བོད་ཀྱི་བུད་མེད་ནུས་སྟོབས་གོང་སྤེལ་གྱི་ཚོགས་ཆེན་ཐེངས་དང་པོ་མཇུག་བསྡོམས་ཐོག་སྲིད་སྐྱོང་མཆོག་ནས་ནུས་སྟོབས་གོང་སྤེལ་གྱི་སྲིད་བྱུས་གཏན་འབེབས་བྱུང་བ་ཁོ་ནས་མི་འགྲིག་པར་བུད་མེད་རང་ངོས་ནས་ཀྱང་ལག་ལེན་བསྟར་དགོས་པ་ཧ་ཅང་གལ་ཆེན་པོ་ཡིན་སྐོར་གསུངས་སོང་།
དེ་རིང་སྔ་དྲོར་༧གོང་ས་མཆོག་ནས་བོད་ཀྱི་བུད་མེད་ནུས་སྟོབས་གོང་སྤེལ་གྱི་ཚོགས་ཆེན་ཐོག་ཚོགས་བཅར་བའི་ཚོགས་ཞུགས་པ་ཚང་མར་མཇལ་ཁ་དང་བཀའ་སློབ་བཀའ་དྲིན་བསྐྱངས་གྲུབ་རྗེས། བོད་ཀྱི་སྨན་རྩིས་ཁང་གི་ཚོགས་ཁང་དུ་ཐེངས་འདིའི་ཚོགས་ཆེན་མཇུག་བསྡོམས་ཀྱི་མཛད་སྒོ་ཚོགས་སོང་བ་དང་། མཛད་སྒོའི་ཐོག་མར་ཚོགས་ཆེན་གྱི་ཟིན་བྲིས་ཚོགས་ཆུང་ནས་ཚོགས་བཅར་པས་ཁྱོན་བསམ་འཆར་ ༣༠༠ ལྷག་བཏོན་ཡོད་པ་རྣམས་དོན་བསྡུས་བྱས་ཏེ། དོན་ཚན་ ༥༧ དུ་བཟོས་ནས་བརྙན་རས་བརྒྱུད་སྒྲོག་སྦྱངས་དང་། བརྗོད་གཞི་རེ་རེའི་ཐོག་དགོངས་ཚུལ་བསྡུ་ལེན་བཅས་གནང་སོང་།
མཇུག་བསྡོམས་ཐོག་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་ནས་ཚོགས་བཅར་བའི་བསམ་ཚུལ་དང་འབྲེལ་བའི་ཐོག་གསུང་བཤད་གནང་སྐབས། ཚོགས་བཅར་བས་བཏོན་པའི་ཕྱོགས་བསྡོམས་དགོངས་འཆར་དོན་ཚན་ ༥༧ དེ་ཚང་མ་བཀའ་ཤག་ནས་ལག་བསྟར་ཐུབ་པ་ཡིན་ན་དགོས་པ་དེ་ཡིན་ཡང་། སྲིད་བྱུས་ཟེར་བ་དེ་སྒྲིག་འཛུགས་ནས་གཏན་འབེབས་བྱེད་ཀྱི་ཡོད་ཀྱང་། ལག་བསྟར་དེ་སྒྲིག་འཛུགས་གཅིག་པུས་བྱེད་དགོས་པའི་ཁྱབ་པ་མེད་པར་སྤྱི་ཚོགས་ཀྱི་ཚོགས་པ་དང་མང་ཚོགས། ཕ་མ་བཅས་ཚང་མར་འགན་ཡོད་པ་དང་། སྲིད་བྱུས་གཏན་འབེབས་གནང་རྗེས་རྡོ་ལ་རི་མོ་བརྐོས་པ་ལྟར་འགྱུར་བ་གཏོང་རྒྱུ་མེད་པ་ཞིག་མིན་སྟབས། སྐབས་དུས་དང་བསྟུན་ནས་བསྐྱར་བཅོས་དེ་འདྲ་ཡོང་སྲིད་ཀྱང་། དེ་རིང་འདི་འདྲ་བཤད་པ་དང་སང་ཉིན་འགྱུར་བ་གཏོང་བ་དེ་འདྲ་ཡོང་གི་མེད་པས་ལག་བསྟར་བྱས་ཏེ་རིམ་གྱིས་མ་ཐུབ་པ་དེ་ཐུབ་པ་བཟོ་བ་དང་། རྒྱུ་དང་རྐྱེན་ལ་བལྟས་ནས་འགྲོ་དགོས་སྐོར་དང་། དེ་བཞིན་༧གོང་ས་མཆོག་ནས་ཚོགས་བཅར་བ་རྣམས་ལ་བཀའ་སློབ་རྩ་ཆེན་པོ་གནང་ཡོད་པ་དེ་དུས་རྒྱུན་སེམས་ལ་བཞག་སྟེ་ལག་བསྟར་བྱེད་དགོས་པ་གལ་ཆེན་པོ་ཞེ་དྲགས་ཡིན་ལ། ལག་བསྟར་བྱེད་སྐབས་སྒྲིག་འཛུགས་དང་མང་ཚོགས། འགན་འཁུར་མཁན་བཅས་སོ་སོར་དཔག་པའི་ལག་བསྟར་དགོས་པ་རེ་ཡོད་སྟབས། ཧུར་ཐག་གིས་སོ་སོའི་ལས་འགན་དེ་ལག་བསྟར་བྱས་པ་ཡིན་ན་༧གོང་ས་མཆོག་ལ་མཇལ་ཁ་ཞུས་པའི་དོན་འགྲུབ་པར་བརྟེན། ཚང་མས་བཀའ་སློབ་སྙིང་ལ་བཅངས་ཏེ་སྲིད་བྱུས་དེའི་ཐོག་ནུས་པ་མཉམ་དུ་སྤུངས་དགོས་སྐོར་དང་། ཚོགས་ཆེན་སྐབས་ཚང་མས་འཚང་ཁ་ཤིག་ཤིག་གིས་ཆ་ཤས་བླངས་ཏེ་བགྲོ་གླེང་དང་དགོངས་འཆར་ལྷུག་པོར་གནང་བར་བཀའ་ཤག་ནས་དགའ་བསུ་དང་ཐུགས་རྗེ་ཆེ་ཞུ་ཡི་ཡོད་ལ། བཀའ་ཤག་གི་ངོས་ནས་སྔོན་རྩིས་ནང་བུད་མེད་ཀྱི་ཤེས་ཡོན་དང་འཕྲོད་བསྟེན་སོགས་གང་ཅིའི་ཐད་ནས་དགོངས་པ་རྒྱ་ཆེན་པོ་བཞེས་ཡོད་པས། དཔལ་འབྱོར་གྱི་མཐུན་རྐྱེན་དེ་ས་གནས་ས་ཐོག་ལ་ཁ་ཡོད་ལག་ཡོད་ཀྱིས་དོན་སྨིན་ཡོང་བར་ས་གནས་མགོ་འཛིན་རྣམ་པས་གཙོ་འགན་འཁུར་དགོས་སྐོར་སོགས་གསུངས་སོང་།
སྲིད་སྐྱོང་མཆོག་ནས་མཇུག་བསྡོམས་ཀྱི་གསུང་བཤད་གནང་སྐབས། བཀའ་ཤག་གི་ཆེད་མངགས་བུད་མེད་ནུས་སྟོབས་གོང་སྤེལ་གྱི་གླུ་གཞས་བརྩམས་དུ་བཅུག་ཡོད་པ་དང་། དེ་བཞིན་བོད་མིའི་སྒྲིག་འཛུགས་ཀྱི་བུད་མེད་དྲུང་ཆེ་དང་དྲུང་འཕར་སོགས་ཀྱིས་གྲུབ་པའི་བུད་མེད་ཀྱི་སློབ་སྟོན་ཚོགས་ཆུང་ཞིག་གཏན་འཇགས་སུ་བསྐོས་བཞག་གནང་ཚར་ཡོད་སྐོར་གསུངས་བ་དང་འབྲེལ། ད་ལན་བཙན་བྱོལ་བོད་མིའི་ལོ་རྒྱུས་ནང་བུད་མེད་ཀྱི་ཚོགས་ཆེན་ཐེངས་དང་པོ་ཆགས་ཀྱི་ཡོད་ལ། བཀའ་ཤག་དང་གོ་སྒྲིག་ཚོགས་ཆུང་གི་ངོས་ནས་བུད་མེད་སྤྱི་འཐུས་དང་བཀའ་ཟུར་རྣམས་ལ་མགྲོན་ཤོག་ཕུལ་ཏེ་ཕེབས་རོགས་ཞུས་ཡོད་ཀྱང་། སྒེར་གྱི་དུས་ཚོད་དང་ནང་གི་དཀའ་ངལ་གྱི་རྐྱེན་པས་ཕེབས་མ་ཐུབ་པ་དེ་ཐུགས་ཁག་མེད་ཀྱང་མགྲོན་ཤོག་མ་བཏང་བར་ལྷག་སོང་བ་དེ་འདྲ་མེད་ལ། ད་ལོའི་ཕྱི་ཟླ་དང་པོའི་ཚེས་ ༢ ཉིན་ཚོགས་འདུ་གསལ་བསྒྲགས་གནང་ཡོད་པ་དང་། ཚོགས་ཞུགས་པ་མི་གྲངས་ ༣༥༠ བསླེབ་པའི་ཚོད་དཔག་གནང་སྟེ་འཚང་ཁ་ཤིག་ཤིག་གིས་ཁ་པར་དང་གློག་འཕྲིན་བཏང་ནས་ཡོང་གི་རེད་བསམ་ཡོད་ཀྱང་། ཚོགས་བཅར་ཐོ་འགོད་ཀྱི་དུས་ཚོད་ཕྱི་ཟླ་དང་པོའི་ཚེས་ ༣༡ ཉིན་བར་ཐོ་འགོད་བྱེད་མཁན་ ༤༥ ཙམ་ལས་བྱུང་མེད་སྟབས། ཕྱི་ཟླ་ ༢ ཚེས་ ༡༥ བར་དུ་ཕྱིར་འགྱངས་བྱེད་དགོས་ཁེལ་ཡོད་སྟབས། མ་འོངས་པར་རང་འགན་རང་འཁུར་གྱིས་བུད་མེད་ཀྱི་ཚོགས་ཆེན་ཐོག་འཚང་ཁ་ཤིག་ཤིག་གིས་བཅར་དགོས་པ་དེ་གལ་ཆེན་པོ་ཡིན་སྐོར་དང་། ང་ཚོའི་སྤྱི་ཚོགས་ནང་བུད་མེད་ལ་གོ་སྐབས་སྤྲོད་དགོས་ཀྱི་འདུག ས་གནས་མགོ་འཛིན་བུད་མེད་མང་པོ་དགོས་ཀྱི་འདུག་ཅེས་བརྗོད་ཀྱི་ཡོད་པ་ལྟར། བཀའ་ཤག་ནས་ཀྱང་བུད་མེད་ཚོར་གོ་སྐབས་སྤྲོད་ཐུབ་པའི་ཐུགས་རེ་གནང་གི་ཡོད་ཀྱང་གོ་སྐབས་ལེན་མཁན་གྱི་བུད་མེད་ཉུང་ཉུང་ཡིན་སྐོར་གསུངས་སོང་།
ཡང་སྲིད་སྐྱོང་མཆོག་ནས་ཞབས་བཀྱག་དང་ཐོབ་ཐང་གི་ཆེད་དུ་མིན་པར་བྱམས་སྙིང་རྗེ་སྒོམ་པའི་ཐོག་ནས་བོད་མི་ས་ཡ་དྲུག་གི་ཆེད་དུ་ངས་དཀའ་ལས་མི་རྒྱག་ན་སུས་རྒྱག སྐྱོ་བོ་ཉམ་ཐག་གི་ཆེད་དུ་ངས་དཀའ་ལས་མི་རྒྱག་སུས་རྒྱག་དེའི་དོན་དུ་དཀའ་ལས་བརྒྱབ་སྟེ་ཞབས་ཞུ་ཞུ་རུ་འགྲོ་ཡི་ཡིན་བསམ་པའི་མགོ་འཁྲིད་ཅིག་དགོས་ཀྱི་ཡོད་ལ། དེའི་ནང་ནས་ཀྱང་བུད་མེད་ཅིག་དགོས་ཀྱི་ཡོད་པ་དང་། ༧གོང་ས་མཆོག་ནས་བུད་མེད་ལ་བྱམས་སྙིང་རྗེ་ཡི་གཞི་དང་རེ་བ་ཆེ་བ་འདུག་གསུང་གི་ཡོད་པ་ལྟར། བྱམས་སྙིང་རྗེ་ཟེར་བ་དེ་ཧ་ལས་པའི་གཏིང་ཟབ་པོ་ཡིན་ལ། བྱམས་སྙིང་རྗེ་ཅན་གྱི་མགོ་འཁྲིད་ཅིག་ཡོད་ན། དང་པོ་ཀུན་སློང་རང་ལ་མིང་དང་གཏམ། དབང་ཆ་བཅས་མེད་དུས། དཀའ་ངལ་གདོང་ལེན་ག་ཚོད་བྱེད་དགོས་ཀྱི་ཡོད་ནའང་སྙིང་སྟོབས་ཤིག་རང་བཞིན་གྱིས་ཡོང་གི་ཡོད་པ་དང་། དེ་བཞིན་མགོ་འཁྲིད་ཆགས་ཏེ་མིང་དང་གཏམ། དབང་བཅས་ཡོད་བསམ་པའི་ང་རྒྱལ་གྱི་མགོ་གནོན་ཐུབ་ལ། གཞན་གྱིས་སྐྱོན་བརྗོད་སོགས་བྱས་ཏེ་སེམས་ཤུགས་མར་ཆགས་པའང་ཡར་འཕར་ཐུབ་པ་སོགས་བྱམས་སྙིང་རྗེ་ཟེར་བ་དེ་ནུས་སྟོབས་ཆེ་ཤོས་དང་གཏིང་ཟབ་ཤོས་དེ་ཡིན་སྟབས། དེ་འདྲ་ཀུན་སློང་འཁུར་ཏེ་མགོ་འཁྲིད་བྱེད་ཐུབ་མཁན་ཞིག་ཡིན་ན་སྐྱེས་པ་དང་བུད་མེད་སུ་ཡིན་མིན་ལ་མ་ལྟོས་པར་སྤྱི་པར་ཕན་ཐོགས་ཀྱི་ཡོད་སྐོར་སོགས་གསུངས་སོང་།
ཉེ་སྔོན་བཀའ་ཤག་ནས་གཏན་འབེབས་གནང་བའི་སྲིད་བྱུས་དོན་ཚན་ ༧ དེ། བུད་མེད་དང་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་དང་ཤེས་འཕྲོད་དཔལ་གསུམ། འཛིན་སྐྱོང་དང་མགོ་འཁྲིད། སྤྱི་ཚོགས། བུད་མེད་ལ་བཙན་དབང་དང་རྩུབ་སྤྱོད་རིགས་འགོག་ཐབས་བཅས་ཀྱི་བརྗོད་གཞིའི་ཐོག་ཚོགས་བཅར་བ་རྣམ་པས་ཉིན་གྲངས་གཉིས་ལྷག་རིང་བགྲོ་གླེང་གནང་བ་བརྒྱུད། བོད་ཕྱི་ནང་གཉིས་ཀྱི་བུད་མེད་བར་འབྲེལ་ལམ་དམ་ཟབ་ཏུ་གཏོང་བ་དང་། བོད་ནས་གསར་དུ་ཡོང་བའི་བུད་མེད་ཚོར་སྣེ་ལེན་དང་བསམ་ཚུལ་བརྗེ་ལེན་དགོས་པ་མ་ཟད། བཙན་བྱོལ་ནང་གི་བུད་མེད་ཚོས་བོད་ནང་གི་བུད་མེད་ཀྱི་གནས་སྟངས་ལ་ཞིབ་འཇུག་མཐར་ཕྱིན་གྱིས་དཔེ་དེབ་བཏོན་ཏེ། རྒྱལ་སྤྱིའི་མཉམ་འབྲེལ་རྒྱལ་ཚོགས་སུ་འབུལ་དགོས་པ། དེ་བཞིན། བཙན་བྱོལ་ནང་གི་བུད་མེད་ཤེས་ཡོན་རྩེ་ཕུད་རྣམས་ལ་ས་གནས་ཀྱི་ཁོངས་སོ་སོ་ནས་ལོ་ལྟར་གཟེངས་རྟགས་སྤྲོད་པ་དང་། སློབ་སྦྱོང་གི་གོ་སྐབས་ཤོར་བའི་བུད་མེད་ལ་གོ་སྐབས་བསྐྱར་བསྐྲུན། སློབ་ཕྲུག་བུ་མོར་མངལ་ཆགས་ཚེ་སློབ་གྲྭ་དང་ཕ་མ་ཐུན་མོང་ནས་མ་སྨད་གཉིས་ལ་ལྟ་སྐྱོང་མུ་མཐུད་དགོས་པ་དང་། དེ་བཞིན་སློབ་གྲྭ་ཁག་གི་བསླབ་གཞིའི་ནང་བྱིས་པ་དང་བུད་མེད་ལ་ཕན་པའི་སེམས་ཁམས་རིག་པའི་སློབ་ཚན་དགོས་ངེས་པ་དང་། བུད་མེད་ཚོང་བདག་ཆེན་མོ་གསོ་སྐྱོང་དང། ས་གནས་མགོ་འཛིན་བུད་མེད་མང་དུ་གཏོང་བ་གང་མྱུར་ལག་བསྟར་དགོས་པ།
གཞན་ཡང་། འཛིན་སྐྱོང་བཀའ་ཤག་ནང་བུད་མེད་བཀའ་བློན་གཉིས་དང་། ས་འཐུས་དང་རང་བདེན་ཚོགས་ཆུང་ནང་བུད་མེད་ཀྱི་ཚོགས་མི་བརྒྱ་ཆ་ ༢༠ ལས་མ་ཉུང་བའི་ས་མིག་ཟུར་བཅད་དགོས་པ། བུད་མེད་རྣམས་སྤྱི་ཚོགས་དང་ཆབ་སྲིད་མགོ་འཁྲིད་ཀྱི་ལས་སྒོར་ཞུགས་པར་བུད་མེད་ཚོས་དམིགས་བསལ་རྒྱབ་སྐྱོར་དགོས་པ། ཕ་མས་སོ་སོའི་བྱིས་པ་བུ་དང་བུ་མོར་གཟིགས་ཕྱོགས་འདྲ་མཉམ། ཕོ་མོ་འདྲ་མཉམ་མ་ཡོང་བའི་རྒྱུ་རྐྱེན་ལ་ཞིབ་འཇུག་ཆེད་ཚོགས་ཆུང་ཟུར་འཛུགས་དགོས་པ། བོད་པའི་སྤྱི་ཚོགས་ནང་དང་ལྷག་པར་སློབ་གྲྭ་ཁག་ནང་བུད་མེད་ལ་བཙན་དབང་དང་རྩུབ་སྤྱོད་རིགས་བྱུང་ཚེ་ས་གནས་ཉེན་རྟོག་པར་ཡ་ང་སྙིང་རྗེ་མེད་པར་རྩིས་སྤྲོད་དགོས་པ་དང་། གནད་དོན་དེ་རིགས་ལ་ཞིབ་འཇུག་སྙན་ཐོ་འདོན་པ་དང་སྔོན་འགོག་གི་གོ་བསྐོན་སློབ་གསོ་སྤྲོད་པ་མ་ཟད། བུད་མེད་ལ་བརྙས་བཅོས་རིགས་བྱུང་ན་ཐད་ཀར་ཞུ་གཏུག་བྱེད་སའི་སྡེ་ཚན་ཟུར་འཛུགས་དགོས་པ་སོགས་ཀྱི་བསམ་འཆར་ཡོད་པ་རེད།
གསར་འགོད་པ། པདྨ་མཚོ།
༄༅། ད་རིང་ཁ་སང་བུད་མེད་ལ་དབྱེ་མེད་ཐོབ་ཐང་གཅིག་པ་དགོས་སྐོར་ཡང་སེ་བཤད་ཀྱི་འདུག་པ་བེུད་རང་ཉིད་ནས་
མ་བྱོན་པ་དང་སྤྱི་ཚོགས་ནང་ལ་ཡར་ཐོན་མ་ཐུབ་པར་བསྡད་ཡོད་པ་མ་གཏོགས་༧གོང་ས་སྐྱབས་མགོན་སྐུ་ཕྲེང་བཅུ་
བཞི་པ་འདིའི་ཕྱི་ལོ་ ༡༩༦༠ ནས་བཟུང་ནས་བཅའ་ཁྲིམས་གཏན་འདེབས་དང་། ལྷག་པར་དུ་སྤྱི་འཐུས་ནང་བུད་མེད་ས་མིག་དམིགས་བསལ་ཟུར་བཅད་གནང་ཡོད་པ་ཤེས་དགོས་པ་རེད།གཞུང་གི་ལས་བྱེད་ནང་ཕོ་མོ་དབྱེ་བ་མེད་པ་འཛུལ་ཞུགས་ཆོག་པའི་ལམ་ཀ་ཡོད་པ་རེད།ལྷག་པར་དུ་བོད་ཀྱི་ལོ་རྒྱུས་ནང་བྱུང་མ་མྱོང་བ་སྔ་མོ་ནས་སྐྱབས་མགོན་རིན་པོ་ཆེས་བཙུན་མ་ཚོའི་མདོ་སྔགས་གཞུང་ལ་ངེས་པར་སློབ་སྦྱོང་བྱས་ཏེ་དགེ་བཤེས་མ་
ཆགས་ཐུབ་པ་བྱེད་དགོས་བཀའ་ནན་ཡང་སེ་བ་ལ་བརྟེན་ནས་ཉེ་ཆར་བཙུན་མ་ ༢༠ དགེ་བཤེས་མ་ཆགས་ཐུབ་པ་རེད། སོ་སོ་རང་ཉིད་ནས་འབད་བརྕོན་བྱེད་དགོས་པ་ཞིག་རེད།
གཉིས་པ་ནི།བེུད་ལ་བཙན་དབང་རྩུབ་སྤྱོད་བརྙས་བཅོས་འགོག་ཐབས་སྐོར་འདི་ནི་འཛམ་གླིང་རྒྱལ་ཁབ་མང་པོའི་ནང
སེལ་ཐབས་མེད་པར་ཡོད་པ་ཞིག་རེད་། གཙོ་ཆེ་ཤོས་ནི་་དཔལ་འབྱོར་གྱི་ཐོག་ནས་ཡོང་གི་ཡོད། དཔེར་ན་ང་རང་ཚོའི་གནས་ཚང་རྒྱ་གར་ལ་ལྟོས་དང་་ད་ལྟ་ཡང་གྲངས་ཀྱི་མི་ལངས་པ་ཡོད་པ་རེད།
ཕྱི་རྒྱལ་ནང་ལ་དཔེ་བཞག་ན་ཨ་རི་དང་་་ཁེ་ན་ཌའི་ནང་ལ་ཁྲིམས་མཐུན་ཆང་ས་མ་བརྒྱབ་པར་ཕྲུ་གུ་མངལ་དུ་ཆགས་པ
ཕལ་ཆེར་བརྒྱ་ཆ་བཞི་བཅུ་ལྔ་བཅུ་ལྷག་ཡོད་ལབ་ལ་འགྲིགས་པ་ལྟ་བུ་རེད།ཕོ་མོའི་འདོད་ཆགས་ཟེར་བ་འདི་སེམས་ཅན་ཡོད་དོ་ཅོག་ལ་རང་བཞིན་གྱི་རང་དབང་མེད་པར་ཡོང་གི་ཡོད་པ་རེད།
ཁྲིམས་སྒྲིག་མང་པོ་བཟོས་ཀྱང་ལག་ལེན་དུ་མ་འཁེལ་བ་གྲངས་ལས་འདས་པ་རེད།ནང་ལུས་ངག་ཡིད་གསུམ་ལ་འགྱུར་བ་
ཞིག་ཐེབས་དགོས་པ་རེད། འདི་ནི་ལས་སླ་བོའི་ཐོག་ནས་འགྱུར་བ་ཡོང་རྒྱུ་དཔེ་མི་སྲིད་པའི་ཁག་པོ་རེད།
དེ་ཡང་བོད་ཀྱི་མཁས་པས།
བློ་སྦྱོང་བློ་སྦྱོང་རང་གི་བློ་སྦྱོང་ཤིག། བྱང་ཆུབ་སེམསས་ཀྱི་རང་གི་བློ་སྦྱོང་ན་།
ལུས་ངག་དགེ་བ་སྣ་གཅིག་མ་འགྲུབ་ཀྱང། ཐར་པའི་ལམ་ལས་གཞན་དུ་འགྲོ་ས་མེད་། ཅེས་གསུངས་པ་ལྟར་རོ།
འདི་ལྟ་བུ་ཞུ་རྒྱུ་མང་པོ་ཡོད་ཀྱང་དེ་རིང་འདི་ཙམ་ཡིན།
ཡིག་ནོར་རེ་ཟུང་ཤོར་འདུག་པས་ཀློག་མཁན་རྣམས་ལ་དགོངས་དག་ཞུ། ནོར་བཅོས། “བསམ་བཏོན་པ་”བསམ་ཚུལ་བཏོན་པ་ཞེས་བཅོས་དགོས། “འགོ་བཙུགས་ན་ཞིབ་འཇུག་བྱེད་མཁན་དེ་ཚོའི་བུད་མེད་” ་་་་ཞིབ་འཇུག་བྱེད་མཁན་དེ་ཚོས་་་ཞེས་བཅོས་དགོས།
བསམ་བཏོན་པ་དེ་དག་ལས་ནང་དོན་གསུམ་གྱི་ཐད་ལ་ཚིག་གསུམ་བཤད་འདོད་བྱུང་།
1བོད་ནས་གསར་དུ་ཡོང་བའི་བུད་མེད་ཚོར་སྣེ་ལེན་དང་བསམ་ཚུལ་བརྗེ་ལེན་དགོས་པ་མ་ཟད། བཙན་བྱོལ་ནང་གི་བུད་མེད་ཚོས་བོད་ནང་གི་བུད་མེད་ཀྱི་གནས་སྟངས་ལ་ཞིབ་འཇུག་མཐར་ཕྱིན་གྱིས་དཔེ་དེབ་བཏོན་ཏེ། རྒྱལ་སྤྱིའི་མཉམ་འབྲེལ་རྒྱལ་ཚོགས་སུ་འབུལ་དགོས་པ། ཞེས་པ་དེ་ལས་བོད་ནས་གསར་དུ་ཞེས་པ་ནས་མ་ཟད་ཅེས་པ་དེ་དགོས་ངེས་ཤིག་རེད། འོན་ཀྱང་བཙན་བྱོལ་ནང་གི་བུད་མེད་ཚོས་ཞེས་པ་ནས་བཏོན་ཏེ། ཞེས་པའི་བར་དེ་ལ་གཟབ་དགོས་ངེས་འདུག ང་ཚོ་བཙན་བྱོལ་ཁྲོད་ནས་བུད་མེད་ཞིབ་འཇུག་བྱེད་པའི་ཤེས་ཚད་ལོན་མཁན་ཡོད་མེད་ཀྱི་ཐད་ཐེ་ཚོམ་དུ་གྱུར་ཡོད། དེར་བརྟེན་ཞིབ་འཇུག་བྱེད་དུས་དངོས་ཡོད་གནས་ཚུལ་རང་ནས་འགྲོ་རྒྱུ་ལས་དེང་སྐབས་ཞིབ་འཇུག་ཡིན་མདོག་གིས་དེབ་རེ་ཟུང་བཏོན་བཞིན་པའི་སྐོར་ལ་བལྟས་ན་དོན་དངོས་དང་མ་མཐུན་པ། མ་ཡིན་པ་ཡིན་པ་ཡིན་པ་མིན་པ་བཏང་སྟེ་ཁ་ནང་ལ་ཡོང་ཚོད་བཤད་ཀྱི་ཡོད་པའི་རྣམ་པ་ངང་ངམ་ཤིག་གེར་ཡོང་གི་འདུག དེ་གཟབ་བྱ་ཞིག་རེད། གལ་སྲིད་ཞིབ་འཇུག་བྱེད་པའི་ལས་འགོ་བཙུགས་ན་ཞིབ་འཇུག་བྱེད་མཁན་དེ་ཚོའི་བུད་མེད་དང་སྐྱེས་པ་སུ་ཡིན་ཡང་དོན་དངོས་ཡིན་པའི་རྗེས་ལ་ཡག་ཉེས་གང་ཡིན་ཡང་ཕྱི་གསལ་ནང་གསལ་གྱིས་བཏོན་དགོས་པ་གལ་ཆེན་རེད། སྐྱོན་ཡོད་པ་རྣམས་སྦས་ཅི་ཐུབ་གཏན་ནས་བྱེད་རྒྱུ་མེད།
2སློབ་སྦྱོང་གི་གོ་སྐབས་ཤོར་བའི་བུད་མེད་ལ་གོ་སྐབས་བསྐྱར་བསྐྲུན། སློབ་ཕྲུག་བུ་མོར་མངལ་ཆགས་ཚེ་སློབ་གྲྭ་དང་ཕ་མ་ཐུན་མོང་ནས་མ་སྨད་གཉིས་ལ་ལྟ་སྐྱོང་མུ་མཐུད་དགོས་པ་དང་། ཞེས་པའི་སློབ་སྦྱོང་གི་གོ་སྐབས་ཤོར་བའི་བུད་མེད་ལ་གོ་སྐབས་བསྐྱར་བསྐྲུན་བྱེད་རྒྱུ་དེ་ཧ་ཅང་གལ་ཆེན་རེད། ཡིན་ནའང་སློབ་གྲྭ་ནས་མ་སྨད་གཉིས་ལ་ལྟ་སྐྱོང་བྱེད་པའི་ལམ་ལུགས་སྲོལ་དེ་དར་ན་སློབ་ཕྲུག་བུ་མོ་མང་པོས་མ་སྨད་གཉིས་ལ་སློབ་གྲྭའི་བདག་པོ་རྒྱག་གི་རེད་ཅེས་མངལ་ཆགས་མཁན་མང་པོ་བྱུང་ན་ག་རེ་བྱེད་དགོས། ངན་པ་ལངས་ཤོར་དུ་འགྲོ་ཐག་ཆོད་རེད། འདི་བསམ་བློ་གཏོང་དགོས་ཡུལ་ཞིག་རེད། རང་གི་བྱས་པ་རང་དང་། ལྕགས་ཀྱི་ཕུར་བུ་སྙིང་ཞེས་པའི་དཔེ་ལྟར་རང་འགན་རང་ལ་འཁུར་བཅུགས་ན་ཞེ་སྣང་གི་དོག་ཟོན་བྱེད་པའི་དགོས་པ་ཡོད་རེད་སྙམ།
3གཞན་ཡང་། འཛིན་སྐྱོང་བཀའ་ཤག་ནང་བུད་མེད་བཀའ་བློན་གཉིས་དང་། ས་འཐུས་དང་རང་བདེན་ཚོགས་ཆུང་ནང་བུད་མེད་ཀྱི་ཚོགས་མི་བརྒྱ་ཆ་ ༢༠ ལས་མ་ཉུང་བའི་ས་མིག་ཟུར་བཅད་དགོས་པ། བུད་མེད་རྣམས་སྤྱི་ཚོགས་དང་ཆབ་སྲིད་མགོ་འཁྲིད་ཀྱི་ལས་སྒོར་ཞུགས་པར་བུད་མེད་ཚོས་དམིགས་བསལ་རྒྱབ་སྐྱོར་དགོས་པ། ཞེས་པར་འཛིན་སྐྱོང་བཀའ་ཤག་ནང་བུད་མེད་བཀའ་བློན་གཉིས་དང་། ས་འཐུས་དང་རང་བདེན་ཚོགས་ཆུང་ནང་བུད་མེད་ཀྱི་ཚོགས་མི་བརྒྱ་ཆ་༢༠་ལས་མ་ཉུང་བའི་ས་མིག་ཟུར་བཅད་དགོས་པ། ཞེས་པ་དེ་ཧ་ཅང་གི་བསམ་བློ་གཏོང་དགོས་པ་ཡུལ་རེད། བསམ་བློ་ཞིབ་ཏུ་མ་བཏང་ན་བྱས་ཉེས་བྱུང་ན་ང་ཚོ་བོད་སྤྱིའི་ལས་དོན་ལ་གནོད་ངེས་རེད། བུད་མེད་འཛིན་སྐྱོང་བཀའ་བློན་ལ་སྡོད་ཐུབ་པའི་འཇོན་ཐང་ཡོད་ན་བཀའ་བློན་གྱི་ས་མིག་ཆ་ཚང་ཡོད་པ་རེད། འོན་ཀྱང་། དེ་ལ་སྤྱི་འཐུས་ཁྲོད་དུ་བུད་མེད་གཉིས་ཀྱི་ས་མིག་འཇོག་སྟངས་དེ་འདྲ་བྱས་ན་གཏན་ནས་ཡོང་གི་མ་རེད། འདི་གཞུང་གི་བཀའ་བློན་རྣམ་པའི་གཙོས་ལས་སྣེ་ཡོང་གིས་ཐུགས་བསམ་ནན་ཏན་གཏོང་དགོས་ངེས་རེད། དེ་འདྲ་བྱས་ན་ཉི་མ་ཞིག་ལ་ང་ཚོའི་འཛིན་སྐྱོང་འདི་རྒྱུ་མ་མི་ལ་མ་ཕན། རྒྱུ་ཁུ་ཁྱི་ལ་མ་ཕན་ཞེས་པའི་དཔེ་རུ་འགྱུར་ཐག་ཆོད་རེད། ས་འཐུས་དང་རང་བདེན་ཚོགས་ཆུང་ནང་བུད་མེད་ཚོགས་མི་བརྒྱ་ཆ་༢༠ ཟེར་པ་དེ་ལའང་བུད་མེད་རང་གི་འཇོན་ཐང་གི་སྒང་ནས་ཡོང་ན་བུད་མེད་ཡར་སླེབས་མཁན་དེ་རིན་ཐང་དང་ཕན་ནུས་ལྡན་པ་རེད། དེ་མིན་ང་ཚོས་སྤྱི་འཐུས་ཁྲོད་བུད་མེད་གཉིས་ཨུ་ཚུགས་བརྒྱབ་སྟེ་འགྲོ་སྟངས་བཞིན་སོང་ན་དེ་འདྲའི་ནུས་པ་མེད་པ་མིག་མཐོང་ལག་ཟིན་རེད། སྐུ་མཁྱེན་དེ་འདྲ་མི་ཡོང་བའི་རེ་བ་ཞུ།