དེ་རིང་རྒྱ་གར་གྱི་གསར་ཁང་ཁག་གིས་གནས་ཚུལ་སྤེལ་བ་ལྟར་ན། རྒྱ་གར་གྱི་ལྷོ་ཤར་ཨན་དྷ་ར་མངའ་སྡེའི་གྷོ་དྷ་ཝ་རི་ (Godavari, Andhra Pradesh) རྫོང་ཁོངས་ཨི་ལུ་རུ་ (Eluru) གྲོང་ཁྱེར་ནང་ཁེ་ཉིན་ཕྱི་ཚེས་ ༥ ཉིན་ནས་མི་གྲངས་ ༣༠༠ ལྷག་ལ་རྒྱུ་རྐྱེན་གང་ཡིན་མི་ཤེས་པའི་ནད་གཞི་ཡ་མཚན་ཞིག་ཕོག་སྟེ། ཁ་སང་ནད་པ་ ༡ འདས་གྲོངས་དང་གཞན་རྣམས་ལ་སྨན་བཅོས་བྱེད་མུས་ཡིན་འདུག
ཨན་དྷ་ར་མངའ་སྡེའི་འཕྲོད་བསྟེན་བློན་ཆེན་ཀི་རི་ཤི་ན་སི་རི་ནི་ཝི་སི་ (Alla Kali Krishna Srinivas) ལགས་ཀྱིས། འབྲེལ་ཡོད་གཞུང་འབྲེལ་མི་སྣ་རྣམས་ནད་གཞི་ཐོན་སའི་ཡུལ་དངོས་ལ་བཅར་ཏེ་རྟོག་ཞིབ་བྱས་རྗེས། ད་ལན་གྱི་ནད་གཞི་དེ་འཐུང་ཆུ་དང་མཁའ་དབུགས་འབག་བཙོག་གི་རྐྱེན་པས་བྱུང་མེད་པ་ཤེས་རྟོགས་ཐུབ་ཡོད་པ་དང་། ནད་པའི་ཁྲག་གི་མ་དཔེ་རྣམས་བརྟག་དཔྱད་ཁང་དུ་བཏང་ཡོད་ཅིང་། ད་ལྟའི་ཆར་ནད་གཞི་དེ་གཉན་སྲིན་གྱི་འགོས་ནད་ཅིག་ཡིན་པའང་ཤེས་རྟོགས་ཐུབ་མེད་སྟབས། ཡ་མཚན་ཅན་གྱི་ནད་གཞི་དེ་བརྟག་དཔྱད་ཁང་དུ་ཞིབ་འཇུག་མཐིལ་ཕྱིན་བྱས་རྗེས་མ་གཏོགས་ཤེས་ཐབས་མེད། ཅེས་བརྗོད་ཡོད་འདུག
ས་གནས་ཀྱི་འཕྲོད་བསྟེན་མི་སྣས་འགྲེལ་བརྗོད་བྱས་པ་ལྟར་ན། ནད་གཞི་ཕོག་པའི་ནད་པའི་ཁྲོད། མིག་ཚ་ནས་གློ་བུར་དུ་སྐྱུག་པ་སྐྱུག་པ་དང་། ཡང་རེ་འགར་ཞེ་མེར་ལངས་ཏེ་དྲན་པ་ཐོར་བའམ་མགོ་ཡུ་འཁོར་བ་སོགས་ཀྱི་ནད་རྟགས་ཐོན་ཡོད་འདུག ཁ་སང་དགོང་མོར་ཁྱོན་ནད་པ་ ༣༠༠ ཁྲོད་ནས་ ༡༢༥ ལྷག་དྲག་སྐྱེད་བྱུང་སྟེ་རང་ཁྱིམ་དུ་ལོག་ཡོད་ཅིང་། གཞན་རྣམས་ལ་མུ་མཐུད་སྨན་བཅོས་བྱེད་མུས་ཡིན་འདུག
ད་ཐེངས་ཀྱི་ནད་གཞི་དེ་ཏོག་དབྱིབས་གཉན་རིམས་ཡིན་མིན་བརྟག་དཔྱད་བྱེད་སྐབས། ནད་པ་ཚང་མར་ཏོག་དབྱིབས་གཉན་རིམས་འགོས་མེད་པ་ཤེས་རྟོགས་བྱུང་ཡོད་ལ། མངའ་སྡེ་གཞུང་གིས་ས་གནས་ལ་ཆེད་མཁས་མི་སྣ་མངགས་གཏོང་གིས་ནད་གཞིར་བརྟག་དཔྱད་བྱེད་དུ་བཅུག་འདུག་པ་མ་ཟད། ས་གནས་ཀྱི་འཐུང་ཆུ་ཙམ་དུ་མ་ཟད་འོ་མའི་ཐོན་སྐྱེད་བཅས་ལའང་ཞིབ་འཇུག་བྱས་ཡོད་འདུག ཨན་དྷ་ར་མངའ་སྡེ་ནི་རྒྱ་གར་གྱི་མངའ་སྡེའི་ཁྲོད་ནས། ཏོག་དབྱིབས་གཉན་རིམས་ཀྱིས་དོ་ཕོག་ཆེ་ཤོས་ཐེབས་པའི་མངའ་སྡེའི་གྲས་ཤིག་ཡིན་ལ། ད་བར་མངའ་སྡེ་དེ་གཅིག་པུའི་ནང་ཁྱོན་ཏོག་དབྱིབས་ནད་པ་ཁྲི་ ༩ མ་ཟིན་ཙམ་ཞིག་ཐོན་ཡོད་འདུག
གསར་འགོད་པ། པ་སངས་ཚེ་རིང་།
