ཨ་རིའི་དབུས་རྒྱུད་རྒྱལ་ཁབ་ནེ་ཁ་ར་གྷུ་གཞུང་གིས་ཐའེ་ཝན་ལ་རྒྱབ་སྐྱོར་བྱས་ཏེ་མ་འོངས་པར་ཐའེ་ཝན་རྒྱལ་ཚོགས་དང་རྒྱལ་སྤྱིའི་སྲིད་དོན་དང་ཉོ་ཚོང་སྒྲིག་འཛུགས་ཁག་ནང་ཞུགས་ཐུབ་པར་འབད་བརྩོན་བྱ་རྒྱུ་ཡིན་འདུག
ཁ་སང་ཐའེ་ཝན་སྲིད་འཛིན་ལྕམ་ཚའེ་ཡེན་ཝན་ཨ་རིའི་དབུས་རྒྱུད་རྒྱལ་ཁབ་ནེ་ཁ་ར་གྷུ་ (Nicaragua) ཡི་རྒྱལ་ས་མ་ན་གྷུ་ (Managua) ནང་ཚོགས་པའི་ཐའེ་ཝན་དང་ནེ་ཁ་ར་གྷ་རྒྱལ་ཁབ་གཉིས་བར་གྱི་ཉོ་ཚོང་དང་འཛུགས་སྐྲུན་ལས་གཞིའི་སྐོར་གྱི་ཚོགས་འདུ་ཞིག་ལ་མཉམ་ཞུགས་གནང་སྟེ། རྒྱལ་ཁབ་དེའི་སྲིད་འཛིན་ཌ་ནེལ་ཨོར་ཊི་གྷ་ (Daniel Ortega) གཙོས་པའི་གཞུང་འབྲེལ་དཔོན་རིགས་དང་ཉོ་ཚོང་དཔོན་རིགས་ཁག་ཅིག་ལ་ཐུག་འཕྲད་བྱས་ཡོད་འདུག
ནེ་ཁ་ར་གྷུའི་སྲིད་འཛིན་ཌ་ནེལ་ཨོར་ཊི་གྷ་ལགས་ཀྱིས་ཐའེ་ཝན་གསར་འགོད་པར། ཐའེ་ཝན་མི་མང་གིས་ཐའེ་ཝན་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཁོངས་སུ་ཞུགས་ཏེ་རྒྱལ་སྤྱིའི་སྲིད་དོན་དང་ཉོ་འཚོང་སྒྲིག་འཛུགས་ཁག་ནང་མཉམ་ཞུགས་ཐུབ་པར་འབད་བརྩོན་བྱེད་བཞིན་ཡོད་པ་ལྟར། ང་ཚོས་རྒྱལ་སྤྱིའི་སྲིད་དོན་དང་ཉོ་ཚོང་སྒྲིག་འཛུགས་ཀྱི་རྩ་འཛིན་དང་འབྲེལ་བའི་ཐའེ་ཝན་གྱི་འཐབ་རྩོད་དེ་ལ་རྒྱབ་སྐྱོར་བྱེད་ཀྱིན་ཡོད་ལ། མ་འོངས་པར་ཡང་མུ་མཐུད་རྒྱབ་སྐྱོར་བྱ་ངེས་ཡིན། ཞེས་བརྗོད་འདུག
ལྕམ་ཚའེ་ཡེན་ཝན་གྱིས་ནེ་ཁ་ར་གྷུ་གསར་འགོད་པར། ངས་ཨ་རིའི་དབུས་རྒྱུད་རྒྱལ་ཁབ་ཁག་དང་། ལྷག་པར་དུ་ནེ་ཁ་ར་གྷུ་གཞུང་གིས་ཐའེ་ཝན་རྒྱལ་ཚོགས་ཁོངས་སུ་ཞུབས་ཐབས་སུ་རྒྱབ་སྐྱོར་གནང་བར་ཐུགས་རྗེ་ཆེ་ཞུ་རྒྱུ་ཡིན། ཞེས་བརྗོད་འདུག
གནས་ཚུལ་ལྟར་ན། ཕྱི་ལོ་ ༢༠༡༣ ལོར་ནེ་ཁ་ར་གྷུ་གཞུང་དང་རྒྱ་ནག་གཞུང་གཉིས་བར་ནེ་ཁ་ར་གྷུ་ནང་ཆུ་ཡུར་འཛུགས་སྐྲུན་གྱི་ལས་གཞི་ཞིག་གི་ཐོག་མ་དངུལ་ཨ་སྒོར་ཐེར་འབུམ་ ༤༠ འཛུགས་རྒྱུའི་གྲོས་ཆོད་བཞག་ཡོད་པ་དང་། ཐེངས་འདི་སྲིད་འཛིན་གཉིས་ཐུག་འཕྲད་དེས་རྒྱལ་ཁབ་གཉིས་བར་གྱི་ཚོང་འབྲེལ་ལ་ཤན་ཤུགས་ཐེབས་རྒྱུ་ཡིན་མིན་ད་སྔ་གནས་ཚུལ་གང་ཡང་འཐོན་མེད།
གསར་འགོད་པ། པདྨ་རྒྱལ།
