བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་ཁ་སང་རྒྱལ་སྤྱིའི་འགྲོ་བ་མིའི་ཐོན་ཐང་ཉིན་མོ་དང་བསྟུན་ནས་བོད་ཀྱི་ཆབ་སྲིད་བཙོན་པ་ཁག་ཅིག་གི་ལོ་རྒྱུས་བརྙན་ཐུང་སྤྱི་ཚོགས་དྲ་ལམ་བརྒྱུད་མུ་འབྲེལ་འགྲེམ་སྤེལ་གནང་རྒྱུ་ཡིན་འདུག
དེ་རིང་སྔ་དྲོའི་ཆུ་ཚོད་ ༡༠ པའི་ཐོག་བཞུགས་སྒར་དྷ་སའི་ནོར་བུ་གསོལ་མགྲོན་ཁང་དུ། བཀྲིས་ལྷུན་༧པཎ་ཆེན་ཨེར་ཏེ་ནི་ཞབས་ཞུ་ལས་དོན་ལྟེ་གནས་ཁང་དང་། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གཉིས་ཐུན་མོང་ཐོག སང་ཉིན་རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོ་དང་བསྟུན། རྒྱལ་སྤྱིའི་བོད་དོན་ཉམས་ཞིབ་པ་བྲག་དམར་ངག་དབང་ཆོས་འཕེལ་ལགས་ཀྱིས་དབྱིན་ཡིག་ཐོག་བརྩམས་པའི་<མཉམ་འབྲེལ་རྒྱལ་ཚོགས་ཀྱིས་སྙུགས་སྲིང་སྟེ་བོད་ཀྱི་༧པཎ་ཆེན་རིན་པོ་ཆེ་བཙལ་བ་>ཞེས་པའི་བོད་བསྒྱུར་དཔེ་དེབ་དབུ་འབྱེད་འགྲེམ་སྤེལ་གནང་སོང་ལ། སང་ཉིན་ཕྱི་ཚེས་ ༡༠ ཉིན་རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོ་དང་བསྟུན་ནས་ཕྱི་ཟླ་ ༡ ཚེས་ ༡༠ བར་ཟླ་གཅིག་རིང་བོད་ནང་གི་འགྲོ་བ་མིའི་ཐོབ་ཐང་རྡོག་རོལ་གྱི་གནད་དོན་ཆེ་ཁག་ལ་གཞིར་བཟུང་སྟེ། རི་མོའི་ལམ་ནས་བོད་ཀྱི་ཆབ་སྲིད་བཙོན་པ་སྐོར་ཞིག་གི་ལོ་རྒྱུས་དང་སྦྲགས་རྒྱབ་ལྗོངས་སུ་བོད་སྐད་ཀྱི་འགྲེལ་བརྗོད་ཡོད་པའི་བརྙན་ཐུང་རིགས་སྤྱི་ཚོགས་དྲ་ལམ་ཁག་དུ་འགོད་སྤེལ་བྱ་རྒྱུ་ཡིན་འདུག
གསར་འགོད་གསལ་བསྒྲགས་སྟེང་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ཚེ་རིང་མཚོ་མོ་ལགས་ཀྱིས། དུས་རྒྱུན་ང་ཚོས་༧པཎ་ཆེན་རིན་པོ་ཆེའི་གནད་དོན་སྐོར་ནས་རྒྱལ་སྤྱིའི་དཔོན་རིགས་ག་གེ་མོ་དང་རྒྱ་ནག་གཞུང་གིས་བཤད་པ་རྣམས་ཁུངས་གཏུག་དུས་ཡིག་ཆ་དཀོན་དྲགས་པའི་རྐྱེན་གྱིས་ཁག་པོ་ཆགས་ཀྱི་ཡོད་ཀྱང་། ད་ལན་དེབ་འདིའི་ནང་མཉམ་འབྲེལ་རྒྱལ་ཚོགས་ཀྱི་ཚན་པ་འདྲ་མིན་གྱིས་༧པན་ཆེན་རིན་པོ་ཆེའི་སྐོར་གླེང་སློང་ཇི་གནང་སོགས་ཀྱི་ཡིག་ཆ་རྣམས་ཟུར་སྦྱར་དུ་བཀོད་ཡོད་སྟབས། ཀློག་པ་པོ་དང་ཉམས་ཞིབ་པ་རྣམས་ལ་ཕན་ཐོགས་ཆེན་པོ་འབྱུང་ངེས་ཡིན་སྐོར་འགྲེལ་བརྗོད་གནང་སོང་།
ཡང་ཁོང་མོས། བོད་ཀྱི་ཆབ་སྲིད་བཙོན་པ་རྣམས་ནི་བོད་ནང་འཐབ་རྩོད་དང་འགྲོ་བ་མིིའི་ཐོབ་ཐང་གི་སྲོག་ཤིང་ལྟ་བུ་ཆགས་ཀྱི་ཡོད་པ་དང་། ང་ཚོས་དུས་རྒྱུན་བོད་ནང་རྒྱ་ནག་གཞུང་ལ་ངོ་རྒོལ་བྱེད་ཀྱི་ཡོད་པ་དང་། རྒྱ་ནག་གིས་དྲིལ་བསྒྲགས་བྱས་པ་རྣམས་བདེན་པ་མིན་པའི་ཁུངས་སྐྱེལ་གཙོ་བོ་དེ་ཆབ་སྲིད་བཙོན་པ་རྣམས་ཡིན་ནའང་། ང་ཚོས་ཆབ་སྲིད་བཙོན་པ་རྣམས་འཛིན་བཟུང་བྱེད་པའི་སྐབས་ཐོག་དེར་ལས་འགུལ་དང་གདུང་སེམས་མཉམ་སྐྱེད་ཞུ་རྒྱུ་ལས། དེའི་རྗེས་དྲན་པ་བརྗེད་པ་ལྟ་བུ་ཆགས་ཀྱི་ཡོད་སྟབས། ལྟེ་གནས་ཁང་གི་ངོས་ནས་འདི་ལོའི་འགྲོ་བ་མིའི་ཐོབ་ཐང་གི་ཉིན་མོ་དེ་བོད་ཀྱི་ཆབ་སྲིད་བཙོན་པའི་གནས་སྟངས་སྐོར་གོ་རྟོགས་དང་གདུང་སེམས་མཉམ་སྐྱེད་ཡོང་ཐབས། དེ་བཞིན་ཆབ་སྲིད་བཙོན་པ་རྣམས་གང་མགྱོགས་གློད་གྲོལ་ཡོང་ཐབས་བཅས་ལ་དམིགས་ཡོད་སྐོར་འགྲེལ་བརྗོད་གནང་སོང་།
ད་ཐེངས་དབུ་འབྱེད་གནང་བའི་དཔེ་དེབ་དེ་ཉིད་ཐོག་མར་བྲག་དམར་ངག་དབང་ཆོས་འཕེལ་ལགས་ཀྱིས་ཕྱི་ལོ་ ༡༩༩༥ ལོ་ནས་ ༢༠༡༩ བར་དུས་ཡུན་ལོ་ངོ་ ༢༤ རིང་མཉམ་འབྲེལ་རྒྱལ་ཚོགས་དང་སྲིད་གཞུང་ཁག་གིས་ཀུན་གཟིགས་༸པཎ་ཆེན་རིན་པོ་ཆེའི་ཡང་སྲིད་ཀྱི་གནད་དོན་ཐོག་རྒྱུན་མཐུད་ནས་རྒྱ་ནག་གཞུང་ལ་འདྲི་རྩད་རིམ་པར་བྱས་སྟེ་བོད་ཀྱི་༸པཎ་ཆེན་རིན་པོ་ཆེ་བཙལ་བ་དང་། རྒྱ་ནག་གཞུང་གིས་འཁྱོག་བཤད་དང་དྲང་བདེན་མིན་པའི་ལན་འདེབས་ཁོ་ན་བྱས་ནས་དུས་ཚོད་འཁྱོལ་ཐབས་བྱས་པ། ལོ་ངོ་འདི་དག་རིང་༸པཎ་ཆེན་རིན་པོ་ཆེ་དང་འབྲེལ་བའི་གནད་དོན་ཐོག་བཟང་ཕྱོགས་ཀྱི་འགྱུར་བ་རྩ་བ་ནས་ཕྱིན་མེད་པའི་ཁར། ལོ་རེ་བཞིན་བློ་འཚབ་ཇེ་ཆེར་འགྱུར་བཞིན་ཡོད་པའི་སྐོར་ལ་ཞིབ་འཇུག་ནན་ཏན་གནང་སྟེ་ཐོག་མར་དབྱིན་ཡིག་ཐོག་བྲིས་གནང་བ་ཞིག་ཡིན་འདུག
ད་ལན་གྱི་དེབ་འདིའི་རྩོམ་པ་པོ་བྲག་དམར་ངག་དབང་ཆོས་འཕེལ་ལགས་ཕྱི་ལོ་ ༡༩༨༩ ལོར་བོད་གཞུང་གི་འགྲོ་བ་མིའི་ཐོབ་ཐང་གི་ལས་བྱེད་ཐོག་མ་ལ་བསྐོས་ཤིང་། ཕྱི་ལོ་ ༡༩༩༥ ནས་ ༢༠༠༣ བར་ཇི་ནི་ཝར་རྟེན་གཞི་བྱས་པའི་བོད་ཀྱི་དོན་གཅོད་ལས་ཁུངས་ཀྱི་འགྲོ་བ་མིའི་ཐོབ་ཐང་ཚན་པར་ཕྱག་ལས་གནང་བ་མ་ཟད། ཕྱིས་སུ་ཁོང་གིས་ཇི་ནི་ཝར་འགྲོ་བ་མིའི་ཐོབ་ཐང་སྐོར་ལ་རྒྱུས་སྟོན་པའི་ཕྱག་ལས་གནང་བའི་ཐོག ཕྱི་ལོ་ ༡༩༩༥ ལོ་ནས་བཟུང་༧པཎ་ཆེན་རིན་པོ་ཆེ་མཆོག་གི་ཡང་སྲིད་ཀྱི་གནད་དོན་སྐོར་ལ་རྒྱུས་ལོན་མཇུག་སྐྱོང་གནང་སྟེ། མཉམ་འབྲེལ་རྒྱལ་ཚོགས་ལ་༧པཎ་ཆེན་རིན་པོ་ཆེ་ཀློད་གྲོལ་ཡོང་ཐབས་ཀྱི་ཞུ་འབོད་སོགས་ལས་དོན་མང་པོ་བསྒྲུབས་ཡོད་འདུག ཡིན་ན་ཡང་། ཁོང་ཕྱི་ལོ་ ༢༠༡༩ ལོར་ཇི་ནི་ཝར་སྙུང་གཞིའི་རྐྱེན་པས་འདས་གྲོངས་སུ་གྱུར་ཡོད་འདུག
གསར་འགོད་པ། པ་སངས་ཚེ་རིང་།
