བོད་མི་ཤུར་མོ་ལགས་ཀྱིས་རྒྱ་ནག་གཞུང་གི་དྲག་གནོན་སྲིད་ཇུས་ལ་ངོ་རྒོལ་གྱིས་རང་ལུས་མེར་སྲེག་གནང་སྟེ་འདས་གྲོངས་སུ་ཕྱིན་ཡོད་པའི་གནས་ཚུལ་ཐོན།
ཁ་སང་བོད་མིའི་སྒྲིག་འཛུགས་ཀྱི་དྲ་ཐོག་ཏུ་སྤེལ་བའི་གནས་ཚུལ་ལྟར་ན། ཕྱི་ལོ་ ༢༠༡༥ ཟླ་ ༩ ཚེས་ ༡༧ ཉིན་བོད་ནང་གི་ཉིན་རྒྱབ་ཆུ་ཚོད་ ༡ ཙམ་ལ་བོད་འབྲི་རུ་རྫོང་ཤག་ཆུ་ཁ་གྲོང་རྡལ་དུ། སྤྱི་སྤྱོད་རླངས་འཁོར་འབབ་ཚུགས་ཀྱི་ཉེ་འཁྲིས་སུ་བོད་མི་ཤུར་མོ་ཞུ་བ་ཞིག་གིས། རྒྱ་ནག་གཞུང་གིས་བོད་ཐོག་འཛིན་པའི་དྲག་པོའི་སྲིད་ཇུས་ལ་ངོ་རྒོལ་སྐད་འབོད་གནང་བཞིན་རང་ལུས་མེར་སྲེག་བཏང་སྟེ་འདས་གྲོངས་སུ་ཕྱིན་ཡོད་པ་དང་། སྐབས་དེར་བོད་མི་ཤུར་མོ་ལགས་དང་ལྷན་དུ་ཁོང་གི་སྤུན་མཆེད་གསུམ་འཛིན་བཟུང་བྱས་ཡོད་འདུག
འདི་གའི་གསར་འགོད་པས་ཁ་པར་བརྒྱུད། བོད་མིའི་སྒྲིག་འཛུགས་ཀྱི་གནས་ཚུལ་དེ་ཐོག་མར་ལག་སོན་བྱུང་མཁན་བདེ་སྲུང་ལས་ཁུངས་ཀྱི་འབྲེལ་ཡོད་ལ་སྐབས་དེའི་ཞིབ་ཕྲའི་གནས་ཚུལ་དང་ཕྱིས་སུ་གནས་ཚུལ་ག་འདྲ་ཆགས་ཡོད་མེད་བཀའ་འདྲི་ཞུས་སྐབས། རང་ལུས་མེར་སྲེག་བཏང་བའི་གནས་ཚུལ་དེ་ཁུངས་ལྡན་ཡིན། ད་ལྟ་དེ་ལས་ལྷག་གི་གནས་ཚུལ་གང་ཡང་གསལ་གྱི་མི་འདུག ཅེས་བརྗོད་བྱུང་།
ཡང་གསར་འགོད་པས་ཕ་ཡུལ་ཤག་ཆུ་ཁའི་ཉེ་འཁྲིས་དང་འབྲི་རུ་རྫོང་ཁོངས་ནས་ཡིན་པའི་བཙན་བྱོལ་བོད་མི་ཁག་ཅིག་ལ་སྐད་ཆ་དྲིས་སྐབས། ཁོ་ཚོ་ཕལ་ཆེ་བས་གནས་ཚུལ་དེ་གསལ་བོ་ཧ་གོ་ཡི་མེད་པ་དང་། བོད་མི་ཤུར་མོ་ལགས་ཀྱི་ཕ་ཡུལ་ཤག་ཆུ་ཁ་ཡིན་ཚེ་འབྲི་རུ་རྫོང་ཁུངས་ཡིན་པ་ལས་ནག་ཆུ་རྫོང་མིན་པ་དང་། ད་ལྟ་འབྲི་རུ་རྫོང་ཁོངས་སུ་རྒྱ་ནག་གཞུང་གིས་དམ་དྲག་ཤུགས་ཆེན་བྱེད་ཀྱི་ཡོད་པར་བརྟེན། བོད་ནང་གི་སོ་སོའི་ནང་མི་གཉེན་ཉེ་སོགས་ལ་འབྲེལ་བ་བྱེད་རྒྱུ་ཧ་ཅང་ཁག་པོ་ཡིན་པའི་འགྲེལ་བརྗོད་གནང་བྱུང་།
ལོ་དེར་ས་གནས་ཉེན་རྟོག་པས་བོད་མི་ཤུར་མོ་ལགས་ཀྱི་གནད་དོན་དང་འབྲེལ་ནས་ཁོང་གི་སྤུན་མཆེད་གསུམ་འཛིན་བཟུང་བྱས་ཡོད་ཀྱང་། ད་སྔ་བར་ཁོ་ཚོའི་གནས་སྟངས་ག་འདྲ་ཞིག་ཆགས་ཡོད་མེད་སོགས་ཀྱི་གནས་ཚུལ་གང་ཡང་ཤེས་རྟོགས་ཐུབ་ཀྱི་མེད་པ་དང་། ཤུར་མོ་ལགས་ཀྱིས་རང་ལུས་མེར་སྲེག་གཏོང་སྐབས་བོད་མི་མང་པོས་དངོས་སུ་མཐོང་ཡོད་ནའང་རྒྱ་ནག་གཞུང་གིས་དམ་དྲག་ཤུགས་ཆེན་བྱས་རྐྱེན་ད་བར་གནས་ཚུལ་ཕྱིར་བསྒྲགས་བྱེད་ཐུབ་མེད་པ་རེད།
བོད་མི་ཤུར་མོ་ལགས་ནི་ནག་ཆུ་རྫོང་ཤག་ཆུ་ཁ་ནས་ཡིན་ཞིང་སྐབས་དེར་རང་ལོ་ ༢༦ ཙམ་ཡིན་པ་དང་། ཁོང་གིས་རང་ལུས་མེར་སྲེག་གནང་མ་ཐག་ས་གནས་ཉེན་རྟོག་པས་འཛིན་བཟུང་གིས་ཤག་ཆུ་ཁའི་སྨན་ཁང་དུ་འཁྱེར་ཡོད་ཀྱང་ཉིན་དེར་འདས་གྲོངས་སུ་ཕྱིན་ཡོད་འདུག
རྒྱ་ནག་གཞུང་གིས་བོད་ས་ཧྲིལ་པོར་དམ་དྲག་དོགས་ཟོན་ཆེན་པོ་བྱེད་ཀྱི་ཡོད་པའི་རྐྱེན་གྱིས། འདས་པའི་ལོ་ཤས་ནས་བོད་ནང་ནས་རང་ལུས་མེར་སྲེག་གནང་བའི་གནས་ཚུལ་རྣམས་ཧ་ཅང་རག་ཁག་པོ་ཆགས་ཡོད་ཀྱང་། ཕྱི་ལོ་ ༢༠༠༨ ནས་བཟུང་ད་བར་བོད་ནང་རྒྱ་ནག་གཞུང་གི་དྲག་གནོན་སྲིད་ཇུས་ལ་ངོ་རྒོལ་ཆེད། ཉུང་མཐར་བོད་མི་ ༡༥༦ ནས་རང་ལུས་མེར་སྲེག་གནང་བའི་གནས་ཚུལ་ཕྱི་ཕྱོགས་སུ་འབྱོར་ཐུབ་ཡོད་པ་རེད།
རང་ལུས་མེར་སྲེག་གནང་མཁན་གྱི་མཚན་གཞུང་བསྡུ་སྒྲིག་པ་མགུར་འབུམ་རྒྱལ། གསར་འགོད་པ། སྐལ་བཟང་སྦྱིན་པ།
