༧གོང་ས་རྒྱལ་བ་རིན་པོ་ཆེ་མཆོག་གིས་མགོ་འཁྲིད་གང་འདྲ་ཞིག་ཡོང་མིན་ཐད་ནས་ང་ཚོས་སློབ་གསོའི་ལམ་ལུགས་གཙོ་འདོན་བྱེད་དགོས་པ་རེད་ཅེས་སློབ་གསོའི་ལམ་ལུགས་ནི་གཞན་དོན་ཆེད་བློས་གཏོང་ཐུབ་ཅིང་བྱམས་བརྩེ་ཅན་གྱི་མི་ཞིག་བསྐྲུན་ཐུབ་པ་ཞིག་དགོས་སྐོར་གསུངས་འདུག
ཁ་སང་ཕྱི་ཚེས་ ༡༧ ཉིན་གྱི་སྔ་དྲོའི་ཆུ་ཚོད་ ༩ ཐོག ༧གོང་ས་རྒྱལ་བ་རིན་པོ་ཆེ་མཆོག་ནས་དྲ་ལམ་བརྒྱུད་ཨ་རིའི་ཧར་ཝར་ཌི་ཆེས་མཐོའི་གཙུག་ལག་སློབ་གཉེར་ཁང་གི་ཚོང་རིག་སྡེ་ཚན་གྱི་སློབ་དཔོན་ཨ་ཐར་བྷོར་ཁུ་སི་ (Arthur Brooks) དང་ལྷན་དུ། སློབ་གཉེར་ཁང་དེའི་དབུ་འཁྲིད་དང་བདེ་སྐྱིད་ཅེས་པའི་སློབ་ཚན་དང་འབྲེལ་ནས་གསུང་མོལ་གནང་ཡོད་པ་དང་། དེ་དང་འབྲེལ་ནས་སློབ་མ་རྣམས་ཀྱི་དྲི་བར་བཀའ་ལན་ཡང་སྩལ་འདུག སྐབས་དེར་༧གོང་ས་མཆོག་ནས་ང་ཚོས་ཕྱི་དངོས་པོ་ལ་ཤུགས་ཆེན་བརྟེན་པའི་འཚོ་བ་ཞིག་ལ་རོལ་གྱི་ཡོད་ནའང་། ནང་སེམས་ཞི་བར་གནས་ཐབས་ཀྱི་གནས་ལུགས་དེ་ཤེས་རྟོགས་དགོས་རྒྱུ་ནི་སྣང་མེད་དུ་འཇོག་ཐབས་མེད་པ་ཞིག་ཡིན་སྐོར་གསུངས་འདུག
འགྲོ་བ་མི་གཅིག་གྱུར་གྱི་འདུ་ཤེས་དགོས་སྐོར་༧གོང་ས་རྒྱལ་བ་རིན་པོ་ཆེ་མཆོག་གིས། ང་ཚོར་འགྲོ་བ་མིའི་རིགས་གཅིག་གྱུར་ཡིན་པའི་འདུ་ཤེས་དགོས་པ་དང་། ང་ཚོ་ཚང་མ་མཉམ་དུ་གནས་དགོས་པ་རེད། མི་སྒེར་གྱི་མ་འོངས་པའི་གནད་དོན་རྣམས་གཞན་ལ་རག་ལུས་པ་རེད། གནས་སྟངས་དེ་འདྲ་ཞིག་གི་འོག་རང་ཉིད་ཁོ་ན་གཙིགས་སུ་འཛིན་པ་ནི་གནས་སྟངས་དེའི་རང་བཞིན་དང་འགལ་གྱི་ཡོད་པ་རེད། དེ་བས་རང་ཉིད་ཧ་ཅང་གཙིགས་སུ་འཛིན་པ་ཡིས་རང་ཉིད་ཀྱི་བདེ་སྐྱིད་ཀྱི་མི་ཚེ་ལ་གནོད་པ་བྱེད་ཀྱི་ཡོད་པ་རེད། དཔེར་ན་བྱིས་པ་ཆུང་ཆུང་ཚོས་རང་ཉིད་ཀྱི་རྩེད་རོགས་རྣམས་མི་རིགས་དང་རྒྱལ་ཁབ། ཆོས་ལུགས་ཅི་ཡིན་ལ་དབྱེ་འབྱེད་མེད་པར་ཁོང་ཚོར་སྤྱི་ཚོགས་གཅིག་ཡིན་པའི་འདུ་ཤེས་དེ་ཡོད་པ་རེད། འོན་ཀྱང་། ངོས་ཀྱི་མཐོང་སྣང་ལ་རིམ་པར་བྱིས་པ་ཚོ་སློབ་གྲྭར་ཕྱིན་རྗེས། འགྲོ་བ་མིའི་གཅིག་གྱུར་གྱི་སློབ་གསོ་སྤྲོད་ཀྱི་མེད་པར། དེ་ལས་ལྡོག་སྟེ་མི་རིགས་དང་རྒྱལ་ཁབ། ཆོས་ལུགས་ཁ་ཁ་ཡིན་པ་གཙོ་བོར་བཟུང་སྟེ་སློབ་གསོ་སྤྲོད་ཀྱི་ཡོད་པ་མ་ཟད། ཆོས་ལུགས་དང་མི་རིགས་གཅིག་གི་ནང་དུའང་དབྱེ་བ་དང་ཁྱད་པར་གཙོ་བོར་འཛིན་གྱི་ཡོད་སྟབས། ངའི་མི་རིགས་དང་ངའི་རྒྱལ་ཁབ་ཀྱི་འདུ་ཤེས་ཤུགས་ཆེན་ཡོང་གི་ཡོད་པ་རེད། སློབ་གསོ་ནི་ཧ་ཅང་གལ་ཆེན་པོ་ཡིན་པ་དང་། ཨ་རིའི་ཧར་ཝར་ཌི་ཆེས་མཐོའི་གཙུག་ལག་སློབ་གཉེར་ཁང་ནི་འཛམ་གླིང་གི་གྲགས་ཆེ་ཤོས་ཀྱི་སློབ་གཉེར་ཁང་ཞིག་ཡིན་པས། སློབ་གཉེར་ཁང་འདིས་འགྲོ་བ་མི་གཅིག་གྱུར་ཡིན་པའི་འདུ་ཤེས་གཙོར་བཟུང་གི་བསླབ་གཞི་ལ་ཤུགས་སྣོན་བརྒྱབས་ཏེ་འཛམ་གླིང་གི་སློབ་གཉེར་ཁང་གཞན་ལ་མིག་དཔེ་སྟོན་དགོས་པ་རེད། ཅེས་གསུངས་འདུག
དེའི་རྗེས་སློབ་དཔོན་ཨ་ཐར་བྷོར་ཁུ་སི་ལགས་ཀྱིས་མགོ་ཁྲིད་མང་པོ་ཞིག་སེམས་སྐྱིད་པོ་མེད་པའི་རྒྱུ་མཚན་ཅི་ཡིན་སྐོར་བཀའ་འདྲི་ཞུས་སྐབས། ༧གོང་ས་མཆོག་གིས་ངོས་ཀྱིས་བསམ་ན་དེ་ནི་གཙོ་བོ་སློབ་གསོའི་ལམ་ལུགས་ལ་རག་ལས་ཡོད་པ་རེད། གཞི་རྩའི་ཆ་ནས་ང་ཚོ་ཚང་མ་གཅིག་མཚུངས་ཡིན་པ་དང་། ང་ཚོ་ནི་སྤྱི་ཚོགས་འདུས་སྡོད་ཀྱི་སྲོག་ཆགས་ཡིན་པ་རེད། སློབ་གསོའི་ལམ་ལུགས་བརྒྱུད་ང་ཚོས་མིའི་རིགས་གཅིག་གྱུར་ཡིན་པ་དང་། རང་ཉིད་སྤྱི་ཚོགས་འདུས་སྡོད་ཀྱི་སྲོག་ཆགས་ཡིན་པའི་ཐོག་ལ་གཙོ་འདོན་བྱེད་དགོས་པ་རེད། གཞི་རྩའི་ཆ་ནས་ངའི་རྒྱལ་ཁབ་དང་ཁོང་ཚོའི་རྒྱལ་ཁབ། ངའི་ཆོས་ལུགས་དང་ཁོང་ཚོའི་ཆོས་ལུགས་ཞེས་འདུ་ཤེས་འཛིན་སྟངས་དེ་ནི་ཕལ་པ་རེད། འཛམ་གླིང་གི་ཤར་ནུབ་གང་དུ་སྡོད་ཀྱི་ཡོད་ནའང་ང་ཚོ་ཚང་མ་འཛམ་བུ་གླིང་འདིའི་སྟེང་དུ་མཉམ་དུ་འཚོ་དགོས་པ་རེད། དེང་སྐབས་ཀྱི་གོ་ལའི་གནམ་གཤིས་འགྱུར་ལྡོག་དང་དཔལ་འབྱོར། ཁོར་ཡུག་སོགས་ཀྱི་དངོས་ཡོད་གནས་སྟངས་འོག ང་ཚོའི་རྒྱལ་ཁབ་དང་ཁོང་ཚོའི་རྒྱལ་ཁབ། ང་ཚོའི་ཆོས་ལུགས་དང་ཁོང་ཚོའི་ཆོས་ལུགས་ཞེས་ཕན་ཚུན་དབྱེ་བ་འབྱེད་པའི་དུས་སྐབས་ཤིག་མིན་པ་དང་། འདས་པའི་དུས་རབས་བཞིན་ངའི་རྒྱལ་ཁབ་དང་ངའི་གླིང་ཕྲན་ཞེས་རྩོད་པའི་དུས་ཤིག་མིན་པར། ང་ཚོ་ནི་གོ་ལ་འདིའི་ཐོག་གི་འགྲོ་བ་མིའི་རིགས་གཅིག་མཚུངས་ཡིན་པའི་འདུ་ཤེས་འཛིན་པའི་དུས་ལ་བབས་ཡོད་པ་རེད། དཔེར་ན་གོ་ལ་ཚ་འགྱུར་གྱི་གནས་སྟངས་འོག ང་ཚོས་གོ་ལ་ཧྲིལ་བོ་བསམ་བློའི་ནང་འཁྱེར་ནས་དཀའ་ངལ་ལ་གདོང་ལེན་བྱེད་དགོས་པ་ཞིག་ཆགས་ཡོད་པ་ལས། ངའི་རྒྱལ་ཁབ་ཅེས་བཤད་བསྡད་ན་ཡོང་ཐབས་མེད་པའི་གནས་སྟངས་ཤིག་ཆགས་ཡོད་པ་རེད། ཅེས་དང་། དཀའ་ངལ་མང་པོ་ཞིག་ནི་རང་ཉིད་ཀྱིས་བཟོས་པ་ཞིག་ཡིན་པ་དང་། ངོས་ཀྱི་མི་ཚེའི་ནང་འཛམ་གླིང་གི་ཆབ་སྲིད་དང་ཆོགས་ལུགས་སོགས་ཀྱི་མགོ་འཁྲིད་མང་པོ་ཞིག་ལ་འཕྲད་མྱོང་བ་དང་། ཁོང་ཚོ་ཕལ་ཆེ་བ་ནི་བསམ་བློ་གུ་ཡངས་དང་མཐོང་སྣང་ལ་སྐྱིད་སྣང་ཞིག་འདུག མགོ་འཁྲིད་རྣམས་ཀྱང་ང་ཚོའི་སྤྱི་ཚོགས་ནས་རིམ་པར་ང་ཚོའི་སློབ་གསོའི་ལམ་ལུགས་བརྒྱུད་ནས་ཡོང་སྟབས། མགོ་འཁྲིད་གང་འདྲ་ཞིག་ཡོང་མིན་ཐད་ནས་ང་ཚོས་སློབ་གསོའི་ལམ་ལུགས་ཐོག་གཙོ་འདོན་བྱེད་དགོས་པ་རེད། ཅེས་སློབ་གསོའི་ལམ་ལུགས་ནི་གཞན་དོན་ཆེད་བློས་གཏོང་ཐུབ་ཅིང་། བྱམས་བརྩེ་ཅན་གྱི་མི་ཞིག་བསྐྲུན་ཐུབ་པ་ཞིག་དགོས་སྐོར་གསུངས་འདུག
སློབ་གཉེར་ཁང་དེའི་སློབ་མ་ཡོ་གྷི་ཀུར་ནའེ་ཝན་ (Yogi Kurniawan) གྱིས། སྔོན་ཆད་མི་ལ་ཆ་རྐྱེན་དེ་ཙམ་མེད་ནའང་བདེ་སྐྱིད་ལྡན་པའི་ངང་འཚོ་གནས་བྱེད་ཀྱི་ཡོད་པ་དང་། དེང་སྐབས་མི་ཚོས་རང་ཉིད་ཀྱི་རྒྱུ་འབྱོར་འཕེལ་ཆེད་དུ་དུས་ཚོད་གཏོང་གི་ཡོད་སྟབས། དེང་སྐབས་ཀྱི་བྱེད་སྟངས་དེས་མི་སྒེར་གྱི་བདེ་སྐྱིད་ལ་ཤུགས་རྐྱེན་ཅི་ཞིག་ཐེབས་ཀྱི་ཡོད་མེད་བཀའ་འདྲི་ཞུས་སྐབས། ༧གོང་ས་མཆོག་གིས། བདེ་སྐྱིད་ནི་མིའི་སེམས་ཚོར་དང་འབྲེལ་བ་དམ་པོ་ཡོད་པ་ནི་ཧ་ཅང་གསལ་པོ་ཡིན་པ་རེད། ཕྱི་དངོས་པོའི་ཐོག་ནས་སྐྱོ་བོ་ཡིན་ནའང་ནང་སེམས་ཀྱི་ཐོག་ནས་ཧ་ཅང་སྤྲོ་སྣང་ལྡན་པ་ཞིག་བྱེད་ཐུབ་ཀྱི་ཡོད་པ་རེད། དེང་སྐབས་ཚོང་པའམ་འབྱོར་ལྡན་ཅན་མང་པོ་ཞིག་ལ་ཕྱི་དངོས་པོའི་མཐུན་རྐྱེན་ཧ་ཅང་འཛོམས་པོ་ཡོད་ནའང་། ནང་སེམས་སུ་འདོད་བློ་མ་ཁེངས་པ་དང་། གཞན་ལ་འགྲན་སེམས་ཡོད་པར་བརྟེན། དུས་རྟག་ཏུ་གང་ཡོད་པ་དེ་ལས་མང་བ་ཞིག་དགོས་ཀྱི་ཡོད་པ་རེད། དེ་བས་ཕྱི་དངོས་པོའི་ཐོག་ནས་མཐུན་རྐྱེན་འཛོམས་པོ་ཡོད་ནའང་ནང་སེམས་སུ་སེམས་ཁྲལ་ཡོད་པ་དང་ཡིད་ཆེས་མེད་པ། ཞེད་སྣང་སྐྱེས་པ་སོགས་ལ་བརྟེན། དེ་ཡིས་རིམ་བཞིན་སེམས་སུ་ཁོང་ཁྲོ་དང་ཕྲག་དོག་བསྐྲུན་གྱི་ཡོད་པ་རེད། གལ་ཆེ་ཤོས་ནི་ང་ཚོས་ཕྱི་དངོས་པོ་ལ་ཤུགས་ཆེན་བརྟེན་པའི་འཚོ་བ་ཞིག་ལ་རོལ་གྱི་ཡོད་ནའང་། ནང་སེམས་ཞི་བར་གནས་ཐབས་ཀྱི་གནས་ལུགས་དེ་ཤེས་རྟོགས་དགོས་རྒྱུ་ནི་སྣང་མེད་དུ་འཇོག་ཐབས་མེད་པ་ཞིག་ཡིན་པ་རེད། ཅེས་བཀའ་ལན་གནང་འདུག
ཡང་༧གོང་ས་རྒྱལ་བ་རིན་པོ་ཆེ་མཆོག་གིས། ནང་སེམས་ཀྱི་དཀའ་ངལ་སེལ་ཐབས་སུ་སེམས་ཀྱི་རང་བཞིན་ལ་ཤེས་རྟོགས་ཡག་པོ་དགོས་པ་ནི་ཧ་ཅང་གལ་ཆེན་ཡིན་པ་དང་། སེམས་ཚོར་དང་འབྲེལ་ནས་བཤད་སྐབས་དེ་ནི་ཆོས་ལུགས་ལ་འབྲེལ་བའི་གནད་དོན་ཞིག་ཏུ་མི་བལྟ་བར། དེ་ནི་སློབ་གསོའི་བསླབ་གཞི་ཞིག་ལ་ངོས་འཛིན་དགོས་པ། ཆོས་ལུགས་ལ་དད་མོས་ཡོད་མེད་གཙོ་བོ་མིན་པར་ནང་སེམས་ཀྱི་རང་བཞིན་དང་སེམས་ཚོར་གྱི་སྐོར་ལ་ཆོས་ལུགས་དང་། ལྷག་པར་དུ་ནང་ཆོས་ནང་གི་ཤེས་བྱ་རྣམས་ཧ་ཅང་བེད་སྤྱོད་ཆེན་པོ་ཡིན་སྐོར་དང་། དེང་རབས་འཕྲུལ་རིགས་ཀྱིས་དངོས་སུ་མིའི་སྤྱི་ཚོགས་ནང་དཀའ་ངལ་བཟོ་ཡི་མེད་པ་དང་། གཙོ་ཤོས་འཕྲུལ་ཆས་བེད་སྤྱོད་བྱེད་མཁན་གྱི་མི་ལ་རག་ལུས་པ་ཞིག་ཡིན་པ། དེ་བཞིན་ད་ལྟའི་ཆར་འཛམ་གླིང་ཐོག་རྡུལ་ཕྲན་མཚོན་ཆ་རྩ་མེད་བཟོ་རྒྱུའི་ལས་འགུལ་ཞིག་འགྲོ་བཞིན་པ་དེ་ནི་བཟང་ཕྱོགས་ཀྱི་རྣམ་པ་ཞིག་ཡིན་སྐོར་སོགས་གསུངས་ཡོད་པ་རེད།
གསར་འགོད་པ། ཀླུ་མགོན་ཐར།
