དྷ་ས་ནས་བོད་ཧིན་ས་མཚམས་སྣ་ཐོད་ལ་བར་ཟླ་གསུམ་ཙམ་རིང་བོད་དོན་གོམ་བགྲོད་གནང་མཁན་བསྟན་འཛིན་དོན་གྲུབ་ལགས་དང་ཁོང་གི་རོགས་པ་བསྟན་འཛིན་ཉི་མ་གཉིས་འབྲས་ལྗོངས་སུ་འབྱོར་ཡོད་འདུག
དེ་རིང་ཕྱི་ཚེས་ ༡ ཉིན་ (Sikkim Chronicle) ནང་གནས་ཚུལ་སྤེལ་བ་ལྟར་ན། དེ་རིང་ཞོགས་པར་ཞི་བའི་གོམ་བགྲོད་པ་བསྟན་འཛིན་དོན་གྲུབ་ལགས་དང་བསྟན་འཛིན་ཉི་མ་ལགས་གཉིས་འབྲས་ལྗོངས་སུ་འབྱོར་ཡོད་པ་དང་། འབྲས་ལྗོངས་ཀྱི་བོད་མིའི་ཚོགས་པ་དྲུག་ (Six Tibetan Associations) གི་ཚོགས་མིས་ཁོང་རྣམ་གཉིས་ལ་སྣེ་ལེན་ཞུས་ཡོད་འདུག་ལ། ཁོང་གིས་འགྲེལ་བརྗོད་གནང་བ་ལྟར་ན། འབྲས་ལྗོངས་ནས་སྣ་ཐོད་ལར་(Nathula) འགྲོ་རྒྱུའི་ཆོག་མཆན་རག་སོང་ན་ཉིན་ལྔ་ལས་འགོར་གྱི་མེད་སྐོར་བརྗོད་བྱུང་།
དེ་རིང་སྔ་དྲོར་འདི་གའི་གསར་འགོད་པས་བསྟན་འཛིན་དོན་གྲུབ་ལགས་སུ་ཁ་པར་བཏང་ཡང་མཐུད་ཐུབ་མ་སོང་། འོན་ཀྱང་། ཟླ་འདིའི་ཕྱི་ཚེས་ ༢༧ ཉིན་འདི་གའི་གསར་འགོད་པར་ཁ་པར་བརྒྱུད་བསྟན་འཛིན་དོན་གྲུབ་ལགས་སུ་གོམ་བགྲོད་སྐོར་སྐད་ཆ་འདྲི་སྐབས་ཁོང་གིས། ད་བར་དྷ་རམ་ས་ལ་ནས་བོད་ཀྱི་ས་མཚམས་སྣ་ཐོད་ལ་བར་དུ་གོམ་བགྲོད་གནང་དོན་ནི། བོད་རང་བཙན་ལས་གལ་ཆེ་བ་བོད་ཀྱི་ཁོར་ཡུག་སྲུང་སྐྱོབ་བྱ་དགོས་པའི་དམིགས་ཡུལ་གཙོ་བོ་ཡིན། དེ་ཡང་རྒྱ་ནག་གཞུང་གིས་བོད་ནང་གི་ཁོར་ཡུག་གཏོར་བཅོམ་བྱེད་བཞིན་པར་ངོ་རྒོལ་དང་། བོད་དེ་རྒྱ་ནག་གིས་བཙན་འཛུལ་བྱས་པའི་རྒྱལ་ཁབ་ཅིག་ཏུ་ངོས་འཛིན་བྱ་རྒྱུ། དེ་བཞིན་རྒྱ་ནག་གི་ཚོང་ཟོག་བཀོལ་མཚམས་འཇོག་ཡོང་ཆེད་བཅས་ཡིན་སྐོར་དང་། བཞུགས་སྒར་དྷ་ས་ནས་གོམ་བགྲོད་གནང་སྟེ་ཟླ་བ་གསུམ་མ་ཟིན་ཙམ་གྱི་གོམ་བགྲོད་སྐབས། ལམ་བར་ནས་དཀའ་ཁག་འཕྲད་ནའང་རང་ཉིད་ལ་ཚོར་བ་སྐྱིད་པོ་དང་མི་མང་པོ་དང་འབྲེལ་བ་ཡག་པོ་ཆགས་ཅིང་། སོ་སོས་བསམ་པ་བཞིན་བྱེད་ཐུབ་པའི་ཉམས་མྱོང་བྱུང་ཞིང་། ཁོང་ལ་དཔལ་འབྱོར་དང་ལམ་སྟོན་རྒྱབ་སྐྱོར། གསར་འགོད་གསལ་བསྒྲགས་ཀྱི་རྒྱབ་སྐྱོར་གནང་བར་བཀའ་དྲིན་ཆེན་པོ་ཡིན་པ་དང་རྒྱབ་སྐྱོར་བ་མེད་པར་ལས་འགུལ་འདི་འགྲུབ་སླ་བོ་མེད་སྐོར་བརྗོད་བྱུང་།
ཡང་ཁོང་གིས། ད་བར་ས་ཆ་ག་པར་ཡིན་ནའང་སོ་སོའི་ངོས་ནས་གསར་འགོད་དྲིལ་བསྒྲགས་དང་གཞན་ལ་རེ་བ་རྒྱག་དགོས་པ་སོགས་གང་ཐུབ་ཐུབ་བྱས་པ་དང་ས་ཐན་པུར་(Sultanpur) ནས་ཁྱི་གཅིག་མཉམ་ཁྲིད་བྱས་ཏེ་གསོ་སྐྱོང་བྱེད་མུས་ཡིན་ལ། ཁྱི་དེའི་མིང་ལ་འགྲུལ་བ་(Traveller)ཞེས་བཏགས་ཡོད་སྐོར་བརྗོད་བྱུང་།
ཁོང་གིས་འགྲེལ་བརྗོད་གནང་བ་ལྟར་ན། ཕྱི་ཚེས་ ༢༩ ཉིན་ (Salugura) ནས་འབྲས་ལྗོངས་བར་དུ་གོམ་བགྲོད་པ་གཉིས་དང་། ཀ་ལིམ་སྤུང་(Kalimpong) དང་རྡོ་རྗེ་གླིང་ནས་བོད་པ་ཁ་ཤས་ཤིག་དང་དྷ་རམ་ས་ལ་ནས་ཁོང་གི་རོགས་པ་བསྟན་འཛིན་ཆོས་འཕེལ་ལགས་བཅས་མཉམ་ཞུགས་གནང་སྟེ་འབྲས་ལྗོངས་སུ་ཕྱིན་ཡོད་འདུག
གསར་འགོད་པ། བསྟན་འཛིན་ཕུར་བུ།
