བློ་གྲོས་འོད་གསལ།
སྤྱིར་བཙན་བྱོལ་བོད་མིའི་མང་གཙོ་ནི་སྲིད་དོན་ཤོགས་ཚོགས་མེད་པའི་ལམ་ལུགས་ཤིག་ཡིན་ནའང་། དོན་ལ་ཕྱོགས་ཁག་ཆེ་ཤོས་གཉིས་ཏེ། ཚོགས་པ་བཅུ་གསུམ་གྱི་ལྷག་འཕྲོ་འཇུ་ཆེན་དང་འབྲེལ་ནས་ཆུ་སྒང་རྙིང་པའི་ཕྱོགས་གཏོགས་དང་། ཆིག་སྒྲིལ་ཚོགས་པའི་རྗེས་ཤུལ་ཟམ་གདོང་ལ་བརྟེན་པའི་ཕྱོགས་གཏོགས་བཅས་ཤོགས་ཁག་ཆེ་ཤོས་གཉིས་ཆགས་ཡོད།
དེ་གཉིས་ཀྱིས་ད་བར་ཆོལ་ཁ་དང་ཆོས་བརྒྱུད། རང་བཙན་དང་དབུ་མ་བཅས་ཀྱི་ཡོལ་བའི་རྒྱབ་ལོག་ནས་བཙན་བྱོལ་བོད་མིའི་ཆོས་སྲིད་གཉིས་ཆར་བྱུས་གཏོགས་དང་སྤྱི་དོན་སྒེར་དོན་གཉིས་ཆར་ཕན་གནོད་ཀྱི་ལས་ཀ་སྣ་ཚོགས་བྱས་ཡོད། མི་མང་ཤོས་ཀྱིས་མིག་ལ་མཐོང་བའི་འཁྲབ་སྟོན་ཙམ་ལས་ཡོལ་བའི་རྒྱབ་ཀྱི་འཁྲབ་གཞུང་མཐོང་གི་མེད་ལ། གློག་བརྙན་ནང་གི་དཔའ་བོ་དེ་དཔའ་བོ་དངོས་ཡིན་པར་འཁྲུལ་ནས་ཡིད་ཆེས་དང་རེ་བ་ཞིག་གིས་རྗེས་འབྲང་དང་ཞབས་ཕྱི་ཞུ་བཞིན་པ་འདི་ཡིན།
ད་ཐེང་གི་འོས་བསྡུའི་ཤུགས་རྐྱེན་ཆེ་ཆུང་དང་འགྲན་སྡུར་མཁན་ཡང་ཤོག་ཁག་དེ་གཉིས་གཙོ་བོ་ཡིན། དབུས་འོས་བསྡུ་ལས་ཁུངས་ཀྱིས་དངོས་གཞི་ལ་མི་འགྲོ་གཉིས་ལས་མེད་པ་གསལ་བོར་བཟོས་རྗེས་གོང་གསལ་ཕྱོགས་གཏོགས་པའི་མི་འགྲོ་ཡང་གཏན་ཁེལ་མི་བྱེད་རང་བྱེད་རེད།
ལོ་ངོ་བཅུ་ཕྲག་ལྷག་གི་སྔོན་ལ་ཟམ་གདོང་ཕྱོགས་གཏོགས་ཤུགས་ཆེན་པོ་ཡོད་ནའང་། འཇུ་ཆེན་མི་ཡུལ་ནས་འདས་རྗེས་བློ་བཟང་སེངྒེས་ཐབས་རྒྱ་ཇུས་སྟོང་གིས་འཇུ་ཆེན་གྱི་ཁ་གཏད་དང་། ཟམ་གདོང་གི་ཕྱོགས་གཏོགས་གལ་ཆེ་ཤོས། དེ་སྔའི་ཆིག་སྒྲིལ་ཚོགས་པ་གསར་འཛུགས་མཁན་དང་ཚོགས་པ་བཅུ་གསུམ་གྱི་ཁ་གཏད་པ་རྒྱ་རི་ཉི་མའི་ཁྱིམ་རྒྱུད་རྒྱ་རི་ཚང་གི་ལྟ་བ་ལང་ཕྱོགས་ཡོངས་རྫོགས་བསྒྱུར། མངའ་རིས་དང་སྟོད་པའི་སྤྱི་ཚོགས་ནང་ཤུགས་རྐྱེན་ངེས་ཅན་སྤེལ་སྟེ། འཇུ་ཆེན་ཕྱོགས་གཏོགས་ཀྱི་དར་ཆ་བསྒྲངས་ནས་ལོ་ངོ་བཅུའི་རིང་བཙན་བྱོལ་གཞུང་བཟུང་ཐུབ་པ་མ་ཟད། འཇུ་ཆེན་ཕྱོགས་གཏོགས་ཀྱི་མགོ་ཁྲིད་བྱེད་པར་དང་བླངས་ཐོན་ཡོད། དེ་ལ་འཇུ་ཆེན་ཕྱོགས་གཏོགས་མང་པོ་ཞིག་རྩ་བ་ནས་རྣ་བར་འགྲོ་གི་མེད་ནའང་ཐབས་ཟད་དུ་གྱུར། དེར་བརྟེན་ཕྱོགས་གཏོགས་ཀྱི་དར་ཆ་བསྒྲངས་ནས་སྲིད་སྐྱོང་ལང་མཁན་ཚོས་བློ་བཟང་སེངྒེས་རྒྱབ་སྐྱོར་ཡོད་པ་ངོམ་རེས་བྱེད་བཞིན་པ་འདི་རེད།
འོན་ཀྱང་འཇམ་ནོར་ནི་སྔར་ནས་ད་བར་བློ་སེང་ལ་དགའ་བོ་མེད་པས་སྐལ་རྡོར་ལ་སྐྱོན་བརྗོད་དང་རྒྱ་རི་སྒྲོལ་མར་བསྟོད་སྔགས་ཚད་མེད་བྱས་མོད། ད་རེས་འཇམ་ནོར་གོ་ལོག་ཆེན་པོ་འཐེབ་ནས་དོན་གྱིས་བློ་སེང་ལ་རྒྱབ་སྐྱོར་ལྟ་བུར་གྱུར་ཡོད། བློ་སེང་གི་མངོན་འདོད་ནི་སྐལ་རྡོར་མིན་པར་རྒྱ་རི་སྒྲོལ་མ་བེད་སྤྱོད་གཏོང་རྒྱུ་དེ་རེད། རྒྱ་རི་ཚང་བེད་སྤྱོད་གཏོང་བའི་ཉམས་མྱོང་ཡང་ཡོད། དེར་བརྟེན་འཇམ་ནོར་གྱིས་རྩིས་ལོག་ཆེན་པོ་དེས་བློ་སེང་གི་ལས་དོན་སྟབས་བདེར་བཏང་།
སྔོན་ཆད་བློ་སེང་གིས་ཤར་གླིང་ཟླ་སྒྲོན་བེད་སྤྱོད་བཏང་ནས་སྟོད་པ་དང་མངའ་རིས་ཕྱོགས་ནས་རྒྱལ་ཁ་ཐོབ་པ་བཞིན། ད་རེས་ཤར་གླིང་ཟླ་སྒྲོན་ཡང་སྐྱར་རྒྱ་རི་སྒྲོལ་མར་དམག་རོགས་ལ་བཏང་ཡོད། འཇམ་ནོར་མི་འདོད་བཞིན་དུ་དོན་ལ་བློ་སེང་གི་རྒྱབ་རོགས་སུ་གྱུར།
བློ་སེང་ནི་ཧ་ཅང་མི་ལམ་འགྲོ་ཅན་མོ་སྟོན་ཕག་མགོ་དང་འདྲ། ད་རེའི་ཨ་རི་ལ་འགྲོ་དོན་གལ་ཆེ་བ་ཞིག་ཀྱང་འདི་ཡིན་ཆོག རྒྱུ་མཚན་ཤར་གླིང་ཕྱི་ལ་ཐོན་དུས་བློ་སེང་གིས་གནད་དོན་ཆེན་པོ་ཞིག་སྒྲུབ་བཞིན་པ་སྔ་མའི་ལོ་བཅུའི་ལོ་རྒྱུས་ལས་མཚོན་ཐུབ། ཁོ་ནི་རང་འདོད་ཁོ་ན་མ་གཏོགས་བསམ་འཆར་གཞན་རྣ་བར་མི་ཤོང་པའི་སྲིད་དོན་པ་ངོ་མ་ཞིག་ཡིན་པས། སྐལ་རྡོར་ནི་ལག་ནང་གི་རྡེའུ་ཞིག་ལས་གཞན་གང་ཡང་མིན། དེར་བརྟེན་སྐལ་རྡོར་ནི་མཚོན་མདངས་ཧར་པོའི་དབུགས་ལྒང་ལྟར་ཉིན་ཤས་ཀྱི་ཚེ་ཐག་ལས་མེད་པ་གསལ་བོ་ཡིན། མདོར་ན་གོང་གསལ་ཕྱོགས་གཏོགས་པས་མཐར་རྒྱ་རི་སྒྲོལ་མའི་ཕྱོགས་ལ་ཁ་མ་མཐུན་རང་མཐུན་རེད་ལ་མཐུན་ངེས་ཀྱང་རེད།
ཟམ་གདོང་ཕྱོགས་གཏོགས་པར་མཚོན་ན། ཟམ་གདོང་དགོང་ན་མཐོ་བས་ལས་དོན་མང་པོ་ཞིག་འཐུས་ཤོར་འགྲོ་བཞིན་པ་མ་ཟད། དེའི་རྗེས་འཇུག་པ་སྤེན་ཚེ་དང་། འབྲོང་ཆུང་གཉིས་ཀྱིས་རང་རང་གི་གོ་སྐབས་རེ་འཚོལ་བཞིན་པ་ལས་ཕྱོགས་གཏོགས་ཀྱི་གནས་སྟངས་དང་། ཁ་གཏད་ཀྱི་སྐོར་ལ་བསམ་གཞིགས་ཟབ་མོ་བྱེད་ཐུབ་ཀྱི་མེད་ཚོད་སྣང་། དེ་ལ་རྒྱུ་མཚན་གཉིས་ཡོད། གཅིག་ནི་ཟམ་གདོང་གི་ལམ་སྟོན་ཉུང་བ་དང་། གཉིས་ནས་འབྲོང་ཆུང་གིས་བསམ་པར་མི་མང་གིས་རེ་སྐུལ་གྱིས་སྲིད་སྐྱོང་ལ་ལངས་བ་ལས་རང་གི་མངོན་མིན་པའི་ཇོ་བཟང་གི་རྣམ་པ་ཞིག་མངོན་ཆེད་དང་། ལྷག་པར་གནད་ཡོད་མང་པོ་ཞིག་གིས་རེ་སྐུལ་དང་རྒྱབ་སྐྱོར་བྱས་ཙང་འོས་ཐོབ་པར་ཡིད་ཆེས་བྱེད་བཞིན་པར་སྣང་། གལ་ཏེ་མ་ཐོབ་ནའང་མིང་ཆད་ཁུར་མི་དགོས་པ་ཙམ་དུ་བསམ་པར་ཟད།
སྤེན་ཚེ་དང་ཁོ་པའི་རྗེས་འབྲངས་པ་དག་གིས་འབྲོང་ཆུང་གི་རྒྱབ་སྐྱོར་བ་རྣམས་ལ་མ་རངས་པའི་རྣམ་པ་རེ་བཏོན་ཞིང་། སྤེན་ཚེས་རང་ཉིད་དངོས་གཞིར་འགྲོ་ཐུབ་པའི་རེ་བ་བྱེད་བཞིན་པ་རེད། ཁོ་གཉིས་ཀྱིས་གལ་ཏེ་མ་ཐོབ་ཀྱང་མི་སྒེར་གྱི་གནད་དོན་ཞིག་ལས་ཕྱོགས་གཏོགས་ཀྱི་གནད་དོན་ལ་བསམ་བློ་འཁོར་གྱི་མེད་པ་དང་། ཡང་ན་བསམ་བློ་གཏོང་གི་མེད་ཚོད་རེད། ཟམ་གདོང་གིས་ལམ་སྟོན་ཞིག་ངེས་པར་དགོས་ནའང་། ལོ་ནའི་བབ་དང་ཆོས་ཀྱི་སློབ་དཔོན་གྱི་མཚན་གནས་འོག་ནས་ཤོགས་ཁག་ལ་ལམ་སྟོན་བོར་ཟིན་ནམ་ཅི་ཆ། གང་ལྟར་ཟམ་གདོང་ཕྱོགས་གཏོགས་པ་ཕལ་མོ་ཆེས་ཁོ་རང་ཚོའི་ཕྱོགས་གཏོགས་སྐོར་ལ་བསམ་བློ་གཏོང་ཐུབ་ཀྱི་མེད་ཚོད་རེད།
ཁོ་གཉིས་ཆར་རྒྱབ་སྐྱོར་བ་གྲངས་མང་པོ་ཞིག་ཡོད་པར་འདོད་ཀྱང་དོན་ལ་མེད། ཆོལ་ཁའི་ཕྱོགས་ནས་བཤད་ན། མདོ་སྨད་མང་ཆེ་བ་སྤེན་ཚེའི་རྒྱབ་ལ་ལངས་ཡོད། དེ་བཞིན་དབུས་གཙང་ནང་དུ། དབུས་ཁུལ་རང་ནས་འབྲོང་ཆུང་ལ་ཤུགས་ཆེ་བ་ཡོད་ཀྱང་དེ་ནི་མདོ་སྨད་ཀྱི་མི་གྲངས་དང་ཁྱད་པར་ཆེར་མེད། སྟོད་པ་དང་མངའ་རིས་གཙོ་བོ་ཡིན་ཟེར་ཡང་དེའི་ནང་ནས་མང་ཆེ་བས་དེ་སྔོན་བློ་སེང་ལ་རྒྱབ་སྐྱོར་བྱས་པ་བཞིན་ད་རེའི་རྒྱ་རི་སྒྲོལ་མ་ལ་རྒྱབ་སྐྱོར་བྱ་ངེས་རེད། རྒྱུ་མཚན་ནི་དེ་ལ་རིགས་འགའ་ཡོད།འཇམ་ནོར་འུད་སྒྲོགས་ཀྱིས་རང་བཙན་ཕྱོགས་གཏོགས་པ་དང་། རྒྱ་སྒྲོན་རང་གི་ནུས་པས་ཉིན་རེའི་འཚོ་བའི་མཐུན་རྐྱེན་ཙམ་ལ་ལྟ་མཁན། དྲིལ་བསྒྲགས་ཀྱི་ནུས་པས་བུད་མེད་ཀྱི་ཐོབ་ཐང་འདོད་མཁན་སོགས་ཡོད། དེ་དག་གིས་རྒྱ་རི་སྒྲོལ་མར་རྒྱབ་སྐྱོར་ཞུ་ངེས་རེད། མཐར་ཐུག་དུས་འབྲོང་ཆུང་དང་སྤེན་ཚེ་ཁོ་གཉིས་ཀྱི་རྒྱབ་སྐྱོར་བས་ཁོ་གཉིས་ཆུ་ལ་གཡུག་རྒྱུ་ཡིན་མིན་དང་ནུས་པ་མཉམ་དུ་སྤོངས་དགོས་མིན་གདམ་ཀ་རེད། དེ་ལྟར་མ་བྱུང་ཚེ་ཕྱོགས་གཏོགས་ཀྱི་ནུས་པ་ཆུང་དུ་འགྱུར་རྒྱུ་ཉག་གཅིག་རེད།
གལ་དེ་འབྲོང་ཆུང་དང་སྤེན་ཚེ་གཉིས་ཀྱིས་ཕྱོགས་གཏོགས་པ་ཆིག་སྒྲིལ་བཟོ་མ་ཐུབ་ཚེ། ཕྱིའི་རྣམ་པར་རྒྱ་རི་སྒྲོལ་མ་ལ་མཐའ་མའི་རྒྱལ་ཁ་ཐོབ་པ་དང་། དོན་ལ་བློ་སེང་ལ་རྒྱལ་ཁ་ཐོབ་པར་འཇུ་ཆེན་ཀྱི་ཕྱོགས་གཏོགས། ཨོ་སྟོབས་ཀྱི་ཆོས་ཕྱོགས་འབྲེལ་ཐག རང་བཙན་ཁར་འཁྱེར་མཁན་དང་རང་བཙན་ངོ་མ་རྩོད་མཁན། ཁྱིམ་ཚང་ཙམ་ལས་མི་བསམ་མཁན་དག་གིས་ཤུགས་རྒྱག་ངེས་རེད།
མདོར་ན་འབྲོང་ཆུང་གི་རྨི་ལམ་དང་སྤེན་ཚེའི་རེ་བ་གཉིས་ལ་ཕར་རྒྱབ་ཚུར་རྒྱབ་ཀྱི་བར་ཐག་ཡོད་པ་དེས། མཐར་ཁོ་གཉིས་ཀྱི་རྒྱབ་སྐྱོར་བ་ཚོས་གཅིག་གིས་གཅིག་ལ་ལེ་འདེད་ཀྱིས་ཕྱོགས་ཁག་མང་པོར་གྱུར་ནས་ཟམ་གདོང་ཕྱོགས་གཏོགས་ཁ་འཐོར་དགུ་འཐོར་བྱེད་པའི་རྒྱུ་རྐྱེན་དུ་འགྱུར་སྲིད། དེའི་རྗེས་བློ་སེང་ཡང་སྐྱར་མོ་སྟོན་ཕག་མགོར་གྱུར་ནས་མུ་མཐུད་ནས་བཙན་བྱོལ་སྤྱི་ཚོགས་ལ་དབང་སྒྱུར་བྱ་རྒྱུ་བཅས་གངས་ཅན་པའི་ལས་དབང་འདི་ཙམ་དུ་ཟད་པར་སྣང་ངོ་།།
མཆན། གོང་གསལ་བསམ་ཚུལ་རྩོམ་ཡིག་དེ་ནི་རྩོམ་པ་པོའི་དགོངས་ཚུལ་ཡིན་པ་ལས་འདི་ག་གསར་ཁང་གི་ལྟ་བ་ལངས་ཕྱོགས་ཡིན་པས་མ་ཁྱབ།
