ཉེ་བའི་ཟླ་དྲུག་ལྷག་རིང་འབྱོར་ལྡན་ལགས་ཀྱིས་དགོས་འདུན་དོན་ཚན་གསུམ་གྱི་ཐོག་ནས་ཨོ་གླིང་སིད་ནེ་གྲོང་ཁྱེར་རྒྱ་ནག་གཞུང་ཚབ་མདུན་དུ་རེས་གཟའ་ལྷག་པ་འཆར་ཅན་རྒྱ་ནག་གཞུང་ལ་ཞི་བའི་ངོ་རྒོལ་ལས་འགུལ་སྤེལ། 
འདི་གའི་གསར་འགོད་པར་ཨོ་གླིང་གནས་སྡོད་ཆབ་སྲིད་བཙོན་ཟུར་ཤེལ་དགེ་འདུན་ཚེ་རིང་ལགས་ཀྱིས་གནས་ཚུལ་མཁོ་སྤྲོད་གནང་བ་ལྟར་ན། བོད་ཀྱི་ཆབ་སྲིད་བཙོན་ཟུར་བློ་བཟང་འབྱོར་ལྡན་ལགས་ཀྱིས། འདི་ལོའི་ཕྱི་ཟླ་ ༦ པ་ནས་མགོ་འཛུགས་ཀྱིས་བདུན་ཕྲག་རེའི་རེས་གཟའ་ལྷག་འཆར་ཅན་ལ། ཨོ་གླིང་སིན་ནེ་གྲོང་ཁྱེར་གྱི་རྒྱ་ནག་གཞུང་ཚབ་མདུན་དུ་དགོས་འདུན་གཙོ་བོ་དོན་ཚན་གསུམ་གྱི་ཐོག་ནས་རྒྱ་ནག་གཞུང་ལ་ཞི་བའི་ངོ་རྒོལ་ལས་འགུལ་སྤེལ་ཏེ། དེ་རིང་ཟླ་ ༦ རིང་གི་ཞི་རྒོལ་ལས་འགུལ་མཇུག་བསྒྲིལ་ཡོད་པ་རེད།
དེ་རིང་ཞི་རྒོལ་ལས་འགུལ་གྱི་ཉིན་མཐའ་མའི་ཐོག་ཨོ་གླིང་སྤྱི་འཐུས་གདོང་འདུས་སྐྱིད་འཛོམས་ལགས་དང་ས་གནས་བོད་རིགས་ཚོགས་པ། དེ་བཞིན། ས་གནས་གཞོན་ནུ་ཚོགས་པ་སོགས་ཀྱི་སྐུ་ཚབ་བཅས་འཛོམས་ཏེ་གཏམ་བཤད་སྤེལ་བ་དང་། སྐབས་དེར་བློ་བཟང་འབྱོར་ལྡན་ལགས་ཀྱིས། དེ་རིང་ངས་ལས་འགུལ་གཉིས་སྤེལ་གྱི་ཡོད། ད་ལོ་ནི་བོད་མིའི་སྒྲིག་འཛུགས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དྲིན་རྗེས་དྲན་གྱི་ལོར་སྲུང་གཙི་ཞུ་ཡི་ཡོད་པར་བརྟེན། ལས་འགུལ་དང་པོ་དེ་ང་རང་བོད་མིའི་སྒྲིག་འཛུགས་ཀྱི་སྤྱི་འབངས་ཤིག་ཡིན་པའི་ཆ་ནས་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དྲིན་རྗེས་དྲན་ཞུ་ཡི་ཡོད། ཅེས་དང་། གཉིས་པ་དེར་རྒྱ་ནག་དགྲ་དམར་གཞུང་གིས་ཕྱི་ལོ་ ༡༩༥༩ ལོ་ནས་ང་ཚོར་བཙན་འཛུལ་དང་ཐུབ་ཚོད་བཏང་ཡོད་པ་རེད། ང་ཚོས་ཕྱི་ལོ་ ༡༩༥༩ ལོ་ནས་མི་རེ་ངོ་རེ་ཡིས་བློས་གཏོང་བྱས་ཏེ་རྒྱ་ནག་གཞུང་ལ་འཐབ་རྩོད་བྱས་ཡོད། འོན་ཀྱང་། ད་སྔ་བར་རྒྱ་ནག་དགྲ་དམར་འདིས་གཡོ་སྒྱུ་དང་ཧམ་པ། འཁྲབ་རྒྱུ་མང་དྲགས་བྱས་ཏེ་བོད་རྒྱལ་ཁབ་བཙན་འཛུལ་བྱས་པ་དང་། ད་ལྟའི་གནས་སྟངས་འདི་འདྲ་ཞིག་བྱུང་བ་རེད། ཅེས་དང་། བོད་དེ་རང་བཙན་གྱི་རྒྱལ་ཁབ་ཅིག་ཡིན་པ་དང་རྒྱ་ནག་གཞུང་གིས་ལྐོག་ཇུས་དང་ངན་ཇུས་སྣ་ཚོགས་ཀྱི་ཐོག་ནས་འཛམ་གླིང་ཡོངས་ལ་མགོ་སྐོར་དང་གནོན་ཤུགས་ཇི་ཐུབ་སྤྲོད་ཀྱི་ཡོད་སྐོར་དང་། ད་ལོའི་ནད་ཡམས་འདིའི་ཐོག་ནས་ཚེ་སྲོག་ཤོར་བའི་མི་རྣམས་དང་ལྷག་པར་དུ་བོད་ཀྱི་རང་ལུས་མེར་སྲོག་གཏོང་མཁན་རྣམ་གྱི་དབུས་པའི་རྒྱལ་གཅེས་དཔའ་བོ་དཔའ་མོ་རྣམ་པ་དྲན་པའི་ཐོག་སོ་སོ་རང་སོར་མ་བསྡད་པར་ལས་འགུལ་སྤེལ་བ་ཡིན་སྐོར་སོགས་བརྗོད་ཡོད་པ་རེད།
ཆབ་སྲིད་བཙོན་ཟུར་ཁོང་གི་དགོས་འདུན་དོན་ཚན་གསུམ་ནི་༧ གོང་ས་རྒྱལ་བ་རིན་པོ་ཆེ་མཆོག་བོད་དུ་གདན་འདྲེན་ཞུ་དགོས་པ་དང་རྒྱ་ནག་དམར་ཤོག་གཞུང་ནས་རྒྱ་ནད་ཏོག་དབྱིབས་རིམས་ནད་ཁྱབ་གདལ་བཏང་བར་འགན་འཁུར་དང་ལེན་བྱེད་དགོས་པ། དེ་བཞིན་རྒྱ་ནག་གི་ཅ་དངོས་རྣམས་ཉོ་ཚོང་མཚམས་འཇོག་བྱེད་དགོས་པ་བཅས་རེད་འདུག
གསར་འགོད་པ། སྐལ་བཟང་སྦྱིན་པ།
