ཁྲི་ཟུར་ཟམ་གདོང་རིན་པོ་ཆེ་མཆོག་ནས་དབུ་ལ་བཞུགས་མཁན་དང་གཤམ་འོག་སྲི་ཞུ་བའི་བར་བྱམས་བརྩེ་ལྡན་པའི་ནང་ཚགས་ཀྱི་བསམ་ཚུལ་ཡོད་ན་འབྲེལ་བ་ཐག་ཉེ་བོ་དང་གོ་བརྡ་མ་འཕྲོད་པར་བརྟེན་ལས་དོན་འཐུས་ཤོར་འགྲོ་བའི་གོ་སྐབས་ཉུང་ཉུང་ཡིན་སྐོར་གསུངས་འདུག
ཁ་སང་ཕྱི་ཚེས་ ༧ ཉིན་གྱི་ཉིན་རྒྱབ་ཆུ་ཚོད་ ༣།༣༠ ཐོག་གངས་སྐྱིད་གཉའ་ཁྲི་ཚོགས་ཁང་དུ། བོད་ཀྱི་སྲིད་བྱུས་ཉམས་ཞིབ་ཁང་གི་གོ་སྒྲིག་འོག་སྲིད་སྐྱོང་བློ་བཟང་སེང་གེ་མཆོག་གིས་གཙོ་སྐྱོང་གནང་སྟེ། བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་ནས་བོད་མིའི་སྒྲིག་འཛུགས་ཀྱི་སྲི་ཞུ་ལས་བྱེད་པ་རྣམས་ལ་སྤྱི་དམངས་ཀྱི་མངོན་འདོད་འགྲུབ་པར་སྲི་ཞུ་བ་ཞིག་གི་བསམ་བློའི་འཁྱེར་སོ་དང་ལས་དོན་སྒྲུབ་ཕྱོགས་སྐོར་ལ་བླངས་དོར་གྱི་བཀའ་སློབ་གནང་ཡོད་པ་དང་། སྐབས་དེར་རིན་ཆེ་མཆོག་གིས་སྲི་ཞུ་བ་རྣམས་པས་བོད་མི་ས་ཡ་དྲུག་དང་འགྲོ་བ་མིའི་རིགས་སྤྱི་ཡོངས་ཀྱི་ཁེ་ཕན་གྱི་ཆེད་དུ་ངས་ལས་ཀ་ཡག་པོ་བྱེད་ཀྱི་ཡིན། ང་རང་གི་མི་ཚེ་སྐྱེལ་བའི་མཐུན་རྐྱེན་དགོས་པ་དེ་ཚོ་ལས་འགན་གྱི་ཞོར་ལ་ཡོང་གི་རེད་བསམ་པའི་བསམ་བློ་ཞིག་འཁུར་གྱི་ཡོད་ན་བསམ་བློའི་འཁྱེར་སོ་ཡང་དག་པ་ཞིག་ཆགས་ཀྱི་ཡོད་སྐོར་གསུངས་འདུག
ཁྲི་ཟུར་ཟམ་གདོང་རིན་པོ་ཆེ་མཆོག་གིས། ད་ལྟའི་ང་ཚོའི་སྤྱི་ཚོགས་ཀྱི་གནས་སྟངས་དེ་ཆབ་སྲིད་དང་དཔལ་འབྱོར་གྱི་ཐོག་ནས་འགྱུར་བ་ཆེན་པོ་འགྲོ་བཞིན་ཡོད་པའི་གནས་སྐབས་ཙམ་དུ་མ་ཟད། བསམ་བློ་དང་རིག་པའི་གཞུང་ལུགས། འཇིག་རྟེན་གྱི་ལྟ་ཚུལ་ཚང་མར་འགྱུར་བ་འགྲོ་བཞིན་པའི་དུས་ཚོད་ཅིག་ལ་སླེབ་ཡོད་པར་བརྟེན། ང་ཚོས་སྤྱི་ཚོགས་ཀྱི་གནས་ཚུལ་ཤེས་རྒྱུ་ཁག་པོ་རེད་ལ། སྤྱི་ཚོགས་ཀྱི་མངོན་འདོད་ཤེས་རྒྱུ་ཁག་པོ་རེད། དཀའ་ངལ་དེ་ང་ཚོས་ཤེས་དགོས་པ་ཞིག་རེད་བསམ་གྱི་འདུག སྲི་ཞུ་བ་གསུང་གི་ཡོད་དུས་སྲི་ཞུ་བ་ཟེར་བའི་ཚིག་དེ་ཡག་པོ་ཞིག་རེད་འདུག བོད་པའི་གནའ་སྔ་མོ་ནས་ཡི་གེའི་ནང་སྲི་ཞུ་བ་ཟེར་བའི་ཚིག་དེ་ཡོད་པ་རེད། ཡིན་ནའང་། སྲི་ཞུ་བ་རྒྱག་ས་གང་ལ་རྒྱག་དགོས་ཀྱི་ཡོད་པ་དེ་སྔ་མོའི་གནས་སྟངས་དང་ད་ལྟའི་གནས་སྟངས་མི་འདྲ་བ་ཆགས་བསྡད་ཡོད་པ་རེད། སྔོན་མ་ང་ཚོ་བོད་ལ་ཡིན་ན་གཞུང་ཞབས་སྲི་ཞུ་བ་ལབ་ཀྱི་ཡོད་པ་དང་། བདག་པོ་དེ་གཞུང་དང་ཞབས་ཞུ་ཞུ་ས་དེ་གཞུང་། ཞབས་ཞུ་ཞུ་མཁན་དེ་གཞུང་ཞབས་པ་ཚོ་རེད། དེང་སང་ཡིན་ན་ཞབས་ཞུ་ཞུ་ས་དེ་གཞུང་མིན་པར་མི་མང་དང་ཡང་ན་སྤྱི་ཚོགས་ཡིན་ལ། དེ་འདྲ་ཏག་ཏག་བསྡད་ཀྱི་ཡོད་མེད་མི་ཤེས་ཏེ་གང་ལྟར་འགྲོ་སྟངས་དེ་འདྲ་ཆགས་བསྡད་ཡོད་པ་རེད། དངོས་གནས་བྱས་ན་སྲི་ཞུ་བ་ཚོ་མང་ཚོགས་ལ་སྲི་ཞུ་ཞབས་འདེགས་ཞུ་མཁན་ཡིན་ན། ཁོང་ཚོས་ཡིད་ཆེས་བློ་གཏད་བྱེད་ས་དང་ཞབས་ཞུ་ཞུ་ས་དེ་ག་བར་འཚོལ་དགོས་ཀྱི་ཡོད་པ་རེད་ཟེར་ན། རང་རང་གིས་ཞབས་ཞུ་ཞུ་སའི་སྤྱི་ཚོགས་དེ་ལ་ཆ་བཞག་དགོས་པ་རེད། སྤྱི་ཚོགས་ཀྱི་ཞབས་ཞུ་དེ་སྒྲིག་འཛུགས་ཤིག་གི་ངོས་ནས་ཞུ་ཡི་ཡོད་སྟབས། སྒྲིག་འཛུགས་དེ་བཙན་བྱོལ་བོད་མིའི་སྤྱི་ཚོགས་ནང་ལ་ཆ་མཚོན་པ་ཡིན་ན། དབུས་བོད་མིའི་སྒྲིག་འཛུགས་ཆགས་ཀྱི་ཡོད་པ་རེད་ལ། བཙན་བྱོལ་བོད་གཞུང་ཆགས་ཀྱི་ཡོད་པ་རེད། སྲི་ཞུ་ཞུ་ས་དེ་མང་ཚོགས་དང་། སྲི་ཞུའི་བརྒྱུད་ལམ་དེ་དབུས་བོད་མིའི་སྒྲིག་འཛུགས་རེད། དེ་གཉིས་བར་གྱི་འབྲེལ་ལམ་དེ་གསལ་པོ་ཞིག་དང་ཡང་དག་པ་ཞིག་གི་ཐོག་ནས་ཕྱག་ལས་གནང་ཐུབ་པ་ཡིན་ན། སྲི་ཞུ་བ་ཞེས་གསུངས་པ་དེ་མིང་དོན་མཚུངས་བ་ཞིག་ཆགས་མདོག་ཁ་པོ་རེད་བསམ་གྱི་འདུག ཅེས་གསུངས་འདུག
ཡང་ཁོང་གིས། སྲི་ཞུ་བའི་གནས་བབ་ག་རེ་ཆགས་དང་མ་ཆགས་དེ་སྲི་ཞུ་བ་རང་ཉིད་ཀྱི་བསམ་བློའི་ནང་རང་གི་སྒྲུབ་བྱའི་སྲི་ཞུའི་བྱ་བ་དེ་ག་འདྲ་ཞིག་ལ་དམིགས་ཡུལ་འཛིན་གྱི་ཡོད་པ་དང་། ག་རེའི་ཆེད་དུ་དམིགས་ཡུལ་འཛིན་གྱི་ཡོད་མེད་ལ་རག་ཡོད་པ་རེད། བསམ་བློའི་འཁྱེར་ཕྱོགས་ཟེར་བའི་བསམ་བློ་ལ་རྒྱུའི་ཀུན་སློང་དང་དུས་ཀྱི་ཀུན་སློང་ཞེས་རིམ་པ་འདྲ་པོ་གཉིས་ཡོད་པ་རེད། བསམ་བློའི་རིམ་པ་དང་པོ་དེ་རྒྱུའི་ཀུན་སློང་དཔེར་ན་ཐོག་མར་ལས་བྱེད་ནང་འཛུལ་སྐབས་ཀུན་སློང་ག་འདྲ་ཞིག་གི་ཐོག་ནས་འཛུལ་བ་རེད་དེ་གལ་ཆེ་ཤོས་རེད། གྲྭ་བ་བྱས་པ་ཡིན་ན་དགོན་པའི་ནང་འཛུལ་ཞུགས་བྱས་ཏེ་དགེ་ཚུལ་སློང་གི་སྡོམ་པ་སྲུང་སྐབས། ངེས་པར་འབྱུང་བའི་ཚུལ་ཁྲིམས་ཀྱི་དབང་དུ་བྱས་སྟེ་ཞེས་གསུངས་པ་ལྟར། ཐར་པ་དོན་གཉེར་གྱི་བློ་ཞིག་གི་དབང་གིས་དགོན་པའི་ནང་སྡོམ་པ་ཞུས་དགོས་ཀྱི་ཡོད་པ་རེད་མ་གཏོགས་ཐར་པ་དོན་གཉེར་གྱི་བློ་ཞིག་མེད་པ་ཡིན་ན་སྡོམ་པ་ཐོབ་རྒྱུ་ཡོད་པ་མ་རེད། ཡིན་ནའང་། དེང་སང་མང་པོ་ཞིག་ཕ་མས་བསྐྱལ་བཞག་པ་དང་། ཡང་ཁ་ཤས་ཧེབ་འདྲ་པོ་ལངས་ཏེ་དགོན་པའི་ནང་ཕྱིན་པ་མ་གཏོགས་ཐར་པ་དོན་གཉེར་གྱི་བློ་ཕར་བཞག་ནས་ཐར་པ་ག་རེ་ཡིན་པ་ངོ་མ་ཤེས་མཁན་དེ་འདྲས་དགེ་ཚུལ་སློང་གི་སྡོམ་པ་སྲུང་ནས་བསྡད་ཡོད་པ་མང་པོ་ཡོད་པ་རེད། དེ་ཚོ་མིང་དང་དོན་མཚུངས་ཀྱི་ཡོད་པ་མ་རེད། དེ་ནང་བཞིན་གྱིས་སྲི་ཞུ་བ་དེའང་ཐོག་མར་མར་སྐུལ་མ་གནང་བ་ཡིན་ན་རེད། ཡར་འཚང་སྙན་བཏང་བ་ཡིན་ནའང་རེད། དེའི་སྐབས་སུ་འགྲོ་བ་མིའི་རིགས་སྤྱི་ཡོངས་ཀྱི་དོན་དུ་སྤྱི་ཚོགས་ལ་ཞབས་འདེགས་ཞུ་བའི་ཀུན་སློང་དེ་འཁུར་ནས་མཉམ་ཞུགས་བྱས་པ་ཞིག་ཡིན་ན། ཀུན་སློང་དེ་ཡང་དག་པ་ཞིག་ཆགས་ཀྱི་ཡོད་པ་རེད། ཅེས་གསུངས་འདུག
སྲི་ཞུའི་ལས་དོན་བྱེད་སྐབས་རང་གཞན་སྤྱི་ཕན་གྱི་བསམ་བློ་གཏོང་ཐུབ་ན་དཀའ་ལས་མེད་སྐོར་ཁོང་གིས། སྲི་ཞུའི་ལས་དོན་སྒྲུབ་སྐབས་འོས་ཤིང་འཚམ་པ་ག་རེ་ཡིན་པ་དང་། དྲང་བདེན་ག་རེ་ཡིན་པ་དེའི་ཐོག་ལ་གཙོ་བོ་འགྲོ་ཐུབ་པ་ཞིག་དང་། བསམ་བློ་དེ་གཞན་ཕན་གྱི་བསམ་བློ་ཞིག་མ་གཏོགས་རང་དོན་གཉེར་བའི་བསམ་བློ་སྟེ། ང་ལ་ཕོགས་ཡག་པོ་དགོས་ཀྱི་ཡོད། ང་འདུག་ས་ཡག་པོ་དགོས་ཀྱི་ཡོད། ང་ལ་འཚོ་བ་ཡག་པོ་དགོས་ཀྱི་ཡོད། དེའི་དོན་དུ་ངས་ལས་ཀ་བྱས་པ་ཡིན་བསམ་པ་ཡིན་ན། ལས་ཀ་བྱས་པ་གཅིག་པ་རེད་དེ་བསམ་བློ་འཁྱེར་སྟངས་ཀྱི་ཐོག་ནས་རིན་ཐང་གཉོམ་པོ་འདྲ་བཟོ་བཞག་གི་ཡོད་པ་རེད། ལས་ཀ་འདི་སྤྱི་ཚོགས་ཀྱི་ལས་དོན་ཞིག་རེད། བོད་མི་ས་ཡ་དྲུག་གི་ཁེ་ཕན་གྱི་ཆེད་དུ་རེད། བོད་མི་ས་ཡ་དྲུག་གི་གཙོས་པའི་འགྲོ་བ་མིའི་རིགས་སྤྱི་ཡོངས་ཀྱི་ཁེ་ཕན་ཆེད་དུ་ཡིན་པས་ངས་འདི་ཡག་པོ་ཞིག་བྱེད་ཀྱི་ཡིན། ང་རང་གི་མི་ཚེ་སྐྱེལ་བའི་མཐུན་རྐྱེན་དགོས་པ་དེ་ཚོ་ལས་འགན་གྱི་ཞོར་ལ་ཡོང་གི་རེད་བསམ་པའི་བསམ་བློ་ཞིག་འཁུར་གྱི་ཡོད་ན། བསམ་བློའི་འཁྱེར་སོ་དེ་ཡང་དག་པ་ཞིག་ཆགས་ཀྱི་ཡོད་པ་རེད་བསམ་གྱི་འདུག ཅེས་དང་། བྱ་བར་སྤྲོ་སྣང་ལྡན་པའི་ཐོག་ནས་འདི་ངའི་ལས་འགན་ཡིན། འདི་བྱས་པར་བརྟེན་ངའི་ཚེ་འདི་དང་ཕྱི་མ་གཉིས་ཆའི་དོན་དག་འགྲུབ་ཀྱི་ཡོད་བསམ་པའི་ཐོག་ནས་བརྩོན་འགྲུས་གནང་བ་ཡིན་ན་དཀའ་ལས་གང་ཡང་མེད་སྐོར་གསུངས་འདུག
མཇུག་ཏུ་ཁོང་གིས་མི་དང་མིའི་བར་བྱམས་བརྩེ་དང་ལྡན་པའི་ནང་ཚགས་ཀྱི་བསམ་ཚུལ་ཡོད་ན་འབྲེལ་བ་ཐག་ཉེ་བོ་དང་ལས་དོན་འཐུས་ཤོར་མེད་པ་ཞིག་ཡོང་སྐོར་གསུངས་དོན། སྲི་ཞུ་ལས་བྱེད་པ་རྣམས་ཀྱིས་ཕྱག་ལས་རྣམས་རྒྱུན་སྐྱོང་གནང་རྒྱུ་དང་། ཆབ་སྲིད་ཀྱི་མགོ་འཁྲིད་ཚོས་གསར་གཏོད་དང་(Innovative )ག་རེ་ཡོད་པ་དེ་གནང་ན། རྒྱུན་མཐུད་ཡོད་པ་དང་རྒྱུན་འཛིན་ཡང་ཡོད་པ་རེད། རྒྱུན་འཛིན་གྱི་ནང་དུ་དགོས་ངེས་ཀྱི་འགྱུར་བ་དང་གསར་གཏོད་དེ་ཡོད་པ་དང་། དེ་གཉིས་མཉམ་དུ་འགྲོ་བར་དུས་ཚོད་ངེས་ཅན་ནང་འགྱུར་བ་འགྲོ་མཁན་གྱི་མགོ་འཁྲིད་དང་དུས་ཡུན་ཧྲིལ་པོར་འདུག་མཁན་གྱི་སྲི་ཞུ་ལས་བྱེད་པ་བར་གྱི་སྒྲིག་འཛུགས་གཅིག་ནང་ནུས་པ་སྤུངས་སྟངས་དེ་འདྲ་ཞིག་ཡིན་དགོས་པ་གལ་ཆེན་པོ་ཡིན་ལ། བསྡོམས་བརྒྱབ་ནས་ཞུས་ན། མགོ་འཁྲིད་དང་སྲི་ཞུ་ལས་བྱེད་སུ་ཡིན་ནའང་ལས་དོན་དེ་སྤྱི་ཚོགས་ཀྱི་ཆེད་དུ་བྱེད་ཀྱི་ཡོད་པ་དང་། སྒྲིག་འཛུགས་ཀྱི་ངོས་ནས་བྱེད་ཀྱི་ཡོད་སྟབས། དེ་ལ་ངེས་པར་མཁོ་བའི་གནས་ཚུལ་ཞིག་ནི་སོ་སོས་ཞབས་འདེགས་ཞུ་སའི་མི་མང་དང་སྲི་ཞུ་བའི་བར་གྱི་འབྲེལ་བ་དང་། རང་ལ་ལམ་སྟོན་བྱེད་མཁན་གྱི་དབུ་འཁྲིད་རྣམ་པ་ཚོ་དང་གཤམ་འོག་ཞབས་འདེགས་ཞུ་མཁན་བར་གྱི་འབྲེལ་བ་དེ་རྩ་ཆེན་པོ་ཞེ་དྲགས་ཡིན་ལ། དབུ་ལ་བཞུགས་མཁན་དང་གཤམ་འོག་ཞབས་འདེགས་ཞུ་མཁན་གཉིས་བར་ལ་བྱམས་བརྩེ་དང་ལྡན་པའི་ནང་ཚགས་ཀྱི་བསམ་ཚུལ་ཡོད་པ་ཡིན་ན། ཡར་མར་གོ་བརྡ་མ་འཕྲོད་པའི་གནས་སྟངས་དེ་ཡོང་གི་མ་རེད་ལ། གོ་བརྡ་མ་འཕྲོད་པའི་གནས་སྟངས་མེད་ན་ལས་དོན་ག་རེ་ཡིན་ནའང་འཐུས་ཤོར་དུ་འགྲོ་བའི་གོ་སྐབས་ཞེ་དྲགས་ཉུང་དུ་འགྲོ་ངེས་རེད། དེ་འདྲ་ཡོང་བར་ལས་དོན་གྱི་ཐོག་ལ་བསམ་ཚུལ་མ་མཐུན་པ་བྱུང་བ་དང་། གང་ཟག་སྒེར་གྱི་ནང་ཚགས་ཀྱི་གནས་སྟངས་གཉིས་དཀྲུག་དཀྲུག་མི་གཏོང་བ་དེ་གལ་ཆེན་པོ་ཞེ་དྲགས་ཡིན་ལ། སྒྲིག་འཛུགས་ཀྱི་མཉམ་འདུས་ལས་དོན་བྱེད་སྐབས་ནོར་འཁྲུལ་ཤོར་ན་འབྲེལ་ཡོད་གང་ཟག་ལ་འཁོན་འཛིང་བྱེད་རྒྱུ་མེད་ལ། དབུ་ལ་བཞུགས་མཁན་གྱིས་ནོར་བ་ཡིན་ན། ངས་བལྟས་ན་ནོར་གྱི་འདུག ནོར་བའི་རྒྱུ་མཚན་འདི་རེད་ཅེས་ཡར་ཞུ་ནུས་པ་ཞིག་དང་། མར་གཤམ་འོག་གི་ལས་ཀ་བྱེད་མཁན་གྱིས་ནོར་བ་ཡིན་ན་དེ་ནོར་བ་རེད་ཅེས་བཤད་དགོས་པ་དང་། ཡང་ནོར་མེད་པ་ཡིན་ན་ནོར་མེད་པའི་རྒྱུ་མཚན་བཤད་པའི་གོ་སྐབས་ངེས་པར་དུ་སྤྲོད་དགོས་པ་རེད། དེ་འདྲའི་འབྲེལ་བ་ཞིག་ཡོད་ན་མི་དང་མིའི་བར་འབྲེལ་བ་ཐག་ཉེ་བོ་ཞིག་ཆགས་ཐུབ་པ་དང་། མདུན་ལ་བཤད་རྒྱུ་དང་རྒྱབ་ལ་བཤད་རྒྱུའི་སྐད་ཆ་མི་འདྲ་བ་གཉིས་མི་ཡོང་བར་ཁྱད་པར་ཞེ་དྲགས་ཡོད་སྐོར་གསུངས་འདུག
གསར་འགོད་པ། པདྨ་མཚོ།
ཟམ་གདོང་རིན་པོ་ཆེ་ལྟ་བུའི་མཁས་པའི་དབང་པོ་ཡོད་བཞིན་དུ་སློབ་སྟོན་པའམ་གྲོས་འདྲི་བ་དགོས་པའི་རྒྱུ་མཚན་ཅི། གྲོས་འདྲི་བ་ཞེས་པ་ལོ་རྒྱུས་སོགས་ཕྱི་ནང་གི་གནས་ཚུལ་ཆ་ཚང་མཁྱེན་མཁན་ཞིག་དགོས་པ་ཡིན།