ཉེ་ཆར་བྱང་ཀོ་རི་ཡིས་མེ་ཤུགས་འཕུར་མདའ་ཞིག་ཚོད་ལྟ་བྱ་འཆར་ཡོད་པ་དེ་གླིང་ཕྲན་གཉིས་ནང་སྙོབ་ཐུབ་ཚུལ་བསྒྲགས་པ་དེར་ཨ་རིའི་བདམས་ཐོན་སྲིད་འཛིན་ཊི་རུམ་ཕི་ཡིས་ཡིད་ཆེས་མེད་ཟེར།
ཟླ་འདིའི་ཕྱི་ཚེས་ ༡ ཉིན་བྱང་ཀོ་རི་ཡའི་སྲིད་འཛིན་ཀེམ་གྱིས་ཨ་རིས་ལྷོ་ཀོ་རི་ཡ་དང་མཉམ་འབྲེལ་དམག་དོན་སྦྱོང་བརྡར་བྱེད་བཞིན་དུ་བྱང་ཀོ་རི་ཡའི་རྡུལ་ཕྲན་གསར་བཟོ་དང་ཚོད་ལྟ་བྱེད་པར་སྐྱོན་བརྗོད་བྱེད་ཀྱིན་ཡོད་ཀྱང་། བྱང་ཀོ་རི་ཡས་གླིང་ཕྲན་གཅིག་ནས་གཅིག་ལ་སླེབ་ཐུབ་པའི་མེ་ཤུགས་འཕུར་མདའ་ (ICBM) དང་རྡུལ་ཕྲན་མཚོན་ཆ་གསར་བཟོ་དང་ཚོད་ལྟ་བྱ་སྲིད་སྐོར་བརྗོད་པ་དེར། ཁ་སང་ཨ་རིའི་སྲིད་འཛིན་འོས་ཐོབ་པ་སྐུ་ཞབས་ཊི་རུམ་ཕི་ཡིས་ཊི་ཝེ་ཊིར་ (Twitter) སྟེང་ལན་འདེབས་ཤིག་བྱས་ཡོད་པའི་ནང་། “བྱང་ཀོ་རི་ཡས་གསར་དུ་བཟོས་པའི་མེ་ཤུགས་འཕུར་མདའ་དེ་བྱང་ཀོ་རི་ཡ་ནས་ཨ་རིར་སྙོབ་ཐུབ་ཚུལ་བཤད་ཡོད་ཀྱང་ད་ལྟའི་ཆར་དེ་འདྲ་འབྱུང་སྲིད་ཀྱི་མ་རེད།” ཅེས་བརྗོད་འདུག
ཁོས་མུ་མཐུད་དུ། བྱང་ཀོ་རི་ཡས་གླིང་ཕྲན་གཅིག་ནས་གཅིག་ལ་སླེབ་ཐུབ་པའི་མེ་ཤུགས་འཕུར་མདའ་ (ICBM) གསར་བ་ཞིག་ལག་འགྲུབ་ཀྱིས་ཚོད་ལྟ་བྱ་འཆར་ཡོད་པའི་སྐོར་ལ་སྐྱོན་བརྗོད་དང་། རྒྱ་ནག་གིས་བྱང་ཀོ་རི་ཡའི་མེ་ཤུགས་འཕུལ་མདའ་གསར་བཟོ་དང་ཚོད་ལྟ་བྱ་བར་འགོག་སྡོམ་བྱེད་དགོས་པ། དེ་བཞིན། འདི་ལོའི་ཕྱི་ ༡ ཚེས་ ༢༠ རྗེས་ནས། རྒྱལ་ཚོགས་ཀྱི་ལས་གཞི་ཁག་ཅིག་དང་འབྲེལ་བའི་ཨ་རིའི་ཕྱི་སྲིད་ལ་འགྱུར་བ་འགྲོ་སྲིད་སྐོར་སོགས་བརྗོད་འདུག
ཨ་རི་དང་རྒྱ་ནག་གཉིས་བར་གྱི་ཚོང་འབྲེལ་སྐོར་ལ་ཁོས། “ཨ་རི་དང་རྒྱ་ནག་གཉིས་བར་གྱི་ཉོ་འཚོང་ལས་རྒྱ་ནག་ལ་ཁེ་བཟང་ཕོན་ཆེན་པོ་རག་གི་ཡོད་ནའང་། རྒྱ་ནག་གིས་ཨ་རི་དང་བྱང་ཀོ་རི་ཡ་གཉིས་བར་གྱི་རྡུལ་ཕྲན་མཚོན་ཆའི་དཀའ་རྙོག་སྣང་མེད་དུ་གཏོང་གི་ཡོད་སྟབས། ཕྱོགས་གཉིས་བར་གྱི་མ་འོངས་ཉོ་འཚོང་འབྲེལ་ལམ་ལ་འགྱུར་བ་གཏོང་སྲིད” ཅེས་བརྗོད་འདུག
གནས་ཚུལ་ལྟར་ན། དེང་སྐབས་སྐུ་ཞབས་ཊི་རུམ་ཕི་ཡིས། ཕྱོགས་གཅིག་ནས་ཨ་རྒྱ་གཉིས་བར་གྱི་ཉོ་འཚོང་ཁེ་ལས་ལ་སྐྱོན་བརྗོད་དང་། ཕྱོགས་གཞན་ཞིག་ནས། ཨུ་རུ་སུ་དང་ཨ་རི་གཉིས་བར་གྱི་འབྲེལ་ལམ་ཡར་རྒྱས་གཏང་འཆར་ཡོད་པ་དང་། དེ་བཞིན། འཆར་ཟླ་ ༣ པའི་ནང་། སྐུ་ཞབས་ཊི་རུམ་ཕི་ཡིས་བྱང་ཀོ་རི་ཡའི་སྲིད་འཛིན་ཀེམ་དང་ལྷན་དུ། བྱང་ཀོ་རི་ཡའི་རྡུན་ཕྲན་གསར་བཟོ་དང་ཚོད་ལྟའི་གནད་དོན་སྐོར་ལ་ཐད་ཀར་འབྲེལ་མོལ་བྱ་འཆར་ཡོད་པ་མ་ཟད། ཁོང་གིས་སྔར་ལས་ལྷག་པའི་སྒོ་ནས་རྒྱ་ནག་གཞུང་ལ་རྒྱ་ནག་དང་བྱང་ཀོ་རི་ཡ་གཉིས་བར་གྱི་འབྲེལ་ལམ་གཅོད་དགོས་པའི་གནོན་ཤུགས་སྤྲོད་འཆར་ཡང་ཡོད་འདུག
སྐུ་ཞབས་ཊི་རུམ་ཕི་ཡིས་ཨ་རྒྱ་གཉིས་བར་གྱི་ཉོ་འཚོང་དང་། བྱང་ཀོ་རི་ཡ་དང་རྒྱ་ནག་གཉིས་བར་གྱི་འབྲེལ་ལམ་བཅས་ལ་སྐྱོན་བརྗོད་བྱས་པ་དེ་ནི། ཟླ་སྔོན་མའི་ཕྱི་ཚེས་ ༡༧ ཉིན། རྒྱ་ནག་གི་མཚོ་དམག་རུ་ཁག་ཅིག་གིས། ཨ་རིའི་མཚོ་འོག་ལྟ་ཞིབ་ཚད་ལེན་ཆུ་འཛུལ་ཡོ་བྱད་ཅིག་ཁྱེར་བའི་རྩོད་རྙོག་དང་འབྲེལ་ཏེ་བཤད་པ་ཞིག་ཡིན་འདུག
འདས་པའི་ལོ་ངོ་བཅུ་ཕྲག་ནང་ཨ་རི་དམིགས་འབེན་དུ་བཟུང་སྟེ། བྱང་ཀོ་རི་ཡས་སྔ་རྗེས་སུ་ཐེངས་ ༥ ལ་རྡུལ་ཕྲན་གསར་བཟོ་དང་ཚོད་ལྟ་བྱས་ཡོད་པ་མ་ཟད། ན་ནིང་གཅིག་པུར་མེ་ཤུགས་འཕུར་མདའ་མི་འདྲ་བ་ ༢༠ ལྷག་ལ་ཚོད་ལྟ་བྱས་ཡོད་འདུག ད་ལན་ཚོད་ལྟ་བྱ་འཆར་ཡོད་པའི་གླིང་ཕྲན་གཅིག་ནས་གཅིག་ལ་ཐོན་ཐུབ་པའི་མེ་ཤུགས་འཕུར་མདའ་ (ICBM) དེ་ནི་སྤྱི་ལེ་ ༥༥༠༠ རིང་ཚད་ལ་འཕུར་སྐྱོད་ཐུབ་པ་དང་། མེ་ཤུགས་འཕུར་མདའ་དེའི་རིགས་ཁ་ཤས་ཤིག་སྤྱི་ལེ་ ༡༠༠༠༠ ལྷག་གི་རིང་ཚད་ལ་འགྲོ་ཐུབ་ཀྱི་ཡོད་པ་དང་། བྱང་ཀོ་རི་ཡ་ནས་ཨ་རིའི་མངའ་སྡེ་ཁ་ལེ་ཧྥོར་ནེ་ཡ་བར་སྤྱི་ལེ་ ༩༠༠༠ ལྷག་ཅིག་གི་རིང་ཚད་ལས་མེད་འདུག
རྒྱལ་ཚོགས་ཀྱི་དྲུང་ཆེ་གསར་བ་སྐུ་ཞབས་གྷུ་ཊིར་རི་ (Guterres) ལགས་ནས། སི་རི་ཡ་དང་ལྷོ་སུ་ཌན། ཡི་མིན་དང་བྷུ་རུན་ཌེ། བྱང་ཀོ་རི་ཡ་སོགས་གཙོས་པའི་འཛམ་གླིང་ཤར་ནུབ་རྒྱལ་ཁབ་ཁག་ནང་འབྱུང་བཞིན་པའི་ཟིང་འཁྲུག་ཞི་འཇགས་སུ་བཏང་སྟེ། ཕྱི་ལོ་ ༢༠༡༧ ལོ་ནི་ཞི་བདེ་ཡི་ལོ་ཞིག་ཏུ་བསྐྲུན་ཐབས་བྱེད་དགོས་པའི་སྐོར་ལ། ང་ཚོས་མིག་མདུན་གྱི་མི་མང་ས་ཡ་མང་པོ་རྩོད་རྙོག་དང་དམག་འཁྲུག་གི་ཁྲོད་དུ་མུ་མཐུད་དཀའ་སྡུག་མྱོང་བཞིན་པར་ཇི་ལྟར་རོགས་སྐྱོར་བྱེད་རྒྱུ་ཡིན་ནམ། དྲག་པོའི་ཟིང་འཁྲུག་ཁྲོད་དུ་མི་སེར་རྣམས་ལ་རྡུང་རྡེག་ཐེབས་ཀྱི་ཡོད། བུད་མེད་དང་བྱིས་པ། སྐྱེས་པ་མང་པོ་རྨས་སྐྱོན་དང་དམར་གསོད། སོ་སོའི་ཡུལ་ལུང་ནས་ཕྱིར་འཕུད་གཏོང་བ། བདག་དབང་འཕྲོག་པ་དང་དབུལ་ཕོངས་ཀྱི་གནས་སུ་སྐྲོད་བཞིན་ཡོད་སྟབས། ཟིང་འཁྲུག་དེ་དག་གི་ཁྲོད་དུ། ང་ཚོར་ཕམ་ཉེས་མ་གཏོགས་རྒྱལ་ཁ་ཅི་ཡང་ཐོབ་མེད། ཕྱི་ལོ་ ༢༠༡༧ ནང་མི་སེར་དང་སྲིད་གཞུང་། དབུ་ཁྲིད་རྣམ་པ་ཚང་མས་ཕྱར་བ་གྲུ་འདེགས་ཀྱི་སྒོ་ནས་དཀའ་སྡུག་དེ་དག་ལ་གདོང་ལེན་བྱེད་རྒྱུར་འབད་བརྩོན་གནང་དགོས། ཞི་བདེ་ནི་ང་ཚོ་ཚང་མའི་དམིགས་འབེན་དང་རེ་སྙེག་ཡིན་པས། ཞི་བདེ་ལ་བརྟེན་ནས། ང་ཚོས་འགྲོ་བ་མིའི་ཆེས་མཐོང་དང་རྩིས་ཐང་། རེ་བ་དང་འཕེལ་རྒྱས། དེ་བཞིན་འགྲོ་བ་མི་ཚང་མ་གཞིས་ཁྱིམ་གཅིག་ལྟར་འཚོ་ཐབས་སུ་འབད་བརྩོན་བྱེད་དགོས། འཛམ་གླིང་སྟེང་ཞི་བདེ་ཡོང་མིན་དེ་ང་ཚོ་ལ་རག་ལས་ཡོད། ཅེས་བརྗོད་འདུག
ཁོས་སྐུ་ཞབས་ཊི་རུམ་ཕི་ཡི་གནས་སྤོ་སྲིད་ཇུས་དང་འབྲེལ་ཏེ། ཁོངས་ཞུགས་རྒྱལ་ཁབ་ཚང་མ་མཉམ་འབྲེལ་ཐོག ད་ཆར་འཕྲད་བཞིན་པའི་དཀའ་རྙོག་ལ་གདོང་ལེན་བྱེད་དགོས། དེ་ནི་རྒྱལ་ཚོགས་ཀྱི་ལས་གཞི་གཙོ་བོ་ཡིན་པ་མ་ཟད། ད་དུང་ཨ་རི་གཙོ་བོར་འཛིན་པའི་ཨ་རིའི་སྤྱི་མཐུན་ཚོགས་པའི་སྲིད་ཇུས་དང་ཡང་འབྲེལ་བ་ཡོད། ཅེས་བརྗོད་འདུག
སྐུ་ཞབས་གྷུ་ཊིར་རི་ཡི་གཏམ་བརྗོད་དེ་དང་འབྲེལ་ཏེ། ཨ་རིའི་སྲིད་འཛིན་འོས་ཐོབ་པ་སྐུ་ཞབས་ཊི་རུམ་ཕི་ཡིས་ཁོང་གི་ཊི་ཝེ་ཊིར་བརྒྱུད་ལམ་ནས། “ཟླ་འདིའི་ཕྱི་ཚེས་ ༢༠ རྗེས་ནས། རྒྱལ་ཚོགས་ཀྱི་ལས་གཞི་ཁག་ཅིག་དང་འབྲེལ་བའི་ཨ་རིའི་ཕྱི་སྲིད་ལ་འགྱུར་བ་འགྲོ་སྲིད། ལས་གཞི་དེ་དག་རྒྱལ་ཚོགས་ལ་མཚོན་ན་གལ་ཆེན་ཡིན་སྲིད་མོད། འོན་ཀྱང་དེ་ནི་སྲིད་དོན་མི་སྣ་ཁག་ཅིག་མཉམ་འཛོམས་ཀྱིས། གཞན་གྱི་སྲིད་དོན་ལ་ཐེ་གཏོགས་ཀྱི་སྐད་ཆ་བཤད་ནས་ཆུ་ཚོད་བསྐྱེལ་ཐབས་བྱས་པ་ཞིག་ཡིན་སྟབས། ཧ་ཅང་ཡིད་སྐྱོ་བ་ཞིག་རེད།” ཅེས་བརྗོད་འདུག
གསར་འགོད་པ། པདྨ་རྒྱལ།
