མགོན་པོ་བོད་རིགས་དྲག་རྩལ་ཁང་གི་དྲག་རྩལ་བ་བསོད་ནམས་དར་རྒྱས་ལགས་ཨ་རིའི་རྒྱལ་སྤྱིའི་སྣ་འཛོམས་དྲག་རྩལ་འགྲན་སྡུར་ཁྲོད་འགྲན་ཡ་ལས་རྣམ་པར་རྒྱལ་ཡོད་འདུག
ཟླ་འདིའི་ཕྱི་ཚེས་ ༢༨ ཉིན་ཨ་རིའི་གྲོང་ཁྱེར་ལཱ་སི་ཝི་གྷ་སིའི་ནང་བསྡུས་པའི་རྒྱལ་སྤྱིའི་སྣ་འཛོམས་དྲག་རྩལ་འགྲན་སྡུར་སྟེང་། བོད་རིགས་དྲག་རྩལ་བ་བསོད་ནམས་དར་རྒྱས་ལགས་ཀྱིས། ཁ་ན་ཌའི་དྲག་རྩལ་བ་མལ་ཁཱོམ་གྷོ་ཌོན་(Malcom Gordon) ལགས་གཉིས་བར་དྲག་རྩལ་འགྲན་བསྡུར་བྱས་ཏེ། ཐོག་མའི་འགྲན་ཐུན་དུས་ཡུན་སྐར་ཆ་ ༤༤ ལས་མ་འགོར་བར་བསོད་ནམས་དར་རྒྱས་ལ་རྒྱལ་ཁ་ཐོབ་ཡོད་པ་དང་། བསོད་ནམས་དར་རྒྱས་ལགས་ནི་རྒྱལ་སྤྱིའི་སྣ་འཛོམས་དྲག་རྩལ་འགྲན་བསྡུར་ཁྲོད་ཀྱི་ལྗིད་ཚད་པོནྜ་(Pound) ༡༠༦ ནས་ ༡༡༢ བར་གྱི་ (Flyweight) འགྲན་རྩོད་རིམ་པའི་ཁྲོད་རྒྱལ་ཁ་ཐོབ་སྟེ། ཐེངས་འདིའི་སྣ་འཛོམས་དྲག་རྩལ་འགྲན་བསྡུར་གྱི་སྡིངས་ཆའི་སྟེང་བསླེབས་པ་ཞིག་ཡིན་འདུག་ལ། ཁོང་ནི་རྒྱལ་སྤྱིའི་སྣ་འཛོམས་དྲག་རྩལ་འགྲན་བསྡུར་ཁང་དུ་ཚུད་པའི་བོད་རིགས་དྲག་རྩལ་བ་ཐོག་མ་དེ་ཆགས་ཡོད་པ་རེད།
དྲག་རྩལ་འགྲན་སྡུར་གྱི་སྡིངས་ཆའི་ཁྲོད་བསོད་ནམས་དར་རྒྱས་ལགས་དྲག་རྩལ་འགྲན་སྡུར་ཁྲོད་ཁོང་གི་རྐང་ལག་མྱུར་བ་དང་འབུར་དུ་ཐོན་པའི་རྩལ་སྣ་འཛོམས་ཡོད་པར་བརྟེན། ཁོང་གི་མིང་ལ་བོད་ཀྱི་གླག་རྒོད་ཅེས་འབོད་ཀྱི་འདུག་ལ། རང་ལོ་ ༢༤ ཡིན་པའི་བསོད་ནམས་དར་རྒྱས་ལགས་ཀྱིས། ངས་འགྲན་བསྡུར་འདི་འགྲན་ཐུན་གཉིས་པར་འགྲོ་རུ་འཇུག་རྩིས་མེད་སྟབས་མགྱོགས་པོར་མཇུག་བསྡུས་པ་ཡིན། དེ་ནི་ངའི་འཆར་གཞི་ཡང་ཡིན། དེ་རིང་གི་འགྲན་སྡུར་ཐོག་ངས་རང་ཉིད་ཀྱི་རྩལ་ཡོད་ཚད་བསྟན་མེད་པས། ངས་ཟླ་རྗེས་མའི་ནང་སླར་ཡང་འགྲན་སྡུར་བྱ་རྒྱུ་ཡིན་པ་མ་ཟད། རྒྱལ་སྤྱིའི་ཨང་རིམ་ ༡༥ ནང་ཚུད་ཀྱི་འགྲན་ཡ་སྤུས་ལེགས་ཤིག་ལ་དྲག་རྩལ་འགྲན་རྒྱུ་ཡིན། ཞེས་བརྗོད་འདུག
ཐེངས་འདིའི་འགྲར་སྡུར་ཁྲོད་བསོད་ནམས་དར་རྒྱས་ལགས་ཀྱིས་རང་ཉིད་ཀྱི་འགྲན་ཡ་དུས་ཡུན་སྐར་ཆ་ ༤༤ ནང་ཚུད་དུ་ཕམ་པར་བཏང་བར་བརྟེན། དེ་ནི་སྣ་འཛོམས་དྲག་རྩལ་གྱི་ (flyweight) ཁྱབ་ཁོངས་ཀྱི་ཆེས་མགྱོགས་མྱུར་ངང་འགྲན་ཡ་ཕམ་པར་བཏང་བའི་ཨང་རིམ་གསུམ་པ་དེ་ཆགས་ཡོད་སྟབས། རྒྱལ་སྤྱིའི་སྣ་འཛོམས་དྲག་རྩལ་འགྲན་སྡུར་ཁང་གིས། བསོད་ནམས་དར་རྒྱས་ལགས་སུ་རྒྱལ་རྟགས་སྐེ་རགས་དང་དམིགས་བསལ་བྱ་དགའ་ཨ་སྒོར་ཁྲི་ ༥ བཅས་གནང་ཡོད་འདུག
བསོད་ནམས་དར་རྒྱས་ལགས་ཐེངས་འདིའི་རྒྱལ་སྤྱིའི་དྲག་རྩལ་འགྲན་བསྡུར་ནང་ཞུགས་པར་བོད་ཕྱི་ནང་གཉིས་ཀྱི་བོད་མི་ཚོས་དགའ་བསུ་ཆེན་པོ་བྱེད་ཀྱི་ཡོད་པ་དང་། དམིགས་བསལ་ཁོང་ཕྱིར་བོད་ནང་དུ་ལོག་རྗེས། སི་ཁྲོན་ཁྲིན་ཏུའུ་ན་ཡོད་པའི་ཁོང་གི་མགོན་པོ་དྲག་རྩལ་ཁང་གི་དབུ་འཛིན་མགོན་པོ་ལགས་བཅས་དགེ་ལས་སློབ་ཕྲུག་ཚོ་དང་། ཁོང་གི་ཕ་ཡུལ་གྱི་ཕ་མ་གཉེན་ཉེ་སོགས་ཕེབས་བསུར་ཡོང་སྟེ་བོད་ལུགས་ལྟར་ཁ་བཏགས་འཐེན་བཞིན་པའི་བརྙན་ཐུང་དྲ་ལམ་དུ་སྤེལ་ཏེ་ཡི་རང་བསྔགས་བརྗོད་ཤུགས་ཆེན་པོ་གནང་བཞིན་འདུག
བསོད་ནམས་དར་རྒྱས་ལགས་ནི་རྒྱ་ནག་གིས་བཅད་བགོས་བྱས་པའི་རྔ་བ་ཁུལ་ཁྲོ་ཆུ་རྫོང་ཁོངས་ནས་ཡིན་ཞིང་། ཆུང་དུས་ནས་སི་ཁྲོན་ཁྲིན་ཏུའུ་རུ་ཡོད་པའི་བོད་རིགས་དྲག་རྩལ་བ་མགོན་པོ་ལགས་ཀྱིས་དྲག་རྩལ་ཁང་དུ་ཞུགས་ཏེ་དྲག་རྩལ་སྦྱངས་ཡོད་འདུག ཕྱི་ལོ་ ༢༠༡༦ བར་ཁོང་གིས་རྒྱ་ནག་གི་དྲག་རྩལ་འགྲན་སྡུར་མང་པོའི་ཐོག་རྒྱལ་ཁ་བླངས་ཡོད་པ་དང་། དེའི་རྗེས་རྒྱལ་སྤྱིའི་རིམ་པའི་དྲག་རྩལ་འགྲན་སྡུར་ཁྲོད་ཞུགས་ཏེ། ཕྱི་ལོ་ ༢༠༡༨ ལོ་ནས་ཨ་རིའི་རྒྱལ་སྤྱིའི་སྣ་འཛོམས་དྲག་རྩལ་འགྲན་སྡུར་ཁང་གི་འགྲན་ཁོངས་སུ་ཞུགས་ཡོད་པ་དང་། ཕྱི་ལོ་ ༢༠༡༩ ལོར་རྒྱལ་སྤྱིའི་སྣ་འཛོམས་དྲག་རྩལ་འགྲན་སྡུར་གྱི་ལྗིད་ཚད་པོནྜ་ ༡༢༦ ནས་ ༡༣༥ བར་ཡིན་པའི་ (Bantamweight) ཁྱབ་ཁོངས་ནས་ཨ་རིའི་དྲག་རྩལ་བ་ཨན་ཌིར་(Andre Soukhamthath)དང་འགྲར་བསྡུར་བྱས་ཏེ་རྒྱལ་ཁ་བླངས་ཡོད་འདུག
ད་ལྟའི་ཆར་རྒྱལ་སྤྱིའི་སྣ་འཛོམས་དྲག་རྩལ་འགྲན་བསྡུར་ཁང་ལ་འཛམ་གླིང་རྒྱལ་ཁབ་ ༧༡ ནང་བུ་དྲག་རྩལ་པ་བུ་ ༨༡༩ དང་ བུད་མེད་དྲག་རྩལ་པ་ ༡༤༦ བཅས་ཁྱོན་དྲག་རྩལ་པ་ ༩༦༥ འདུག་ལ། རྒྱལ་སྤྱིའི་སྣ་འཛོམས་དྲག་རྩལ་འགྲན་བསྡུར་ཁང་ཕྱི་ལོ་ ༡༩༩༣ ལོར་གསར་འཛུགས་བྱུང་སྟེ། ད་སྔ་བར་འཛམ་གླིང་རྒྱལ་ཁབ་འདྲ་མིན་ནང་དྲག་རྩལ་འགྲན་བསྡུར་གྱི་བྱེད་སྒོ་ཁྱོན་ ༥༠༠ ལྷག་སྤེལ་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
ཕོ་རྒོད་པོ་་་བོད་ཀྱི་ཕོ་རྒོད་་་་བོད་ཀྱི་སྤོ་པ་་་ཨ་མདོའི་ཕོ་རྒོད་་་་་ང་ཚོའི་སྤོ་པ་་་་་བོད་ཀྱོ་ཕོ་རྒོད་་་་རྒྱལ་གྱུར་གཅིག་་་དཀོན་མཆོག་མཁྱེནནནནནནནནནནནནནནནནནནནནནན