ཛ་དྲག་གི་སྐབས་འདིར་རྒྱ་གར་གྱི་དབུས་ས་གཉིས་ཀྱི་མི་མང་ལ་རོགས་རམ་ཆེན་པོ་གནང་གི་འདུག

རྒྱ་གར་ནང་ཏོག་དབྱིབས་ནད་པ་ ༦༠༠༠ ལྷག་ཟིན་ཏེ་མི་མང་ལ་ནད་མནར་དང་འཚོ་བའི་དཀའ་སྡུག་ཆེན་པོ་ཡོང་བཞིན་ཡོད་པས་བཙན་བྱོལ་བོད་མི་མང་པོས་དངུལ་དང་བཟའ་ཆས་སོགས་ཀྱིས་རོགས་རམ་ཆེན་པོ་གནང་བཞིན་འདུག ཏོག་དབྱིབས་ནད་ཡམས་འཛམ་གླིང་གི་རྒྱལ་ཁབ་དང་རང་སྐྱོང་ས་ཁུལ་ ༡༨༠ ལྷག་གི་ནང་ཁྱབ་སྟེ། ཏོག་དབྱིབས་ནད་པ་ས་ཡ་གཅིག་དང་ཕྱེད་ཀ་ལྷག་དང་མི་གྲངས་ཁྲི་ ༩ མ་ཟིན་ཙམ་འདས་གྲོངས་སུ་ཕྱིན་ཟིན་ཡོད་པ་དང་། རྒྱ་གར་ནང་དུའང་ཏོག་དབྱིབས་ནད་པ་ ༦༠༠༠ ལྷག་དང་མི་ ༡༨༠ འདས་གྲོངས་སུ་ཕྱིན་ཏེ་དཀའ་ངལ་ཆེན་པོ་ཡོང་བཞིན་ཡོད་པའི་སྐབས་འདིར། ༧གོང་ས་མཆོག་གི་དབུས་པའི་བཙན་བྱོལ་བོད་མིའི་སྒྲིག་འཛུགས་དང་། དགོན་སྡེ་གྲྭ་ཚང་ཁག དེ་བཞིན་ཚོགས་པ་དང་མི་སྒེར་བཅས་དངུལ་དང་བཟའ་ཆས་སོགས་ཀྱིས་རོགས་རམ་འཕོན་ཆེན་གནང་བཞིན་འདུག

འདི་གར་མཁན་པོ་རང་གྲོལ་མཆོག་ནས་གནས་ཚུལ་མཁོ་གཏོང་གནང་བ་ལྟར་ན། དེ་རིང་ཕྱི་ཚེས་ ༩ ཉིན་འབྲི་གུང་བཀའ་བརྒྱུད་གཙུག་ལག་སློབ་གཉེར་ཁང་གི་འགན་འཛིན་ལྷན་ཚོགས་ཀྱི་དྲུང་ཆེ་མཁན་པོ་རང་གྲོལ་མཆོག་དང་། གདན་ས་བྱང་ཆུབ་གླིང་གི་དབུ་འཛིན་པདྨ་རིག་འཛིན་ལགས། དྲུང་ཡིག་བུ་ཆུང་ལགས་བཅས་ཨུ་ཌར་ཁན་མངའ་སྡེའི་བློན་ཆེན་ཊི་ཝན་ཌར་སིང་རཱ་ཝེ(Trivendra Singh Rawat)མཆོག་གི་སར་ཆེད་བཅར་གྱིས། ཏོག་དབྱིབས་ནད་ཡམས་ཀྱི་རྐྱེན་པས་ནད་མནར་དང་འཚོ་བ་དཀའ་སྡུག་འོག་ཡོད་པའི་མི་མང་གི་ཆེད་དུ་ཧིན་སྒོར་འབུམ་ ༥ ཞལ་འདེབས་སུ་ཕུལ་ཡོད་པ་དང་། དེ་བཞིན་འབྲི་གུང་བཀའ་བརྒྱུད་གཙུག་ལག་སློབ་གཉེར་ཁང་གི་ལས་སློབ་རྣམས་ཀྱིས་རང་རང་གི་ལྷག་བསམ་དང་ཕྱར་གྲུ་མཉམ་འདེགས་མཚོན་སླད། ཉེ་འཁོར་གྱི་ཡུལ་མི་དཀའ་ངལ་ཅན་རྣམས་ལ་ཁྱོན་ཧིན་སྒོར་༢༤༤༠༡༧ ཞལ་འདེབས་སུ་གནང་ཡོད་པ་དང་སྦྲགས། ད་ཆར་ཛ་དྲག་གི་ནད་ཡམས་འདིས་མནར་བའི་སྐྱེ་བོ་ཀུན་གཉན་འཕྲང་གི་དུས་ངན་འདི་ལས་མྱུར་དུ་ཐར་བ་དང་། དེའི་ཆེད་དུ་ཉིན་མཚན་ལྟོས་མེད་དུ་ཕྱག་ལས་གནང་བཞིན་པ་ཐམས་ཅད་ལ་ཐུགས་རྗེ་ཆེ་ཞུས་འདུགདེ་བཞིན་འབྲེལ་ཡོད་ནས་འདི་གར་གནས་ཚུལ་མཁོ་གཏོང་གནང་བ་ལྟར་ན། རྡོར་གདན་བཀའ་བརྒྱུད་སྨོན་ལམ་ཆེན་མོའི་ཐེབས་རྩ་ཚོགས་པའི་(Kagyupa International Monlam Trust )སྤྱི་ལས་ཁང་གིས། ཟླ་འདིའི་ཕྱི་ཚེས་ ༤ ཉིན་རྒྱ་གར་གྱི་སྲིད་བློན་མུ་དྷི་མཆོག་གི་ངལ་སེལ་ཐེབས་རྩར་(PM Cares)ཧིན་སྒོར་འབུམ་ལྔ་ཕུལ་ཡོད་པ་དང་། ཟླ་འདིའི་ཕྱི་ཚེས་ ༢ ཉིན། བྷི་ཧར་མངའ་སྡེའི་སྤྱི་ཁྱབ་བློན་ཆེན་Shri Nitish Kumar མཆོག་གི་ངལ་སེལ་ཐེབས་རྩ་བརྒྱུད་དེ་ཧིན་སྒོར་འབུམ་ལྔ་གནང་ཡོད་འདུགགཞན་ཡང་། ཟླ་འདིའི་ཕྱི་ཚེས་ ༥ ཉིན་༸ས་སྐྱ་ཁྲི་འཛིན་རཏྣ་བཛྲ་རིན་པོ་ཆེ་མཆོག་ནས་ཨུ་ཌར་ཁན་མངའ་སྡེའི་སྤྱི་ཁྱབ་བློན་ཆེན་མཆོག་གི་ངལ་སེལ་ཐེབས་རྩར་ཧིན་སྒོར་འབུམ་ ༣ ཞལ་འདེབས་གནང་ཡོད་འདུག་ལ། དེ་བཞིན་དཔལ་ས་སྐྱ་སྒྲོལ་མ་ཕོ་བྲང་ནས་ཧིན་སྒོར་འབུམ་ ༣ དང་།དངོར་དཔལ་ཨི་ཝམ་ཆོས་ལྡན་ནས་ཧིན་སྒོར་འབུམ་ ༣། ས་སྐྱ་མཐོ་སློབ་ཀྱིས་ཧིན་སྒོར་འབུམ་ ༣། གཞན་ཡང་ས་སྐྱ་སྨོན་ལམ་ཆེན་མོ་ཐེབས་རྩ་ནས་ཧིན་སྒོར་འབུམ་ ༥ དང་། ས་སྐྱ་བཙུན་དགོན་ནས་ཧིན་སྒོར་འབུམ་ ༣། ས་སྐྱ་ལྟེ་གནས་ཁང་ནས་ཧིན་སྒོར་འབུམ་ ༣ བཅས་ཁྱོན་བསྡོམས་མངའ་སྡེའི་སྤྱི་ཁྱབ་བློན་ཆེན་མཆོག་གི་ངལ་སེལ་ཐེབས་རྩར་ཧིན་སྒོར་འབུམ་ ༢༣ ཞལ་འདེབས་སུ་གནང་ཡོད་འདུག༧སྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེ་མཆོག་ནས་རྒྱ་གར་གྱི་ཡུལ་མི་ཉམ་ཐག་མང་པོའི་ཛ་དྲག་གི་གནས་སྟངས་ལ་གདུང་སེམས་མཉམ་སྐྱེད་དང་། དཀའ་ངལ་སེལ་ཆེད་སྲིད་བློན་མཆོག་གི་ངལ་སེལ་ཐེབས་རྩར་ཧིན་སྒོར་འབུམ་ ༡༠ རོགས་དངུལ་གནང་འདུག

གསར་འགོད་པ། པ་སངས་ཚེ་རིང་།