ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་སི་ཁོ་ཊི་པེ་རི་ལགས་ཀྱིས་སྲིད་འཛིན་ཊོམ་ཕུ་མཆོག་ནི་བོད་མིར་མཚོན་ན་རང་བཙན་ཐོབ་རྒྱུའི་རེ་བ་མཐའ་མ་དེ་ཡིན་པས་སྲིད་འཛིན་གྱི་དབང་ཚད་ཀྱི་ཐོག་ནས་བོད་མི་ས་ཡ་མང་པོར་རང་བཙན་ཐོབ་རྒྱུར་ཤུགས་སྣོན་བརྒྱབ་དགོས་པའི་རེ་སྐུལ་ཞུས་འདུག
ཁེ་ཉིན་ཕྱི་ཚེས་ ༡༨ ཉིན་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་སི་ཁོ་ཊི་པེ་རི(Scott Perry)ལགས་ཀྱིས་ཨ་རིའི་ལས་ཐོག་སྲིད་འཛིན་ཊོམ་ཕུ་ལ་ཕྱག་ཡིག་ཅིག་ཕུལ་བའི་ནང་། ཨ་རིའི་གཞུང་གིས་ཐོག་འཛིན་པའི་སྲིད་བྱུས་རྣམས་བསྐྱར་ཞིབ་བྱས་ཏེ། བོད་དེ་རང་དབང་རང་བཙན་གྱི་རྒྱལ་ཁབ་ཅིག་ཏུ་ངོས་འཛིན་དགོས་པའི་རེ་སྐུལ་ཞུས་ཡོད་འདུག
ཕྱག་ཡིག་ནང་སྐུ་ཞབས་སི་ཁོ་ཊི་པེ་རི་ཡིས། བོད་དེ་ཕྱི་ལོ་ ༡༩༥༡ ལོར་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱིས་ཁྲིམས་འགལ་ཐོག་བཙན་འཛུལ་མ་བྱས་སྔོན་རང་དབང་རང་བཙན་གྱི་རྒྱལ་ཁབ་ཅིག་ཡིན་པ་དང་། ཨ་རིའི་གྲོས་ཚོགས་ནས་གཏན་འབེབ་བྱས་པའི་ཁྲིམས་ཡིག་མི་ཉུང་བའི་ནང་བོད་དེ་བཙན་འཛུལ་བྱས་པའི་རྒྱལ་ཁབ་ཅིག་ལ་ངོས་འཛིན་བྱས་ཡོད་སྐོར་དང་། ཨ་རིའི་ངོས་ནས་རྒྱ་ནག་གི་རྒྱལ་སྤྱིའི་གཞི་རྩའི་ཁྲིམས་སྲོལ་དང་འགལ་བའི་བྱ་སྤྱོད་དེ་སྣང་མེད་དུ་འཇོག་དགོས། ཡང་ནས་ཨ་རིའི་གྲོས་ཚོགས་ཀྱིས་འདས་པའི་དུས་ཡུན་རིང་བོད་ལ་རྒྱབ་སྐྱོར་བྱས་པའི་ལངས་ཕྱོགས་དེ་འཛིན་དགོས་པ་ཡིན། བོད་མིར་དགོས་པ་ནི་ཨ་རིའི་ངོས་ནས་བོད་དེ་རང་བཙན་གྱི་རྒྱལ་ཁབ་ཅིག་ཏུ་ངོས་འཛིན་བྱ་རྒྱུ་དེ་ཡིན་སྐོར་བཀོད་འདུག
གཞན་ཡང་ཕྱག་ཡིག་དེའི་ནང་། འདས་པའི་ལོ་དུས་ནང་ཨ་རིས་རྒྱ་ནག་དང་། རྒྱ་གར། བལ་ཡུལ་བཅས་ནང་ཡོད་པའི་བོད་མི་ཚོར་ཨ་སྒོར་ས་ཡ་མང་པོ་རོགས་དངུལ་དུ་བྱིན་ཡོད་ལ། དེ་ཡང་གཙོ་བོ་བོད་མིས་རང་གི་རྒྱལ་ཁབ་སྲུང་སྐྱོབ་ཆེད་དམིགས་པ་ཞིག་ཡིན། ང་ཚོའི་འབད་བརྩོན་ལ་ལྟོས་མེད་ཀྱིས་རྒྱ་ནག་གིས་མུ་མཐུད་བོད་ལ་དྲག་གནོན་དང་། ཉེ་ལམ་བོད་མི་རྣམས་བཙན་དབང་གིས་ངལ་རྩོལ་དུ་བཀོལ་བ་སོགས་ཀྱི་ཐབས་བྱུས་བརྒྱུད་ཧན་མི་རིགས་མ་ཡིན་པ་རྣམས་རྒྱ་བསྒྱུར་བྱེད་མུས་ཡིན་སྟབས། ཨ་རིའི་ངོས་ནས་རང་དབང་སྲུང་སྐྱོབ་ཀྱི་གཞི་རྩའི་ཆོད་སེམས་དེ་ལག་ལེན་བསྟར་དགོས་པ་ཡིན། ཞེས་དང་། སྲིད་འཛིན་ཊོམ་ཕུ་ནི་བོད་མིར་མཚོན་ན་རང་བཙན་ཐོབ་རྒྱུའི་རེ་བ་མཐའ་མ་དེ་ཡིན་སྟབས། སྲིད་འཛིན་གྱི་དབང་ཚད་ཀྱི་ཐོག་ནས་བོད་མི་ས་ཡ་མང་པོར་རང་བཙན་ཐོབ་རྒྱུར་ཤུགས་སྣོན་བརྒྱབ་དགོས་སྐོར་རེ་སྐུལ་ཞུས་ཡོད་འདུག
འདི་ལོའི་ཕྱི་ཟླ་ ༥ ཚེས་ ༡༩ ཉིན་སྐུ་ཞབས་སི་ཁོ་ཊི་པེ་རི་ལགས་ཀྱིས་ཨ་རིའི་གྲོས་ཚོགས་འོག་མའི་ནང་བོད་རང་སྐྱོང་ལྗོངས་(TAR)དེ་རྒྱ་ནག་དང་ཁ་བྲལ་རང་བཙན་གཙང་མའི་རྒྱལ་ཁབ་གཅིག་ལ་ངོས་འཛིན་དགོས་པའི་ཁྲིམས་འཆར་དེ་བཏོན་ཡོད་པ་དང་། ཁྲིམས་འཆར་དེར་བོད་གཞུང་དམངས་གཉིས་ནས་དགའ་བསུ་དང་སྦྲགས་སྐུ་ཞབས་ཁོང་ལ་ལེགས་གསོལ་ཞུས་ཡོད་ཀྱང་། བོད་མིའི་སྒྲིག་འཛུགས་དང་བོད་ཀྱི་གཞུང་འབྲེལ་མ་ཡིན་པའི་ཚོགས་པ་མང་པོས་སྐུ་ཞབས་ཁོང་ལ་ཁྲིམས་འཆར་དེའི་ནང་བོད་རང་སྐྱོང་ལྗོངས་ཙམ་མིན་པར། བོད་ཆོལ་ཁ་གསུམ་ཀ་ཚུད་དགོས་པའི་རེ་སྐུལ་ཞུས་པ་ལྟར། ད་ལན་གྱི་ཕྱག་ཡིག་གི་མགོར་བོད་ཀྱི་ཆོལ་ཁ་གསུམ་སྟེ། ཨ་མདོ། ཁམས། དབུས་གཙང་གསུམ་ནང་གནས་སྡོད་བོད་མི་རྣམས་ལོ་བརྒྱ་ཕྲག་རིང་རང་བཙན་ནམ། རང་སྐྱོང་གང་འཚམ་གྱི་གནས་སྟངས་འོག་བསྡད་ཡོད་སྐོར་འགྲེལ་བརྗོད་ཡོད་འདུག
གསར་འགོད་པ། པ་སངས་ཚེ་རིང་།
