བཀུར་འོས་སྤྱི་འཐུས་རྣམས་སྨྱོས་བ་རེད་དམ།

                                                                 སྐལ་བཟང་རྣམ་རྒྱལ། (སུད་སི།)

ཕྱི་ལོ་ ༡༩༩༡ ནང་༧གོང་ས་༧སྐྱབས་མགོན་ཆེན་པོ་མཆོག་གིས་མང་གཙོའི་རིང་ལུགས་ལ་མདུན་སྤོས་ཆེན་པོས་བཙན་བྱོལ་བོད་མིའི་བཅའ་ཁྲིམས་ཀྱི་ཟིན་བྲིས་གསོལ་སྩལ་དང་། བོད་མི་མང་སྤྱི་འཐུས་ལྷན་ཚོགས་སྐབས་བཅུ་གཅིག་པས་ (༡༩༩༡ ནས་ ༡༩༩༦ བར) བཙན་བྱོལ་བོད་མིའི་བཅའ་ཁྲིམས་ཟིན་བྲིས་ཀྱིས་གཙོས་པའི་ཁྲིམས་དང་སྒྲིག་གཞི་མང་པོ་གཏན་འབེབས་ཀྱིས་མང་གཙོའི་རིང་ལུགས་ཡང་དག་པ་ཞིག་གི་ནང་བསྐྱོད་མགོ་ཚུགས་ཤིང་། སྐབས་དེའི་སྤྱི་འཐུས་ཚོགས་གཙོ་སློབ་དཔོན་ཟམ་གདོང་རིན་པོ་ཆེས་གང་ཟག་གི་དབང་བསྒྱུར་ནས་ཁྲིམས་ཀྱི་དབང་བསྒྱུར་དུ་འཕོས་པ་ཡིན་ཞེས་སྐབས་མང་པོར་གསུངས་པ་མ་ཟད། དེ་ལྟ་བུ་ཞིག་ཡིན་པའི་ཚོར་སྣང་ཡང་བོད་མིའི་སྤྱི་ཚོགས་ལ་སྤྲད་ཐུབ་པ་བྱུང་ཡོད། དེ་བཞིན་སྤྱི་འཐུས་སྐབས་བཅུ་གཉིས་པ་ (༡༩༩༦ ནས་ ༢༠༠༡ བར) བཅས་སྐབས་གཉིས་རིང་བོད་མིའི་སྤྱི་ཚོགས་ནང་རྙོག་གླེང་ཆེན་པོ་མང་པོ་བྱུང་ཡོད་ཀྱང་། བོད་མི་མང་སྤྱི་འཐུས་ལྷན་ཚོགས་ཀྱིས་དེ་དག་སེལ་ཐབས་ལ་ཕྱག་རྗེས་ཆེན་པོ་བཞག་ཡོད་པ་མ་ཟད། རང་གི་ས་མཚམས་ལས་ནམ་ཡང་བརྒལ་མེད། དེ་ནི་མང་གཙོའི་རིང་ལུགས་ཀྱི་དབང་ཚད་ཆ་བགོས་དང་སྟངས་འཛིན་ལྗིད་མཉམ་ལ་མེད་དུ་མི་རུང་བ་ཡིན།

འོན་ཀྱང་བར་ལམ་ལོ་ཤས་ནས་ང་ཚོ་བོད་པའི་སྤྱི་ཚོགས་ལ་མང་གཙོའི་རིང་ལུགས་དེ་འཚམས་པ་ཨེ་ཡོད་སྙམ་པའི་བསམ་བློ་ཡང་ཡང་འཁོར་ཞིང་། མང་གཙོའི་རིང་ལུགས་དེ་རང་གི་མི་ཚེའི་ཀུན་སྤྱོད་ནང་མེད་ན་ཇི་ཙམ་ཁ་ནས་བཤད་ཀྱང་དྭང་བ་འདྲེན་མི་ཐུབ་པ་ནི་ཉིན་ཤས་གོང་གི་བོད་མིའི་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་གསུམ་སྡེབ་གཅིག་ཏུ་འཕོ་འགྱུར་བཏང་བ་ལས་གསལ་པོ་ཆགས་སོང་། དེ་སྔ་བོད་ནས་ཕེབས་པའི་མི་རབས་རྒན་པ་རྣམས་ཀྱི་སྐབས་སུ་བྱུང་ཡོད་ན་ཁོང་ཚོར་དེང་རབས་ཀྱི་ཤེས་ཡོན་མ་བྱུང་བས་ཐུགས་ཁག་མེད་ཀྱང་། ད་ལྟ་སྤྱི་འཐུས་ཕལ་ཆེ་བ་དེང་རབས་ཀྱི་ཤེས་ཡོན་ཐོབ་པ་ཤ་སྟག་ཏུ་རློམ་པ་ཡིན་པས་དེ་ལྟ་བུ་བསམ་བཞིན་དུ་ནོར་འཁྲུལ་ཚབས་ཆེ་གཏོང་དགོས་དོན་གང་ཡིན་ནམ། དངོས་གནས་དེ་ཚོས་མང་གཙོའི་རིང་ལུགས་ཀྱི་ལྟ་གྲུབ་ཀྱི་གཞི་རིམ་གྱི་གནས་ཚུལ་ཙམ་ཡང་མཁྱེན་གྱི་ཨེ་ཡོད་སྙམ་པ་ཞིག་ཡོང་གི་འདུག  མ་གཞི་ནས་གྲོས་ཚོགས་ཀྱི་སྡིངས་ཆ་དེ་བོད་ཀྱི་རྩ་དོན་དང་བོད་མི་སྐྱབས་བཅོལ་བའི་བདེ་སྡུག་གླེང་སློང་ཞུ་ཡུལ་ཞིག་ཡིན་པ་ལས། སོ་སོ་སྒེར་གྱི་ང་རྒྱལ་ཆེ་ལོད་བསྟན་ས་དང་། ཆོལ་ཁའི་ཞེན་ཁོག་རོ་ལངས་བརྒྱབ་སའི་ས་ཆ་ཞིག་གཏན་ནས་མ་རེད། ལྷག་པར་དུ་ད་རེས་གྲོས་ཚོགས་ནང་བོད་མིའི་ཆེས་མཐོའི་ཁྲིམས་ཞིབ་ཁང་གི་རྐང་ལག་གཏུབ་པའི་བཅའ་ཁྲིམས་བསྐྱར་བཅོས་ཀྱི་གྲོས་འཆར་ཞིག་འཁྱེར་ཡོད་ཀྱང་གཏན་འབེབས་ཐུབ་མེད། དེ་ཚོས་དབང་ཚད་ཆ་བགོས་དང་སྟངས་འཛིན་ལྗིད་མཉམ་གྱི་ལྟ་གྲུབ་ཕྱོགས་ཙམ་ཡང་མི་མཁྱེན་པ་མ་ཟད། ད་དུང་དགའ་རབ་ཤེས་ཀྱི་ཡོད་སྙམ་པའི་ང་རྒྱལ་དེ་བསྟན་གྱི་ཡོད། གལ་ཏེ་བོད་མིའི་མང་གཙོའི་རིང་ལུགས་ཀྱི་འཕྲོད་བསྟེན་ཐོག་ནས་བལྟས་ན་ད་རེས་ཆེས་མཐོའི་ཁྲིམས་ཞིབ་པ་འཕོ་འགྱུར་བཏང་བ་དེ་གནས་ཚུལ་ཧ་ཅང་ཚབས་ཆེན་ཞིག་ཡིན་རུང་། སྤྱི་འཐུས་དེ་ཚོས་གནས་ཚུལ་ཧ་ཅང་ཆུང་ངུ་ཞིག་ལ་བརྩི་ཚུལ་ལ་བལྟས་ན་དངོས་གནས་སྤྱི་འཐུས་ཚོའི་བསམ་བློའི་གནས་ཚད་ཇི་ཙམ་དམའ་པོ་ཡིན་པ་གསལ་པོ་རེད་འདུག ང་ཚོས་དེ་ཚོའི་ལག་ཏུ་དབང་ཆ་སྤྲད་ན་འཕྲལ་ཕུགས་གཉིས་ཀར་གནོད་གཞི་ལས་ཕན་ཐོགས་ཏིལ་འབྲུ་ཙམ་ཡང་མེད་པ་ཇེ་གསལ་རེད། སྤྱི་འཐུས་ལྷན་ཚོགས་ཀྱི་སྤྱི་འཐུས་མང་ཆེ་བ་ནི་ལུས་ངག་གི་རྣམ་རིག་ལ་བལྟས་ན་མང་གཙོའི་རིང་ལུགས་ཀྱི་དྲི་མ་ཙམ་ཡང་མེད་པར། སྤྱིར་བཏང་གི་མི་ཕལ་པ་ལས་ཁོང་ཁྲོ་ཆེ་བ་དང་། བརྣག་སེམས་ཆེ་བ། ཁེངས་དྲེགས་ཆེ་བ། ང་ལས་ལྷག་པ་སུ་ཡོད་སྙམ་པ་ཤ་སྟག་རེད། གྲོས་ཚོགས་ནི་མི་ངན་དེ་ཚོས་དབང་བསྒྱུར་ནས་སྤྱི་འཐུས་བསམ་ཤེས་ཅན་དང་ཡོན་ཏན་ཅན་འགའ་ཤས་ཡོད་པ་རྣམས་ཀྱང་མངོན་མ་ཐུབ་པ་ལྟ་བུ་ཆགས་འདུག ནུབ་ཕྱོགས་ཀྱི་དབུ་ཁྲིད་ཅིག་གིས་མང་གཙོའི་རིང་ལུགས་ནི་ལྐུགས་པས་དབང་བསྒྱུར་བ་ཞིག་རེད་ཅེས་གསུངས་པ་དེ་དེ་སྔ་གང་འདྲ་ཡིན་ནམ་སྙམ་པའི་ཐེ་ཚོམས་ཤིག་ཡོད་ཀྱང་། ད་ལྟ་ང་ཚོའི་མང་གཙོའི་རིང་ལུགས་ཀྱི་གནས་སྟངས་ལ་བལྟས་དུས་དངོས་རྭ་འཕྲོད་པ་ཞིག་ཡོང་གི་འདུག  ད་གཟོད་གཞི་ནས་མང་གཙོའི་རིང་ལུགས་ཀྱི་སྐྱོང་བ་པོ་རྣམས་གནས་ཚད་ལྡན་པ་མེད་ན་ཇི་ཙམ་གནོད་སྐྱོན་གཏོང་ཐུབ་ཀྱི་ཡོད་པ་མིག་མཐོང་ལག་ཟིན་བྱུང་བ་དེས་ང་ཚོའི་སྤྱི་ཚོགས་ལ་མང་གཙོའི་རིང་ལུགས་འོས་འཚམས་མེད་པ་ལ་སླར་ཡང་དྲན་བསྐུལ་ཞིག་བཏང་སོང་།

༧གོང་ས་༧སྐྱབས་མགོན་ཆེན་པོས་བོད་གཞུང་གི་སྐུ་དབང་ཆ་ཚང་རྩིས་སྤྲོད་གནང་སྟེ་ལོ་བཅུ་མ་འཁོར་གོང་ནས་ང་ཚོས་མང་གཙོའི་རིང་ལུགས་ཀྱི་ཡན་ལག་མེད་དུ་མི་རུང་བ་གཅོད་འབྲེག་ལ་བླ་ན་མེད་པའི་ལག་རྗེས་བཞག་ཡོད་ཀྱང་། དེ་ལ་གནོངས་འགྱོད་སྤུ་ཙམ་མེད་པར། ད་དུང་འཇོན་མདོག་མཁས་མདོག་གིས་ཕྱོགས་ཀུན་ཏུ་རྒྱལ་རྔ་བརྡུངས་པ་ནི་བླུན་པོ་མིན་ན་གང་རེད། སོ་སོ་བསྡད་སའི་ཤིང་སྡོང་གི་ཡལ་ག་དེ་གཅོད་འབྲེག་ལ་འབད་ན་མཐར་སོ་སོའང་ལྷུང་རྒྱུ་རེད། དེ་ཙམ་ཡང་མི་མཁྱེན་པའི་བཀུར་འོས་སྤྱི་འཐུས་རྣམ་པ་དེ་ཚོས་གཞན་གྱི་སྐུ་ཚབ་ཇི་ལྟར་བྱེད་ཐུབ། དེར་བརྟེན་༧གོང་ས་༧སྐྱབས་མགོན་ཆེན་པོ་བོད་མིའི་སྤྱི་ཚོགས་ལ་ཆོས་ཀྱི་ཕྱོགས་ནས་ལྟ་ཅི། སྲིད་ཕྱོགས་ནས་ཀྱང་ཇི་ཙམ་མེད་དུ་མི་རུང་བ་དང་བཀའ་དྲིན་ཆེན་པོ་ཡིན་པ་ནི་ང་ཚོའི་ཁ་སྟབས་དེ་དག་ལས་ཧ་ཅང་གསལ་པོ་ཆགས་ཡོད། ད་དུང་༧གོང་ས་མཆོག་ལས་མཁས་པ་དང་འཇོན་པ་ཡོད་མདོག་བྱེད་མཁན་གྲོས་ཚོགས་ནང་སྤྱི་འཐུས་མི་ཉུང་བ་ཞིག་ཡོད། དེ་དག་གིས་སོ་སོའི་ཀུན་སྤྱོད་དང་། ཤེས་ཚད། འཇོན་ཐང་སོགས་ལེགས་པར་ཤེས་པར་བྱས་ནས་ད་བར་བོད་ཀྱི་རྩ་དོན་དང་བཙན་བྱོལ་སྤྱི་ཚོགས་ལ་སྨན་པའི་ཞབས་འདེགས་ག་རེ་བསྒྲུབས་ཡོད་མིན་ལའང་བསམ་བློ་ངེས་པར་གཏོང་དགོས། བཀའ་དྲིན་ཅན་རྣམས་ལ་བཀའ་དྲིན་བསམ་ཤེས་བྱེད་དགོས་པའི་འཇིག་རྟེན་མི་ཆོས་ཙམ་ཡང་མ་ཤེས་ན་མི་དེ་ཟག་པའི་མཐའ་ལ་ལྷུང་ཟིན་པས་རེ་བ་བརྒྱབ་རྒྱུ་ལྷག་མེད། དེར་བརྟེན་རྒྱ་ཆེ་མང་ཚོགས་ཀྱིས་སྤྱི་འཐུས་དེ་དག་ངོས་ཟིན་པ་གནང་ནས་སླར་ཡང་འདེམས་རྒྱུ་མེད་པའི་འབོད་སྐུ་ཞུ་རྒྱུ་ཡིན།

ད་ལྟའི་ང་ཚོའི་བོད་མི་མང་སྤྱི་འཐུས་ལྷན་ཚོགས་དེ་མདོར་ན། ༡། བོད་ཀྱི་རྩ་དོན་སྒྲུབ་པ་ལ་འགོག་རྐྱེན་བྱེད་མཁན་དང་། ༢། མི་ངན་རྣམས་ཀྱི་གཡུལ་ས་དང་ཁ་ཕོ་སྒྲོགས་ས། ༣། ཆོལ་ཁའི་དུག་ནད་ཀྱི་འབྱུང་ཁུངས། ༤། མང་གཙོའི་རིང་ལུགས་ཀྱི་སྲོག་རྩ་གཅོད་ས་སོགས་ཡིན་ཞིང་། དེ་ལྟ་བུ་དེ་ཡོད་པ་ལས་མེད་པ་བཟང་བར་བརྟེན། ང་ཚོའི་སྤྱི་ཚོགས་ལ་མང་གཙོའི་རིང་ལུགས་དེ་འོས་འཚམས་མེད་ཅེས་བརྗོད་དགོས་པའི་རྒྱུ་མཚན་དེ་ལྟར་རེད།

མཐའ་མར་ད་ལན་ཆེས་མཐོའི་ཁྲིམས་ཞིབ་པ་གསུམ་པོ་འཕོ་འགྱུར་གྱི་གྲོས་འཆར་ལ་དགག་བྱ་གནང་མཁན་སྤྱི་འཐུས་བཅུ་པོས་ཞེན་ཁོག་དང་ང་རྒྱལ་གྱི་གཞན་དབང་དུ་མ་སོང་བར་ཁྲིམས་ཀྱི་དབང་བསྒྱུར་དང་མང་གཙོའི་རིང་ལུགས་སྲ་བརྟན་ལ་དགོངས་བཞེས་གནང་བར་བསྔགས་བརྗོད་ཞུ་རྒྱུ་ཡིན།

མཆན། གོང་བཀོད་བསམ་ཚུལ་རྩོམ་ཡིག་དེ་ནི་རྩོམ་པ་པོའི་དགོངས་ཚུལ་ཡིན་པ་ལས་འདི་ག་གསར་ཁང་གི་དགོངས་ཚུལ་ཡིན་པས་མ་ཁྱབ།