༢༠༢༠ ལོའི་བཙན་བྱོལ་བོད་མིའི་གསར་འགྱུར་ཆེ་ཁག་བཅུ།

སྤྱི་འཐུས་རྒྱུན་ལས་དང་ཁྲིམས་ཞིབ་ཁང་གི་ཆད་འགེལ།རྒྱ་ནག་ཝུ་ཧན་ནས་འཛམ་གླིང་གང་སར་རྒྱ་ཁྱབ་ཏུ་ཕྱིན་པའི་ཏོག་དབྱིབས་གཉན་རིམས་རྐྱེན་གྱིས། སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༩ པ་དེ་ཕྱི་ཟླ་ ༣ ཚེས་ ༡༧ ཉིན་གངས་སྐྱིད་སྤྱི་འཐུས་ཚོགས་ཁང་དུ་ཉིན་ཕྱེད་ཙམ་རིང་ཚོགས་ཏེ། རྩིས་ལོ་ ༢༠༢༠ དང་ ༢༠༢༡ ལོའི་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་རྩིས་ལོའི་ཁྱོན་བསྡོམས་ཡོང་འཆར་སྒོར་ས་ཡ་ ༢,༦༣༤,༤༨༠,༡༠༧ ་དང་འགྲོ་འཆར་ཁྱོན་སྒོར་ས་ཡ་ ༢,༧༡༤,༧༩༤,༦༠༥ བཀའ་འཁྲོལ་གཏན་འབེབ་གནང་པ་རེད། ཕྱི་ཟླ་ ༨ ཚེས་  ༡༧ ཉིན་བོད་མི་མང་སྤྱི་འཐུས་ཚོགས་གཙོ་སྦྲེལ་བོ་རྣམ་གཉིས་ཀྱིས། ཕྱི་ཟླ་ ༩ ནང་འཚོགས་གཏན་འཁེལ་བའི་གྲོས་ཚོགས་ཚོགས་དུས་བཅུ་པ་ཏོག་དབྱིབས་ཀྱིས་རྒྱལ་སྤྱིའི་འགྲུལ་བཞུད་སྒོ་རྒྱ་བསྡམས་པའི་རྐྱེན་གྱིས། ཕྱི་ལོ་ ༢༠༢༡ ཟླ་ ༣ པའི་བར་གྲོས་ཚོགས་ཕར་འགྱངས་གནང་བ་ཡོངས་བསྒྲགས་གནང་།  ཕྱི་ཟླ་ ༩ ཚེས་ ༢༥ ཉིན་ཆེས་མཐོའི་ཁྲིམས་ཞིབ་ཁང་གིས། སྤྱི་འཐུས་རྒྱུན་ལས་རྣམ་པས་བཙན་བྱོལ་བོད་མིའི་བཅའ་ཁྲིམས་ལ་རྩིས་མེད་བྱས་པའི་བྱེད་འཛོལ་ལ་སྤྱི་འཐུས་རྒྱུན་ལས་ ༡༡ གི་འདེམས་བྱེད་ཀྱི་ཐོབ་ཐང་བཀག་བསྐྱིལ་བྱས་པའི་ཆད་འགེལ་བཀའ་ཁྱབ་བཏང་བ་དང་། སྐབས་དེར་སྤྱི་འཐུས་རྒྱུན་ལས་ཀྱིས་ཆད་འགེལ་དེ་ངོས་ལེན་གནང་རྒྱུ་མིན་པའི་བསྒྲགས་གཏམ་སྤེལ་ཡོད་ནའང་།  ཆེས་མཐོའི་ཁྲིམས་ཞིབ་ཁང་གིས་དབུས་འོས་བསྡུ་ལས་ཁང་ལ་འགན་བསྐུར་བཀའ་ཁྱབ་བཏང་བ་ལྟར། དབུས་འོས་བསྡུ་ལས་ཁང་གིས་སྤྱི་འཐུས་རྒྱུན་ལས་རྣམ་པའི་འོས་བསྡུའི་འདེམས་བྱེད་ཀྱི་ཐོབ་དབང་བཀག་བསྐྱིལ་གནང་ཡོད། དེ་བཞིན། ཕྱི་ཟླ་ ༡༡ ཚེས་ ༢༦ ཉིན་བོད་མི་མང་སྤྱི་འཐུས་རྒྱུན་ལས་ཀྱིས་གྲོས་ཚོགས་ཚོགས་དུས་བཅུ་པ་དེ་ཕྱི་ལོ་ ༢༠༢༡ ཟླ་ ༣ ཚེས་ ༡༥ ནས་ ༣༡ བར་ཏེ་ཉིན་གྲངས་སྤར་སྣོན་གྱིས་འཚོག་གཏན་འཁེལ་བའི་ཡོངས་བསྒྲགས་གནང་།

སྲིད་སྐྱོང་སློབ་ཡོན་ལེན་མཁན་སློབ་ཕྲུག་ ༡༩ བྱུང་།ཕྱི་ཟླ་ ༧ ཚེས་ ༡༣ ཉིན་ཕྱི་ལོ་ ༢༠༢༠ ལོའི་རྒྱ་གར་རྒྱལ་ཡོངས་འཛིན་རིམ་བཅུ་གཉིས་ཀྱི་ཡིག་རྒྱུགས་ཆེན་མོའི་གྲུབ་འབྲས་གསལ་བསྒྲགས་གནང་ཡོད་པ་དང་། བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱིས་འདི་ལོར་བོད་སློབ་ཁག་ ༡༦ ནས་སློབ་མ་ཁྱོན་ ༡༠༡༦ ཡིག་རྒྱུགས་ནང་ཞུགས་ཏེ། བརྒྱ་ཆ་བརྒྱ་འཕྲོད་མཁན་སློབ་གྲྭ་ ༡༠ དང་། སློབ་གྲྭ་ཁག་ཡོངས་ནས་ཡིག་རྒྱུགས་བརྒྱ་ཆ་ ༩༠ ཡན་ལེན་མཁན་སློབ་ཕྲུག་ ༩༡ དང་སྲིད་སྐྱོང་སློབ་ཡོན་བྱ་དགའ་ཐོབ་མཁན་སློབ་ཕྲུག་ ༡༩ བྱུང་ཡོད་པའི་གནས་ཚུལ་བསྒྲགས།

ཆབ་སྲིད་བཙོན་ཟུར་འགའ་འདས་གྲོངས།

ཕྱི་ཟླ་ ༧ ཚེས་ ༡༤ ཉིན་ཐའེ་ཝན་ནང་གནས་བཞུགས་དང་རྒྱའི་བཙོན་འཇུག་འོག་ལོ་ངོ་ ༢༠ རིང་སྡུག་སྦྱོང་མནར་གཅོད་མྱངས་བའི་བོད་ཀྱི་ཆབ་སྲིད་བཙོན་ཟུར་དགེ་བཤེས་བྱམས་པ་རྒྱ་མཚོ་ལགས་དགུང་གྲངས་ ༨༥ ཐོག་དགོངས་པ་རྫོགས། ཕྱི་ཟླ་ ༨ ཚེས་ ༣ ཉིན་མི་ལོ་ ༢༧ ལྷག་རིང་བཙོན་ཁང་དུ་སྡུག་སྦྱོང་མནར་གཅོད་མྱངས་མྱོང་མཁན་བོད་ཀྱི་ཆབ་སྲིད་བཙོན་ཟུར་ཨ་མ་ཨ་བདེ་ལགས་དྷ་རམ་ས་ལའི་རང་ཤག་ཏུ་འདས་གྲོངས་སུ་ཕྱིན། ཕྱི་ཟླ་ ༧ ཚེས་ ༢༧ ཉིན་ལོ་ངོ་ ༡༡ རིང་རྒྱའི་བཙོན་འོག་ཏུ་མནར་གཅོད་མྱོང་མཁན་བོད་ཀྱི་ཆབ་སྲིད་བཙོན་ཟུར་རྒན་བསྟན་འཛིན་ཆོས་གྲགས་ལགས་དྷ་རམ་ས་ལ་ནས་འདས་གྲོངས་སུ་ཕྱིན། ཕྱི་ཟླ་ ༡༠ ཚེས་ ༡༧ ཉིན་རྒྱའི་བཙོན་འོག་ཏུ་མི་ལོ་ ༣༡ ལྷག་རིང་སྡུག་སྦྱོང་མནར་གཅོད་མྱོང་མཁན་བོད་ཀྱི་ཆབ་སྲིད་བཙོན་ཟུར་སྟག་སྣ་འཇིགས་མེད་བཟང་པོ་ལགས་དགུང་ལོ་ ༩༡ ཐོག་སུད་སི་ནས་འདས་གྲོངས་སུ་ཕྱིན།

༢༠༢༡ ལོའི་སྲིད་སྤྱིའི་འོས་བསྡུ་ཆེན་མོ་མགོ་བཙུགས།

ཕྱི་ཟླ་ ༨ ཚེས་ ༥ ཉིན་ནས་དབུས་འོས་བསྡུ་ལས་ཁང་གིས་སྲིད་སྤྱི་གཉིས་ཀྱི་འོས་བསྡུ་ཆེན་མོ་དངོས་སུ་དབུ་འཛུགས་གནང་བའི་གསལ་བསྒྲགས་སྤེལ་ཞིང་། སྲིད་སྤྱི་གཉིས་ཀྱི་སྔོན་འགྲོའི་འོས་བསྡུ་ཕྱི་ལོ་ ༢༠༢༡ ཟླ་ ༡ ཚེས་ ༣ དང་དངོས་གཞིའི་འོས་བསྡུ་ཕྱི་ལོ་ ༢༠༢༡ ཟླ་ ༤ ཚེས་ ༡༡ ཉིན་གཏན་འཁེལ། ཕྱི་ཟླ་ ༩ ཚེས་ ༡ ནས་ཟླ་ ༡༠ ཚེས་ ༣༠  བར་བོད་མི་འདུས་སྡོད་ཀྱི་འཛམ་གླིང་རྒྱལ་ཁབ་གྲངས་ ༢༦ དང་ས་གནས་འོས་བསྡུ་ལས་ཁང་གྲངས་ ༥༨ ཀྱིས་མི་མང་གི་མིང་ཐོ་དེབ་སྐྱེལ་གྱིས། རྒྱ་གར་ནང་འོས་འཕེན་མཁན་ཁྱོན་ ༥༥༦༨༣ དང་ཕྱི་རྒྱལ་ཡུལ་གྲུ་ཁག་ཏུ་འོས་འཕེན་མཁན་ ༢༤༠༧༤ བཅས་ཁྱོན་བསྡོམས་ཕྱི་ལོ་ ༢༠༢༡ ལོའི་སྲིད་སྤྱི་གཉིས་ཀྱི་འོས་བསྡུའི་ནང་ཆ་ཤས་བཞེས་མཁན་མི་གྲངས་  ༧༩༦ ༩༧ བྱུང་ཞིང་། གྲངས་འབོར་དེ་ནི་ཕྱི་ལོ་ ༢༠༡༦ ལོ་དང་བསྡུར་ཚེ་དེབ་སྐྱེལ་བྱེད་མཁན་ ༡༠༦༨༠ ཇེ་ཉུང་དུ་ཕྱིན་ཡོད། དེར་བརྟེན། འོས་བསྡུ་ལས་ཁང་གིས་ཕྱི་ཟླ་ ༡༢ ཚེས་ ༢༣ ནས་ ༢༨ བར་ཉིན་གྲངས་ལྔའི་རིང་མིང་གཞུང་དེབ་འགོད་བྱ་འདོད་ཡོད་རིགས་ལ་ཐེངས་གཉིས་པའི་གོ་སྐབས་ཀྱང་ཕུལ་ཡོད།

དོགས་ཡོད་གསང་མྱུལ་བ།  ཕྱི་ཟླ་ ༨ ཚེས་ ༡༣ ཉིན་རྒྱ་གར་གཞུང་གིས་རྒྱ་མི་གསང་ཉུལ་བ་ལའོ་སང་ཟེར་བ་ཞིག་གིས་༧གོང་ས་མཆོག་གི་དབུས་པའི་བཙན་བྱོལ་བོད་མི་གནད་ཡོད་རྣམ་པར་གསང་བའི་མྱུལ་ཞིབ་བྱས་པའི་དོགས་གཞི་དང་། ཁྲིམས་འགལ་ཐོག་ཧིན་སྒོར་བྱེ་བ་ ༣༠༠ ལྷག་གཏོང་ལེན་བྱས་པའི་ཉེས་མིང་འོག་འཛིན་བཟུང་བྱས་ཤིང་། རྒྱ་མི་གསང་ཉུལ་བ་ལའོ་སང་དང་འབྲེལ། ཧི་མ་ཅལ་མངའ་སྡེའི་ནང་མི་ ༢ འཛིན་བཟུང་བྱས་པ་ལས་མི་གཅིག་བོད་མི་ཡིན་པར་བཤད། རྒྱ་གར་ལྷོ་ཕྱོགས་ཀྱི་དགེ་འདུན་པ་ ༧ གཙོས་པའི་ཁྱོན་བོད་མི་ ༣༠ ལ་རྒྱ་གར་གཞུང་གིས་འདྲི་རྩད་བྱས་པའི་གནས་ཚུལ་ཐོན། དེ་བཞིན། སི་ཝེ་ཌན་(Sweden)གཞུང་གིས་ཕྱི་ལོ་ ༢༠༡༨ ལོའི་ཟླ་ ༦ ཚེས་ ༡༥ ཉིན་ཡུལ་དེའི་ནང་གནས་སྡོད་བོད་མི་རྡོ་རྗེ་རྒྱལ་མཚན་ཞེས་པ་ཞིག་གིས་བོད་མིའི་སྐོར་ལ་གསང་བའི་མྱུལ་ཞིབ་བྱས་པའི་ནག་ཉེས་འོག ལོ་གཅིག་དང་ཟླ་ ༡༠ ཡི་བཙོན་འཇུག་ཁྲིམས་ཐག་བཅད་པ་ལྟར། ཕྱི་ཟླ་ ༩ ཚེས་ ༢༨ ཉིན་བཙོན་འཇུག་དུས་ཡུན་རྫོགས་ཏེ། རྒྱ་ནག་ནང་ཕྱིར་སློག་གཏོང་རྒྱུའི་ཐག་བཅད། གཞན་ཡང་། ཕྱི་ཟླ་ ༩ ཚེས་  ༢༡  ཉིན། ཨ་རིའི་དབུས་ཉེན་རྟོག་ལས་ཁུངས་ (FBI) ཀྱིས། ནེའུ་ཡོག་གྲོང་ཁྱེར་གྱི་ཉེན་རྟོག་པ་མིང་ལ་པདྨ་དར་རྒྱས་ངག་དབང་ (Baima dajie Angwang ) ཞེས་པ་ཞིག་འཛིན་བཟུང་བྱས་ཏེ། ཕྱི་ལོ་ ༢༠༡༤ ལོ་ནས་མི་དེས་རྒྱ་ནག་གཞུང་ལ་གསང་བའི་གནས་ཚུལ་མཁོ་སྤྲོད་དང་། ལྷག་པར་དུ་རྒྱ་ནག་གཞུང་ཚབ་ཁང་གི་བཀོད་མངགས་བཞིན་ཨ་རིར་གནས་སྡོད་བོད་མི་ཚོའི་འགྲོ་འདུག་སྤྱོད་གསུམ་ལ་གསང་བའི་མྱུལ་ཞིབ་བྱས་ཏེ། རྒྱ་ནག་གཞུང་ལ་བོད་དོན་དང་འབྲེལ་བའི་གསང་བའི་གནས་ཚུལ་རིགས་མཁོ་སྤྲོད་བྱས་ཡོད་པའི་ནག་ཉེས་བཙུགས་ཡོད་པ་དང་། ཁོས་ནག་ཉེས་ངོས་ལེན་བྱས་མེད་པ་མ་ཟད། ཁོའི་ནང་མི་འབྲེལ་ནས་ཨ་སྒོར་ས་ཡ་ ༡ གཏའ་དངུལ་དུ་བཞག་སྟེ་ཁོ་ཀློད་གྲོལ་ཡོང་བའི་ཞུ་ཡིག་ཕུལ།

བཙན་བྱོལ་བོད་མིའི་དམག་མིར་ངོས་འཛིན་གསར་པ་ཞིག་ཐོབ།ཕྱི་ཟླ་༨ ཚེས་ ༣༠ ཉིན་གྱི་དགོང་མོར་ལ་དྭགས་སྤང་གོང་མཚོའི་ཉེ་འགྲམ་ས་མཚམས་སུ་རྒྱ་གར་དམག་ཕྱོགས་ནས་ལྟ་སྲུང་གནང་སྐབས། བོད་མིའི་དྭང་ཞབས་བརྒྱ་ཤོག་བདུན་པའི་མེ་ཏོག་གཉིས་ཅན་གྱི་བརྒྱ་དཔོན་ཉི་མ་བསྟན་འཛིན་ལགས་རྐྱེན་འདས་སུ་ཕྱིན་ཡོད་པ་དང་། ཁོང་གི་དམག་རོགས་བོད་རིགས་གཞོན་ནུ་བསྟན་འཛིན་བློ་ལྡན་ཞེས་པ་ལའང་རྨས་སྐྱོན་བྱུང་བའི་གནས་ཚུལ་ཕྱི་ནང་གི་གསར་འགྱུར་བརྒྱུད་ལམ་མང་པོའི་ནང་ཐོན་རྗེས། ཕྱི་ལོ་ ༡༩༦༢ ལོར་བཙུགས་ཤིང་རྒྱ་གར་གྱི་དམག་དོན་ཐད་བྱས་རྗེས་མང་པོ་བཞག་མྱོང་བའི་རྒྱ་གར་གྱི་དམིགས་བསལ་མདུན་མཆོང་དམག་དཔུང་(Special frontier force)སྟེ། བོད་མིའི་དྭང་ཟུར་དམག་སྒར་ཨང་ ༢༢ པའི་དམག་མི་རྣམས་ཀྱི་བློས་གཏོང་དང་བྱས་རྗེས་མང་པོ་གླེང་སློང་བྱས་ཏེ། ཕྱི་ནང་གི་ངོས་འཛིན་གསར་པ་ཞིག་ཐོབ་པའི་མགོ་བཙུགས།

རྒྱུད་སྨད་མཁན་ཟུར་ལ་ཨོ་གླིང་གཟེངས་རྟགས་ཐོབ།ཕྱི་ཟླ་ ༩ ཚེས་ ༦ ཉིན་རྒྱུད་སྨད་མཁན་ཟུར་བཀྲ་ཤིས་ཚེ་རིང་ལགས་ཀྱིས། འདས་པའི་ལོ་ངོ་ ༣༠ ལྷག་གི་རིང་ཨོ་གླིང་མི་མང་ལ་ནང་ཆོས་དང་ཤེས་ཡོན་ཐོག་ནས་ཞབས་འདེགས་རྒྱ་ཆེར་ཞུས་དང་ཞུ་བཞིན་པར་བརྟེན། ཨོ་གླིང་གཞུང་གིས་ཆེད་བསྟོད་ངོས་འཛིན་གྱི་གཟེངས་རྟགས་ (Order of Australia medal Zes) ཞེས་པ་ཕུལ། ཨོ་གླིང་གི་གཟེངས་རྟགས་དེ་བོད་མི་ཞིག་ལ་ཐོབ་པ་ཐེངས་གཉིས་པ་ཆགས་ཡོད་པ་དང་། ཕྱི་ལོ་ ༢༠༠༧ ཡས་མས་སུ་སྤྱི་ཚོགས་ཞབས་ཞུ་བ་རྣམ་རྒྱལ་ཚེ་རིང་ཞུ་བ་ཞིག་ལ་གཟེངས་རྟགས་དེ་གནང་ཡོད་པ་དང་། གཟེངས་རྟགས་དེ་ཨོ་གླིང་གི་མི་སེར་ཡིན་མིན་ལ་ཁྱད་པར་མེད་པར་ཨོ་གླིང་གཞུང་གིས་མི་སྣ་བྱས་རྗེས་ཅན་དང་གཞན་ཕན་གྱི་ལས་དོན་སྒྲུབ་མཁན་རྣམས་ལ་འབུལ་སྲོལ་ཡོད་པ་ཞིག་ཡིན་འདུག

རང་འགན་རང་འཁྲི་ཡི་བོད་དོན་ལས་འགུལ།ཕྱི་ཟླ་ ༩ ཚེས་ ༢༣ ནས་ཕྱི་ཟླ་ ༡༠ ཚེས་ ༩ བར་ཀུ་ལུ་མ་ན་ལིར་གནས་སྡོད་བོད་མི་ཚེ་རིང་དབང་འདུས་ལགས་དང་ཚེ་རིང་དོན་འགྲུབ་ལགས། ཆུང་བདག་ལགས་བཅས་ནས་བོད་དོན་བདེན་མཐའ་གསལ་ཆེད། ཀུ་ལུ་མ་ན་ལི་ནས་རྒྱ་གར་གྱི་རྒྱལ་ས་ལྡི་ལིའི་རྒྱ་ནག་གཞུང་ཚབ་བར་ཞི་བའི་གོམ་བགྲོད་གནང་།  ཕྱི་ཟླ་ ༡༡ ཚེས་ ༢ ཉིན་བོད་མི་བསྟན་འཛིན་དོན་གྲུབ་ལགས་ནས་རྒྱ་ནག་གཞུང་གིས་བོད་ནང་གི་ཁོར་ཡུག་གཏོར་བཅོམ་བྱེད་བཞིན་པར་ངོ་རྒོལ་དང་། བོད་དེ་རྒྱ་ནག་གིས་བཙན་འཛུལ་བྱས་པའི་རྒྱལ་ཁབ་ཅིག་ཏུ་ངོས་འཛིན་བྱ་རྒྱུ། དེ་བཞིན་རྒྱ་ནག་གི་ཚོང་ཟོག་བཀོལ་མཚམས་འཇོག་དགོས་པའི་དགོས་འདུན་འོག བཞུགས་སྒར་དྷ་ས་ནས་འབྲས་ལྗོངས་ཀྱི་བོད་ཧིན་ས་མཚམས་སྣ་ཐོད་ལ་བར་ཞི་བའི་གོམ་བགྲོད་ལས་འགུལ་གནང་མུས་ཡིན། ཕྱི་ཟླ་ ༡༡ ཚེས་ ༡༨ ནས་ཚེས་ ༢༣ བར་ཉིན་ ༥ རིང་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག རྒྱ་ནག་གཞུང་གིས་བོད་ནང་གི་བོད་མིར་སྡུག་སྦྱོང་མནར་གཅོད་གཏོང་བཞིན་པ་དང་། ཁྲིམས་འགལ་གྱི་རྒྱ་སྐྱེད་བཙན་འཛུལ་རིང་ལུགས་ལག་བསྟར་བྱེད་བཞིན་པ། དེ་བཞིན་རྒྱ་ནག་ནས་མཆེད་པའི་ཝུ་ཧན་ཏོག་དབྱིབས་གཉན་རིམས་ཀྱིས་འཛམ་གླིང་ཡོངས་ལ་གོད་ཆག་ཆེན་པོ་བཟོས་པ་བཅས་རྒྱ་ནག་གཞུང་གི་ནག་ཉེས་ཐེར་འདོན་ཆེད། བཞུགས་སྒར་དྷ་རམ་ས་ལ་ནས་བོད་ཧིན་ས་མཚམས་ཁུ་ནུ་བར་བོད་མི་སྐོར་སྐྱོད་པ་ ༦༥ ཡིས་སྦག་སྦག་སྐོར་སྐྱོད་ཀྱི་ལས་འགུལ་སྤེལ།

ཨ་རིའི་བོད་དོན་དམིགས་བསལ་འབྲེལ་མཐུད་པ་བསྐོས།ཕྱི་ཟླ་ ༡༠ ཚེས་ ༡༤ ཉིན་ཨ་རིའི་རྒྱལ་སྲིད་དྲུང་ཆེ་མེག་པོམ་པེའོ་མཆོག་གིས་གསར་འགོད་གསལ་བསྒྲགས་ཤིག་གི་སྟེང་། ཨ་རིའི་རྒྱལ་སྲིད་ལྷན་ཁང་གི་དམངས་གཙོ་དང་འགྲོ་བ་མིའི་ཐོབ་ཐང་། ངལ་རྩོལ་ལས་ཁུངས་ཀྱི་དྲུང་ཆེའི་ལས་རོགས་སྐུ་ཞབས་རོ་བྷར་ཊི་ཨེ་ཌེ་སི་ཊོ་རོ་ (Robert A. Destro) ལགས། ཨ་རིའི་གཞུང་གི་བོད་དོན་དམིགས་བསལ་འབྲེལ་མཐུད་པར་བསྐོ་བཞག་གནང་བའི་གསལ་བསྒྲགས་གནང་ཞིང་། བོད་མིའི་སྒྲིག་འཛུགས་ཀྱི་དབུས་གཞུང་འབྲེལ་མིན་པའི་ཚོགས་སྡེ་སོགས་བོད་གཞུང་མང་གཉིས་ནས་དགའ་བསུ་ཞུས། འོན་ཀྱང་། ཚོགས་སྡེ་ཁག་ཅིག་ནས་བོད་དོན་དམིགས་བསལ་འབྲེལ་མཐུད་པ་དེ་དྲུང་ལས་ཀྱི་གནས་རིམ་ཅན་ཞིག་བསྐོ་བཞག་མ་གནང་བར་བློ་ཕམ་བྱུང་བའི་དགོངས་ཚུལ་བཏོན།

ཨ་རིས་བོད་དོན་རྒྱབ་སྐྱོར་གྱི་ཁྲིམས་གཏན་འབེབ་གནང་།ཕྱི་ཟླ་ ༡༢ ཚེས་ ༢༢ ཉིན་ཨ་རིའི་བོད་དོན་ཐོག་འཛིན་པའི་ཕྱི་ལོ་ ༢༠༢༠ ལོའི་བོད་དོན་སྲིད་ཇུས་དང་རྒྱབ་སྐྱོར་ཁྲིམས་འཆར་ཨ་རིའི་གྲོས་ཚོགས་གོང་མའི་ནང་སྤྱི་མོས་གཏན་འབེབ་བྱུང་བ་དང་། ཟླ་དེའི་ཕྱི་ཚེས་ ༢༨ ཉིན་ཨ་རིའི་སྲིད་འཛིན་ཊོམ་ཕུ་མཆོག་གིས་མཚན་རྟགས་བསྐྱོན་པ་བརྒྱུད་ཁྲིམས་འཆར་དེ་དངོས་སུ་ཨ་རིའི་ཁྲིམས་ཆགས། བོད་མི་མང་སྤྱི་འཐུས་ཚོགས་གཙོ་མཆོག་དང་བཀའ་ཤག་གིས་བོད་ཕྱི་ནང་གཉིས་ཀྱི་བོད་མི་ཡོངས་ཀྱི་ཚབ་ཞུས་ཏེ། ཨ་རིའི་གཞུང་དང་འབྲེལ་ཡོད་ཡོངས་ལ་ཐུགས་རྗེ་ཆེ་ཞུ་ཡོད་པ་དང་། ཁྲིམས་འདིའི་ཐོག་ནས་བོད་ནང་གི་ཆོས་དད་རང་དབང་དང་༧གོང་ས་མཆོག་གི་ཡང་སྲིད་སོགས་ཨ་རིའི་ཁྲིམས་ལ་བཟོས་ཏེ་རྒྱ་ནག་གིས་ཐེ་བྱུས་བྱ་མི་ཆོག་པ་དང་། བོད་ཀྱི་ཆུ་དང་ཁོར་ཡུག་སྲུང་སྐྱོབ་དང་དམངས་གཙོའི་ལམ་སྲོལ་ལས་གྲུབ་པའི་བོད་མིའི་སྒྲིག་འཛུགས་ནི་བཙན་བྱོལ་བོད་མི་ཡོངས་ཀྱི་སྒྲིག་འཛུགས་ལ་ངོས་འཛིན་བྱ་རྒྱུ་ཡིན་པའི་དོན་ཚན་གསར་པ་གཉིས་ཁ་སྣོན་བྱུང་།

གནས་ཚུལ་ཕྱོགས་སྒྲིག་པ་སྐལ་བཟང་སྦྱིན་པ།