དགེ་བཤེས་བློ་བཟང་དཔལ་ལྡན། ཨོ་གླིང་།
སྟོང་ལོ་གསར་པའི་མགོ་སྟོད་འདིར། བོད་མིའི་རང་དབང་སླར་གསོའམ། ཡང་ན། བོད་མིའི་ལོ་རྒྱུས་ཀྱི་མུ་མཐའ་སྐྱོང་བའི་རྒྱུན་ཐག་གཙོ་བོ་སྟེ། བཙན་བྱོལ་བོད་མིའི་ཆིག་སྒྲིལ་གྱི་ནུས་པ་འཐོར་ཞིག་ལ་འགྲོ་བར་ཉེ་བའི་གནས་ཚུལ་གཅིག་རྗེས་གཉིས་མཐུད་དུ་མངོན་འོང་བས། མི་རིགས་ཀྱི་ལར་ཞེན་དང་གཅེས་སེམས་མངའ་བའི་ཤེས་ལྡན་པ་རྣམས་ཀྱིས་ཀྱང་ཐམས་ཅད་བག་ཡོད་དུ་གནས་པར་འབོད་སྐུལ་གཏོང་བཞིན་ཡོད། འོན་ཀྱང་བསམ་ཡོད་རྒན་གྲས་ཁ་ཤས་ཀྱིས་གཞན་ལ་བསམ་ཤེས་དང་བསྟུན་མཁས་ཆེ་དྲགས་ནས་དྲང་བདེན་བརྗོད་པའི་སྨྲ་ལྕེ་ཡང་ལྐུག་པར་གྱུར་འདུག
སྤྱི་ཚོགས་ཀྱི་ལབ་གླེང་སྣ་ཚོགས་ཀྱི་བར་གསེང་ན་སྣང་ཚུལ་སྣ་ཚོགས་འབྱུང་བཞིན་པའི་ཁྲོད། གཞུང་དངུལ་བཏང་ནས་གཞོན་སྐྱེས་འདུ་འཛོམས་གནང་བ་དང་། ཕྱི་རྒྱལ་ཡུལ་གྲུ་ཁག་ལ་འཐུས་མི་བསྐོ་འཇོག་བྱས་ནས་གཞོན་སྐྱེས་ཚོར་གོ་སྐབས་མང་པོ་སྤྲོད་རྒྱུ་ཡིན་ཚུལ་གྱི་ལབ་གླེང་ཞིག་ཀྱང་རླུང་ཡན་བཞིན་ཁྱབ་བཞིན་ཡོད་ལ། གནས་ཚུལ་འདིའི་རིགས་ལ་འདྲ་འདྲ་འགྲིག་འགྲིག་གི་ཕྱི་ཐུམ་ཇི་ལྟར་གཡོག་ཀྱང་། དོན་ལ་རང་ཕྱོགས་ཀྱི་འོས་ཤོག་གཡོ་ལེན་བྱེད་པའི་སྒྱུ་ཐབས་ཉག་གཅིག་ལས་མ་འདས། རྒྱུ་མཚན་དེའི་དབང་གིས་མི་རབས་རྒན་གཞོན་བར་འགྲན་རྩོད་ཀྱི་གླེང་གཞི་ཡང་མངོན་གསལ་དུ་སླེབས་བཞིན་ཡོད།
ད་ལྟ་བོད་མིའི་སྤྱི་ཚོགས་ཀྱི་ཕྱོགས་སོ་སོ་ནས་ཇི་ལྟར་བྱས་ན། ང་ཚོའི་ཆིག་སྒྲིལ་གྱི་ནུས་པ་སླར་གསོ་བྱེད་པའམ། ཡང་ན། མཐུན་སྒྲིལ་གྱི་ནུས་པ་ཇེ་དམ་དུ་གཏོང་བའི་ཐབས་ཤེས་སྣ་ཚོགས་འཚོལ་བ་དང་། གཅིག་སྒྲིལ་འཐོར་རྐྱེན་དུ་འགྲོ་བའི་རྒྱུ་རྐྱེན་འཚོལ་ཞིབ་བྱེད་བཞིན་ཡོད། མཐུན་སྒྲིལ་ཇེ་དམ་དུ་གཏོང་བ་དང་། ཕྱོགས་ཞེན་ཇེ་ཆེར་འགྲོ་བའི་རྒྱུ་རྐྱེན་འཚོལ་བའི་གོ་རིམ་ཁྲོད། མི་མང་པོ་ཞིག་ལ་ཐུན་མོང་གི་ངོས་འཛིན་ཞིག་བྱུང་བ་ནི། ཆོལ་ཁ་གསུམ་ཟེར་བ་དང་། ཆོས་བརྒྱུད་ལྔ་ཞེས་པ་འདི་གཉིས་འཐོར་རྐྱེན་གྱི་རྒྱུ་གཙོ་བོ་ཞིག་ཏུ་མཐོང་བཞིན་ཡོད་ཚོད་ལ། དེའི་སྐོར་གྱི་གླེང་ཕྱོགས་ཀྱང་མང་དུ་འབྱུང་བཞིན་འདུག བོད་ནས་བཙན་བྱོལ་དུ་འབྱོར་བའི་རིགས་ཞེན་ཡོད་མདོག་སྟོན་མཁན་ཁ་ཤས་ཀྱིས་ང་བོད་ཡིན་འོན་ཀྱང་མདོ་དབུས་ཁམས་གསུམ་གང་གི་ཀྱང་མིན་ཚུལ་བྲིས་པ་དྲ་ཐོག་ཏུ་མཐོང་རྒྱུ་འདུག
འོན་ཀྱང་། བོད་མིའི་སྒྲིག་འཛུགས་ཀྱི་སྤྱི་འཐུས་ཀྱི་གྲུབ་ཆ་དེ། ཆོལ་ཁ་གསུམ་དང་། ཆོས་བརྒྱུད་བཅས་ནས་ཡོང་དགོས་པ་འདི། ལོ་རྒྱུས་ཀྱི་གནད་དོན་ཧ་ཅང་གལ་ཆེན་ཞིག་ལ་དམིགས་ཡོད་དེ། མན་ཆིན་སྲིད་གཞུང་ནས་མགོ་བཙུགས་པའི་བོད་མི་ཁ་བྲལ་དང་དཀྲུག་ཤིང་གི་གཡོ་བྱུས་རྒྱུན་རིང་བཏིང་བ་དང་། བོད་མི་ནང་ཁུལ་ནས་ཀྱང་རྒྱུ་རྐྱེན་སྣ་ཚོགས་ཀྱི་དབང་གིས་ཆིག་སྒྲིལ་གྱི་ནུས་པ་ཉམས་ནས་དུས་ཡུན་རིང་པོ་འདས་ཤིང་། རྒྱ་ནག་གི་སྲིད་དབང་སྔ་ཕྱི་གཉིས་ཀྱིས་ཀྱང་མངོན་ལྐོག་ཅི་རིགས་ནས། འཇམ་རྩུབ་གཡོ་བསླུའི་ཐབས་ཤེས་སྣ་ཚོགས་བཀོལ་ནས། བོད་མི་རྣམས་ཁ་བྲལ་དུ་གཏོང་འདོད་ཀྱི་གཡོ་ཇུས་ཀྱི་མཚོན་ཁ་ནས་བསྲུང་བའི་རྡོ་རྗེ་གོ་ཁྲབ་ལྟ་བུ་ཞིག་ཡིན་པ་ལས། མི་རིགས་ཁ་བྲལ་གཏོང་བྱེད་ཀྱི་འགད་རྫས་ལྟ་བུ་ཞིག་ག་ལ་ཡིན་ཏེ། བཙན་པོའི་རྒྱལ་རབས་འཐོར་བཤིག་ཏུ་སོང་བའི་ལོ་ངོ་གཅིག་སྟོང་ཡས་མས་ཀྱི་རིང་ལ་ཕྱིར་ལྟ་བྱས་ན། ད་ལྟའི་སྐབས་འདི་ནི་བོད་ལ་མི་རིགས་ཀྱི་འདུ་ཤེས་ཆེས་ཟབ་པའི་དུས་དང་། གཅིག་གྱུར་གྱི་ནུས་པ་ཆེས་ཆེ་བའི་དུས་ཡིན་པ་མངོན་གསལ་ཡིན་པ་དང་། ལོ་ངོ་བརྒྱ་ཕྲག་མང་པོར་ཁ་འཐོར་དུ་སོང་བའི་མི་རིགས་ཤིག་ཕྱི་ནང་གི་འགལ་རྐྱེན་མཚོ་ལྟར་བརྡོལ་བའི་སྐབས་འདི་འདྲ་ལ། མི་རིགས་ཀྱི་འདུ་ཤེས་སླར་གསོ་དང་། དམིགས་ཡུལ་གཅིག་ཏུ་གྱུར་བ་འདི་ལ་རྒྱུ་རྐྱེན་ཧ་ཅང་མང་པོ་ཞིག་ཡོད་སྲིད་ཀྱང་། ཆེས་གལ་ཆེ་བ་ཞིག་ནི། ༧གོང་ས་ཐམས་ཅད་མཁྱེན་པའི་ཕུགས་རྒྱང་རིང་པོའི་དགོངས་གཞིའི་འོག་བྱུང་བའི་བཙན་བྱོལ་སྒྲིག་འཛུགས་འདི་ལ་རག་ལས་ཆེན་པོ་ཡོད་པ་ཤེས་དགོས་པ་ཡིན།
སེར་མོ་པའི་སྤྱི་འཐུས་རེ་ཟུང་གིས་སྐྱུག་བྲོ་བའི་གཏམ་བཤད་དང་ཀུན་སྤྱོད་ཡ་མ་ཟུང་རེ་འགའ་ལ་བརྟེན་ནས། ཆོས་བརྒྱུད་སྤྱི་འཐུས་ཀྱང་ཕན་ལས་གནོད་ཆེ་ཚུལ་གྱི་བསམ་ཚུལ་མང་དུ་འབྱུང་བཞིན་པ་དང་། རེ་འགས་བསམས་ན། ༧གོང་ས་སྐྱབས་མགོན་ཆེན་པོ་མཆོག་དང་། མཁས་དབང་ཟམ་གདོང་རིན་པོ་ཆེ་ལྟ་བུ་ཞིག་གིས་དངོས་སུ་སྤྱི་ཚོགས་ཀྱི་འགན་མ་ཁུར་ན། བོད་མིའི་མཐུན་སྒྲིལ་འཐོར་ཞིག་གི་ཉེན་ཁ་འདི་ལ་གཡོལ་ཐབས་མེད་ཚུལ་ཡང་གླེང་། རྒྱ་ནག་དམར་གཞུང་གི་སྣེ་ཁྲིད་པ་ཚོས་ཀྱང་ང་ཚོའི་སྤྱི་ཚོགས་འདི་འཐོར་ཞིག་ལ་འགྲོ་རྒྱུར་བསྒུགས་ནས་བསྡད་ཡོད་པ་མ་ཟད། བོད་མིའི་ལོ་རྒྱུས་ཀྱི་ཤི་གསོན་ཀྱང་ཐད་ཀར་ང་ཚོའི་མཐུན་སྒྲིལ་ལ་རག་ལས་ཤིང་། གལ་ཏེ། ང་ཚོའི་མཐུན་སྒྲིལ་མུ་མཐུད་འཐོར་བཤིག་ཏུ་སོང་ན། དུས་རབས་འདིའི་ནང་བོད་མིའི་ལོ་རྒྱུས་ལ་རྫོགས་ཚིག་ཐེབས་རྒྱུ་ཉག་གཅིག་ལས་མ་འདས་པ་ང་ཚོས་མངོན་གསལ་དུ་མཐོང་གིན་འདུག་པ་འདིའོ། །
དེས་ན་ང་ཚོས། མི་རིགས་ཁ་འཐོར་ཡ་བྲལ་དང་། ལོ་རྒྱུས་ཉམས་རྒུད་ཀྱི་སྐྱོ་གར་ལ་བསྒུགས་ནས་སྡོད་རྒྱུ་མིན་པར། ༧གོང་ས་ཐམས་ཅད་མཁྱེན་པས། རེ་བ་བཟང་ས་ནས་རྒྱག་དགོས་པ་དང་གྲ་སྒྲིག་སྡུག་ས་ནས་བྱེད་དགོས་པའི་བཀའ་སློབ་ཀྱི་དགོངས་དོན་བཞིན། མི་རིགས་ཀྱི་མཐུན་སྒྲིལ་ཇེ་བརྟན་དང་། ནུས་པ་ཉམས་སྤུངས་ཀྱི་ཕྱོགས་ལ་ཅི་ཐུབ་ཀྱི་འབད་དགོས་པ་མ་ཟད། འདིའི་ཕྱོགས་ལ་མཁས་པ་ཚོས་རྣམ་དཔྱོད་འདོན་དགོས་ཤིང་། ཆབ་སྲིད་པས་སྲིད་ཇུས་འདིང་དགོས་པ་སྨོས་མེད་ཡིན།
འོན་ཀྱང་། མི་རིགས་མཐུན་སྒྲིལ་གྱི་ཆེད་དུ་ཆོལ་ཁའི་མིང་དང་ཆོས་བརྒྱུད་ཀྱི་སྤྱི་འཐུས་མེད་པར་གཏོང་རྒྱུ་དེ། བྱེད་ཐབས་ལེགས་པོ་ཞིག་མིན་པ་མ་ཟད་དངོས་སུ་ལག་བསྟར་བྱེད་ཐབས་བྲལ་བ་ཞིག་ཡིན་པས། དོན་མེད་ཀྱི་སྟོང་གཏམ་མང་དུ་གླེང་བ་ལས། ཚང་མས་ཁས་ལེན་ཐུབ་ཅིང་། དངོས་ཡོད་ལག་ལེན་དུ་འཁྱོལ་ཐུབ་པའི་བྱ་བ་རེ་འགའ་ངེས་པར་བསྒྲུབ་དགོས་པར་མཐོང་།
མདོར་ན། ད་ལྟའི་ང་ཚོའི་སྤྱི་ཚོགས་ནང་བྱུང་བའི་འཐོར་རྐྱེན་གྱི་གནས་སྟངས་ཅི་རིགས་དང་། གླེང་ཕྱོགས་མི་ལེགས་པ་མང་དུ་འབྱུང་བཞིན་པ་འདི་དག་གི་འབྱུང་རྐྱེན་ལ། ལོ་རྒྱུས་ཀྱི་གནས་སྐབས་སྣ་ཚོགས་ཀྱི་རྒྱུ་རྐྱེན་ཡོད་ན་ཡང་། དངོས་ཀྱི་རྒྱུ་རྐྱེན་གལ་ཆེན་ཞིག་ནི། རང་རེའི་གྲོས་ཚོགས་ཀྱི་མི་སྣ་རེ་ཟུང་གི་བྱ་སྤྱོད་དང་། གཏམ་བཤད་ཀྱི་ཟུར་རེ་འགའ། སྲིད་སྐྱོང་དང་སྤྱི་འཐུས་ཀྱི་འོས་བསྡུའི་ཁྱབ་བསྒྲགས་གནང་སྟངས་། གནད་ཡོད་མི་སྣས་དབང་ཆ་བེད་ལོག་ཏུ་སྤྱོད་པའི་གནས་ཚུལ་སོགས་ལས་བྱུང་ཞིང་དེའི་ཤུགས་རྐྱེན་སྤྱི་ཚོགས་ཐོག་ཁྱབ་བརྡལ་དུ་སོང་བ་མངོན་གསལ་ཡིན།
འོ་ན། སྲིད་སྐྱོང་དང་སྤྱི་འཐུས་ཀྱི་སྟེགས་བུ་ལ་སུ་ཞིག་འཁོད་མིན་ཏེ་ང་ཚོ་མང་ཚོགས་ལ་ཡོད་པའི་ཐོབ་ཐང་ཉག་གཅིག་ཡིན་པས། གནས་སྟངས་འདི་ལ་འགྱུར་བ་གཏོང་མི་ཐུབ་པ་ཞིག་ཀྱང་ག་ལ་ཡིན། འོན་ཀྱང་། གནས་སྐབས་ཀྱི་རིང་ལ་ཆོལ་ཁ་དང་ཆོས་བརྒྱུད་ཀྱི་སྤྱི་འཐུས་མེད་པར་གཏོང་ཐབས་ཤིག་མེད་པ་མ་ཟད། མེད་པར་བྱས་པའི་དབང་དུ་བཏང་ཡང་མི་རིགས་ཀྱི་ལོ་རྒྱུས་དང་། ང་ཚོའི་ད་ལྟའི་གནས་བབ་ལ་བློ་ཡུལ་ལས་འདས་པའི་ལྡོག་ཕྱོགས་ཀྱི་འགྱུར་ལྡོག་འགྲོ་སྲིད་པ་ཞིག་ཡིན། དེས་ན་ད་ལྟ་ང་ཚོས་བྱེད་ཐུབ་པ་དང་བྱེད་འོས་པ་ཞིག་ནི། གྲོས་ཚོགས་ཀྱི་གྲུབ་ཆ་ཡོང་སྟངས་ལ་ལེགས་བཅོས་གཏོང་རྒྱུ་དེ་ཡིན།
ཁོ་བོས་བསམས་ན། ཆོལ་ཁ་དང་ཆོས་བརྒྱུད་ཀྱི་སྤྱི་འཐུས་དེ་ཚོ་སུ་ཞིག་ཡིན་ནའང་བོད་གངས་ཅན་པའི་སྤྱི་བའི་འཐུས་མི་ཡིན་པས། ཆོལ་ཁ་དང་ཆོས་བརྒྱུད་ཀྱི་སྤྱི་འཐུས་སུ་ཡིན་ཀྱང་འོས་ཤོག་བརྒྱ་དགོས་པའི་དབང་དུ་བཏང་ཚེ། འོས་ཤོག་ལྔ་བཅུ་ཆོལ་ཁ་དང་ཆོས་བརྒྱུད་རང་ཁོངས་ནས་ཐོབ་དགོས་པ་དང་། གཞན་འོས་ཤོག་ཉེར་ལྔ་རེ་ཆོལ་ཁོངས་གཞན་གཉིས་ནས་བླུགས་པ་ཡིན་ན། ད་གཟོད་ཆོལ་ཁ་དང་ཆོས་བརྒྱུད་དེའི་སྤྱི་འཐུས་སུ་ཐག་གཅོད་གནང་ཐུབ་ཚེ། ཆོལ་ཁ་དང་ཆོས་བརྒྱུད་ཀྱི་གླེང་རྙོག་རིགས་ཉུང་དུ་འགྲོ་རྒྱུ་མ་ཟད། མིང་དོན་གཉིས་མཚུངས་ཀྱི་སྤྱི་བའི་འཐུས་མི་ཞིག་ཏུ་བགྲངས་ཆོག་པ་ཡིན། དེ་ལྟར་ལག་ལེན་དུ་གནང་ན་སྤྱིའི་སྡིངས་ཆ་བེད་སྤྱོད་གནང་མཁན་ཚོས་ཀྱང་གང་བྱུང་ཕྱོགས་ཞེན་བྱེད་པར་ཡང་ཚད་བཀག་ངེས་ཅན་ཐེབས་རྒྱུ་དང་། ལས་དོན་བྱེད་ཕྱོགས་བཅས་ལ་ཡང་འགྱུར་བ་འགྲོ་ངེས་པ་ཡིན།
མདོར་ན། ཆོལ་ཁ་གསུམ་དང་། ཆོས་བརྒྱུད་ཀྱི་ཚབ་མཚོན་རང་འཇགས་བཞག་པའི་ཐོག འཐུས་མི་རྣམས་ལ་བོད་མི་སྤྱི་ཡོངས་ནས་སྟངས་འཛིན་བྱེད་ཐུབ་པ་ཞིག་བྱུང་ན། ང་ཚོའི་སྤྱི་བའི་ལས་དོན་ལ་ཕན་ཐོགས་ངེས་ཅན་ཞིག་ཡོང་ངེས་ཡིན་པའི་བསམ་ཚུལ་ཉུང་བསྡུས་འདི། བོད་མི་སྤྱི་སེམས་ཅན་ཚོར་ཕུལ་བའི་ལྷག་བསམ་གྱི་དར་དཀར་ཡུག་གཅིག་ཡིན་པ་ལས། སྐབས་འཚོལ་རིང་ལུགས་པ་དང་། དམར་གཞུང་གི་མགྲིན་ཚབ་པ་ཚོར་འབྲེལ་བ་ཅི་ཡང་མེད་དོ། །
