འདས་པའི་ཟླ་བ་གཅིག་ལྷག་གི་རིང་འབར་མའི་གྲོང་ཁྱེར་ཆེ་ཆུང་ཁག་གི་ནང་མང་ཚོགས་སྟོང་ཕྲག་མང་པོས་སྤྱི་འབངས་ཀྱི་སྲིད་དབང་འཕྲོག་མཁན་དམག་གི་སྒྲིག་འཛུགས་ལ་ཞི་བའི་ཐོག་ནས་ངོ་རྒོལ་བསྟུད་མར་བྱེད་བཞིན་པ་དང་བསྟུན། ཁ་སང་ཕྱི་ཚེས་ ༣ ཉིན་དྲག་དམག་གིས་ཉེན་བརྡ་མེད་པའི་ཐོག་ནས་མེ་མདའ་སོགས་འཕངས་ཏེ་རང་ལོ་ ༡༤ དང་ ༡༩ ཅན་གཉིས་ཚུད་པའི་མི་གྲངས་ ༣༨ རྐྱེན་ལམ་དུ་བཏང་ཡོད་འདུག
འཛམ་གླིང་མཉམ་འབྲེལ་རྒྱལ་ཚོགས་ཀྱི་འབར་མའི་དམིགས་བསལ་སྐུ་ཚབ་ལྕམ་ཀི་རི་སི་ཊིན་སི་ཁེ་རེ་ནར་ (Christine Schraner) ལགས་ཀྱིས། འདི་ལོའི་ཕྱི་ཟླ་ ༢ ཚེས་ ༡ ཉིན་དྲག་དམག་གིས་སྲིད་དབང་འཕྲོག་པ་ནས་བཟུང་ད་ཐེངས་ལྟ་བུ་མི་སྲོག་ཤོར་མྱོང་མེད། ད་བར་ཁྱོན་མི་གྲངས་ ༥༠ ལྷག་རྐྱེན་འདས་དང་། མི་གྲངས་ ༡༢༠༠ ལྷག་འཛིན་བཟུང་བྱས་ཏེ་གར་སོང་ཆ་མེད་དུ་གྱུར་ཡོད་སྐོར་དང་། རྒྱལ་སྤྱིའི་སྒྲིག་འཛུགས་དང་མགོ་འཁྲིད་ཚོས་ཐབས་ཇུས་གང་ཡོད་སྤྱད་དེ་གནས་སྟངས་ཞི་འཇགས་བཟོ་དགོས་པ་དང་། དེའི་ཆེད་རྒྱལ་སྤྱིའི་སྤྱི་ཚོགས་ཡོངས་ཀྱིས་ནུས་པ་མཉམ་སྤུངས་བྱེད་དགོས་སྐོར་འབོད་སྐུལ་ཞུས་འདུག
དྲག་དམག་སྒྲིག་འཛུགས་ཀྱིས་འབར་མའི་སྲིད་དབང་བཟུང་ནས་རྒྱལ་ཡོངས་ནང་ངོ་རྒོལ་ལས་འགུལ་བ་རྣམས་འབུར་འཇོམས་གཏོང་ཆེད་གྲོང་ཁྱེར་དང་གྲོང་སྡེ་ཆེ་ཆུང་ཚང་མའི་ནང་མེ་མདའ་ཐོགས་པའི་དམག་མི་བཀྲམ་སྟེ། ཟླ་སྔོན་མའི་ཕྱི་ཚེས་ ༢༧ ཉིན་ཞི་བའི་ངོ་རྒོལ་བ་ ༡༨ རྐྱེན་འདས་སུ་བཏང་ཡོད་ནའང་། ད་བར་འབར་མའི་ས་ཁུལ་འདྲ་མིན་ནང་མི་མང་སྟོང་ཕྲག་མང་པོས་དམག་གི་སྒྲིག་འཛུགས་ངོས་ནས་སྲིད་དབང་མི་མང་ལ་རྩིས་སྤྲོད་བྱས་ཏེ་དམངས་གཙོ་བསྐྱར་གསོ་དགོས་པ་དང་། ལྕམ་ཨང་སན་སུའུ་ཀེ་ (Aung San Suu Kyi) གཙོས་པའི་སྤྱི་འབངས་ཀྱི་མགོ་འཁྲིད་ཚོ་འཕྲལ་དུ་ཀློད་གྲོལ་དགོས་པའི་འབོད་ཚིག་སྒྲོག་མུས་ཡིན་པ་རེད།
སྲིད་འཛིན་བྷའེ་ཌིན་མཆོག་གིས་སྣེ་ཁྲིད་པའི་ཨ་རིའི་གཞུང་གིས་འབར་མའི་དམག་གི་སྒྲིག་འཛུགས་ལ་དཔལ་འབྱོར་གྱི་ཉེས་ཆད་བཅད་དེ་སྲིད་དབང་མང་ཚོགས་ཀྱི་མགོ་འཁྲིད་ལ་རྩིས་སྤྲོད་དགོས་པའི་གནོན་ཤུགས་སྤྲད་ཡོད་ལ། ཟླ་འདིའི་ཕྱི་ཚེས་ ༢ ཉིན་ལྷོ་ཤར་ཨེ་ཤ་ཡའི་རྒྱལ་ཁབ་ཀྱི་ཕྱི་སྲིད་བློན་ཆེན་རྣམས་ཀྱིས་འབར་མའི་སྐོར་ནས་དམིགས་བསལ་ཚོགས་འདུ་ཞིག་ཚོགས་ཡོད་ནའང་། རྒྱལ་ཁབ་རེ་ཟུང་གིས་མ་གཏོགས་འབར་མའི་དམག་གིས་ལྕམ་ཨང་སན་སུའུ་ཀེ་ཀློད་གྲོལ་དགོས་སྐོར་བཤད་མི་འདུག དེ་བཞིན་ཁ་སང་གི་གནས་སྟངས་ཛ་དྲག་དང་བསྟུན། དབྱིན་ཡུལ་གྱིས་ཟླ་འདིའི་ཕྱི་ཚེས་ ༥ ཉིན་རྒྱལ་ཚོགས་ཀྱི་བདེ་འཇགས་ལྷན་ཚོགས་བསྐྱར་དུ་ཚོགས་དགོས་སྐོར་བཤད་ཡོད་ནའང་། དེ་སྔོན་རྒྱ་ནག་དང་ཨུ་རུ་སུ་གཉིས་ཀྱིས་འབར་མའི་གནད་དོན་དེ་ནང་སྲིད་ཅིག་ཡིན་སྐོར་བཤད་དེ་རྒྱལ་ཚོགས་ཀྱི་སྐྱོན་བརྗོད་བསྒྲགས་གཏམ་བསྒྲག་རྒྱུར་བཀག་འགོག་བྱས་ཡོད་པ་ལྟར། ད་ཐེངས་ཀྱང་དེ་ལྟར་ཡོང་སྲིད་སྐོར་ཚོད་དཔག་བྱེད་ཀྱིན་འདུག
ཡིན་ནའང་། ཁ་སང་ཨ་རིའི་རྒྱལ་སྲིད་ལྷན་ཁང་གི་མགྲིན་ཚབ་པ་ནེཌ་པཱ་རའེ་སི་ (Ned Price) ཡིས་འབར་མའི་དམག་གིས་མང་ཚོགས་སྟེང་འདི་ལྟ་བུའི་དྲག་སྤྱོད་སྤེལ་བ་དེར་བློ་ཕམ་ཆེན་པོ་བྱུང་ཡོད་པ་དང་། ཨ་རིའི་ངོས་ནས་རྒྱལ་ཁབ་གཞན་ཚང་མས་མགྲིན་དབྱངས་གཅིག་གི་ཐོག་ནས་འབར་མའི་དམག་གིས་རང་གི་མི་སེར་ཐོག་ཚད་ལས་བརྒལ་བའི་དྲག་སྤྱོད་སྤེལ་བཞིན་པར་སྐྱོན་བརྗོད་བྱེད་དགོས་པ་དང་། ལྷག་པར་དུ་རྒྱ་ནག་དེ་སྔར་ནས་འབར་མའི་མཐུན་གྲོགས་རྒྱལ་ཁབ་ཅིག་ཡིན་སྟབས། རྒྱ་ནག་ངོས་ནས་ད་ལྟའི་འབར་མའི་གནས་སྟངས་ཞི་འཇགས་ཡོང་རྒྱུར་རོགས་འདེགས་བྱ་དགོས་སྐོར་སྐུལ་འདེད་བྱས་ཡོད་འདུག
འབར་མའི་དམག་སྤྱི་མིན་ཨང་ལེང་ (Min Aung Hlaing) གིས་སྣེ་ཁྲིད་པའི་དམག་གི་སྒྲིག་འཛུགས་ཀྱིས་བདེན་དཔང་གང་ཡང་མེད་པའི་ཐོག་ནས། འདས་ལོའི་ཕྱི་ཟླ་ ༡༡ ནང་བསྡུས་པའི་འབར་མའི་རྒྱལ་ཡོངས་འོས་བསྡུ་དེ་དྲང་བདེན་བྱུང་མེད་སྐོར་བརྗོད་དེ། འོས་བསྡུའི་ཁྲོད་རྒྱལ་ཁ་ཆེན་པོ་བླངས་པའི་ལྕམ་ཨང་སན་སུའུ་ཀེ་གཙོས་པའི་འབར་མའི་སྲིད་འཛིན་དང་། རྒྱལ་ཡོངས་ཡར་ཐོན་ཚོགས་པའི་ (NDL) མགོ་འཁྲིད་མང་པོ་འཛིན་བཟུང་བྱས་ཡོད་ལ། ད་དུང་ཉེ་ཆར་རྒྱལ་ཚོགས་ཀྱི་འབར་མའི་དམིགས་བསལ་སྐུ་ཚབ་ཀྱིས་དམག་གི་སྒྲིག་འཛུགས་ལ་དཔལ་འབྱོར་ཉེས་ཆད་དང་། རྒྱལ་སྤྱིའི་སྤྱི་ཚོགས་ནས་ཁེར་ཕུད་གཏང་སྲིད་པའི་ཉེན་བརྡ་གཏོང་སྐབས། འབར་མའི་དམག་གིས། ང་ཚོ་དཔལ་འབྱོར་གྱི་ཉེས་ཆད་ལ་གོམས་ཡོད། འབྱུང་འགྱུར་ང་ཚོར་མཐུན་གྲོགས་རེ་ཟུང་ལས་མེད་པར་གནས་ཐབས་ཤེས་དགོས། ཞེས་ལན་འདེབས་བྱས་ཡོད་པ་རེད།
གསར་འགོད་པ། པ་སངས་ཚེ་རིང་།
མང་གཙོ་དམག་གཙོ་ལ་འགྱུར་བ་མ་རེད་དམ་།