༧གོང་ས་མཆོག་གིས་རྒྱ་ནག་གཞུང་གི་མགོ་འཁྲིད་ཚོས་སྣེ་འཁྲིད་དེ་རྒྱ་ནག་ནང་ཁྲིམས་ཀྱི་དབང་བསྒྱུར་དང་གསར་འགྱུར་རང་དབང་ཡོད་པ་ཞིག་བཟོ་ཐུབ་ན་ཡ་རབས་བཟང་སྤྱོད་ཀྱིས་ཕོངས་ཡང་ངོ་ཚ་ཡིས་ཕན་ནུས་ཏོག་ཙམ་འཐོན་རྒྱུ་ཡིན་སྐོར་གསུངས་འདུག
ཕྱི་ཟླ་ ༡༡ ཚེས་ ༢༨ ཉིན་རྒྱ་རིགས་ན་གཞོན་ཤེས་ཡོན་པ་ཁག་ཅིག་ནས་༧གོང་ས་མཆོག་ལ་མཇལ་ཁ་ཞུས་པ་དང་སྟབས་བསྟུན། རྒྱ་རིགས་དཔལ་འབྱོར་རིག་པའི་ཤེས་ཡོན་པ་ཆིན་ཝེ་ཕིན་ལགས་ཀྱིས་མ་འོངས་པར་རྒྱ་ནག་གི་ཆབ་སྲིད་ལམ་ལུགས་ལ་གསར་བརྗེ་བྱེད་ཐབས་སྐོར་བཀའ་འདྲི་དགོངས་སྐོར་ཞུ་སྐབས། ༧གོང་ས་མཆོག་ནས་སྔ་མོ་ཏིན་ཞའོ་ཕིན་གྱིས་བློ་སྟོབས་ཆེན་པོའི་ཐོག་ནས་རྒྱ་ནག་གི་དཔལ་འབྱོར་ལམ་ལུགས་ལ་བསྒྱུར་བཅོས་བཏང་སྟེ། དཔལ་འབྱོར་ལམ་ལུགས་ཀྱི་སྒོ་མོ་ཕྱེས་ནས་རྒྱ་ནག་ལ་ཕན་ཐོགས་ཞེ་དྲགས་བྱུང་ཡོད་པ་རེད། ད་ལྟ་ཞི་ཅིན་ཕིན་གྱིས་རྒྱ་ནག་གི་ཆབ་སྲིད་འགྲོ་སྟངས་ཐད་ཏོག་ཙམ་འགྱུར་བ་ཞིག་གཏང་ཐུབ་པ་ཡིན་ན་ཡག་པོ་མེད་འགྲོ་དྲན་སོང་། ལམ་སང་ཆབ་སྲིད་ཀྱི་འགྱུར་བ་དེ་གུང་ཁྲན་ཏང་ལ་འགྱུར་བ་གཏོང་བའི་སྐད་ཆ་མིན་པར་ཏིན་ཞའོ་ཕིན་གྱིས་གུང་ཁྲན་ཏང་གིས་མགོ་འཁྲིད་པའི་འོག་ལ་དཔལ་འབྱོར་ལམ་ལུགས་ལ་འགྱུར་བ་བཏང་སོང་ང་། གུང་ཁྲན་ཏང་གི་མགོ་འཁྲིད་འོག་རྒྱ་ནག་ནང་ཤེས་ཡོན་དང་བྱམས་བརྩེའི་ཐོག་ཤུགས་བརྒྱབ་པ་ཡིན་ན་བྱེད་ཐུབ་པ་རེད། རྒྱ་ནག་གི་མགོ་འཁྲིད་ཚོས་མཐོང་གི་ཡོད་པ་རེད། ད་ལྟ་བྱང་ཀོ་རི་ཡའི་གནས་སྟངས་ག་འདྲ་འདུག མ་གཞི་དབུ་འཁྲིད་རེད་དེ་གཙོ་བོ་ལམ་ལུགས་དེ་མི་གཅིག་གི་ལག་པར་དབང་ཆ་ཆ་ཚང་ཡོད་པ་ཆགས་དུས་རྙོག་དྲ་དེ་འདྲ་འདུག་གཱ། དཔེར་ན། དངོས་གནས་བྱས་ན་མའོ་ཙེ་ཏུང་གིས་གསར་བརྗེ་བྱེད་པའི་དམིགས་ཡུལ་དང་སུན་ཀྲུང་ཧྲན་གྱིས་གསར་བརྗེ་བྱེད་པའི་དམིགས་ཡུལ་ནི་མི་གཅིག་དང་ཁྱིམ་ཚང་གཅིག་ལ་དབང་བསྡད་པ་དེར་ངོ་རྒོལ་བྱས་པ་རེད། ཕྱིས་སུ་དབང་ཐོབ་སྐབས་སོ་སོ་རྒྱལ་པོ་འདྲ་བྱས་ནས་བསྡད་ན་ཡག་པོ་མི་འདུག ཅེས་གསུངས་འདུག
ཡང་རྒྱ་རིགས་ཆིན་ཝེ་ཕིན་ལགས་ཀྱིས། རྒྱ་ནག་གཞུང་གི་ད་ལྟའི་ལམ་ལུགས་ལ་འདོད་པ་མ་ཁེངས་བའི་གཞོན་སྐྱེས་ཚོས། རྒྱ་ནག་ནང་ཆབ་སྲིད་གསར་བརྗེ་བྱེད་པར་སྐུལ་མ་གཏང་དགོས་སམ་ཡང་ན། སུན་ཀྲུང་ཧྲན་ལ་སློབ་སྦྱོང་བྱས་ཏེ་ད་ལྟའི་ལམ་ལུགས་མགོ་གཏིང་སློག་ཐབས་དགོས་བཀའ་འདྲི་ཞུས་པར་༧གོང་ས་མཆོག་གིས། གསར་བརྗེ་གཏང་ན་ཡག་པོ་ཡོད་པ་རེད། ངོ་ཐོག་ལ་བསམ་བློ་བཏང་བ་ཡིན་ན་གུང་ཁྲན་རིང་ལུགས་ངས་ཡག་པོ་ཡོད་པ་རེད་དྲན་གྱི་འདུག སྤྱི་ཚོགས་དང་དཔལ་འབྱོར་གྱི་ཐོག་ནས་ང་མཱ་ཁི་སི་རིང་ལུགས་པ་ཡིན་ཞེས་པ་དེ་སྤོབས་པ་བྱས་ནས་བཤད་ཀྱི་ཡོད། ང་ཕྱེད་ཀ་ནང་པ་ཡིན། ཕྱེད་ཀ་མཱ་ཁི་སི་རིང་ལུགས་པ་ཡིན་ཞེས་ཟེར་གྱི་ཡོད། ད་དུང་སྤྱི་ཚོགས་རིང་ལུགས་ཟེར་བ་དེ་ནང་པའི་དཔལ་འབྱོར་རིང་ལུགས་རེད་ཅེས་ཕལ་ཆེར་ལབ་ཐུབ་པ་རེད། གུང་ཁྲན་ཏང་གི་མགོ་འཁྲིད་ཚགས་ཚུད་པོ་ཡོད་པས་ཚགས་ཚུད་པོའི་ཐོག་གུ་ཡངས་པོ་བྱས་ན་ཡག་པོ་ཡོང་གི་རེད་དྲན་གྱི་འདུག འཛམ་བུ་གླིང་འདིའི་སྒང་ལ་གུང་ཁྲན་ཞེས་ལབ་དུས་སྡུག་པོ་འདྲ་ཞིག་རྩི་ཡི་མེད་འགྲོ། ད་ལྟ་གུང་ཁྲན་རིང་ལུགས་དཔེ་མི་སྲིད་ཡག་པོ་ཡོད་རེད་དཱ་ཟེར་བ་ཞིག་ཏན་ཏན་བཟོ་ཐུབ་ཀྱི་རེད། ཐོག་མ་གསར་བརྗེ་སློང་སྐབས་དངོས་གནས་དྲང་གནས་རྒྱ་ནག་གི་ངལ་རྩོལ་པ་་འབུམ་ཕྲག་ས་ཡ་མང་པོས་རྒྱབ་སྐྱོར་བྱས་པ་རེད་ལ། རེ་བ་ཞེ་དྲགས་བརྒྱབ་པ་རེད། ཡིན་ནའང་། ཕྱིས་སུ་དབང་ཆ་བྱུང་སྐབས་ཡང་ཁེད་མཚར་འདྲ་པོ་ཞིག་ཆགས་སོང་ང་། ང་ཕྱི་ལོ་ ༡༩༥༤ ལོར་རྒྱ་ནག་ནང་བསླེབས་པ་རེད། སྐབས་དེར་དངོས་གནས་གུང་ཁྲན་ཏང་ཡོན་དེ་ཚོ་ལྷག་བསམ་རྣམ་དག་ཡོད་པ་འདྲ་པོ་མཐོང་སོང་། དེར་བརྟེན་སྐབས་དེར་ངས་ང་གུང་ཁྲན་ཏང་ནང་འཛུལ་རྒྱུ་ཡིན་ཞེས་ལབ་པ་ཡིན། ཕྱིས་སུ་ཡ་རབས་ཀྱི་བསམ་བློ་དང་རྣམ་དཔྱོད་དེ་མེད་པ་ཡིན་དུས་ལུགས་སྲོལ་དམ་པོ་བྱེད་པ་དེ་ལྷག་བསྡད་པ་དང་། དམིགས་ཡུལ་དང་བསམ་བློ་གུ་ཡངས་པོ་དེ་མེད་པ་ཡིན་པས་སྐྱོན་ཡོང་བ་རེད། དེར་བརྟེན་མ་འོངས་པར་ད་ལྟའི་ལམ་ལུགས་ལ་འགྱུར་བ་བཏང་ཡང་ཡ་རབས་སྤྱོད་པ་བཟང་པོའི་ལྟ་གྲུབ་དེ་མེད་དུས་ཁག་པོ་ཆགས་འགྲོ་ཡི་རེད།
གཏམ་བརྗོད་རང་དབང་དང་གསར་འགྱུར་ཏོག་ཙམ་རང་དབང་དགོས་པ་རེད། མ་གཞི་དེ་རིང་ཁ་སང་སྔོན་མ་དང་བསྡུར་ན་པེ་ཅིན་དང་ཧྲང་ཧེ་དེ་ཚོར་ཇ་ཁང་དང་ཟ་ཁང་དེ་འདྲའི་ནང་དུ་མགོ་འཁྲིད་ཚོར་སྐྱོན་བརྗོད་བྱེད་མཁན་ཡོང་གི་འདུག་ཟེར་གྱི་འདུག་གཱ། གསར་འགྱུར་ནང་ཏོག་ཙམ་སྐྱོན་བརྗོད་བྱེད་ས་ཡོད་པ་ཞིག་བྱུང་བ་ཡིན་ན། སྔོན་ནས་སེམས་ནང་དུ་ཡ་རབས་བཟང་སྤྱོད་མེད་པ་ཡིན་ནའང་ཏོག་ཙམ་ངོ་ཚ་འདྲ་པོ་ཞིག་ཡོད་པ་དཔེར་ན། རྒྱ་གར་འདྲ་པོར་ཕན་གྱི་འདུག་གཱ། དེ་ནས་ཁྲིམས་ཀྱི་དབང་བསྒྱུར་དེ་གལ་ཆེན་པོ་རེད། ངའི་ངོ་ཤེས་པ་དེ་འདྲར་ཐུག་སྟེ་ཚགས་པར་རྒྱག་མཁན་ལ་ཐུག་དགོས་པ་རེད་ཅེས་ལབ་དུས། མི་མང་པོས་ཞེད་སྣང་འདྲ་བྱས་ནས་ཐུག་གི་འདུག ང་ལ་རྒྱབ་མདུན་མངོན་ལྐོག་བྱེད་དགོས་པ་གང་ཡང་མེད་པས་ཚགས་པར་རྒྱག་མཁན་སུ་ལ་ཐུག་པ་ཡིན་ནའང་སྤོབས་པ་བྱས་ནས་ཐུག་གི་ཡོད་མ་གཏོགས་ཞེད་སྣང་ཁྱོན་ནས་མེད། ངའི་རོགས་པ་མང་པོ་ཞིག་གིས་ཚགས་པར་རྒྱག་མཁན་ལ་ཐུག་དགོས་པ་རེད་ཅེས་ཞེད་སྣང་བྱེད་ཀྱི་འདུག གུང་ཁྲན་ཏང་གི་མགོ་འཁྲིད་ཚོ་ལུང་པ་ཁག་གི་ནང་དུ་འགྲོ་སྐབས་སྔོན་ལ་དྲི་བ་ག་རེ་འདྲི་རྒྱུ་ཡོད་པ་དེ་ཤོག་ལེབ་ནང་བྲིས་ནས་གཏོང་དགོས་ཀྱི་འདུག་གཱ། ཅེས་གསུངས་འདུག
ཡང་ཆིན་ཝེ་ཕིན་ལགས་ཀྱིས། མ་འོངས་པར་རྒྱ་ནག་འཛམ་གླིང་གི་དམངས་གཙོའི་ལམ་ལུགས་འཕེལ་ཕྱོགས་སུ་བསྐྱོད་དགོས་སྟབས། ང་ཚོས་རྒྱ་ནག་མི་མང་གིས་གཤམ་འོག་ནས་ཡར་དམངས་གཙོ་སྐུལ་འདེད་གཏོང་བར་རེ་སྒུག་བྱེད་དགོས་སམ་ཡང་ན། རྒྱ་ནག་གཞུང་གི་མགོ་འཁྲིད་ཚོས་རང་ངོས་ནས་དམངས་གཙོའི་གསར་བརྗེ་བྱེད་དགོས་བཀའ་འདྲི་ཞུས་པར་༧གོང་ས་མཆོག་གིས། རྒྱ་ནག་སྟོབས་ལྡན་རྒྱལ་ཁབ་ཀྱིས་འཛམ་བུ་གླིང་འདིའི་སྒང་ལ་དངོས་གནས་དྲང་གནས་གྲུབ་འབྲས་ཐོན་པ་ཞིག་དང་། ནུས་པ་ཐོན་པ་ཞིག་བྱེད་དགོས་བྱུང་ན། ཁྱིམ་མཚེས་རྒྱལ་ཁབ་གཙོ་བོར་གྱུར་བའི་རྒྱལ་ཁབ་ཚོའི་ཡིད་ཆེས་དང་བརྩི་འཇོག་བྱེད་པ་དེ་གལ་ཆེན་པོ་རེད། དེའི་ཆ་ནས་བཤད་པ་ཡིན་ན། གོང་དུ་བཤད་པའི་གསར་འགྱུར་རང་དབང་དང་ཁྲིམས་ཀྱི་དབང་བསྒྱུར་བྱུང་བ་ཡིན་ན་ཏན་ཏན་མིས་བརྩི་འཇོག་བྱེད་པ་དང་ཡིད་ཆེས་བྱེད་པ་ཤུགས་ཆེ་རུ་འགྲོ་ཡི་རེད་བསམ་གྱི་འདུག རྒྱ་ནག་སྟོབས་ལྡན་རེད་ཟེར་ནས་དྲག་པོའི་ཤུགས་ངོམས་ཏེ་དཔེར་ན་རྒྱ་ནག་ལྷོ་ཕྱོགས་ཀྱི་མཚོ་བརྒྱུད་ལ་ཅིག་ལབ་ཡོང་དུས། གླིང་ཕྲན་ཆུང་ཆུང་ཞིག་ལ་རྒྱ་ནག་གིས་བདག་དབང་ཞེ་དྲགས་བཤད་དེ་མི་རླུང་ལངས། དོགས་པ་བྱས་ཏེ་ཡག་པོ་ཅི་མི་འདུག་གཱ། དཔེར་ན། ང་རང་སྒེར་ལ་ཆ་བཞག་ན། རྒྱ་ནག་གི་མགོ་འཁྲིད་ཁ་ཤས་ཤིག་གིས་ང་ལ་ཚོགས་གཏམ་བཏང་སྟེ་སྐྱོན་བརྗོད་བྱས་ནས་རྒྱ་ནག་རྒྱལ་ཁབ་ལ་ག་རེ་ཕན་ཐོགས་ཡོད་པ་རེད། རྒྱ་ནག་གིས་སྐྱོན་བརྗོད་དང་ཚོགས་གཏམ་ག་ཚོད་མང་བ་བཏང་ན་ང་རྒྱ་ནག་ལ་འགྲོ་རྒྱུར་ཐག་རིང་དུ་ཕྱིན་པ་རེད། རྒྱ་ནག་ནང་གི་ནང་པ་དང་མི་མང་ལྷག་བསམ་རྣམ་དག་དེ་ཚོའི་གདོང་མཐོང་ཡོང་དུས་ང་གང་མགྱོགས་མགྱོགས་རྒྱ་ནག་ནང་བསླེབ་ཐུབ་ན་དྲན་གྱི་འདུག་ཀྱང་། ད་ལྟའི་རྒྱ་ནག་གཞུང་གི་སྲིད་བྱུས་མཁྲེགས་པོ་དེའི་འོག་ནས་ང་རྒྱ་ནག་ནང་བསླེབ་པ་ཡིན་ན། ཕལ་ཆེར་ང་ལ་ལག་ལྕགས་བརྒྱབ་སྟེ་བཙོན་ཁང་དུ་འགྲོ་དགོས་པ་འདྲ་པོ་འདུག སྐབས་དེར་ཁྱེད་རང་ཚོ་གྲོགས་པོ་ཚོས་སྐད་འདྲ་བརྒྱབ་པ་ཡིན་ནའང་སུ་གཅིག་གིས་རྩི་ཡི་མ་རེད། དེ་ལས་ང་འདི་ལྟར་ཐག་རིང་པོ་བྱས་ནས་བསྡད་ན་ཡག་པོ་རེད་དཱ། ང་ཕྱི་ལོགས་ལ་བསྡད་ནས་མི་ལ་ཕན་ཐོགས་དགའ་རབ་བྱེད་ཐུབ་ཀྱི་འདུག ཨ་རི་དང་ཡུ་རོབ་སོགས་ཀྱི་ནང་དཔེར་ན་ཉེ་ཆར་ང་ཡུ་རོབ་ཀྱི་ལུང་པ་དགའ་རབ་ཅིག་ནང་ཕྱིན་པ་རེད། ངས་སྐད་ཆ་བཤད་དུས་མི་སྟོང་ཕྲག་ཁ་ཤས་དང་སྟོང་ཕྲག་ ༡༠ དེ་འདྲ་ཡོང་གི་འདུག དགའ་བོ་ཞེ་དྲགས་གནང་གི་འདུག མི་མང་པོས་ངའི་སྐད་ཆ་གོ་ན་ཞེ་དྲགས་ཕན་གྱི་འདུག་ཟེར་གྱི་འདུག ང་རང་གིས་སྐྱིད་པོ་རྒྱག་པའི་སྐད་ཆ་མ་རེད། ངའི་མི་ཚེ་འདི་མི་ལ་ཕན་ཐོགས་ཡོད་པ་ཞིག་དགོས་ཀྱི་ཡོད་པ་རེད།
ད་ལྟ་ང་ལོ་ ༨༡ ཡིན་པའི་ནང་པའི་དགེ་སློང་ཞིག་ཡིན། ད་དུང་ལོ་ ༡༠ དང་ ༡༥། ༢༠ ཙམ་ལ་བསྡད་སྲིད་པ་རེད། ངའི་མི་ཚེ་འདི་འགྲོ་བ་མིའི་རིགས་ལ་བེད་སྤྱོད་ཡོད་པ་ཞིག་དགོས་པ་རེད། དེ་ངའི་དམ་བཅའ་ཡིན། ཞེས་གསུངས་འདུག དེ་ནས་རྒྱ་རིགས་ཆིན་ཝེ་ཕིན་ལགས་ཀྱིས་༧གོང་ས་མཆོག་ནས་འཛམ་གླིང་གི་དཔལ་ཡོན་ཐད་བཞག་གནང་བའི་རླབས་ཆེན་གྱི་མཛད་རྗེས་ལ་བཀའ་དྲིན་ཆེ་ཞུ་བ་དང་ཆབས་ཅིག ད་ལན་གྱི་བརྙན་རིས་བཀའ་མོལ་འདི་དྲ་ལམ་དང་ཡུའུ་ཊོབ་བརྒྱུད་འཛམ་གླིང་གི་ཡུལ་ཕྱོགས་གང་སར་ཁྱབ་ཐུབ་པ་དང་། ལྷག་པར་དུ་རྒྱ་ནག་གི་གཞོན་སྐྱེས་ཚོས་ཧ་ཅང་དོ་འཁུར་ཆེན་པོ་གནང་སྟེ། ༧གོང་ས་མཆོག་དང་བོད་ལ་ཁྱོན་ཡོངས་ནས་ཤེས་རྟོགས་ཐུབ་པའི་ཡིད་ཆེས་ཡོད་ལ། རྒྱ་ནག་གཞུང་ནས་ཀྱང་བརྙན་རིས་འདི་མཐོང་ཐུབ་ཀྱི་ཡིན་ལ། ༧གོང་ས་མཆོག་ནས་ལྷག་བསམ་རྣམ་དག་གིས་རྒྱ་ནག་གཞུང་ལ་ཐུགས་རེ་འདི་འདྲ་གནང་བ་དང་། སྤྱི་ཚོགས་ཀྱི་གཟིགས་སྣང་དང་མ་འོངས་པའི་རེ་བ་བཅས་ཁོང་ཚོས་མཐོང་ཐུབ་ཀྱི་རེད། རྒྱ་ནག་གི་མ་འོངས་པ་དེ་བྱམས་དང་སྙིང་རྗེ་ཡོད་པའི་སྤྱི་ཚོགས་ཤིག་ཆགས་ཐུབ་པའི་རེ་བ་ཡོད་པ་དང་། བྱམས་དང་སྙིང་རྗེ་ལྡན་པའི་སྤྱི་ཚོགས་ཤིག་ཆགས་པ་ཡིན་ན་ད་གཟོད་འཛམ་གླིང་ལ་རེ་བ་ཡོད་པ་རེད་ལ། འགྲོ་བ་མིའི་རིགས་ལའང་རེ་བ་ཡོད་པ་རེད། བཀའ་དྲིན་ཆེ། ཞེས་ཞུས་འདུག
གསར་འགོད་པ། པདྨ་མཚོ།
