བོད་མཚོ་སྔོན་ཞིང་ཆེན་སྐྱེ་རྒུ་མདོ་ཁུལ་འབྲིང་རིམ་སློབ་གྲྭ་སོགས་འབྲོག་ཕྱོགས་ཀྱི་སློབ་གྲྭ་ཁག་ཅིག་ཏུ་བདུན་ཕྲག་རེར་ཉེན་རྟོག་པས་ཆབ་སྲིད་སློབ་གསོ་ཐེངས་གསུམ་རེར་འཚོག་བཞིན་འདུག
དེ་ཡང་རྒྱ་ནག་གཞུང་གིས་བོད་མཚོ་སྔོན་ཞིང་ཆེན་སྐྱེ་རྒུ་མདོ་ཁུལ་སོགས་སུ། དེ་སྔོན་གྱི་ལས་བྱེད་རྒན་པ་མང་པོ་ཞིག་ཟི་ལིང་སོགས་སུ་གནས་སྤོར་བཏང་སྟེ། གཏན་འཇགས་མིན་པའི་ལས་བྱེེད་གསར་པ་མང་པོ་ཞིག་སླེབ་ཀྱིན་ཡོད་པ་མ་ཟད། ལས་བྱེད་དེ་དག་གི་བྱ་བའི་རྣམ་འགྱུར་དང་གྲུབ་འབྲས་ལ་བལྟས་ནས་གཏན་འཇགས་ཆགས་དགོས་པ་ཞིག་བཟོས་ཡོད་འདུག
ས་གནས་ཀྱི་འབྲེལ་ཡོད་ཅིག་གིས་འདི་གར་གནས་ཚུལ་མཁོ་སྤྲོད་གནང་བ་ལྟར་ན། གཏན་འཇགས་མིན་པའི་ལས་བྱེད་གསར་པ་དེ་དག་གྲོང་རྡལ་དུ་ཕབ་པའི་ཁྱིམ་ཚང་རེ་རེའི་ནང་དངོས་སུ་ཕྱིན་ཏེ། སྲིད་གཞུང་གི་རོགས་དངུལ་དང་ཟ་འབྲུ་སོགས་སྤྲད་པ་དང་སྦྲགས། ཕ་མ་ཚོས་སོ་སོའི་བུ་ཕྲུག་རྣམས་ལ་རྒྱུན་དུ་རླབས་ཆེན་གྱི་མེས་རྒྱལ་བཀའ་དྲིན་ཆེན་པོ་ཡིན་ལུགས་དང་། མ་འོངས་པར་རྒྱལ་ཁབ་ལ་ཞབས་ཕྱི་ཧུར་ཐག་བསྒྲུབ་དགོས་པའི་སློབ་གསོ་གཟབ་ནན་གྱིས་གཏོང་དགོས་ཚུལ་སྐུལ་འདེད་གཏོང་གི་ཡོད་འདུག
ཡང་གནས་ཚུལ་མཁོ་སྤྲོད་པ་གཞན་ཞིག་གིས། ད་ལོར་སྔར་དང་མི་འདྲ་བར་ས་གནས་ཉེན་རྟོག་པ་རུ་ཁག་རུ་ཁག་བྱས་ཏེ། སྐྱེ་རྒུ་མདོ་ཁུལ་འབྲིང་རིམ་སློབ་གྲྭ་སོགས་འབྲོག་ཕྱོགས་ཀྱི་སློབ་གྲྭ་ཁག་གི་ནང་དུ་བདུན་ཕྲག་རེར་ཐེངས་གསུམ་ཙམ་ཡོང་ནས། ཀྲུང་གོ་གུང་ཁྲན་ཏང་གི་ལོ་བརྒྱའི་འབད་འཐབ་ཀྱི་གཟི་བརྗིད་ལ་སློབ་སྦྱོང་བྱེད་དགོས་ཚུལ་དང་། ངེས་པར་དུ་ཀྲུང་གོ་གུང་ཁྲན་ཏང་ལ་སེམས་གཏིང་ནས་དགའ་ཞེན་དང་ཞབས་འདེགས་སྒྲུབ་དགོས་ཟེར་བ་སོགས་ཀྱི་ཆབ་སྲིད་སློབ་གསོ་སྤྲོད་ཀྱི་ཡོད་འདུག
གསར་འགོད་པས་རྒྱུས་ལོན་བྱུང་བ་ལྟར་ན། རྒྱ་ནག་གཞུང་གིས་སོ་སོའི་ཆབ་སྲིད་ཀྱི་ཁེ་ཕན་འགྲུབ་ཆེད། བོད་ཀྱི་ས་གནས་ཁག་གི་ལས་བྱེད་རྒན་པ་མང་པོ་གནས་སྤོར་བཏང་སྟེ། རྒྱ་མི་རིགས་གཙོ་བོར་གྱུར་བའི་ཉམས་གསོག་དང་གཏན་འཇགས་མིན་པའི་ལས་བྱེད་མང་པོ་བོད་ཁུལ་དུ་ཆེད་གཏོང་བྱས་ནས་རོགས་སྐྱོབ་ཡིན་ལུགས་རྗོད་ཀྱིན་ཡོད་པ་དེ། ལོ་མང་གིས་སྔོན་ནས་བཟུང་བོད་མགོ་ལོག་ཁུལ་སོགས་ཀྱི་ནང་ལག་བསྟར་བྱེད་མུས་རེད་འདུག་ལ། ལས་གནས་གཏན་འཇགས་མིན་པའི་ལས་བྱེད་གསར་པ་དེ་ཚོས་སོ་སོའི་མདུན་ལམ་ཆེད་སྲིད་གཞུང་གི་བཀོད་མངགས་ཧུར་ཐག་གིས་སྒྲུབ་ཀྱི་ཡོད་པ་མ་ཟད། མང་པོ་ཞིག་གིས་ས་གནས་མི་མང་གི་རང་དབང་ལ་རྡོག་རོལ་ཚབས་ཆེན་བཏང་སྟེ། སོ་སོའི་ལས་གནས་གཏན་སྲུང་དང་གོ་གནས་འཕར་བར་འབད་བརྩོན་བྱེད་བཞིན་འདུག
རྒྱ་གར་ལྷོ་ཕྱོགས་ཀྱི་གསར་འགོད་པ་དོན་འགྲུབ་བཀྲ་ཤིས།
