན་ཁྲི་ཆེན་ཡོངས་འཛིན་དོན་འགྲུབ་རྒྱ་མཚོས་རྒྱལ་དབང་སྐུ་ཕྲེང་དྲུག་པ་ཚངས་དབྱངས་རྒྱ་མཚོའི་ཡོངས་འཛིན་ཆེ་བ་གནང་བ་དང་། དགུང་གྲངས་དོན་གསུམ་ཐོག་ ༡༧༢༧ ལོར་ལྷ་བཟང་ཁང་གིས་སྲིད་རྙོག་གི་དོན་རྐྱེན་འོག་དགའ་ལྡན་ཁྲི་ལས་ཕབ་རྗེས་བྱ་ཡུལ་ཆོས་སྡེ་རུ་དགོངས་པ་ཆོས་དབྱིངས་སུ་ཐིམ། སྐུ་ཕྲེང་གཉིས་པ་ཧོ་ཐོག་ཐུ་གླིང་དགེ་འདུན་བསྟན་པའི་རྒྱལ་མཚན་མཆོག་ནི་རྒྱལ་དབང་བདུན་པ་ཆེན་པོའི་ཐུགས་སྲས་གྱི་ཚུལ་དུ་བཟུང་ནས་མདོ་ཁམས་ཡུལ་དུ་ཆེད་གཏོང་གནང་མཛད་ཅིང་། བསྟན་པའི་མིག་རྒྱན་ཆེ་བར་མཛད་པའི་གཟིགས་གསོས་སུ་ཧོ་ཐོག་ཐུའི་ཆོ་ལོ་བཞེས་གནང་མཛད། དགུང་གྲངས་རེ་གསུམ་པར་ ༡༧༩༠ ལོར་དགོངས་པ་ཆོས་དབྱིངས་སུ་ཐིམ། སྐུ་ཕྲེང་གསུམ་པ་བློ་བཟང་བསྟན་པའི་རྒྱལ་མཚན་མཆོག་ནི། ༡༩༧༡ ལོར་ཁམས་སྡེེ་དགེ་གླིང་ཚང་དུ་སྐུ་འཁྲུངས་བ་དང་། དགུང་གྲངས་ཉི་ཤུའི་ཐོག་ ༡༨༡༠ ལོར་དགོངས་པ་ཆོས་དབྱིངས་སུ་ཐིམ། སྐུ་ཕྲེང་བཞི་པ་དགའ་ལྡན་ཁྲི་ཐོག་དོན་ལྔ་པ་ཡོངས་འཛིན་ངག་དབང་ལུང་རྟོགས་ཡོན་ཏན་རྒྱ་མཚོ་མཆོག་ནི་ ༡༨༡༡ ལོར་སྤོ་སྨད་དུ་ཡུམ་སྒྲོལ་མའི་སྲས་སུ་སྐུ་འཁྲུངས་ཤིང་། ༧རྒྱལ་མཆོག་སྐུ་ཕྲེང་བཅུ་གཅིག་པ་མཁས་གྲུབ་རྒྱ་མཚོའི་ཡོངས་འཛིན་གནང་བ་དང་། དགུང་གྲངས་ཞེ་ལྔའི་ཐོག་ ༡༨༥༥ ལོར་དགོངས་པ་ཆོས་དབྱིངས་སུ་ཐིམ།
སྐུ་ཕྲེང་ལྔ་པ་ཤར་ཆོས་ཡོངས་འཛིན་བློ་བཟང་ལུང་རྟོགས་བསྟན་འཛིན་འཕྲིན་ལས་མཆོག་ནི། ༡༨༥༦ ལོར་གངས་ཅན་ལྗོངས་ཀྱི་ཡུལ་དབུས་ལྷ་ས་དང་ཁད་ཉེ་འཕན་ཡུལ་རག་མ་ཞེས་པར་སྐུ་འཁྲུངས་ཤིང་། ༧རྒྱལ་མཆོག་སྐུ་ཕྲེང་བཅུ་གསུམ་པ་ཐུབ་བསྟན་རྒྱ་མཚོ་མཆོག་གི་ཡོངས་འཛིན་མཛད། དགུང་གྲངས་ང་གསུམ་ཐོག་ ༡༩༠༢ ལོར་དགོངས་པ་ཆོས་དབྱིངས་སུ་ཐིམ། སྐུ་ཕྲེང་དྲུག་པ་དགའ་ལྡན་ཐོག་གོ་བདུན་པ་ཡོངས་འཛིན་གླིང་སྤྲུལ་ཐུབ་བསྟན་ལུང་རྟོགས་རྣམ་རྒྱལ་འཕྲིན་ལས་མཆོག་ནི། ༡༩༠༣ ལོར་ཡབ་ཀུན་དགའ་ཚེ་རིང་དང་ཡུམ་བསོད་ནམས་བདེ་སྐྱིད་གཉིས་སུ་སྲས་སུ་བཀར་འོག་ཏུ་སྐུ་འཁྲུངས་ཤིང་། ༧གོང་ས་རྒྱལ་བ་རིན་པོ་ཆེ་སྐུ་ཕྲེང་བཅུ་བཞི་བ་ཆེན་པོ་མཆོག་གི་ཡོངས་འཛིན་ཆེ་བའི་མཚན་གནས་རིམ་པར་བཞེས་ནས་བྱང་ཆུབ་ལམ་གྱི་རིམ་པ་དང་གཞུང་ཆེན་བཀའ་པོད་ལྔས་མཚོན། དཔལ་དུས་ཀྱི་འཁོར་ལོའི་དབང་ཆེན་གྱིས་གཙོས་བདེ་གསང་འཇིགས་གསུམ་གྱི་དབང་ཁྲིད་མན་ངག་སོགས་མདོ་སྔགས་ཡོངས་རྫོགས་ཀྱི་གསུང་ཆོས་དང་༧གོང་ས་མཆོག་ལ་བསྙེན་རྫོགས་ཀྱི་སྡོམ་པ་འབུལ་གནང་མཛད་ནས་སངས་རྒྱས་ཀྱི་བསྟན་པ་ཉིན་མོ་ལྟར་གསལ་བར་མཛད། གདན་ས་གསུམ་གཙོ་གྱུར་གྱི་རིས་སུ་མ་ཆད་པའི་བསྟན་འཛིན་གྱི་སྐྱེས་ཆེན་དམ་པ་དུ་མས་ཞབས་པད་སྤྱི་བོའི་གཙུག་ཏུ་བཀུར། མཐར་དགུང་གྲངས་བརྒྱད་ཅུའི་ཐོག་ ༡༩༨༣ ལོར་དགོངས་པ་ཆོས་དབྱིངས་སུ་ཐིམ་ཚུལ་བསྟན།
རྒྱ་གར་ལྷོ་ཕྱོགས་ས་གནས་གསར་འགོད་པ་དོན་འགྲུབ་བཀྲ་ཤིས།
སྐུ་སྐྱེ་བསྟན་དོན་དུ་བྱོན་ན། བཤད་གྲུབ་ལག་རྗེས་ཤིག་ཡོད་དགོས།
བཀྲ་ཤིས་པའི་གཏམ་བཟང་ལ་ཕྱོགས་བཅུ་ཡོངས་ཀྱི་ཚབ་ཞུས་ཏེ་བཀྲ་ཤིས་བདེ་ལེགས་ཞུ།