ཨོ་གླིང་གཞུང་གིས་རྒྱ་ནག་གི་རྒྱུད་གཅིག་ལམ་གཅིག་གི་གྲོས་ཆོད་རྩིས་མེད་བཏང་།

ཁ་སང་ཕྱི་ཚེས་ ༢༡ ཉིན་ཨོ་གླིང་གཞུང་གིས་རྒྱལ་ཡོངས་ཀྱི་ཁེ་ཕན་ལ་བལྟས་ཏེ་རྒྱ་ནག་གི་རྒྱུད་གཅིག་ལམ་གཅིག་གི་ཚོང་ལས་མཉམ་འབྲེལ་གྱི་གྲོས་ཆོད་རྩིས་མེད་བཏང་བ་གསལ་བསྒྲགས་གནང་བ་དེར་ཡུལ་དེའི་རྒྱ་ནག་གཞུང་ཚབ་ཁང་གིས་སྐྱོན་བརྗོད་དྲག་པོ་བྱས་འདུག

དེའི་ཐད་ཨོ་གླིང་གི་ཕྱི་སྲིད་བློན་ཆེན་མེ་རི་སི་པེན་ (Marise Payne) ལགས་ཀྱིས། འདས་ལོའི་ཕྱི་ཟླ་ ༡༢ པའི་ནང་ཨོ་གླིང་གྲོས་ཚོགས་ཀྱིས་དབུས་གཞུང་ལ་མངའ་སྡེ་ཁག་གི་ཕྱི་འབྲེལ་ཐག་གཅོད་ལ་ཐེ་གཏོགས་བྱེད་ཆོག་པའི་དབང་ཆ་སྤྲད་ཡོད་པར་བརྟེན། ད་ལྟ་མངའ་སྡེ་གཞུང་གིས་ཕྱིའི་རྒྱལ་ཁབ་ཁག་ལ་ཕྱི་འབྲེལ་གྱི་ཆོད་ཡིག་འཇོག་སྐབས་དབུས་གཞུང་ལ་ལམ་སྟོན་ཞུ་དགོས་པ་དང་། ཐེངས་འདིའི་དབུས་གཞུང་གི་གྲོས་ཆོད་གཉིས་རྩིས་མེད་བཟོས་པའི་ཐག་གཅོད་དེ་ནི་ཕྱིའི་རྒྱལ་ཁབ་ཁག་ལ་ཕྱི་འབྲེལ་མུ་མཐུད་འཛིན་ཆེད་ཡིན་པ་ལས་རྒྱལ་ཁབ་བྱེ་བྲག་པར་ཁ་གཏད་གཅོག་ཐབས་ལ་དམིགས་པ་ཞིག་མིན་སྐོར་དང་། འཛམ་གླིང་ཁྱོན་ཡོངས་ལ་ཏོག་དབྱིབས་གཉན་རིམས་ཁྱབ་གདལ་ཕྱིན་རྗེས། ཨོ་གླིང་གཞུང་གིས་རྒྱ་ནག་དང་མཉམ་འབྲེལ་བྱེད་ཕྱོགས་ལ་འགྱུར་བ་ཐེབས་ཏེ་དངོས་ཡོད་ཀྱི་ཐོག་ནས་རྒྱལ་ཁབ་ཁག་ལ་ཕྱི་འབྲེལ་འཛིན་ཐབས་བྱེད་ཀྱི་ཡོད་སྐོར་བརྗོད་འདུག

ཨོ་གླིང་གི་སྲིད་བློན་སི་ཁོ་ཊི་མོ་རི་སོན་ (Scott Morrison) ལགས་ཀྱི་སྲིད་གཞུང་གིས་རྒྱ་ནག་གཞུང་ལ་རྒྱལ་ཁབ་རིམ་པའི་ཐོག་ནས་རྒྱུད་གཅིག་ལམ་གཅིག་གི་ལས་གཞིའི་ཐོག་རྒྱུས་ལོན་གྲོས་ཆོད་ (MOU) འཇོག་རྒྱུར་དགག་བྱ་ཤུགས་ཆེན་བྱས་ཡོད་ནའང་། ཕྱི་ལོ་ ༢༠༡༨ དང་ ༢༠༡༩ སོ་སོར་ཨོ་གླིང་གི་ཝེག་ཊོ་རེ་ཡ་ (Victoria) མངའ་སྡེའི་ནང་འཛུགས་བསྐྲུན་ལས་གཞི་ཡར་རྒྱས་ཡོང་ཐབས་སུ་མངའ་སྡེའི་རིམ་པའི་ཐོག་རྒྱ་ནག་རྒྱལ་ཡོངས་ཡར་རྒྱས་དང་བཅོས་བསྒྱུར་ཚོགས་ཆུང་ (National Development and Reform Commission) ལ་ཕྱི་འབྲེལ་བཙུགས་ཏེ་རྒྱུད་གཅིག་ལམ་གཅིག་གི་ལས་གཞི་གཉིས་ལ་རྒྱུས་ལོན་གྲོས་ཆོད་བཞག་ཡོད་པ་རེད།

ལས་གཞི་དེ་གཉིས་རྩིས་མེད་བཟོས་པའི་ཐད་ཁ་སང་ཕྱི་ཚེས་ ༢༡ ཉིན་ཨོ་གླིང་བཅའ་སྡོད་རྒྱ་ནག་གཞུང་ཚབ་ཁང་གིས་ཡིག་ཐོག་ཏུ་བསྒྲགས་གཏམ་ཞིག་སྤེལ་ཏེ། ཨོ་གླིང་གཞུང་གི་ཐག་གཅོད་དེ་ནི་རྒྱུ་མཚན་གང་ཡང་མེད་པ་ཞིག་དང་། རྒྱ་ནག་གཞུང་ཕྱོགས་ལ་དོན་མེད་ཁོང་ཁྲོ་སློང་གཞི་གཞན་ཞིག་ཡིན་པ། ཐག་གཅོད་དེ་ལ་བརྟེན་ནས་ཨོ་གླིང་གཞུང་ལ་ཕྱོགས་གཉིས་དབར་གྱི་འབྲེལ་བ་ཡར་རྒྱས་གཏོང་བའི་ཀུན་སློང་གཙང་མ་ཞིག་མེད་པ་མཚོན་གྱི་ཡོད་སྐོར། དེ་བཞིན་ཐག་གཅོད་དེ་ཡིས་ཕྱོགས་གཉིས་ཀྱི་འབྲེལ་ལམ་ལ་སྔར་ལྷག་དོ་ཕོག་བཏང་བ་ཙམ་དུ་མ་ཟད། ཨོ་གླིང་གིས་རང་ཉིད་ཀྱི་ཁེ་ཕན་ལ་གནོད་སྐྱོན་བཟོས་པ་ཞིག་ཡིན་སྐོར་སོགས་བཀོད་དེ་སྐྱོན་བརྗོད་དང་དགག་བྱ་བྱས་འདུག

ཨོ་གླིང་གི་ཐག་གཅོད་དེ་ལ་ཨོ་གླིང་བོད་དོན་ལས་འགུལ་ལྷན་ཁང་ (Australia Tibet Council) གིས་རྒྱལ་ཁ་ཞིག་ལ་ངོས་འཛིན་བྱེད་ཀྱི་ཡོད་པ་དེ་གའི་དྲ་ཐོག་ཏུ་བཀོད་འདུག་ལ། ཨོ་གླིང་གཞུང་གིས་མུ་མཐུད་ཁུང་ཙི་ལྟེ་གནས་ཁང་ཁག་ལ་བཞག་ཡོད་པའི་གྲོས་ཆོད་ཁག་ལའང་ཞིབ་འཇུག་ནན་མོ་བྱ་དགོས་པའི་དགོས་འདུན་བཏོན་འདུག ལས་འགུལ་ཁང་དེས་ལོ་མང་རིང་རྒྱ་ནག་གཞུང་གིས་ཨོ་གླིང་གི་ནང་ཐེ་ཇུས་དང་ཤུགས་རྐྱེན་སྤྲོད་ཀྱི་ཡོད་པའི་ཐད་ཞུ་གཏུག་གི་ལས་འགུལ་སྤེལ་ཡོད་པ་མ་ཟད། རྒྱ་ནག་གི་རྒྱུད་གཅིག་ལམ་གཅིག་གི་སྲིད་ཇུས་རྩིས་མེད་བཟོ་བ་དང་། ཁུང་ཙི་ལྟེ་གནས་ཁང་ཁག་སྒོ་བརྒྱབ་དགོས་པའི་ལས་འགུལ་རིམ་པར་སྤེལ་ཡོད་པ་རེད།

རྒྱུད་གཅིག་ལམ་གཅིག་གི་སྲིད་ཇུས་འོག་གི་ལས་གཞི་གཉིས་རྩིས་མེད་བཟོས་པ་དེ་ཡིས་ཨོ་གླིང་གི་དཔལ་འབྱོར་ལ་གནོད་སྐྱོན་ཤུགས་ཆེན་མེད་སྐོར་ལ་སི་ཌི་ནི་ཚོང་རིག་སློབ་གཉེར་ཁང་གི་སློབ་དཔོན་ཆེན་མོ་ཧན་སི་ (Hans Hendrischke) ཡིས། རྩིས་མེད་བཏང་བའི་ལས་གཞི་དེ་གཉི་ག་ཡུལ་དངོས་སུ་ལག་བསྟར་བྱེད་མགོ་བཙུགས་མེད་སྟབས། གྲོས་ཆོད་རྩིས་མེད་བཟོས་པ་ཡིས་ཨོ་གླིང་གི་དཔལ་འབྱོར་ལ་ཤུགས་རྐྱེན་ཆུང་ངུ་ལས་ཐེབས་ཀྱི་མེད་པ་དང་། གྲོས་ཆོད་དེ་གཉིས་ཀྱི་ནང་ལས་གཞི་ཁག་ཁ་གསལ་གཏན་འབེབ་བྱུང་མེད་པ་མ་ཟད། ལས་གཞི་ཁག་ངེས་པར་དུ་བསྒྲུབ་དགོས་པ་གསལ་མེད་སྐོར་བརྗོད་འདུག

རྒྱ་ནག་ནི་ཨོ་གླིང་གི་ཚོང་འབྲེལ་ཆེ་ཤོས་ཀྱི་རྒྱལ་ཁབ་དེ་ཡིན་པ་མ་ཟད། མཐོ་སློབ་ཁག་གི་ཕྱིའི་སློབ་མའི་ཡོངས་ཁུངས་ཆེ་ཤོས་དེ་ཆགས་ཡོད་ནའང་། ཕྱི་ལོ་ ༢༠༡༨ ལོར་ཨོ་གླིང་གིས་རྒྱ་ནག་གི་ཧཱ་ཝེ་འཕྲུལ་རིག་བཟོ་ཚོང་ཁང་གི་ཤུགས་ཚད་ ༥ པའི་དྲ་ལམ་ (5G) ཨོ་གླིང་ནང་གཏང་རྒྱུར་བཀག་འགོག་བྱས་པ་ནས་བཟུང་ཕྱོགས་གཉིས་ཀྱི་འབྲེལ་ལམ་ཇེ་སྡུག་ཏུ་འགྲོ་མགོ་བརྩམས་ཡོད་པ་དང་། དེར་མཐུད་ཉེ་ལམ་ཏོག་དབྱིབས་གཉན་རིམས་ཀྱི་འབྱུང་རྐྱེན་རྟོག་ཞིབ་དང་འབྲེལ་ནས་རྒྱལ་སྤྱིའི་ཆེད་མཁས་པའི་ཚོགས་ཆུང་ཞིག་རྒྱ་ནག་ནང་རྩད་གཅོད་བྱ་ཆེད་གཏང་དགོས་པའི་དགོས་འདུན་ཤུགས་ཆེན་བཏོན་པར་བརྟེན། ཕྱོགས་གཉིས་ཀྱི་ཕྱི་འབྲེལ་དང་ཚོང་འབྲེལ་སོགས་ལ་དོ་ཕོག་ཆེན་པོ་འགྲོ་བཞིན་ཡོད་པའི་འོག རྒྱ་ནག་གཞུང་གིས་ཨོ་གླིང་གི་རྒུམ་ཆང་དང་སོལ་བ་སོགས་ནང་འདྲེན་བཀག་འགོག་བྱས་ཏེ་རྒོལ་ལན་བསློགས་ཡོད་པ་རེད།

གསར་འགོད་པ། ཀླུ་མགོན་ཐར།