དེ་རིང་ནི་ཕྱི་ལོ་ ༡༩༥༩ ཟླ་ ༣ ཚེས་ ༡༠ ཉིན། བོད་ཀྱི་རྒྱལ་ས་ལྷ་སར་རྒྱ་ནག་གཞུང་ལ་ངོ་རྒོལ་གྱི་བོད་མིའི་རང་དབང་སྒེར་ལངས་བྱས་ཏེ་ལོ་ངོ་ ༥༨ འཁོར་བའི་ཉིན་མོ་ཡིན་པ་ལྟར། བཙན་བྱོལ་བོད་མིའི་བསྟི་གནས་བཞུགས་སྒར་དྷ་རམ་ས་ལ་གཙོས་པའི་རང་དབང་དང་དམངས་གཙོའི་རྒྱལ་ཁབ་ཁག་ནང་བོད་པ་དང་བོད་དོན་རྒྱབ་སྐྱོར་བ་ཚོས་དུས་དྲན་སྲུང་གཙི་དང་། རྣམ་པ་འདྲ་མིན་ཐོག་རྒྱ་ནག་གཞུང་གི་སྒེར་སྤྱོད་དང་དྲག་གནོན་སྲིད་བྱུས་ལ་ངོ་རྒོལ་ལས་འགུལ་སྤེལ་བཞིན་ཡོད།
ད་ལོའི་བོད་མིའི་སྒྲིག་འཛུགས་སྲིད་སྐྱོང་མཆོག་གི་གསུང་འཕྲིན་ནང་། “ཕྱི་ལོ་ ༢༠༠༩ ནས་ད་བར་བོད་ནང་བོད་མི་ ༡༤༥ ཡིས་གཞན་ལ་འཚེ་བ་མ་བྱས་པར་རང་ལུས་མེར་བསྲེགས་བཏང་སྟེ་ “བོད་ལ་རང་དབང་དགོས། ༸གོང་ས་༸སྐྱབས་མགོན་ཆེན་པོ་མཆོག་བོད་ལ་གདན་འདྲེན་ཞུ་དགོས།” ཞེས་བོད་མིའི་མངོན་འདོད་གསལ་འདོན་བྱས་ཡོད།” ཅེས་དང་། “སྔ་ལོ་ཨ་རིའི་སྲིད་འཛིན་སྐུ་ཞབས་ཨོ་བྷ་མ་མཆོག་དང་བོད་མིའི་བླ་ན་མེད་པའི་དབུ་འཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་རྣམ་གཉིས་མཇལ་འཕྲད་གནང་སྐབས། ཨ་རིའི་སྲིད་འཛིན་མཆོག་གིས་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་ཡོད་པ་མ་ཟད་༸གོང་ས་མཆོག་གི་སྐུ་ཚབ་དང་རྒྱ་ནག་གཞུང་གི་སྐུ་ཚབ་དབར་དོན་ཕན་ལྡན་པའི་གྲོས་མོལ་བྱེད་དགོས་པ་སླར་ཡང་སྐུལ་མ་གནང་ཡོད། དེ་བཞིན་ཉེ་སྔོན་སྐུ་ཞབས་རེག་སེ་ཊི་ལར་སན་མཆོག་ཨ་རིའི་ཕྱི་སྲིད་དྲུང་ཆེར་བསྐོ་གཞག་གཏན་འཁེལ་གནང་སྐབས་ཁོང་གིས། “པེ་ཅིང་སྲིད་གཞུང་ནས་བཙན་བྱོལ་བོད་གཞུང་ངམ། ཏཱ་ལའི་བླ་མ་མཆོག་གི་སྐུ་ཚབ་དང་ལྷན་གྲོས་མོལ་ཡོང་ཐབས་སླད་མུ་མཐུད་སྐུལ་མ་བྱེད་རྒྱུ་ཡིན་པ་དང་། ༧གོང་ས་མཆོག་མཇལ་འཕྲད་ཀྱང་ཞུ་རྒྱུ་ཡིན།” ཞེས་སོགས་ལན་འདེབས་གནང་བར་རྗེས་སུ་ཡི་རངས་ཞུ།”
“སྲིད་འཛིན་ཞི་ཅིན་ཕིང་གིས་གཙོས་རྒྱ་ནག་གི་དབུས་སའི་འགོ་འཁྲིད་ཚོས་རྒྱ་ནག་བརྟན་ལྷིང་ཡོང་བར་མཐའ་མཚམས་སྲུང་སྐྱོབ་དགོས་པ་དང་། མཐའ་མཚམས་སྲུང་སྐྱོབ་ཡོང་བར་བོད་ལ་བརྟན་ལྷིང་དགོས་སྐོར་དང་། ཡང་། “བདེ་སྤྲོད་བདེ་ལེན་”ཞེས་བདེ་སྐྱིད་དགོས་ན་བདེ་འཇགས་འགན་སྲུང་བྱེད་དགོས་ཟེར་བའི་སྲིད་བྱུས་བཟུང་སྟེ་བོད་ས་ཡོངས་ལ་དམ་བསྒྲགས་ཧ་ཅང་ཆེན་པོ་བྱེད་བཞིན་ཡོད། ཉེ་ཆར་བོད་རང་སྐྱོང་ལྗོངས་མི་དམངས་ཞིབ་དཔྱོད་ཁང་ཟེར་བའི་ལས་དོན་སྙན་ཐོའི་ནང་ཁ་བྲལ་ལ་ངོ་རྒོལ་བྱེད་པའི་འཐབ་རྩོད་སྤེལ་ཏེ་ཉེས་དོན་ཉེས་གསོག་ལ་ཁྲིམས་ལུགས་ལྟར་རྡུང་རྡེག་བཏང་ཡོད་སྐོར་དང་། དེ་ཡང་བོད་རང་སྐྱོང་ལྗོངས་གཅིག་པུའི་ནང་འདས་ལོར་མི་གྲངས་ ༡༤༤༦ འཛིན་བཟུང་དང་། མི་གྲངས་ ༡༧༩༣ ལ་ཁྲིམས་གཏུགས་བྱས་ཡོད་པ་ཡོངས་གྲགས་བྱས་ཡོད།” ཅེས་སོགས་བཀོད་འདུག
སྲིད་སྐྱོང་གི་གསུང་འཕྲིན་ནང་ད་དུང་ “རྒྱ་གཞུང་གི་འགོ་འཁྲིད་ཚོས་བོད་ཐོག་འཛིན་པའི་སྲིད་བྱུས་ལ་བསྐྱར་ཞིབ་ཀྱིས་རྒྱ་ནག་གི་དམར་ཚོགས་སྤྱི་ཁྱབ་དྲུང་ཆེ་ཧུའུ་ཡའོ་པང་གིས་བོད་ཐོག་བཟུང་བའི་གུ་ཡངས་ཀྱི་སྲིད་བྱུས་ལག་བསྟར་བྱེད་དགོས་པ་དང་། ༸གོང་ས་མཆོག་གིས་འདོན་གནང་མཛད་པའི་གཉིས་སྨན་དབུ་མའི་ལམ་གྱི་སྲིད་བྱུས་གཞིར་བཞག་བོད་དོན་འགྲིག་འཇགས་ཡོང་རྒྱུར་༸གོང་ས་མཆོག་གི་སྐུ་ཚབ་དང་གྲོས་མོལ་བསྐྱར་མཐུད་ཡོང་བར་འབོད་སྐུལ་བསྐྱར་ནན་བྱེད་རྒྱུ་ཡིན།
༸གོང་ས་མཆོག་གིས་རེ་བ་བཟང་ས་དང་གྲ་སྒྲིག་སྡུག་ས་ནས་བྱེད་དགོས་པའི་བཀའ་སློབ་རིམ་ཕེབས་བཞིན། བཀའ་ཤག་གི་ལྔ་དང་ལྔ་བཅུའི་ཐབས་བྱུས་འོག་ནས་འབྱུང་འགྱུར་ལོ་ལྔའི་ནང་དབུ་མའི་ལམ་གྱི་སྲིད་བྱུས་གཞིར་བཞག་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་དང་། འབྱུང་འགྱུར་ལོ་ལྔ་བཅུའི་རིང་བོད་མིའི་སྒྲིག་འཛུགས་མུ་མཐུད་སྲ་བརྟན་རྒྱུན་གནས་ཐུབ་པ་བྱས་ཏེ་བོད་མིའི་རང་དབང་འཐབ་རྩོད་རྒྱུན་སྐྱོང་བྱེད་རྒྱུ་ཡིན། འོན་ཀྱང་བོད་མིའི་རྩ་དོན་ལ་གནོད་གཞི་༸གོང་ས་མཆོག་ལ་གཞི་མེད་མཚན་སྨད་ཞུ་མཁན་རྒྱ་ནག་གཞུང་གི་རྒྱུགས་ཁྱིའམ་དོལ་རྒྱལ་རྗེས་འབྲང་པ་ཁ་ཤས་ཀྱི་གཙོས་སྨྲ་བརྗོད་རང་དབང་ཁ་ལ་འཁྱེར་ནས་༸གོང་ས་མཆོག་ལ་ཟུར་ཟ་བྱེད་མཁན་བོད་མི་རེ་ཟུང་ཡོད་པ་ཚོའི་ཐ་ཤལ་གྱི་བྱེད་བབ་དེ་རིགས་ལ་མཐའ་གཅིག་ཏུ་ངོ་རྒོལ་དང་གདོང་ལེན་བྱེད་རྒྱུ་ཡིན། བྱེད་བབ་དེ་རིགས་ནི་བོད་མི་ནང་ཁུལ་དཀྲུགས་ཤིང་དང་། དགྲ་དགའ་གཉེན་སྡུག་ཡོང་གཞི་ཡིན་པས་མཚམས་འཇོག་ངེས་པར་བྱེད་དགོས་པ་བསྐྱར་བརྗོད་བྱེད་རྒྱུ་ཡིན།
ཕྱི་ལོ་ ༢༠༡༧ ལོ་འདི་བཞིན་བོད་མིའི་སྒྲིག་འཛུགས་ནས་ལས་འགུལ་གྱི་ལོར་སྲུང་བརྩི་བྱེད་རྒྱུ་ཡིན་པ་ལྟར་བོད་ནང་གི་ཛ་དྲག་གནས་སྟངས་སོགས་རྒྱལ་སྤྱིའི་ནང་ངོ་སྤྲོད་དང་གོ་རྟོགས་རྒྱ་གང་ཆེ་སྤེལ་བའི་ཐོག་ནས་རྒྱབ་སྐྱོར་སྔར་ལྷག་ཡོངས་ཐབས་བྱེད་རྒྱུ་ཡིན། དེ་བཞིན་ཕྱི་ལོ་ ༢༠༡༨ ལོ་ནི་བོད་མི་རྣམས་བཙན་བྱོལ་དུ་འབྱོར་ནས་མི་ལོ་ ༦༠ འཁོར་བའི་དྲན་གསོའི་དུས་ཚིགས་ཤིག་ཡིན་ན། རྒྱ་བལ་འབྲུག་གསུམ་གཙོ་གྱུར་བོད་མི་གནས་སྡོད་བྱ་ཡུལ་གྱི་རྒྱལ་ཁབ་ཁག་གི་ནང་བཀའ་དྲིན་རྗེས་དྲན་གྱི་ངོ་བོར་སྲུང་བརྩི་ཞུ་རྒྱུ་ཡིན།
“དེ་རིང་གོ་སྐབས་འདི་བརྒྱུད་ཨ་རིའི་རྒྱལ་ཡོངས་མང་གཙོའི་ཐེབས་རྩས་བཙན་བྱོལ་བོད་མིའི་མང་གཙོའི་འཕེལ་རིམ་ལ་གཟེངས་བསྟོད་ཀྱི་བྱ༌དགའ་གནང་བ་དང་། ཨ་རིའི་རོགས་ཚོགས་ནས་བཙན་བྱོལ་བོད་མིའི་སྨན་བཅོས་ལྟ་སྐྱོང་ལས་གཞིར་གཟེངས་བསྟོད་ཡིག་ཆ་གནང་བ་བཅས་ལ་ཐུགས་རྗེ་ཆེ་དང་།” ད་ལོའི་དུས་འཁོར་དབང་ཆེན་དང་འབྲེལ་བའི་སྐོར་ལ། “༸གོང་ས་༸སྐྱབས་མགོན་ཆེན་པོ་མཆོག་ནས་དགུང་ལོ་བརྒྱ་ལྷག་བཞུགས་རྒྱུའི་བཀའ་བཞེས་བཟང་པོ་སླར་ཡང་ཕེབས་པ་ནི་རང་ཅག་རྣམས་ཀྱི་བསོད་ནམས་ཡིན་པས་༸མགོན་པོ་གང་ཉིད་ལ་དད་གུས་ཡོད་པའི་སྐྱེ་བོ་སྤྱི་དང་སྒོས་སུ་བོད་མི་ཡོངས་ཀྱི་ཚབ་ཞུས་ཏེ་བཀྲིན་བླ་ལྷག་ཏུ་ཆེ་ཆེ་ཞུ་བ་དང་ཆབས་ཅིག དེ་ལྟར་ཡོང་བར་རང་ཅག་གངས་ཅན་པ་ཡོངས་ཀྱིས་སྤྱི་མཐུན་བསོད་ནམས་ཀྱིས་འཆུན་པ་དགོས་རྒྱུ་ཤིན་ཏུ་གལ་ཆེ་བས་རྣམ་དཀར་དགེ་བའི་ལས་ལ་འབད་འབུངས་དང་། ༸མགོན་པོ་གང་ཉིད་མཆོག་གིས་ཅི་གསུང་བཀའ་སྒྲུབ་ཞུ་རྒྱུ། བོད་མི་ནང་ཁུལ་ཆོལ་ཁའི་འཐེན་འཁྱེར་སྤངས་ཏེ་མཐུན་ལམ་དམ་ཚིག་རྡོག་རྩ་གཅིག་བསྒྲིལ་བཅས་བྱེད་དགོས་པའི་འབོད་སྐུལ་བསྐྱར་ནན་བྱེད་རྒྱུ་ཡིན། དེ་བཞིན་༧གོང་ས་མཆོག་གིས་བཀའ་སློབ་ལམ་སྟོན་ཇི་ཕེབས་ལྟར་གཞིས་བྱེས་བོད་མི་ཚོས་རང་གཞན་གཉིས་ཕུང་གི་རྒྱུ་ཆང་རག་ཚོད་མེད་འཐུང་བ་དང་། རྒྱན་རྩེད་བྱེད་པ་སོགས་བག་མེད་ཀྱི་བྱ་སྤྱོད་རིགས་སྤོང་དགོས་པ་དང་། དེའི་ཚབ་ཏུ་རང་གི་བུ་ཚའི་ཤེས་ཡོན་ཐོག་འགྲོ་གྲོན་གཏོང་དགོས་པའི་རེ་སྐུལ་ནན་པོ་ཞུ་རྒྱུ་དང་། རང་རིགས་དཔལ་འབྱོར་གྱི་གནས་བབ་བཟང་པོ་ཡོད་མཁན་ཚོས་ཀྱང་སོ་སོའི་བུ་ཚ་དང་མི་རིགས་ཀྱི་ཤེས་ཡོན་ཐོག་འགྲོ་གྲོན་གཏོང་གནང་ཡོང་བའི་འབོད་སྐུལ་བྱེད་རྒྱུ་ཡིན།” ཞེས་བཀོད་འདུག
བོད་མི་མང་སྤྱི་འཐུས་ལྷན་ཚོགས་ཀྱི་གསུང་འཕྲིན་ནང་། རྒྱ་ནག་གཞུང་གིས་༸གོང་ས་མཆོག་ལ་སྐྱོན་བརྗོད་དང་། མཁྲེགས་འཛིན་སྲིད་བྱུས་ལ་འགྱུར་བ་གང་ཡང་བཏང་མེད་ཀྱང་། ༸གོང་ས་མཆོག་གི་མཛད་འཕྲིན་རྒྱས་བཞིན་པ་དང་། གཞིས་བྱེས་བོད་མིའི་སྒྲིག་འཛུགས་བཅས་ཀྱི་འབད་བརྩོན་ལ་བརྟེན་ཏེ། བོད་མིའི་བདེན་དོན་ལ་རྒྱབ་རྩ་གནང་མཁན་ཇེ་མང་དུ་འགྲོ་བཞིན་ཡོད་ཚུལ་དང་འབྲེལ་ཏེ། “ ༢༠༡༧ ཟླ་ ༢ པའི་ནང་ཨ་རིའི་ཕྱི་སྲིད་དྲུང་ཆེ་གསར་པ་སྐུ་ཞབས་ Mr. Rex Tillerson མཆོག་ནས་ཨ་རིའི་སྲིད་གཞུང་གསར་པས་བོད་དོན་ཐོག་མུ་མཐུད་རྒྱབ་སྐྱོར་གནང་རྒྱུ་མ་ཟད། རྒྱ་གཞུང་དང་༸གོང་ས་མཆོག་གི་དབར་འབྲེལ་མོལ་ཡོང་ཐབས་དང་། ༸གོང་ས་མཆོག་དང་མཇལ་འཕྲད་ཞུ་རྒྱུ་ཡིན་སྐོར་གསུངས་ཡོད་པ་བཅས་ཀྱིས་རྒྱལ་སྤྱིའི་ནང་༸གོང་ས་མཆོག་གི་མཛད་འཕྲིན་ལ་གུས་བཀུར་དང་། བོད་དོན་ཐོག་རྒྱབ་སྐྱོར་དང་དོ་སྣང་ཆེན་པོ་གནང་བཞིན་ཡོད་པའི་བཟང་ཕྱོགས་ཀྱི་རྣམ་པ་མངོན་འགྱུར་ཡོང་བཞིན་ཡོད།” ཅེས་ཐའེ་ཝན་དང་ཉི་ཧོང་སོགས་སུ་བོད་དོན་རྒྱབ་སྐྱོར་ཚོགས་པ་གསར་འཛུགས་གནང་ཡོད་སྐོར་དང་། འཛམ་གླིང་མཉམ་འབྲེལ་རྒྱལ་ཚོགས་ཀྱི་ཚོགས་ཆེན་ཐོག ༡༩༥༩ ཟླ་ ༡༠ པ་དང་། ༡༩༦༡ ཟླ་ ༡༢ པ། ༡༩༦༥ ཟླ་ ༡༢ པ་བཅས་སུ་བོད་དོན་ལ་གྲོས་ཆོད་རིམ་པ་ ༣ བཞག་ཡོད་པ་ལྟར། ད་ལྟའི་དྲུང་ཆེ་གསར་པ་སྐུ་ཞབས་ Mr. Antonio Guterres མཆོག་གིས་ཀྱང་བོད་དོན་ལ་རྒྱབ་སྐྱོར་ཡོང་བའི་འབོད་སྐུལ་སོགས་ཞུས་འདུག
སྤྱི་འཐུས་ཀྱི་གསུང་འཕྲིན་ནང་། “རྒྱ་གཞུང་གིས་བོད་རྒྱའི་ཆབ་སྲིད་གནས་སྟངས་ཐོག་མཁྲེགས་བཟུང་ཅན་གྱི་སྲིད་བྱུས་འཛིན་པ་རྣམས་ལ་འགྱུར་བ་མ་བཏང་ཚེ་རྒྱ་གཞུང་དང་། བོད་མི་རིགས་དབར་འགལ་ཟླ་ཤུགས་ཆེ་རུ་འགྲོ་རྒྱུ་དང་། རྒྱལ་སྤྱིའི་སྤྱི་ཚོགས་ནས་ཀྱང་རྒྱ་གཞུང་ལ་ལྟ་སྟངས་ཇེ་སྡུག་ཏུ་སོང་སྟེ། ཆེ་མཐོང་ནམ་ཡང་སླེབས་ཐབས་མེད་པ་ཆགས་རྒྱུ་ཡིན། བོད་རྒྱའི་དཀའ་རྙོག་འདི་སེལ་དགོས་ན་རྒྱ་གཞུང་ཁོ་ནའི་ལག་ན་ཡོད་པས་ད་ལྟ་རྒྱ་གཞུང་གི་སྲིད་འཛིན་ཞི་ཅིན་ཕིང་ནས་༸གོང་ས་མཆོག་གིས་བསྟན་གནང་བའི་དབུ་མའི་ལམ་གྱི་སྲིད་བྱུས་ཐོག་ནས་འབྲེལ་མོལ་འགོ་འཛུགས་དང་། བོད་ལ་མིང་དོན་མཚུངས་པའི་རང་སྲིད་རང་སྐྱོང་ལག་བསྟར་ཡོང་ཐབས་ལ་བསམ་ཤེས་བྱ་དགོས་ཞེས་དེ་རིང་གི་གོ་སྐབས་འདི་བརྒྱུད་ནས་དྲན་སྐུལ་བྱ་རྒྱུ་ཡིན།
རང་རེའི་ཕ་ཡུལ་བོད་ནང་བོད་མི་རྣམས་ཆབ་སྲིད་ཀྱི་ཁེ་དབང་ལོངས་སུ་སྤྱོད་རྒྱུ་མེད་པའི་ཁར། ཆོས་དད་དང་། མི་རིགས་ཀྱི་ཐུན་མོང་མ་ཡིན་པའི་རྩ་ཆེའི་རིག་གཞུང་དང་། སྐད་ཡིག་སོགས་མི་ཉམས་རྒྱུན་འཛིན་བྱེད་པའི་རང་དབང་མེད་པར་གནས་བཞིན་པའི་དུས་སྐབས་ཧ་ཅང་གཉན་འཕྲང་ཅན་སྔར་བོད་ཀྱི་ལོ་རྒྱུས་སུ་བྱུང་མ་མྱོང་བའི་དུས་སྐབས་འདིར་རང་རེ་བྱེས་འཁོད་བོད་མི་རྒན་གཞོན་བར་གསུམ་ཚང་མས་སྔར་བས་ལྷག་པའི་སེམས་ཤུགས་ཆེར་བསྐྱེད་ཀྱིས་བོད་ཀྱི་རྩ་དོན་འགྲུབ་ཐབས་སྤྱི་དང་། ཐུན་མོང་མ་ཡིན་པའི་ཆོས་དང་། རིག་གཞུང་། སྐད་ཡིག་བཅས་པར་ཉམས་པ་སླར་གསོ་དང་མི་ཉམས་རྒྱུན་འཛིན་ཞུ་སྒོ་གང་ཅིར་བོད་མིའི་སྒྲིག་འཛུགས་དང་། རྒྱ་ཆེའི་མང་ཚོགས་བཅས་གཉིས་ཕྱོགས་ནས་ཕྱར་བ་གྲུ་འདེགས་ཀྱི་ཤུགས་གནོན་རྒྱག་དགོས་པའི་འབོད་སྐུལ་ནན་ཏན་ཞུ་རྒྱུ་ཡིན།
ད་ལོའི་ཕྱི་ཟླ་ ༡ ཚེས་ ༡༤ ཉིན་རྡོ་རྗེ་གདན་དུ་དུས་འཁོར་དབང་ཆེན་སྟེང་། “མགོན་པོ་གང་ཉིད་མཆོག་ནས་དགུང་གྲངས་བརྒྱ་ལྷག་སྐུ་འཚོ་བཞུགས་མཛད་རྒྱུའི་བཀའ་བཞེས་བཟང་པོ་ཐོབ་པར་གཞིས་བྱེས་བོད་མི་ཡོངས་ཀྱིས་ཚབ་ཞུས་ཏེ་བཀའ་དྲིན་བླ་མེད་དུ་ཆེ་ཞེས་ཞུ་རྒྱུ་དང་། རང་རིགས་བོད་མི་རྣམས་དམ་ཚིག་གཟོང་ཁ་ཆིག་སྒྲིལ་གྱིས་མགོན་པོ་གང་གི་བཀའ་བཞིན་སྒྲུབ་པའི་མཆོད་པས་མཉེས་པར་བྱ་རྒྱུ་ནི་གཡོལ་ཐབས་མེད་པའི་བོད་མིའི་ལས་འགན་གལ་ཆེ་ཞིག་ཡིན་པས་ངོ་ལྐོག་མེད་པར་རང་འགན་རང་སྲུང་གིས་བོད་མིའི་འཐབ་རྩོད་དང་། སྤྱི་ཚོགས་ཀྱི་ཆེ་མཐོང་སོགས་གང་སར་ཞན་ཆར་མི་འགྲོ་བར་དུས་རྟག་ཏུ་འབད་བརྩོན་གནང་དགོས།” ཅེས་སོགས་འཁོད་འདུག
