འཛམ་གླིང་འཕྲོད་བསྟེན་ལྷན་ཚོགས་ཀྱིས་རྒྱ་ནག་གཞུང་ལ་བསྟུན་མཁས་ཆེན་པོ་བྱེད་བཞིན་པ།

འཛམ་གླིང་འཕྲོད་བསྟེན་ལྷན་ཚོགས་ཀྱི་འགན་འཛིན་ལས་རོགས་ཀྱིས་ཐའེ་ཝན་ལྷན་ཚོགས་དེའི་ནང་ཞུགས་པར་བསྐྱར་ཞིབ་དགོས་མིན་སོགས་ཀྱི་དྲི་བར་ལན་འདེབས་བྱས་མེད་པ་མ་ཟད་བརྙན་ལམ་བཅར་འདྲི་སྒོ་བརྒྱབ། དེ་རིང་ཧོང་ཀོང་རང་དབང་གསར་ཤོག་གིས་གནས་ཚུལ་ཞིག་སྤེལ་བའི་ནང་། ཁ་སང་ཧོང་ཀོང་གི་རླུང་འཕྲིན་ཁང་ཆེ་ཤོས་དང་རྙིང་ཤོས་སུ་གྲགས་པའི་ཧོང་ཀོང་གི་རླུང་འཕྲིན་གསར་འགྱུར་ཁང་(Radio Television Hong Kong, RTHK) གི་པལ་སི་(Pulse)ཞེས་པའི་བདུན་རེའི་བརྙན་ལམ་ལས་རིམ་སྟེང་། འཛམ་གླིང་འཕྲོད་བསྟེན་ལྷན་ཚོགས་ཀྱི་སྤྱི་ཁྱབ་འགན་འཛིན་ལས་རོགས་བྷུ་རུ་སི་ཨེལ་ཝ་ཌི་ (Bruce Aylward)ཞེས་པ་དེར། ལྷན་ཚོགས་དེའི་ཚོགས་ཁོངས་སུ་ཐའེ་ཝན་འཇུག་མིན་ཐད་བསྐྱར་ཞིབ་བྱ་རྒྱུ་ཡིན་མིན་དྲིས་པར། བྷུ་རུ་སི་ཨེ་ལ་ཝ་ཌིས་ལན་སྤྲད་མེད་པ་མ་ཟད་བརྙན་སྒོའང་བརྒྱབ་ཡོད་འདུག

གསར་འགོད་པ་ཝོ་ནི་ཐོང་(Yvonne Tong) གིས། འཛམ་གླིང་འཕྲོད་བསྟེན་ལྷན་ཚོགས་ཀྱིས་ཐའེ་ཝན་ལྷན་ཚོགས་ཁོངས་སུ་འཇུག་མིན་ཐད་བསྐྱར་ཞིབ་བྱ་རྒྱུ་ཡིན་མིན་དྲིས་པར། དང་ཐོག་བྷུ་རུ་སི་ཡེལ་ཝ་ཌིས་ལན་འདེབས་མ་བྱས་པར་ཁུ་སིམ་མེར་བསྡད་པ་དང་། དེ་ནས་དྲི་བ་གསལ་པོ་གོ་མ་བྱུང་ཞེས་བརྗོད་པ་མ་ཟད། གསར་འགོད་པས་ཡང་བསྐྱར་འདྲི་རྒྱུ་ཡིན་སྐོར་བརྗོད་སྐབས། བྷུ་རུ་སི་ཡིས། དྲི་བ་བསྐྱར་དུ་གཏོང་དགོས་མ་རེད། དྲི་བ་རྗེས་མ་དེ་གཏོང་རོགས། ཞེས་བརྗོད་ཡོད་པ་རེད།

གསར་འགོད་པས་མུ་མཐུད་ཐའེ་ཝན་གྱི་གནས་སྟངས་སྐོར་གླེང་སློང་བྱ་འདོད་ཡོད་སྐོར་བརྗོད་སྐབས། བྷུ་རུ་སི་ཡིས་འཕྲལ་མར་རང་གི་བརྙན་སྒོ་བརྒྱབ་ཡོད་འདུག དེའི་རྗེས་གསར་འགོད་པས་ཡང་བསྐྱར་བརྙན་ལམ་མཐུད་དེ། ཐའེ་ཝན་གྱིས་ཏོག་དབྱིབས་རིམས་ནད་འགོག་སྲུང་གི་བྱ་འགུལ་ཇི་འདྲ་སྤེལ་གྱི་ཡོད་མེད་དྲིས་པར་བྷུ་རི་སིས། ང་ཚོས་རྒྱ་ནག་སྐོར་བཤད་ཟིན། ཞེས་ལན་འདེབས་བྱས་ཡོད་པ་རེད།

སྤྱིར་འདས་ལོའི་ཕྱི་ཟླ་ ༡༢ ཚེས་ ༣༡ ཉིན་རྒྱ་ནག་གིས་ཏོག་དབྱིབས་ནད་ཡམས་ཀྱི་ཛ་དྲག་གནས་སྟངས་སྐོར་འཛམ་གླིང་ལ་ཡོངས་ཁྱབ་བྱས་ཡོད་པ་མ་ཟད། རྒྱ་ནག་གི་གྲོང་ཁྱེར་ཝུ་ཧན་ནང་ཉིན་རེར་ཏོག་དབྱིབས་ནད་གྲངས་འཕར་བཞིན་པའི་གནས་སྟངས་སོགས་འཛམ་གླིང་འཕྲོད་བསྟེན་ལྷན་ཚོགས་ལ་སྙན་གསེང་ཞུས་ཡོད་པ་རེད། རྒྱ་ནག་གི་སྨན་པ་དང་རྒྱལ་སྤྱིའི་སྨན་པ་སྐོར་ཞིག་གིས་ཏོག་དབྱིབས་ནད་ཡམས་འདི་ཉིད་འཛམ་གླིང་གི་ཛ་དྲག་འཕྲོད་བསྟེན་དཀའ་ངལ་ཞིག་ཡིན་པར་གསལ་བསྒྲགས་བྱེད་དགོས་པའི་བསམ་ཚུལ་བཏོན་ཡོད་ཀྱང་། འཛམ་གླིང་འཕྲོད་བསྟེན་ལྷན་ཚོགས་ཀྱིས་དེ་ལྟར་བྱས་མེད་པ་མ་ཟད། ལྷན་ཚོགས་ཀྱི་ཚོགས་གཙོ་ཊེ་ཌོ་རོ་སི་ཨ་དྷ་ནོམ་ (Tedros Adhanom) གྱིས་སྣེ་འཁྲིད་པའི་ཆེད་འཛུགས་ཚོགས་ཆུང་རྒྱ་ནག་ལ་བསྐྱོད་དེ། རྒྱ་ནག་གི་གཞུང་འབྲེལ་མི་སྣར་ཐུག་འཕྲད་ཀྱིས་གནས་སྟངས་ལ་ཞིབ་འཇུག་བྱས་རྗེས། གསར་འགོད་གསལ་བསྒྲགས་ཤིག་གི་སྟེང་རྒྱ་ནག་གིས་ཏོག་དབྱིབས་ནད་ཡམས་སྔོན་འགོག་གི་བྱ་འགུལ་ཚགས་ཚུད་སྤེལ་བཞིན་ཡོད་སྐོར་གྱི་བསྔགས་བརྗོད་ཤུགས་ཆེན་བྱས་ཡོད་པ་ཟད། ཕྱིས་སུ་ཏོག་དབྱིབས་ནད་ཡམས་འཛམ་གླིང་གི་ས་ཕྱོགས་གང་སར་ཁྱབ་སྟེ་ཅུང་ཛ་དྲག་ལྟ་བུ་ཆགས་སྐབས་ཀྱང་། རྒྱ་ནག་གི་ཐབས་བྱུས་ལ་བསྟོད་བསྔགས་བྱས་པ་མ་ཟད། འདི་ལོའི་ཕྱི་ཟླ་ ༡ ཚེས་ ༣༡ ཉིན་ཏོག་དབྱིབས་ནད་ཡམས་དེ་ཉིད་འཛམ་གླིང་གི་འཕྲོད་བསྟེན་ཛ་དྲག་གནས་སྟངས་ཤིག་ཏུ་ངོས་འཛིན་གསལ་བསྒྲགས་བྱེད་སྐབས་ཀྱང་། རྒྱ་ནག་ནང་གི་གནས་སྟངས་ལ་གཞིགས་ནས་གསལ་བསྒྲགས་བྱས་པ་ཞིག་མིན་སྐོར་བརྗོད་ཡོད་པ་རེད། སྐབས་དེར་དབྱེ་ཞིབ་པ་མང་པོས་འཛམ་གླིང་འཕྲོད་བསྟེན་ལྷན་ཚོགས་ལ་རྒྱ་ནག་ནས་གནོན་ཤུགས་ཆེན་པོ་སླེབས་ཀྱི་ཡོད་སྐོར་དང་། འཕྲོད་བསྟེན་ལྷན་ཚོགས་ཀྱིས་ཆབ་སྲིད་འཁྲབ་ཀྱི་ཡོད་སྐོར་གྱི་སྐྱོན་བརྗོད་ཤུགས་ཆེན་བྱས་དང་བྱེད་བཞིན་ཡོད་པ་རེད།

དེ་བཞིན་ཟླ་འདིའི་ཕྱི་ཚེས་ ༤ ཉིན་བརྒྱུད་ལམ་བཞི་པ་(Channel 4) ཞེས་པའི་གསར་ཁང་གིས་ལྷན་ཚོགས་དེའི་འགན་འཛིན་ལས་རོགས་བྷུ་རུ་སི་ལ་ཏོག་དབྱིབས་ནད་ཡམས་དང་འབྲེལ་བའི་བཅར་འདྲི་བྱེད་སྐབས། ཁོ་པས་རྒྱ་ནག་ནང་དོགས་ཡོད་ནད་པ་རྣམས་ཉིན་གྲངས་ ༡༤ རིང་གི་ཟུར་བཅད་དུས་སྐབས་རིང་ལྟ་རྟོག་ལེགས་པོ་ཐོབ་ཡོད་སྐོར་དང་། ཏོག་དབྱིབས་ནད་པ་ཚོར་ལྟ་རྟོག་དང་སྨན་བཅོས་ལེགས་པོ་བྱེད་ཀྱི་ཡོད་སྐོར་སོགས་བརྗོད་དེ། རྒྱ་ནག་གཞུང་གི་རིམས་འགོག་བྱ་འགུལ་ལ་བསྟོད་བསྔགས་ཤུགས་ཆེན་བྱས་ཡོད་འདུག ཡང་ཁོ་པས་གསར་འགོད་གསལ་བསྒྲགས་ཤིག་གི་སྟེང་། གལ་ཏེ་རང་ཉིད་ལ་ཏོག་དབྱིབས་ནད་ཡམས་འགོས་ཚེ། རྒྱ་ནག་ནང་སྨན་བཅོས་བྱ་རྒྱུ་ཡིན་སྐོར་ཡང་བརྗོད་ཡོད་འདུགའདི་ལོའི་ཕྱི་ཟླ་ ༡ ཚེས་ ༢༣ ཉིན་ཨོ་སུ་ཀ་ཡིབ་(Osuka Yip )ཞེས་པ་ཞིག་གིས་ change.org ཐོག འཛམ་གླིང་འཕྲོད་བསྟེན་ལྷན་ཚོགས་ཀྱི་འགན་འཛིན་ཊེ་ཌོ་རོ་སི་ཨ་དྷ་ནོམ་་གྱིས་འགན་འཛིན་གྱི་ལས་གནས་ནས་རྩ་དགོངས་ཞུ་དགོས་པའི་དྲ་ལམ་མཚན་རྟགས་བསྡུ་རུབ་ཀྱི་ལས་འགུལ་ཞིག་མགོ་བརྩམས་ཡོད་པ་དང་། དལྟའི་ཆར་ལས་འགུལ་དེར་མི་གྲངས་འབུམ་༦དང་ཕྱེད་ཀ་བརྒལ་བས་མཚན་རྟགས་བསྐྱོན་ཚར་ཡོད་པ་དང་། དམིགས་ཚད་མཚན་རྟགས་ས་ཡ་ ༡ ཟིན་མཚམས་འཛམ་གླིང་མཉམ་འབྲེལ་རྒྱལ་ཚོགས་ལ་འབུལ་རྒྱུ་ཡིན་འདུག

ད་ལྟ་ཏོག་དབྱིབས་ནད་ཡམས་དེ་རྒྱ་ནག་ནས་ནུབ་གླིང་ཡུ་རོབ་དང་ཨ་རི་སོགས་སུ་འགོས་ཁྱབ་ཚབས་ཆེན་ཕྱིན་ཡོད་པ་དང་བསྟུན། རྒྱ་ནག་གཞུང་གིས་རང་ཁོངས་སུ་ཏོག་དབྱིབས་ནད་ཡམས་ཚོད་འཛིན་བྱས་ཐུབ་ཡོད་སྐོར་དང་། འདས་པའི་བདུན་ཕྲག་གཅིག་རིང་ཕྱི་ནས་འགོས་པའི་ནད་པ་མ་གཏོགས། རང་ཁོངས་སུ་བྱུང་མེད་སྐོར་བསྒྲགས་ཡོད་ཅིང་། རྒྱ་ནག་གི་སློབ་གྲྭ་དང་བཟོ་གྲྭ་མང་ཆེ་བ་བསྐྱར་དུ་སྒོ་ཕྱེ་བར་འབད་བཞིན་ཡོད་པ་རེད། དེ་ཙམ་དུ་མ་ཟད་ད་ལྟ་རྒྱ་ནག་གཞུང་གིས་ཨ་ཧྥེ་རི་ཁ་དང་། ཡུ་རོབ། ཨེ་ཤ་ཡའི་རྒྱལ་ཁབ་མི་ཉུང་བར་སྨན་པ་དང་། སྨན་བཅོས་འཕྲུལ་ཆས་སོགས་ཀྱི་རོགས་སྐྱོར་བྱས་ཏེ། འཛམ་གླིང་མི་མང་གི་ཏོག་དབྱིབས་ནད་ཡམས་དང་འབྲེལ་བའི་རྒྱ་ནག་ལ་ལྟ་ཕྱོགས་བཟང་དུ་གཏོང་ཐབས་བྱེད་ཀྱི་ཡོད་སྐོར་དབྱེ་ཞིབ་པ་མང་པོས་བརྗོད་ཡོད་པ་རེད།

འདས་པའི་ལོ་ཤས་རིང་ནས་རྒྱ་ནག་གིས་ཐའེ་ཝན་དང་ཕྱི་འབྲེལ་བཙུགས་པའི་རྒྱལ་ཁབ་ཚོར་དཔལ་འབྱོར་སོགས་ཀྱི་བསླུ་བྲིད་བཏང་སྟེ། ཐའེ་ཝན་དང་ཕྱི་འབྲེལ་གཅོད་ཐབས་བྱེད་བཞིན་ཡོད་པ་མ་ཟད། བསྟུད་མར་རྒྱལ་སྤྱིའི་སྤྱི་ཚོགས་ཀྱིས་ཐའེ་ཝན་གྱི་ཁ་བྲལ་སྟོབས་ཤུགས་ལ་རྒྱབ་སྐྱོར་བྱས་ཚེ། དེར་རྒྱ་ནག་གིས་བཟོད་བསྲན་བྱེད་ཐབས་མེད་སྐོར་དང་། ཐའེ་ཝན་དེ་མེས་རྒྱལ་དང་གཅིག་ཏུ་བསྒྲིལ་ཆེད་དམག་གི་སྟོབས་ཤུགས་བཀོལ་དགོས་བྱུང་ན་ཡང་བཀོལ་རྒྱུ་ཡིན་སྐོར་གྱི་འཇིགས་སྐུལ་ཡང་བྱེད་ཀྱི་ཡོད་པ་རེད། ཡིན་ནའང་འདས་ལོར་ཨ་རིས་ཐའེ་ཝན་ལ་རྒྱལ་སྲུང་བདེ་འཇགས་ཀྱི་གོ་མཚོན་བཙོང་ཡོད་པ་མ་ཟད། ཟླ་འདིའི་ཕྱི་ཚེས་ ༢༧ ཉིན་ཨ་རིའི་གྲོས་ཚོགས་གོང་འོག་གཉིས་ཀྱིས་ཚད་མཐོའི་རྒྱབ་སྐྱོར་ཐོག་གཏན་འབེབ་བྱུང་བའི་ཐའེ་ཝན་གྱི་ཕྱི་འབྲེལ་ནུས་སྟོབས་གོང་འཕེལ་གཏོང་རྒྱུའི་ཁྲིམས་འཆར་(Taiwan Allies International Protection and Enhancement Initiative ACT) དེར། སྲིད་འཛིན་ཊོམ་ཕུ་མཆོག་ནས་མཚན་རྟགས་བསྐྱོན་ནས་ཁྲིམས་ཡིག་ཏུ་གཏན་འབེབ་གནང་ཡོད་པ་རེད།

གསར་འགོད་པ། པ་སངས་ཚེ་རིང་།