འོས་བསྡུ་ཆེན་མོའི་དམིགས་བསལ་ཚགས་པར་དང་འབྲེལ་བའི་གསལ་བཤད།

འདི་ག་བོད་ཀྱི་དུས་བབ་གསར་ཁང་ནས་དེ་རིང་ནས་འོས་བསྡུ་ཆེན་མོ་དང་འབྲེལ་བའི་ཚགས་པར་རྣམས་འགྲེམས་སྤེལ་བྱེད་བཞིན་ཡོད་ལ། ཚགས་པར་འདིའི་ནང་དུ་འདི་ག་གསར་ཁང་གི་ཕྱི་ལོ་ ༢༠༢༡ ལོའི་སྲིད་སྐྱོང་འོས་མིའི་མི་མང་རང་བཞིན་གྱི་དྲི་བ་དྲིས་ལན་གྱི་ལས་རིམ་ནང་ཆ་ཤས་བཞེས་མཁན། སྲིད་སྐྱོང་འོས་མི་རྣམ་པའི་བརྙན་ལམ་བཅར་འདྲི་རྣམས་སྔར་ནས་བརྒྱུད་ལམ་དུ་སྤེལ་ཟིན་པ་དེ་དག་ཡིག་ཐོག་ཏུ་ཕབ་ནས་བཀོད་ཡོད་པ་དང་། དེ་བཞིན་འདི་གའི་སྤྱི་འཐུས་འོས་མི་ངོ་སྤྲོད་ཀྱི་ལས་རིམ་ནང་ཆ་ཤས་བཞེས་མཁན་གྱི་སྤྱི་འཐུས་འོས་མི་རྣམ་པ་ངོ་སྤྲོད་ཞུས་པའི་ཚགས་པར་ཞིག་ཡིན།

ཐོག་མར་ཚགས་པར་འདི་དང་ང་ཚོའི་དྲ་ལམ་ཁག་ཏུ་ང་ཚོའི་ལས་རིམ་ནང་ཆ་ཤས་བཞེས་འདོད་མེད་མཁན་རྣམ་པའི་རང་དབང་ལ་བརྩི་བཀུར་ཞུས་པའི་ཐོག་ནས་ཁོང་རྣམ་པའི་སྐུ་པར་དང་མཚན། ལྷག་པར་དུ་གསལ་བཤད་སོགས་ཡོངས་ཁྱབ་ཐོག་སྤེལ་བར་སྤྱི་ཚོགས་ནང་གླེང་གཞི་སློང་བ་ཙམ་ལས་རང་རོགས་གཉིས་ཀར་དགེ་ཕན་ཡོད་པ་ཞིག་མཐོང་མ་སོང་སྟབས། གསལ་བཤད་རིགས་གཏན་ནས་ཞུ་རྩིས་མེད། འོན་ཀྱང་། ང་ཚོའི་དམིགས་བསལ་ཚགས་པར་གྱི་མདུན་ངོས་སུ་ཡོད་པའི་མི་མང་རང་བཞིན་གྱི་དྲི་བར་བཀའ་ལན་གནང་མཁན་སྲིད་སྐྱོང་འོས་མི་རྣམ་པའི་སྐུ་པར་ནང་སྐུ་ངོ་བཀའ་ཟུར་འབྲོང་ཆུང་དངོས་གྲུབ་མཆོག་གི་སྐུ་པར་མེད་པ་དེར་ཁོང་གི་རྒྱབ་སྐྱོར་བ་ཁག་ཅིག་ནས་ཆེད་དུ་བརྙན་བཟོས་པ་དང་། སྤྱི་ཚོགས་དྲ་ལམ་དུ་འདི་ག་གསར་ཁང་ནས་དྲང་པོ་གནང་མེད་པའི་སྐྱོན་འཛུགས་རིགས་མང་པོ་ཞིག་སྤེལ་བཞིན་ཡོད་པའི་རྐྱེན་གྱིས་གསལ་བཤད་ཐུང་ངུ་འདི་མ་ཞུ་ཐབས་མེད་བྱུང་སོང་།