རྒྱ་ནག་ཁོར་ཡུག་ལྷན་ཁང་གིས་བོད་ཀྱི་འབྲི་ཆུ་དང་རྨ་ཆུའི་འགག་ཁུལ་ཁག་ཅིག་གི་འབག་བཙོག་ཚད་ལས་བརྒལ་འདུག་པས་བཙོག་བཙོག་གཙང་སེལ་ལ་ཤུགས་སྣོན་རྒྱག་དགོས་པའི་འབོད་སྐུལ་བྱས།
ཁ་སང་ཕྱི་ཚེས་ ༤ ཉིན་རྒྱ་ནག་ཁོར་ཡུག་ལྷན་ཁང་གིས་གནས་ཚུལ་ཞིག་སྤེལ་ཏེ། འབྲི་ཆུ་དང་རྨ་ཆུའི་འགག་ཁུལ་ཁ་ཤས་གཞུང་གི་གཏན་འབེབ་བྱས་ཡོད་པའི་ཚད་གཞི་ལས་འབག་བཙོག་ཧ་ཅང་ཆེན་པོ་ཆགས་ཡོད་པ་དང་། འབྲི་ཆུའི་སྨད་རྒྱུད་དུ་ཆགས་པའི་རྒྱ་ནག་ཐེན་ཅིན་ (Tianjin) གྲོང་ཁྱེར་གྱི་བཟོ་གྲྭ་ཁག་གི་ཁུལ་དུ་འཐུང་ཆུ་དང་། ཞིང་ལ་འདྲེན་པ་སོགས་ཀྱི་ཆེད་དུ་སྤྱོད་ཐབས་མེད་པར་གྱུར་བའི་འབྲི་ཆུ་འབག་བཙོག་གཙང་སེལ་ལ་ཤུགས་སྣོན་རྒྱག་དགོས་པ་མ་ཟད། རྨ་ཆུའི་བར་རྒྱུད་དང་སྨད་རྒྱུད་དུ་ཛ་དྲག་གི་གཙང་སེལ་བྱ་འགུལ་སྤེལ་དགོས་སྐོར་འབོད་སྐུལ་བྱས་འདུག
རྒྱ་ནག་གཞུང་གིས་འབྲི་ཆུའི་རྒྱུད་དང་འབྲེལ་ནས་ཡར་རྒྱས་གཏོང་ཕྱོགས་ཀྱི་ཡིག་ཆ་ཞིག་བཀྲམས་ཏེ། ཕྱི་ལོ་ ༢༠༢༥ ལོའི་བར་དུ་ཚན་རིག་དང་དེང་རབས་གསར་གཏོད་དང་མཐུན་པའི་བཟོ་གྲྭ་འཛུགས་སྐྲུན་དང་གཞི་རྒྱ་ཆེ་བའི་འཛུགས་སྐྲུན་གཞན་ཁག་བར་སྦྲེལ་བ། དེ་བཞིན་ཁོར་ཡུག་སྲུང་སྐྱོབ་ཀྱི་ཁྲིམས་སྒྲིག་དམ་དུ་གཏོང་བ་དང་། ཞབས་ཞུའི་སྤུས་ཚད་མཐོ་རུ་གཏང་སྟེ་འབྲི་ཆུ་གཙང་སེལ་དང་རྒྱུན་གནས་ཀྱི་ཡར་རྒྱས་གཏོང་བའི་དམིགས་འབེན་ཡོད་སྐོར་བཀོད་འདུག
རོ་ཊིར་སི་གསར་ཁང་གི་གནས་ཚུལ་ལྟར་ན། རྒྱ་ནག་གཞུང་གིས་ཆུ་ལ་རིམ་པ་དྲུག་ཏུ་བགོས་ཡོད་པའི་རིམ་པ་དང་པོ་གསུམ་ནི་མིས་བེད་སྤྱོད་བྱེད་ཆོག་པ་དང་། གཞན་གསུམ་ལས་མཐའ་མ་ནི་མི་དང་ཞིང་ལས། བཟོ་གྲྭ་སོགས་ཀྱི་ཆེད་བེད་སྤྱོད་མི་ཆོག་པ་ཡིན་འདུག རྒྱ་ནག་གི་ཆུ་སྤྱིའི་བརྒྱ་ཆའི་ ༧༥།༤ ཙམ་ནི་རིམ་པ་དང་པོ་གསུམ་དེའི་ཁུངས་སུ་ཚུད་ཡོད་པ་དང་། འདས་ལོ་ལས་བརྒྱ་ཆའི་གཉིས་ཡར་འཕར་ཡོད་འདུག དེ་བཞིན་རིམ་པ་དྲུག་པ་དེའི་བརྒྱ་ཆ་ ༣།༢ ཡིན་འདུག
ཕྱི་ལོ་ ༢༠༠༩ ལོའི་ཟླ་ ༥ ཙམ་ལ་རྒྱ་ནག་གཞུང་གིས་ལྷོ་ཆུ་བྱང་འདྲེན་གྱི་ལས་གཞིའི་ཆེད་འབྲི་ཆུའི་རྒྱུད་ཀྱི་མི་མང་ ༣༣༠༠༠༠ ཙམ་གནས་སྤོ་དགོས་སྐོར་གཞུང་འབྲེལ་གསར་འགྱུར་བརྒྱུད་ལམ་ཁག་ཏུ་བསྒྲགས་ཡོད་པ་དང་། ལོ་དེར་རྒྱ་ནག་གཞུང་གིས་འབྲི་ཆུ་འགག་གསུམ་ཁུལ་དུ་ཆུ་མཛོད་ཆེན་པོ་ཞིག་བརྒྱབས་ནས་མི་གྲངས་ ༨༥༠༠༠༠ ཙམ་གནས་སྤོས་ཡོད་སྐོར་བརྗོད་ཡོད་ཀྱང་། རྗེས་སུ་ཉམས་ཞིབ་པ་ཚོས་སྐབས་དེར་མི་གྲངས་ས་ཡ་ ༡ ཙམ་གནས་སྤོ་བྱེད་བཅུག་ཡོད་སྐོར་བརྗོད་ཡོད་པ་རེད། འབྲི་ཆུའི་ཁ་ཕྱོགས་བསྒྱུར་དགོས་དོན་ནི་རྒྱ་ནག་གི་བྱང་ཕྱོགས་སུ་ཆུ་དཀོན་རྐྱེན་ལོ་ལྟར་ཐན་པ་ཡོང་བཞིན་པའི་དཀའ་ངལ་སེལ་ཐབས་ཡིན་སྐོར་བརྗོད་ཡོད་ཀྱང་། ཞིབ་འཇུག་ལས་ཤེས་རྟོགས་བྱུང་བ་ལྟར་ན། རྒྱ་ནག་གཞུང་གིས་འབྲི་ཆུ་གཙང་པོའི་ཁ་ཕྱོགས་ལྷོ་ནས་བྱང་ཕྱོགས་ལ་བསྒྱུར་བ་མ་ཟད། ཤར་བྱང་གཉིས་ལ་ཡང་ཡུར་བ་མང་པོ་བཟོས་ཏེ་འཐུང་ཆུ་དང་ཞིང་ཆུ་འདྲེན་གྱི་ཡོད་སྐོར་བརྗོད་ཡོད་པ་རེད།
ཆུ་བོ་ཆེན་པོ་འདི་གཉིས་ཀྱི་རྒྱུད་དུ་རྒྱ་ནག་གཞུང་གིས་གློག་ཁང་གསར་རྒྱག་དང་ཆུ་ཁ་གཞན་དུ་བསྒྱུར་ཐབས་བྱེད་པ་སོགས་ཀྱི་ལས་གཞི་ཧ་ཅང་མང་པོ་སྤེལ་གྱི་ཡོད་ལ། ལྷག་པར་དུ་བོད་ཁུལ་གྱི་ས་གཤིས་སྙི་མོ་ཡིན་པ་ལ་བལྟོས་མེད་ཀྱིས་འཛུགས་བསྐྲུན་ཤུགས་ཆེན་བྱེད་བཞིན་ཡོད་པར་བརྟེན། འདས་ལོར་བོད་འཇོ་མདའ་རྫོང་དུ་ཐེངས་གཉིས་ལ་རི་ཉིལ་ནས་འབྲི་ཆུ་འགག་པ་དང་། ཕྱི་ལོ་ ༢༠༡༧ ལོར་རྨ་ཆུའི་བཞུར་རྒྱུན་ཟི་ལིང་དུ་འདྲེན་པའི་ལས་གཞི་གཏན་འབེབ་བྱས་པ། གློག་ཁང་བརྒྱབས་ཏེ་ཆུ་བསྐྱིལ་བ་སོགས་ལ་བརྟེན། བོད་ཁུལ་གྱི་རྩྭ་ཐང་བྱེ་འགྱུར་གྱི་གནས་སྟངས་ཧ་ཅང་ཚབས་ཆེན་ཆགས་ཀྱི་ཡོད་པ་དང་། ཆུ་རྒྱུད་ཀྱི་མི་མང་སྟོང་ཕྲག་མང་པོ་བཙན་གྱིས་གནས་སྤོ་རུ་འཇུག་བཞིན་ཡོད་པ་སོགས་རོང་འབྲོང་མང་ཚོགས་ཀྱི་འཚོ་བར་དོ་ཕོག་ཆེན་པོ་གཏོང་བཞིན་ཡོད་པ་རེད།
རྨ་འབྲི་གཉིས་ཀྱི་མགོ་ཁུངས་བོད་ཡིན་ལ། འབྲི་ཆུ་ལྟ་བུར་མཚོན་ན་བོད་ཀྱི་གདང་ལའི་རི་རྒྱུད་རྒྱ་ལ་རྩེ་ཟླུམ་གྱི་ལྷོ་ནུབ་ཕྱོགས་ནས་བབས་ཏེ། བོད་ལྗོངས་དང་དཀར་མཛེས། མཚོ་སྔོན་སྐྱེ་དགུ། ཡུན་ནན་བདེ་ཆེན་བཅས་ཀྱི་བོད་རིགས་ས་ཁུལ་གྱི་རྫོང་ ༡༤ ལ་བཞུར་ཞིང་། བོད་ཡུལ་གྱི་བཞུར་རྒྱུན་རིང་ཚད་སྤྱི་ལེ་ ༢༨༠༦ དང་། སྤྱིའི་རིང་ཚད་ནི་སྤྱི་ལེ་ ༦༣༠༠ ཡིན་ལ། འབྲི་ཆུ་ནི་ཨེ་ཤ་ཡའི་རྒྱུག་ཆུ་རིང་ཤོས་དང་འཛམ་གླིང་གི་རྒྱུག་ཆུ་རིང་ཤོས་གཉིས་པ་དེ་ཡིན་འདུག དེའི་རྒྱུད་ཀྱི་མི་གྲངས་དུང་ཕྱུར་ ༤ ཙམ་ལ་ཆུའི་མཐུན་རྐྱེན་སྐྲུན་གྱི་ཡོད་ལ། རྒྱ་ནག་གི་སོ་ནམ་ཞིང་ལས་ཀྱི་བཞི་ཆའི་གཅིག་ཙམ་ལ་ཞིང་ཆུ་གཏོང་གི་ཡོད་འདུག
རྨ་ཆུ་ནི་མཚོ་སྔོན་ཞིང་ཆེན་གྱི་ཨ་ཆེན་གངས་རི་ནས་སི་ཁྲོན་དང་ཀན་སུའུ། ཀ་ཅི་ཀ། ནང་སོག ཧྲན་ཞི་དང་ཧྲན་ཞི། ཧུའུ་ནན་སོགས་ཞིང་ཆེན་དགུ་དང་། རང་སྐྱོང་ལྗོངས་གཅིག་བཅས་བརྒྱུད་ནས་པོ་ཧེ་རྒྱ་མཚོར་བཞུར་གྱི་ཡོད་འདུག་ལ། བོད་ཡུལ་དུ་རྨ་ཆུར་གཙང་ལག་གྲགས་ཆེ་བ་ནི་དར་ལག་ཆུ་དང་རྩེ་ཆུ། གསེར་ཆེན་ཆུ་དང་ཆུ་སྔོན། འབའ་ཆུ་དང་དགུ་ཆུ། ཙོང་ཆུ་དང་རྐ་ཆུ། ཀླུ་ཆུ་དང་བསང་ཆུ། འཇུ་ལག་ཆུ་སོགས་ཡོད་ལ། བོད་ནང་གི་བཞུར་རྒྱུན་རིང་ཚད་སྤྱི་ལེ་ ༡༦༩༣ དང་སྤྱིའི་རིང་ཚད་སྤྱི་ལེ་ ༥༤༦༤ ཙམ་ཡོད་པར་བརྟེན། རྒྱ་ནག་ནང་བཞུར་བཞིན་པའི་རྒྱུག་ཆུ་རིང་ཤོས་གཉིས་པ་དང་འཛམ་གླིང་གི་རིང་ཤོས་དྲུག་པ་དེ་ཡིན་འདུག
གསར་འགོད་པ། ཀླུ་མགོན་ཐར།
