རྒྱ་ནག་གཞུང་གིས་ཡེ་ཤུ་ཆོས་པ་ ༧༦ ལ་ཁྲིམས་ཐག་བཅད།

རྒྱ་ནག་གཞུང་གིས་འདི་ལོའི་ཕྱི་ཟླ་ ༦ ནས་ ༩ བར་རྒྱ་ནག་ཀྲའེ་ཅང་ཞིང་ཆེན་ནང་ཡེ་ཤུ་ཆོས་ལུགས་ཀྱི་ཆོས་དཔོན་དང་ཆོས་བྱེད་པ་ ༧༦ ལ་ཁྲིམས་ཐག་བཅད་ཡོད་འདུགཁ་སང་རྒྱ་ནག་ནང་གི་ཆོས་དད་རང་དབང་དང་འགྲོ་བ་མིའི་ཐོབ་ཐང་སྐོར་གྱི་གསར་ཁང་ (Bitter Winter) གིས་སྤེལ་བའི་གནས་ཚུལ་ནང་། འདི་ལོའི་ཕྱི་ཟླ་ ༦ ནས་ ༩ བར་རྒྱ་ནག་གཞུང་གིས་རྒྱ་ནག་ཀྲའེ་ཅང་ཞིང་ཆེན་ནང་ཡེ་ཤུ་ཆོས་ལུགས་ཀྱི་ཆོས་དཔོན་དང་རྗེས་འབྲང་པ་ ༧༦ ལ་བསམ་སྦྱོར་ངན་པའི་ལྟ་གྲུབ་ཚར་གཅོད་ཟེར་བའི་མིང་འོག་བཙོན་འཇུག་ཁྲིམས་ཐག་བཅད་ཡོད་པ་དང་། དེའི་ཁྲོད་ཀྱི་ལོ་ན་ཆུང་ཤོས་ ༡༩ ཅན་གྱི་བུ་མོ་ཞིག་ལ་ལོ་ ༣ བཙོན་འཇུག་ཁྲིམས་ཆད་དང་རྒྱ་སྒོར་ ༡༥༠༠༠ ཡི་ཉེས་ཆད་བཅད་ཡོད་འདུག

དེ་འབྲེལ་གྱི་ཞིབ་ཕྲའི་གནས་ཚུལ་ནང་། འདི་ལོའི་ཕྱི་ཟླ་ ༩ ཚེས་ ༢༩ ཉིན་རྒྱ་ནག་ཀྲེ་ཅང་གི་རྫོང་རིམ་པའི་ཁྲིམས་ཁང་གསུམ་གྱིས་ཡེ་ཤུ་ཆོས་ལུགས་ཀྱི་རྗེས་འབྲང་པ་ ༤༩ ལ་ཁྲིམས་ཐག་བཅད་ཡོད་པ་དང་། ཕྱི་ཟླ་ ༨ ནང་ཀྲའེ་ཅང་གི་པའེ་ཀྲན་(Beichen)རྫོང་ཁྲིམས་ཁང་གིས་མི་ ༡༢ ཁྲིམས་ཐག་བཅད་པ་དང་། ཧྲའེ་པའེ་རྫོང་རིམ་པའི་ཁྲིམས་ཁང་གིས་མི་གྲངས་ ༢༡ ལ་ཁྲིམས་ཐག་བཅད་ཡོད་འདུག རྒྱ་ནག་གཞུང་གིས་སྔ་ཕྱིར་འཛིན་བཟུང་བྱས་པའི་བཙོན་མ་རྣམས་ཀྱི་བཙོན་འཇུག་གི་དུས་ཡུན་དང་ས་གནས་གང་དུ་བཙོན་འཇུག་བྱས་ཡོད་སྐོར་གྱི་གནས་ཚུལ་ཚང་མ་གསང་རྒྱའི་འོག་བཞག་སྟེ། ད་ལྟ་ཁོ་ཚོའི་ནང་མི་ཚོས་ཀྱང་གནས་ཚུལ་ཤེས་རྟོགས་ཐུབ་ཀྱི་མེད་སྐོར་སོགས་བརྗོད་འདུག་ལ། འཛིན་བཟུང་བྱས་པའི་ཡེ་ཤུ་ཆོས་ལུགས་པ་ཕལ་ཆེ་བ་ཕྱི་ལོ་ ༢༠༡༨ ལོ་ནས་འཛིན་བཟུང་བྱས་ཏེ་འདྲི་རྩད་བཀག་ཉར་འོག་བཞག་ཡོད་འདུག

དཀོན་མཆོག་གི་ལྷ་ཁང་ (CAG, Church of Almighty God) ཞེས་པ་ནི་རྒྱ་ནག་ནང་ཡེ་ཤུ་ཆོས་ལུགས་སྤེལ་མཁན་གྱི་ཚོགས་སྡེ་ཆེ་ཤོས་དེ་ཡིན་པ་ལྟར། ད་རེས་ཁྲིམས་ཐག་བཅད་པའི་ཡེ་ཤུ་བ་ཚང་མ་ལྷ་ཁང་དེའི་འབྲེལ་ཡོད་རྐྱང་རྐྱང་ཆགས་ཡོད་པ་དང་། བསམ་སྦྱོར་ངན་པའི་ལྟ་གྲུབ་ཚར་གཅོད་དགོས་སྐོར་བརྗོད་དེ། འདས་ལོར་ཀྲའེ་ཅང་དུ་རྒྱ་ནག་གིས་ལྷ་ཁང་དེའི་ཁོངས་གཏོགས་ཆོས་པ་ ༡༧ དང་ནང་སོག་གི་ ༧ འཛིན་བཟུང་བྱས་ཡོད་འདུག་ལ། ཕྱི་ལོ་ ༢༠༡༩ ལོར་རྒྱ་ནག་གིས་ཅང་སུའུ་ཞིང་ཆེན་གྱི་ (Lianyungang)དང་ (Suqian) གྲོང་ཁྱེར་གཉིས་ནང་ཡེ་ཤུ་ཆོས་ཁང་ ༧༠ ལྷག་གཏོར་བཤིག་བཏང་བ་དང་། རྒྱ་ནག་རྒྱལ་ཡོངས་སུ་བསམ་སྦྱོར་ངན་པའི་ལྟ་གྲུབ་ཚར་གཅོད་ཀྱི་མིང་བྱང་འོག་ཡེ་ཤུ་ལྷ་ཁང་ཁག་གི་མཚོན་རྟགས་རྒྱངས་ཤིང་དང་དུར་རྡོ་གྲངས་ལས་འདས་པ་རྩ་མེད་དུ་བཏང་ཡོད་འདུགཡང་རྒྱ་ནག་གི་རྩ་ཁྲིམས་ནང་ཆོས་ལུགས་རང་དབང་ཡོད་ཅེས་བརྗོད་ཡོད་ནའང་། ཞི་ཅིན་ཕིན་རྒྱ་ནག་གི་སྲིད་འཛིན་ཆགས་པ་ནས་བཟུང་ཆོས་ལུགས་རང་དབང་ནི་དམར་ཤོག་ཚོགས་པའི་འགོག་རྐྱེན་ཞིག་ཏུ་ངོས་འཛིན་བྱས་ཏེ་ཆོས་ལུགས་ཐོག་དམ་དྲག་ཇེ་ཆེར་བཏང་བ་དང་། ཕྱི་ལོ་ ༢༠༡༨ ལོའི་ཟླ་ ༡༢ ནང་སི་ཁྲོན་ཞིང་ཆེན་ཁྲིན་ཏུའུ་གྲོང་ཁྱེར་འབྲིང་རིམ་མི་མང་ཁྲིམས་ཁང་ཟེར་བས། ཁྲིན་ཏུའུ་(Chengdu)གྲོང་ཁྱེར་ནང་རྟེན་གཞི་བྱས་པའི་ཡེ་ཤུ་ཆོས་དཔོན་ཝང་ཡེ་(Wang Yi)ལ། རྒྱལ་ཁབ་མགོ་རྟིང་སློག་རྩིས་བྱས་པའི་ཉེས་མིང་འོག ལོ་ ༩ ཡི་བཙོན་འཇུག་ཁྲིམས་ཐག་དང་ལོ་ ༣ ཀྱི་ཆབ་སྲིད་ཐོབ་ཐང་མེད་པ་བྱས་ཡོད་པ་དང་། དེ་བཞིན་པེ་ཅིན་དུ་ཡོད་པའི་(Zion)ལྷ་ཁང་དང་ཀོང་ཀྲུའུ་གྲོང་ཁྱེར་དུ་ཡོད་པའི་(Rongguili)ལྷ་ཁང་སོགས་ཡེ་ཤུ་ཆོས་ཕྱོགས་ཀྱི་བྱེད་སྒོ་སྤེལ་སའི་ལྷ་ཁང་མང་པོ་ཞིག་སྒོ་བརྒྱབ་བཅུག་ཡོད་འདུག་ལ། སྐབས་དེར་ཉམས་ཞིབ་པ་མང་པོས་རྒྱ་ནག་ནང་ཡེ་ཤུ་ཆོས་ལུགས་དར་ཁྱབ་འབྱུང་བཞིན་པར་རྒྱ་ནག་གཞུང་ནས་དོགས་ཟོན་དང་འཇིགས་སྣང་བྱེད་ཀྱི་ཡོད་སྐོར་བརྗོད་ཀྱི་ཡོད་པ་རེད།

རྒྱ་ནག་གཞུང་གིས་རྒྱ་ནག་ནང་ཡེ་ཤུ་ཆོས་ལུགས་པ་ས་ཡ་ ༤༤ ཡོད་སྐོར་བསྒྲགས་ཡོད་ཀྱང་། ཨ་རིའི་པཱོར་ཌའོ་གཙུག་ལག་སློབ་གྲྭ་ཆེན་མོའི་ (purdue university) སྤྱི་ཚོགས་རིག་གནས་པ་(Fenggang Yang) ལགས་ཀྱིས། རྒྱ་ནག་ནང་ཡེ་ཤུ་ཆོས་ལུགས་བྱེད་མཁན་མི་གྲངས་ས་ཡ་ ༡༠༠ བརྒལ་ཡོད་པ་དང་།   མི་གྲངས་ས་ཡ་ ༣༦ གིས་རྒྱ་ནག་གཞུང་གི་སྟངས་འཛིན་འོག་མངོན་མེད་ཀྱི་ཐོག་ནས་ཡེ་ཤུ་ཆོས་ལུགས་ཉམས་ལེན་བྱེད་ཀྱི་ཡོད་པ་དང་། ཕྱི་ལོ་ ༢༠༣༠ ལོར་རྒྱ་ནག་ནང་ཡེ་ཤུ་བ་མི་གྲངས་ས་ཡ་ ༢༥༠ ཙམ་ལ་ཟིན་སྲིད་པའི་ཚོད་དཔག་བྱས་འདུག

གསར་འགོད་པ། སྐལ་བཟང་སྦྱིན་པ།