༧གོང་ས་མཆོག་དབུས་པའི་བོད་པའི་དགོན་སྡེ་ཁག་ཅིག་གིས་ཐའེ་ཝན་ནང་བྱུང་བའི་མེ་འཁོར་དོན་རྐྱེན་ཆེད་སྐྱབས་འཇུག་དང་སྨོན་ལམ་སོགས་འདོན་གྱི་ཡོད་འདུག
ཟླ་འདིའི་ཕྱི་ཚེས་ ༣ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་ཉེ་ལམ་ཐའེ་ཝན་ནང་མེ་འཁོར་བརྡབ་སྐྱོན་གྱི་གོད་ཆག་བྱུང་བ་དང་འབྲེལ། ཐའེ་ཝན་སྲིད་འཛིན་ཚའེ་དབྱིང་ཝན་ (Tsai Ing-wen) ལགས་ཀྱི་མཚན་ཐོག་ལ་ཐུགས་གསོའི་གསུང་འཕྲིན་ཞིག་སྩལ་བའི་ནང་། ངོས་ནས་ཁྱེད་དང་སྟབས་མ་ལེགས་པར་གོད་ཆག་འདིའི་ཁྲོད་ནས་འདས་གྲོངས་སུ་ཕྱིན་པ་རྣམས་ཀྱི་ཤུལ་ལུས་ནང་མི་དང་གཞན་རྣམས་ལ་སེམས་གསོ་ཞུ་ཡི་ཡོད། ཅེས་དང་། ཐའེ་ཝན་གྱི་མི་མང་དུས་ཡུན་རིང་པོ་ནས་ངོས་དང་སེམས་ཐག་ཉེ་བོ་ཡོད་སྟབས། འདི་ལྟ་བུའི་དོན་རྐྱེན་རེ་བྱུང་སྐབས་ང་ཚོ་ཚང་མ་གོད་ཆག་ཆེན་པོ་ཞིག་དང་འཕྲད་པ་ལྟ་བུ་འདུག ཅེས་གསུངས་ཡོད་འདུག
མེ་འཁོར་བརྡབ་སྐྱོན་གྱི་གནས་ཚུལ་དེ་བྱུང་མ་ཐག ཐའེ་ཝན་རྒྱལ་སྤྱིའི་བོོད་བརྒྱུད་ནང་བསྟན་ཞིབ་འཇུག་ཚོགས་པའི་གོ་སྒྲིག་འོག་བོད་པའི་དགེ་འདུན་པ་ཚོ་དངོས་སུ་གོད་ཆག་བྱུང་ཡུལ་དུ་ཆེད་ཕེབས་ཀྱིས་སྨོན་ལམ་གསུང་འདོན་གནང་བར། ཐའེ་ཝན་གྱི་སྲིད་འཛིན་དང་ཧྭ་ལེན་ (Hua-lien) རྫོང་གི་རྫོང་དཔོན་གཉིས་ནས་ཐུགས་རྗེ་ཆེ་ཞུས་ཡོད་འདུག་ལ། ཐའེ་ཝན་གཞུང་ངོས་ནས་ཕྱི་ཚེས་ ༣ ནས་ཉིན་གྲངས་གསུམ་རིང་རྒྱལ་ཡོངས་ཀྱི་རྒྱལ་དར་ཕྱེད་ཀ་མར་ཕབ་དུ་བཅུག་སྟེ་འདས་པོ་རྣམས་ལ་མྱ་ངན་རྗེས་དྲན་ཞུས་ཡོད་པ་རེད། གཞན་ཡང་ཁ་སང་རྒྱ་གར་ལྷོ་ཕྱོགས་ཀྱི་གདན་ས་ཁག་ཏུའང་མེ་འཁོར་བརྡབ་སྐྱོན་ཁྲོད་འདས་གྲོངས་སུ་སོང་བ་རྣམས་ལ་སྨོན་ལམ་གསུང་འདོན་གནང་ཡོད་འདུག
ཐའེ་ཝན་གྱི་ (The Straits Times) གསར་ཁང་གི་གནས་ཚུལ་ལྟར་ན། ཟླ་འདིའི་ཕྱི་ཚེས་ ༢ ཉིན་གྱི་ས་གནས་ཀྱི་སྔ་དྲོའི་ཆུ་ཚོད་ ༩ པ་ཙམ་ལ། ཐའེ་ཝན་གྱི་ཨང་རྟགས་ ༤༠༨ ཅན་གྱི་འགྲུལ་སྐྱེལ་མེ་འཁོར་དེ་ཕུག་ལམ་ཞིག་བརྒྱུད་ནས་ཐའེ་ཝན་ལྷོ་ཤར་ཐའེ་ཐང་ (Taitung) ཞེས་པའི་གྲོང་ཁྱེར་དུ་སྐྱོད་སྐབས། གློ་བུར་དུ་འཛུགས་སྐྲུན་རླངས་འཁོར་ཞིག་དང་གདོང་ཐུག་བརྒྱབ་སྟེ། མེ་འཁོར་ནང་ལས་བྱེད་དང་འགྲུལ་བ་བཅས་ཁྱོན་མི་གྲངས་ ༤༩༦ ཡོད་པའི་ཁྲོད་ནས་བྱིས་པ་ལོ་ན་ ༦ ཚུད་པའི་ཉུང་མཐར་འགྲུལ་བ་ ༥༠ འདས་གྲོངས་དང་། འགྲུལ་བ་ ༡༤༠ ལྷག་ལ་སྐྱོན་ཕོག་སྟེ་སྨན་ཁང་དུ་བསྐྱལ་ཡོད་པ་རེད།
གསར་འགོད་པ། བསྟན་འཛིན་ཕུར་བུ།
