རྒྱ་ནག་གི་དབང་ཡོད་སྣང་མེད་དུ་འཇོག་མི་རུང་བའི་འབོད་སྐུལ་ཞུས་འདུག

རྒྱ་ནག་གིས་བོད་དང་ཡུ་གུར། ཧོང་ཀོང་དང་ཐའེ་ཝན་བཅས་ཀྱི་མི་མང་གི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བཞིན་པ་དང་འབྲེལ་ཨ་རི་དང་ཡུ་རོབ་གཙོས་པའི་འཛམ་གླིང་རྒྱལ་ཁབ་ ༣༠ ལྷག་ནས་རྒྱ་ནག་ལ་ཁ་གཏད་གཅོག་འཆར་ཡོད་པ་རེད།

རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཁ་སང་ནུབ་གླིང་རྒྱ་མཚོ་བྱང་མའི་དམག་དོན་སྒྲིག་འཛུགས་ (Nato) ཀྱི་སྤྱི་ཁྱབ་འགན་འཛིན་ཇེན་སི་ (Jens Stoltenberg) ལགས་ཀྱིས། ཡུ་རོབ་གྲོས་ཚོགས་ཀྱི་བདེ་སྲུང་དང་ཕྱི་སྲིད་ལས་དོན་གྱི་ཚོགས་འདུའི་སྟེང་། ཨ་རི་དང་ཡུ་རོབ་མཐུན་ཚོགས་གཙོས་པའི་མཐུན་ཕྱོགས་རྒྱལ་ཁབ་ཁག་གི་མཐུན་སྒྲིལ་སླར་གསོ་བྱས་ཏེ།  ཨེ་ཤ་ཡའི་ཞི་བདེ་རྒྱ་མཚོའི་ཁུལ་དུ། རྒྱ་ནག་གི་དྲག་ཤུགས་རྒྱ་སྐྱེད་དང་འཇིགས་སྐུལ་གྱི་བྱ་སྤྱོད་མཚམས་འཇོག་དགོས་པའི་འབོད་སྐུལ་ཞུས་ཡོད་པ་རེད།

དེ་འབྲེལ་གནས་ཚུལ་ནང་སྐུ་ཞབས་ཇེན་སི་ལགས་ཀྱིས། རྒྱ་ནག་ནི་ང་ཚོ་ཐུན་མོང་གི་རིན་ཐང་ལ་བརྩི་འཇོག་མི་བྱེད་པའི་སྲིད་དབང་སྒེར་གཅོད་གཞུང་ཞིག་ཡིན་སྟབས། རྒྱ་ནག་གི་འཕེལ་རྒྱས་ཀྱིས་ང་ཚོར་གནོད་ཚབས་ཆེ་བའི་ཁ་གཏད་གཅོག་གི་ཡོད། ད་ལྟ་རྒྱ་ནག་འཛམ་གླིང་གི་རྒྱལ་སྲུང་བདེ་འཇགས་ཀྱི་མ་དངུལ་ཆེ་ཤོས་ཨང་གཉིས་པ་དང་འཛམ་གླིང་གི་དཔལ་འབྱོར་སྟོབས་ཤུགས་ཆེ་ཤོས་ཆགས་ལ་ཉེ་བ་དང་བསྟུན། དེང་རབས་ཅན་གྱི་དམག་སྲིད་ལས་དོན་ཚད་མཐོའི་རྒྱ་སྐྱེད་གཏོང་བཞིན་ཡོད། དེར་བརྟེན། ནུབ་གླིང་བྱང་མའི་དམག་དོན་སྒྲིག་འཛུགས་ཀྱི་མཐུན་གྲོགས་ཁག་མཉམ་འབྲེལ་ཐོག་གནས་རྒྱུ་གལ་ཆེན་པོ་རེད། ཅེས་བརྗོད་ཡོད་པ་དང་། ནུབ་གླིང་བྱང་མའི་དམག་དོན་སྒྲིག་ཁོངས་སུ་ཡུ་རོབ་དང་བྱང་ཨ་རིའི་རྒྱལ་ཁབ་ ༣༠ ཙམ་ཡོད་པ་རེད།

དེ་བཞིན། ཁ་སང་ནས་ཨ་རིའི་རྒྱལ་སྲིད་དྲུང་ཆེ་ཨན་ཊོ་ནེ་ (Antony J. Blinken) ལགས་དང་རྒྱལ་སྲུང་དྲུང་ཆེ་ཨ་སི་ཊིན་ (Lloyd J. Austin) ལགས་གཉིས་ལྷོ་ཀོ་རི་ཡ་དང་ཉི་ཧོང་ནང་གཞུང་འབྲེལ་སྐོར་སྐྱོད་གནང་བ་བརྒྱུད། ཨ་རིའི་སྲིད་འཛིན་གསར་བ་རྗོ་བྷའེ་ཌན་གཞུང་ནས་རྒྱ་གར་རྒྱ་མཚོའི་ཁུལ་གྱི་ཨ་རིའི་ཕྱོགས་གཏོགས་ཀྱི་རྒྱལ་ཁབ་ཁག་བར་གྱི་མཐུན་ལམ་སྲ་བརྟན་དུ་བཏང་ནས་རྒྱ་ནག་ལ་ཁ་གཏད་གཅོག་རྒྱུ་ཡིན་སྐོར་བསྒྲགས་ཡོད་པ་རེད།

གནས་ཚུལ་ནང་ཨ་རི་གཙོ་བྱས་པའི་ནུབ་གླིང་བྱང་མའི་དམག་དོན་སྒྲིག་འཛུགས་དང་ཞི་བདེ་རྒྱ་མཚོའི་ཁུལ་གྱི་ཨ་རིའི་མཐུན་གྲོགས་རྒྱལ་ཁབ་ཁག་མཉམ་འབྲེལ་གྱིས། རྒྱ་ནག་གིས་བཙན་དབང་སྟོབས་ཤུགས་བཀོལ་སྤྱད་ཀྱིས། བོད་དང་ཤིན་ཅང་གི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བཞིན་པ་དང་། ཧོང་ཀོང་གི་རང་སྐྱོང་གནས་བབ་ལ་བརྡབ་གསུག  དེ་བཞིན་ཐེ་ཝན་གྱི་མང་གཙོར་འབུར་འཇོམ་བྱེད་བཞིན་པ་སོགས་ཀྱི་འགན་ལེན་བྱེད་དུ་འཇུག་གི་ཡིན་སྐོར་བརྗོད་འདུག

ཡང་རྒྱ་ནག་གིས་བོད་དང་ཡུ་གུར་། ཧོང་ཀོང་དང་ཐའེ་ཝན་བཅས་ཀྱི་མང་གཙོ་དང་རང་དབང་། འགྲོ་བ་མིའི་ཐོབ་ཐང་སོགས་ལ་ཁྱད་གསོད་དང་རྡོག་རོལ་གཏོང་གི་ཡོད་པའི་གནད་དོན་དང་འབྲེལ། ད་ལྟ་སུད་སིའི་གྲོང་ཁྱེར་ཇི་ནི་ཝའི་ནང་འཚོགས་བཞིན་པའི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་ཐེངས་ ༤༦ ཐོག་ཨ་རི་དང་རྒྱལ་ཚོགས་ཀྱི་ཚོགས་མི་རྒྱལ་ཁབ་བཅུ་གསུམ་གྱིས། རྒྱ་ནག་གིས་བོད་དང་ཤིན་ཅང་། ཧོང་ཀོང་བཅས་ཀྱི་མི་མང་གི་འགྲོ་བ་མིའི་ཐོབ་ཐང་རྡོག་རྡོལ་གཏོང་བཞིན་པའི་གནས་སྟངས་གླེང་སློང་དང་འབྲེལ་རྒྱ་ནག་ལ་སྐྱོན་བརྗོད་བྱས་ཡོད་པ་རེད།

གཞན་ཡང་། ཨེ་ཕོག་དུས་བབ་སྟེང་སྤེལ་བའི་གནས་ཚུལ་ནང་། ཁ་སང་ཨ་རིའི་གྲོས་ཚོགས་གོང་མའི་འཐུས་མི་རོམ་ནེ་ (Sen. Mitt Romney) ལགས་ཀྱིས། ཕྱི་ལོ་ ༢༠༢༢ ལོར་རྒྱ་ནག་ཏུ་འཚོགས་གཏན་འཁེལ་བའི་རྒྱལ་སྤྱིའི་ཨོ་རྩལ་འགྲན་ཚོགས་དེ། རྒྱ་ནག་ནང་འཚོག་རྒྱུ་མཚམས་འཇོག་དགོས་པ་མ་ཟད། རྒྱལ་སྤྱིའི་སྤྱི་ཚོགས་ཀྱིས་འཛུལ་ཞུགས་མི་གནང་བའི་འབོད་སྐུལ་ཞུས་ཡོད་པ་རེད།

དེ་ཡང་གྲོས་ཚོགས་འཐུས་མི་རོམ་ནེ་ལགས་ཀྱིས་རྒྱལ་སྤྱིའི་སྤྱི་ཚོགས་ཀྱིས་རྒྱ་ནག་ལ་སྐྱོན་བརྗོད་བྱེད་འོས་པ་ཞིག་ཡིན་པ་དང་། རྒྱུ་མཚན་ནི་རྒྱ་ནག་དམར་ཤོག་ཚོགས་པས་ཧོང་ཀོང་གི་རང་སྐྱོང་གནས་བབ་ལ་སྒྱུར་བཅོས་བཏང་སྟེ། གསར་འགོད་པ་དང་མི་མང་གི་ཞི་བའི་གོམ་བགྲོད་བཀག་སྡོམ་དང་། ཡུ་གུར་བ་གཙོས་པའི་གྲངས་ཉུང་མི་རིགས་གཞན་གྱི་རིགས་རྒྱུད་རྒྱ་རིགས་ཅན་དུ་བསྒྱུར་ཐབས་དང་ཁོ་ཚོའི་ནང་མི་ཁ་བྲལ། དེ་བཞིན་ངལ་སྩོལ་དང་སློབ་གསོ་སྒྱུར་བཀོད་ཁང་སོགས་སུ་བཙན་གྱིས་བཅུག་གི་ཡོད་སྐོར་སོགས་བརྗོད་དེ། རྒྱལ་སྤྱིའི་རྩེད་འགྲན་པ་རྒྱ་ནག་གི་དགུན་ཁའི་ཨོ་རྩལ་འགྲན་ཚོགས་ནང་མི་ཞུགས་རྒྱུ་དང་། ཨ་རི་གཙོས་པའི་འཛམ་གླིང་རྒྱལ་ཁབ་ཁག་གིས། རྒྱལ་སྤྱིའི་ཨོ་རྩལ་འགྲན་ཚོགས་ཀྱི་རྒྱུན་ལས་རྣམས་ལ་སྐུལ་མ་བཏང་སྟེ། རྒྱ་ནག་ཏུ་ཨོ་རྩལ་འགྲན་ཚོགས་འཚོག་རྒྱུ་མཚམས་འཇོག་དགོས་པའི་འབོད་སྐུལ་ཞུས་ཡོད་པ་རེད།

གསར་འགོད་པ། སྐལ་བཟང་སྦྱིན་པ།