༧གོང་ས་མཆོག་གིས་དམིགས་བསལ་ཆིབས་ཞབས་སྐུ་སྲུང་ཨ་ནན་ཟླ་བ་ལགས་འདས་གྲོངས་སུ་ཕྱིན་པར་ཁོང་གི་ནང་མི་རྣམས་ལ་ཐུགས་གསོ་དང་སྨོན་ལམ་སྐྱབས་འཇུག་ཞུས་ཡོད་པ་རེད།
ཟླ་འདིའི་ཕྱི་ཚེས་ ༢༦ ཉིན་ཨ་རིའི་མངའ་སྡེ་མི་ནི་སོ་ཊའི་ནང་། ༧གོང་ས་རྒྱལ་བ་རིན་པོ་ཆེ་མཆོག་བོད་ནས་རྒྱ་གར་ལ་བཙན་བྱོལ་ལ་ཕེབས་སྐབས་ཀྱི་དམིགས་བསལ་ཆིབས་ཞབས་སྐུ་སྲུང་ཨ་ནན་ཟླ་བ་ལགས་སྐུ་གཟུགས་བདེ་མིན་ལ་བརྟེན། སྨན་བཅོས་ཞབས་རིམ་ཞུས་ཡོད་འདུག་ཀྱང་། དྲག་སྐྱེད་མ་བྱུང་བར་དགུང་ལོ་ ༨༠ ཙམ་གྱི་ཐོག་འདས་གྲོངས་སུ་ཕྱིན་ཡོད་འདུག
ཨ་ནན་ཟླ་བ་ལགས་ཀྱི་བུ་མོའི་བཟའ་ཟླ་འཇིགས་མེད་ཨོ་རྒྱན་ལགས་ཀྱི་ངོ་དེབ་ཐོག་ཏུ་སྤེལ་བའི་གནས་ཚུལ་ནང་། དམིགས་བསལ་ཆིབས་ཞབས་སྐུ་སྲུང་ཨ་ནན་ཟླ་བ་ལགས་རང་ཉིད་ཀྱི་ཁྱིམ་མི་ལྷན་རྒྱས་འཛོམས་སྐབས། ཞི་བའི་ངང་འདས་གྲོངས་སུ་ཕྱིན་ཡོད་སྐོར་དང་། ཟླ་འདིའི་ཕྱི་ཚེས་ ༢༩ ཉིན་གྱི་ཨ་རིའི་ཉིན་གུང་རྒྱབ་ཀྱི་ཆུ་ཚོད་ ༡།༣༠ ཐོག་སྐུ་ཕུང་ཞུགས་འབུལ་བྱ་རྒྱུ་ཡིན་སྐོར་བཀོད་འདུག
དགའ་ལྡན་ཕོ་བྲང་གི་འབྲེལ་ཡོད་ལས་བྱེད་ཞིག་གིས་འདི་གའི་གསར་འགོད་པར་འགྲེལ་བརྗོད་གནང་པ་ལྟར་ན། སྐུ་སྲུང་ཨ་ནན་ཟླ་བ་ལགས་འདས་གྲོངས་སུ་ཕྱིན་པའི་གནས་ཚུལ་དེ་རིང་ཕྱི་ཚེས་ ༢༨ ཉིན་གྱི་ཞོགས་པར་གཟིམ་ཆུང་གི་དཀོར་གཉེར་བརྒྱུད་༧གོང་ས་རྒྱལ་བ་རིན་པོ་ཆེ་མཆོག་ལ་ཞུས་འདུག་པ་དང་། ༧གོང་ས་རྒྱལ་བ་རིན་པོ་ཆེ་མཆོག་ནས་སྐུ་སྲུང་ཟུར་པ་ཨ་ནན་ཟླ་བ་ལགས་འདས་གྲོངས་སུ་ཕྱིན་པར་ཐུགས་སྨོན་སྐྱབས་འཇུག་ཞུས་ཡོད་སྐོར་ཨ་རིར་བཞུགས་པའི་དམ་པ་ཁོང་གི་ནང་མིར་ཞུས་ཡོད་འདུག
དམིགས་བསལ་ཆིབས་ཞབས་སྐུ་སྲུང་ཨ་ནན་ཟླ་བ་ལགས་ཕྱི་ལོ་ ༡༩༥༥ ལོར་དགུང་གྲངས་བཅོ་ལྔ་ཙམ་ལས་སོན་མེད་ཀྱང་ནོར་བུ་གླིང་ཁར་༧རྒྱལ་བའི་སྐུ་སྲུང་དམག་མིར་འཛུལ་ཞུགས་བྱས་ཏེ་ལོ་བཞིའི་རྗེས། སྐུ་སྲུང་དམག་མི་ངོ་མར་བསྐོ་བཞག་གནང་བ་དང་། ཕྱི་ལོ་ ༡༩༥༩ ཟླ་ ༣ ཚེས་ ༡༧ ཉིན་གྱི་མཚན་མོར་༧གོང་ས་རྒྱལ་བ་རིན་པོ་ཆེ་མཆོག་བཙན་བྱོལ་དུ་ཕེབས་སྐབས་ཀྱི་དམིགས་བསལ་སྐུ་སྲུང་བ་བདུན་གྱི་གྲས་དང་སྐབས་དེའི་སྐུ་སྲུང་ཆུང་ཤོས་དེ་ཡིན་འདུག་ལ། དམ་པ་ཁོང་ནི་དམིགས་བསལ་ཆིབས་ཞབས་སྐུ་སྲུང་བདུན་ཡོད་པའི་ནང་ནས་སྐུ་སྲུང་མཐའ་མ་དེའང་ཡིན་འདུག
ཨ་ནན་ཟླ་བ་ལགས་ནི་ཕྱི་ལོ་ ༡༩༣༩ ལོར་ཕ་ལྷག་པ་དང་མ་དབྱངས་ཅན་གཉིས་སུ་བོད་ཀྱི་རྒྱལ་ས་ལྷ་སར་འཁྲུངས་བ་དང་སྤུན་མཆེད་ལྔ་ལས་ཆུང་ཤོས་དེ་ཡིན་འདུག མ་སུ་རིར་ཐོག་མར་འབྱོར་སྐབས་༧གོང་ས་མཆོག་གི་བཀའ་དགོངས་བཞིན། མ་སུ་རི་སློབ་གྲྭར་ཐོག་མའི་སློབ་ཕྲུག་ལྔ་བཅུའི་གྲས་སུ་ཞུགས། ཕྱིས་སུ་ཨ་རིའི་ཀོར་ནེལ་གཙུག་ལག་སློབ་གྲྭ་ཆེན་ (Cornell University Ithaca) དང་བོས་ཀྲོན་ (Boston) དུ་ཨ་རིའི་གསང་བའི་སློབ་སྦྱོང་གནང་སྟེ། རྒྱ་གར་ལ་ཕྱིར་ཕེབས་རྗེས་བོད་གཞུང་གི་བཀའ་དགོངས་ལྟར་བལ་ཡུལ་དང་རྒྱ་གར་གྱི་རྒྱལ་ས་ལྡི་ལི། དེ་བཞིན། མ་སུ་རི་སློབ་གྲྭ་སོགས་སུ་ཕྱག་ལས་གནང་། ཁོང་དང་ཁོང་གི་བཟའ་ཟླ་མཁའ་འགྲོ་གཉིས་ལ་བུ་ཕྲུག་གསུམ་ཡོད་པ་དང་། ཕྱི་ལོ་ ༡༩༩༦ ལོར་ཨ་རིའི་མི་ནི་སོ་ཊ་མངའ་སྡེའི་ནང་གནས་སྤོས་བགྱིས་ཏེ་རྒས་ཡོལ་དུ་ཕེབས་ཡོད་འདུག
གསར་འགོད་པ། ཀླུ་མགོན་ཐར།
ཨ་ནན་ཟླ་བ་དམ་པ་ཁོང་ཕྱི་ལོ་ ༡༩༦༢ ལོར་བ་ཡུལ་རྡོར་པ་ཊན་གཞིས་ཆགས་སུ་སུད་སི་རྒྱ་གྲམ་དམར་པོའི་རོགས་ཚོགས་ཀྱི་སྐད་བསྒྱུར་གནང་སྐབས་ང་ཚོ་གཞིས་ཆགས་དེར་ཡོད་ན་ཁོང་སྐུ་ཚེ་རྫོགས་པར་མྱ་ངན་གུས་བཏུད་ཞུ་གི་ཡོད་ལ་ནང་མི་བུ་ཕྲུག་ཚོར་གདུང་སེམས་མཉམ་སྐྱེད་ཞུ་གི་ཡོད་།