བོད་དོན་འཐབ་རྩོད་པ་བསྟན་འཛིན་བརྩོན་འགྲུས་ལགས་ཀྱིས་རྒྱ་གར་གྱིས་རྒྱ་ནག་གཅིག་གི་སྲིད་ཇུས་འཛིན་གྱི་ཡོད་ཀྱང་རྒྱ་ནག་གིས་རྒྱ་གར་གཅིག་གི་སྲིད་ཇུས་འཛིན་གྱི་མེད་པས་རྒྱ་གར་གྱིས་བསྐྱར་དུ་བསམ་གཏོང་དགོས་པའི་དུས་ལ་བབ་ཡོད་སྐོར་གྱི་འབོད་སྐུལ་གནང་རྒྱུ་ཡིན་འདུག
ཟླ་འདིའི་ཕྱི་ཚེས་ ༡༢ སྟེ་བོད་ཀྱི་ལོ་སར་ཚེས་ ༡ ཉིན་བོད་རང་བཙན་འཐབ་རྩོད་པ་བསྟན་འཛིན་བརྩོན་འགྲུས་ལགས་ཀྱིས་རྒྱ་གར་གྱི་མང་ཚོགས་ལ་བོད་ཀྱི་གནད་དོན་ཐད་གོ་རྟོགས་སྤེལ་ཐབས་སུ། བཞུགས་སྒར་དྷ་ས་ནས་ལྡི་ལི་བར་ཟླ་བ་ ༡ ལྷག་གི་རིང་ཁེར་རྐྱང་གི་གོམ་བགྲོད་ལས་འགུལ་ཞིག་སྤེལ་གཏན་ཁེལ་འདུག་ལ། ལས་འགུལ་དེ་བརྒྱུད་ནས་རྒྱ་གར་གཙོས་པའི་རྒྱལ་སྤྱིའི་སྤྱི་ཚོགས་ཀྱིས་རྒྱ་ནག་གཅིག་གི་སྲིད་ཇུས་ལ་འགྱུར་བ་གཏོང་དགོས་པའི་འབོད་སྐུལ་ཞུ་རྒྱུ་ཡིན་འདུག
དེ་ཡང་གོམ་བགྲོད་ལས་འགུལ་གྱི་བསྒྲགས་གཏམ་ནང་བསྟན་འཛིན་བརྩོན་འགྲུས་ལགས་ཀྱིས། ངས་གཙོ་བོ་རྒྱ་གར་གཞུང་ལ་དགོས་འདུན་ནན་ཏན་གྱིས་ཞུ་རྒྱུ་ནི། རྒྱ་ནག་གཅིག་གི་སྲིད་ཇུས་བཟུང་བ་དེར་འགྱུར་བ་གཏོང་དགོས། རྒྱ་གར་གྱིས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཟེར་བ་དེ་རྒྱལ་ཁབ་གཅིག་ལ་ངོས་འཛིན་བྱས་ནའང་། རྒྱ་ནག་གིས་དེ་ལྟར་ཡ་ལན་བྱེད་ཀྱི་མེད། རྒྱ་ནག་གིས་ཨ་རུ་ན་ཅལ་མངའ་སྡེ་ཁོང་ཚོའི་ཡིན་ཟེར་གྱི་ཡོད་པ་མ་ཟད། ཧི་མ་ཅལ་དང་། ལ་དྭགས། ཨུ་དིར་ཁན། འབྲས་ལྗོངས་བཅས་ཀྱི་ས་ཆའི་ཆ་ཤས་ཀྱང་ཁོང་ཚོའི་ཡིན་ཟེར་གྱི་ཡོད་པ་རེད། ཀ་ཤི་མིར་གྱི་གནད་དོན་ཐོག་རྒྱ་ནག་གིས་རྒྱ་གར་ལ་རྒྱལ་སྤྱིའི་མཉམ་འབྲེལ་རྒྱལ་ཚོགས་ནང་ཞུ་གཏུག་ཡང་ཡང་བྱས་ཡོད་པ་རེད། ང་ཚོས་བསྐྱར་དུ་བསམ་བློ་གཏོང་དགོས་དོན་གཅིག་ལ། རྒྱ་ནག་གིས་རྒྱ་གར་རྒྱལ་ཁབ་གཅིག་ལ་ངོས་འཛིན་བྱེད་ཀྱི་མེད་ན། རྒྱ་གར་གྱིས་རྒྱ་ནག་རྒྱལ་ཁབ་གཅིག་ལ་ངོས་འཛིན་བྱེད་དོན་ཅི་ཡོད། ཅེས་བཀོད་འདུག
འདི་གའི་གསར་འགོད་པས་བསྟན་འཛིན་བརྩོན་འགྲུས་ལགས་སུ་ད་ལྟའི་དུས་སྐབས་འདིར་ལས་འགུལ་འདི་འདྲ་སྤེལ་དགོས་པའི་རྒྱུ་མཚན་གང་ཡིན་སྐོར་དྲིས་པར་ཁོང་གིས། འདས་ལོ་ནས་བཟུང་རྒྱ་གར་ནང་རྒྱ་ནག་ཐད་སེམས་ཁྲལ་བྱེད་མཁན་མང་དུ་ཕྱིན་ཡོད་པ་རེད། འོན་ཀྱང་ངའི་བསམ་ཚུལ་ལ་རྒྱ་གར་ནང་བོད་དོན་སྐོར་ཤེས་མཁན་ཧ་ཅང་ཉུང་ཉུང་རེད། མི་མང་ཙམ་དུ་མ་ཟད་ཤེས་ཡོན་པ་དང་གསར་འགོད་པ་རྣམས་ཀྱིས་ཀྱང་དེ་ཙམ་ཤེས་ཀྱི་མེད། བོད་ཀྱི་གནས་ཚུལ་མ་ཤེས་བར་དུ་རྒྱ་ནག་ལ་གདོང་ལེན་བྱེད་ཐུབ་ཐབས་མེད། དེར་བརྟེན། རྒྱ་གར་ནང་བོད་དོན་སྐོར་གོ་རྟོགས་སྤེལ་རྒྱུའི་དུས་ཚོད་ཏག་ཏག་སླེབས་འདུག་ལ། རྒྱ་གར་གྱིས་ཀྱང་ཉན་རྒྱུའི་དུས་ཚོད་ཅིག་ལ་སླེབས་ཡོད། ཅེས་བརྗོད་བྱུང་། དེ་བཞིན་རྒྱ་གར་གྱི་གཞི་རིམ་དང་མཐོ་རིམ་སློབ་དེབ་ནང་རྒྱ་གར་གྱི་ཁྱིིམ་མཚེས་རྒྱལ་ཁབ་བལ་ཡུལ་དང་། པཱ་ཀི་སི་ཐན་སོགས་ཀྱི་སྐོར་ལ་འཁོད་ཡོད་ཀྱང་བོད་སྐོར་གང་ཡང་འཁོད་མེད་སྐོར་དང་། ཉེ་ལམ་རྒྱ་གར་གྱི་དམག་མིས་བོད་ཀྱི་ལོ་རྒྱུས་དང་རིག་གནས་ཐད་སློབ་སྦྱོང་བྱ་དགོས་པའི་གནས་ཚུལ་ཞིག་ཀྱང་ཐོན་ཡོད་སྐོར་སོགས་བརྗོད་བྱུང་།
ཡང་གོམ་བགྲོད་ལས་འགུལ་གྱི་གནད་འགག་སྐོར་ལ་ཁོང་གིས། གོམ་བགྲོད་ཟེར་བ་དེ་ས་གནས་ས་ཐོག་རང་ལ་འགྲོ་ཡི་ཡོད་སྟབས། རང་བཞིན་གྱིས་མི་མང་པོ་དང་ཐུག་འཕྲད་བྱུང་གི་ཡོད་ལ། གོམ་བགྲོད་ཀྱི་དུས་ཡུན་རིང་པོ་ཡིན་སྟབས་གནས་ཚུལ་འགྲེམ་སྤེལ་གྱི་དུས་ཚོད་ཀྱང་རིང་པོ་རག་གི་ཡོད། དེ་བཞིན་མི་ཞིག་དངོས་སུ་གོམ་པ་བརྒྱབ་སྟེ་དཀའ་ལས་བརྒྱབ་དུས། མི་སུ་འདྲ་ཞིག་ཡིན་ནའང་དེར་ལྟ་ཉན་བྱ་རྒྱུ་དང་དོ་སྣང་ཤུགས་ཆེ་བ་བྱེད་ཀྱི་རེད། འཛམ་གླིང་གི་ལོ་རྒྱུས་ཁྲོད་དུའང་རྒྱ་གར་ནང་གྷན་དྷི་དང་། ཨ་ཧྥེ་རི་ཁའི་ནང་མན་ཌེ་ལ། གཞན་ཡང་ཨ་རིའི་ནང་མར་ཊིན་ལུ་ཐར་ཀིང་སོགས་ཀྱིས་ཞི་བའི་གོམ་བགྲོད་བྱས་ཡོད་སྟབས། གོམ་བགྲོད་ཟེར་བ་དེ་མང་ཚོགས་ཁྲོད་གོ་རྟོགས་སྤེལ་རྒྱུའི་ཐབས་ལམ་གནད་འགག་ཅིག་ཏུ་རྩི་ཡི་ཡོད་པ་རེད། ཅེས་བརྗོད་བྱུང་།
འདས་པའི་ལོ་གཅིག་ནང་ལ་དྭགས་ཀྱི་བོད་ཧིན་ས་མཚམས་སུ་རྒྱ་དཀར་ནག་གི་དམག་མིའི་བར་གདོང་ཐུང་བྱུང་བ་དང་བསྟུན། རྒྱ་གར་ནང་གི་བོད་མི་སྒེར་ཚུད་པའི་གཞུང་འབྲེལ་མ་ཡིན་པའི་ཚོགས་པ་ཁག་གིས་སྦག་སྦག་སྐོར་སྐྱོད་ལས་འགུལ་དང་། མི་སྒེར་གྱི་གོམ་བགྲོད་ལས་འགུལ་སོགས་བརྒྱུད་ནས་རྒྱ་གར་གྱི་གཞུང་དམངས་གཉིས་ལ་བོད་དོན་ཐོག་གོ་རྟོགས་སྤེལ་ཐུབ་པ་བྱུང་ཡོད་ཅིང་། རྒྱ་གར་གྱི་རྒྱལ་ཡོངས་གསར་འགྱུར་བརྒྱུད་ལམ་ཁག་ཏུའང་སྔར་དང་མི་འདྲ་བར་བོད་དོན་ཐོག་དོ་སྣང་དང་གནས་ཚུལ་འགྲེམ་སྤེལ་ཤུགས་ཆེ་རུ་སོང་ཡོད་པ་རེད།
གསར་འགོད་པ། པ་སངས་ཚེ་རིང་།
ཡག་པོ་རེད་རྗེས་སུ་ཡིད་རངས་ཡོད་། གལ་ཆེ་ཤོས་དེ་བཙན་བྱོལ་བོད་མིའི་བཅའ་
ཁྲིམས་དོན་ཚན་བཅོ་ལྔ་ནང་འཁོད་པའི་བོད་དོན་བདེན་མཐའ་སེལ་ཐུབ་པ་ལ་དབུས་བོད་
མིའི་སྒྲིག་འཛུགས་ཀྱི་གཏན་ལ་ཕབ་པའི་དབུ་མའི་ལམ་གྱི་སྲིད་ཇུས་བརྒྱུད་ནས་བོད་རྒྱ་
གཉིས་མི་དང་མི་ཐུག་ནས་ཕར་བཤད་ཚུར་ཉན་དང་ཚུར་བཤད་ཕར་ཉན་བརྒྱུད་ནས་
བོད་རྒྱའི་དཀའ་ངལ་སེལ་དགོས་པ་དེ་གལ་ཆེན་དོན་ཆེན་ཞིག་ལ་ངོས་འཛིན་ཞུ་གི་ཡོད་།