རྒྱ་ནག་གིས་ཨ་རིས་རྒྱ་ནག་ཐོག་འཛིན་བཞིན་པའི་སྲིད་ཇུས་སྙོམས་སྒྲིག་གིས། རྒྱ་ནག་ལ་དཔལ་འབྱོར་ཐོག་ནས་ཉེས་ཆད་གཏོང་བཞིན་པ་མཚམས་འཇོག་དང་ཨ་རྒྱ་གཉིས་ནས་གྲོས་མོལ་བྱེད་པར་གྲ་སྒྲིག་ཡོད་སྐོར་བརྗོད་འདུག
རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཕྱི་ལོ་ ༢༠༡༠ ཟླ་ ༡༢ ཚེས་ ༡ ཉིན་རྒྱ་ནག་ཕྱི་སྲིད་ལྷན་ཁང་གིས་མགོ་འཛུགས་བྱས་ཤིང་། རྒྱ་ནག་དང་རྒྱལ་ཁབ་གཞན་བར་གྱི་འབྲེལ་ལམ་སྐོར་གྱི་ལོ་འཁོར་ཚོགས་འདུའི་ (Lanting Forum) སྟེང་། དེ་རིང་རྒྱ་ནག་གི་ཕྱི་སྲིད་བློན་ཆེན་ཝང་ཡེ་ཡིས། ཨ་རིས་རྒྱ་ནག་དམར་ཤོག་ཚོགས་པ་དང་དེའི་ཆབ་སྲིད་ལམ་ལུགས། ད་དུང་རྒྱ་ནག་དངོས་ཟོག་དང་བཟོ་གྲྭ་ཁག་ལ་ཚོང་འབྲེལ་ཉེས་ཆད་མཚམས་འཇོག་དང་། བོད་དང་ཧོང་ཀོང་། ཤིན་ཅང་བཅས་ཀྱི་ཁ་བྲལ་རིང་ལུགས་ལ་རྒྱབ་སྐྱོར་མཚམས་འཇོག་དགོས་པའི་སྐུལ་མ་བཏང་ཡོད་འདུག
དེ་འབྲེལ་གནས་ཚུལ་ནང་ཝང་ཡེ་ཡིས། བྷའེ་ཌན་གཞུང་གིས། སྲིད་འཛིན་ཟུར་བ་ཊོམ་ཕུའི་རྒྱ་ནག་ཐོག་མཁྲེགས་འཛིན་བྱས་པའི་སྲིད་ཇུས་ཁག་སྙོམས་སྒྲིག་གིས། ཨ་རྒྱ་གཉིས་ཞི་བའི་ངང་འཕེལ་རྒྱས་དང་མཉམ་གནས་ཀྱི་ཕྱོགས་སུ་བསྐྱོད་དགོས་ཀྱི་ཡོད་པ་མ་ཟད། རྒྱ་ནག་གིས་ཨ་རིར་ཁ་གཏད་གཅོག་པའམ་རྒྱལ་སྤྱིའི་སྟེང་གི་ཨ་རིའི་གོ་བབས་འཛིན་འདོད་མེད་སྐོར་བརྗོད་འདུག
ཉེ་སྔོན་ཕྱི་ཚེས་ ༡༡ ཉིན་སྲིད་འཛིན་བྷའེ་ཌན་གྱིས། ཁ་པར་བརྒྱུད་ཞི་ཅིན་ཕིན་དང་གྲོས་མོལ་ཐོག་མ་བྱས་སྐབས། ཁོས་རྒྱ་ནག་གིས་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པར་མཇུག་འབྲས་ངན་པ་ཡོང་རྒྱུ་ཡིན་པའི་ཉེན་བརྡ་བཏང་སྟེ། མཉམ་འབྲེལ་རྒྱལ་ཚོགས་གཙོས་པའི་རྒྱལ་སྤྱིའི་སྟེང་ཨ་རིས་མུ་མཐུད་འགྲོ་བ་མིའི་ཐོབ་ཐང་སྲུང་སྐྱོབ་བྱ་རྒྱུ་ཡིན་སྐོར་ཞི་ཅིན་ཕིན་ལ་བཤད་ཡོད་ཅེས་བརྗོད་ཡོད་པ་རེད།
ཡང་ཝང་ཡེ་ཡིས། ང་ཚོའི་རེ་བར་ཨ་རིས་རྒྱ་ནག་ཐོག་འཛིན་བཞིན་པའི་སྲིད་ཇུས་སྙོམས་སྒྲིག་བྱས་ཏེ། རྒྱུ་མཚན་མེད་པར་རྒྱ་ནག་གི་དངོས་ཟོག་ཐོག་དཔྱ་ཁྲལ་བཀལ་རྒྱུ་དང་རྒྱ་ནག་གི་བཟོ་ཚོང་ཁང་དང་ཉམས་ཞིབ་སྡེ་ཚན། དེ་བཞིན། སློབ་གསོའི་སྡེ་ཁག་སོགས་སུ་དཔལ་འབྱོར་ཐོག་ནས་ཉེས་ཆད་གཏོང་བཞིན་པ་མཚམས་འཇོག་དང་། ལྷག་པར་དུ་ཨ་རིས་དོན་དངོས་དང་མི་མཐུན་པར་རྒྱ་ནག་ལ་དྲག་གནོན་བྱ་རྒྱུ་མཚམས་འཇོག་དགོས་ཀྱི་ཡོད། ཅེས་འབོད་སྐུལ་ཞུས་ཡོད་པ་མ་ཟད། རྒྱ་ནག་གིས་ཨ་རྒྱ་གཉིས་ནས་གྲོས་མོལ་གྱི་ལམ་ནས་ཕྱོགས་གཉིས་དབར་གྱི་འགལ་ཟླ་ཁག་མེད་པར་བཟོས་ཏེ་དཀའ་ངལ་སེལ་བར་གྲ་སྒྲིག་ཡོད་སྐོར་སོགས་བརྗོད་ཡོད་འདུག
ད་ལྟ་ཨ་རྒྱ་གཉིས་དབར་ཚོང་འབྲེལ་དང་ཏོག་དབྱིབས་གཉན་རིམས་ཀྱི་འབྱུང་ཁུངས། ལྷོ་རྒྱ་ནག་རྒྱ་མཚོའི་ཁུལ་གྱི་རྒྱ་ནག་གི་དྲག་པོའི་དམག་ཤུགས། དེ་བཞིན་འགྲོ་བ་མིའི་ཐོབ་ཐང་གི་གནས་བབ་སོགས་དང་འབྲེལ་ནས་ཨ་རྒྱ་གཉིས་ཀྱི་འབྲེལ་ལམ་ཆེས་ཚད་དམའ་ཤོས་སུ་བསླེབས་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
