ཨ་རིའི་གྲོས་ཚོགས་ཀྱི་སྐུ་ཚབ་ཚོགས་ཆུང་བཞུགས་སྒར་དྷ་རམ་ས་ལར་འབྱོར།

ཨ་རིའི་དམངས་གཙོ་ཚོགས་པ་དང་སྤྱི་མཐུན་ཚོགས་པ་གཉིས་ཀྱི་འཐུས་མི་དྲུག་གི་དབུས་པའི་སྐུ་ཚབ་ཚོགས་ཆུང་ཞིག་བཞུགས་སྒར་དྷ་རམ་ས་ལར་ཕེབས་འབྱོར་གྱིས་ཟླ་འདིའི་ཕྱི་ཚེས་ ༤ ཉིན་བར་གཟིགས་སྐོར་གནང་བཞིན་འདུགདེ་རིང་ཕྱི་ཚེས་ ༢ ཉིན་གྱི་ཕྱི་དྲོའི་ཆུ་ཚོད་ ༤ པ་མ་ཟིན་ཙམ་ལ་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་ཌཱ་ཝེ་ཌི་ཕ་རེ་སི་(David price)ལགས་དང་། སྤྱི་མཐུན་ཚོགས་པའི་འཐུས་མི་སྐུ་ཞབས་ཝེན་བྷ་ཁུ་ནིན་(Vern Buchanan)ལགས་རྣམ་གཉིས་ཀྱི་དབུས། གྲོས་ཚོགས་འོག་མའི་དམངས་གཙོ་ཚོགས་པའི་འཐུས་མི་ལྕམ་སྐུ་སུ་སན་ཌཱ་ཝེ་(Susan Davis)ལགས་དང་སྐུ་ཞབས་གྷེ་རི་ཁོ་ནོ་ལེ་(Gerry connolly)ལགས།  གྲོས་ཚོགས་འོག་མའི་སྤྱི་མཐུན་ཚོགས་པའི་འཐུས་མི་སྐུ་ཞབས་ནེལ་ཌོན(Neal Dunn)ལགས་དང་སྐུ་ཞབས་ཇོན་རོ་ཐིར་ཧྥོར་ཌི་(John Rutherford)ལགས། གཞན་ཡང་། ལས་བྱེད་དང་སྐུ་སྲུང་སོགས་མི་གྲངས་ ༣༠ ཙམ་གྱིས་གྲུབ་པའི་སྐུ་ཚབ་ཚོགས་ཆུང་ཞིག གྷ་གྷུལ་གནམ་ཐང་བརྒྱུད་བཞུགས་སྒར་དྷ་རམ་ས་ལར་གཟིགས་སྐོར་དུ་ཕེབས་འབྱོར་བྱུང་སོང་ལ། ཟླ་འདིའི་ཕྱི་ཚེས་ ༤ ཉིན་ཕྱིར་ཕེབས་རྒྱུ་ཡིན་འདུག

དེ་རིང་ཕྱི་དྲོར་དྷ་ས་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་དུ་འཚམས་གཟིགས་སུ་ཕེབས་སོང་བ་དང་། བོད་མིའི་སྒྲིག་འཛུགས་ཀྱི་དྲ་བར་བཀོད་པའི་མཛད་འཆར་ལྟར་ན། ཕྱི་ཚེས་ ༣ ཉིན་གྱི་སྔ་དྲོར་བཀའ་ཤག་གི་མཇལ་འཕྲད་ཁང་དུ་དཔལ་ལྡན་སྲིད་སྐྱོང་མཆོག་གི་དབུས་བཀའ་བློན་རྣམ་པ་དང་ལྷན་མཇལ་འཕྲད་གནང་རྒྱུ་དང་། དེ་ནས་སྔ་དྲོའི་ཆུ་ཚོད་ ༡༡ ཙམ་ལ་བཞུགས་སྒར་རྒྱལ་བའི་ཕོ་བྲང་དུ། ༸གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་དང་ཉིན་གུང་ལྗགས་སྨིན་ལྷན་བཞེས་མཛད་རྒྱུ་དང་། དེ་ནས་ཐེག་ཆེན་ཆོས་གླིང་གཙུག་ལག་ཁང་དུ་མཆོད་མཇལ་ཞུ་རྒྱུ་ཡིན་འདུགཉིན་རྒྱབ་ཆུ་ཚོད་ ༣ ཐོག་བོད་མི་མང་སྤྱི་འཐུས་ལྷན་ཚོགས་སུ་ཕེབས་ཏེ་གྲོས་ཚོགས་ཀྱི་ཚོགས་གཙོ་སྦྲེལ་པོའི་དབུས་སྤྱི་འཐུས་རྒྱུན་ལས་རྣམས་དང་མཇལ་འཕྲད་གནང་རྗེས།  གངས་སྐྱིད་ཚོགས་ཁང་གསར་པའི་ནང་དུ་བོད་མིའི་སྒྲིག་འཛུགས་ཀྱི་སྲི་ཞུ་བ་ཡོངས་ལ་གསུང་བཤད་གནང་རྒྱུ་དང་། དེ་ནས་བོད་ཀྱི་ཟློས་གར་ཚོགས་པ་ནས་སྲོལ་རྒྱུན་གྱི་གཞས་སྣ་འཁྲབ་སྟོན་ཞུས་རྗེས། བོད་མིའི་སྒྲིག་འཛུགས་བཀའ་ཤག་ནས་སྐུ་མགྲོན་རྣམ་པར་དགོང་ཚིགས་འདེགས་འབུལ་རྒྱུ་ཡིན་འདུག

ད་ལན་ནི་འདས་པའི་ལོ་ཤས་ནང་ཨ་རིའི་གྲོས་ཚོགས་ཀྱི་སྐུ་ཚབ་ཚོགས་ཆུང་བཞུགས་སྒར་དུ་ཕེབས་པ་ཐེངས་གཉིས་པ་དེ་ཆགས་ཡོད་པ་རེད། ཕྱི་ལོ་ ༢༠༡༧  ལོར་ད་ལྟའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ནན་སི་པེ་ལོ་སི་(Nancy Pelosi )མཆོག་གིས་དབུ་འཁྲིད་པའི་ཆབ་སྲིད་ཚོགས་པ་གཉིས་ཀྱི་འཐུས་མི་བཅས་མི་གྲངས་ ༣༩ ཙམ་གྱིས་གྲུབ་པའི་སྐུ་ཚབ་ཚོགས་ཆུང་ཞིག་བཞུགས་སྒར་དྷ་རམ་ས་ལར་ཕེབས་ཏེ། ༧གོང་ས་མཆོག་ལ་མཇལ་བཅར་ཞུས་པའི་གཙོས་བོད་མིའི་སྒྲིག་འཛུགས་དང་བོད་མི་མང་སྤྱི་འཐུས་ལྷན་ཚོགས་སོགས་སུ་གཟིགས་ཞིབ་གནང་ཡོད་པ་རེད།