རྒྱ་ནག་གཞུང་གིས་ཏོག་དབྱིབས་གཉན་རིམས་འགོས་ཁྱབ་བཀག་འགོག་ཆེད་ཇོ་མོ་གླང་མའི་རི་རྩེ་ནས་དབྱེ་མཚམས་བཟོ་ཡི་ཡོད་སྐོར་བསྒྲགས།
ཟླ་འདིའི་ཕྱི་ཚེས་ ༡༠ ཉིན་དྲ་ལམ་དུ་གནས་ཚུལ་ཐོན་པ་ལྟར་ན། བོད་རང་སྐྱོང་ལྗོངས་ཟེར་བའི་བོད་ཀྱི་རྩེད་རིགས་ལས་དོན་ཁང་གི་ (Tibetan Sports Bureau)མགོ་ཁྲིད་ཉི་མ་ཚེ་རིང་གིས། ཇོ་མོ་གླང་མའི་རི་རྩེར་དབྱེ་མཚམས་བཟོ་ཡི་ཡོད་པའི་སྐོར་བརྗོད་སྐབས། རྒྱ་ནག་དང་བལ་ཡུལ་ནས་ཇོ་མོ་གླང་མའི་རི་རྩེར་འཛེགས་མཁན་རྣམས་ལ་ཏོག་ནད་མི་འགོས་པའི་ཆེད་དུ་དུས་གཅིག་ཏུ་རི་རྩེར་མི་ཐུག་པའི་དབྱེ་བ་ཕྱེ་ཡི་ཡོད་པ་རེད། ཅེས་བརྗོད་འདུག
ཇོ་མོ་གླང་མ་ནི་འཛམ་གླིང་གི་རི་བོ་མཐོ་ཤོས་དེ་ཡིན་པ་དང་། དེ་བོད་དང་བལ་ཡུལ་བར་གྱི་ས་མཚམས་སུ་ཆགས་ཤིང་། འདས་ལོ་ནས་ཏོག་དབྱིབས་གཉན་རིམས་ཀྱི་རྐྱེན་གྱིས་རྒྱ་ནག་གིས་ཇོ་མོ་གླང་མར་ཕྱིའི་རྒྱལ་ཁབ་ཁག་ནས་རི་འཛེགས་པ་བཀག་འགོག་བྱས་ཡོད་ཀྱང་། ཕྱི་ལོ་ ༢༠༢༡ ནང་རྒྱ་ནག་གཞུང་གིས་རི་འཛེགས་པ་ ༤༠༠ ཡས་མས་ལ་ཆོག་མཆན་སྤྲད་ཡོད་འདུག
བྷི་བྷི་སི་ཡི་གནས་ཚུལ་ལྟར་ན། རྒྱ་ནག་གིས་ཇོ་མོ་གླང་མའི་རི་འཛེགས་པ་ཁ་ཤས་བལ་ཡུལ་རྒྱལ་ས་ཀཱ་ཋི་མན་ཌུ་ (Kathmandu) རུ་ཏོག་ནད་བརྟག་དཔྱད་བྱེད་ཆེད་དང་སྨན་བཅོས་བྱེད་པའི་ཆེད་དུ་བཏང་ཡོད་འདུག་ལ། འདས་པའི་བདུན་ཕྲག་ནང་བལ་ཡུལ་ནས་ཇོ་མོ་གླང་མའི་རི་འཛེགས་པ་ ༡༧ ལ་ཏོག་ནད་འགོས་ཡོད་འདུག
བལ་ཡུལ་གྱི་འཕྲོད་བསྟེན་བློན་ཆེན་(Hridayesh Tripathi) ་གྱིས། བལ་ཡུལ་ནང་ཏོག་ནད་ཅན་འབུམ་ ༤ ལྷག་ཡོད་པ་དང་། ཟླ་འདིའི་ཕྱི་ཚེས་ ༡༠ ཉིན་ཁོ་ནར་ཏོག་ནད་ཅན་ ༩༡༠༠ བྱུང་ཡོད་ཅིང་། མི་ ༣༩༠༠ ཙམ་ཏོག་ནད་ཀྱི་རྐྱེན་གྱིས་འདས་གྲོངས་སུ་ཕྱིན་འདུག ད་ལྟའི་ཆར་བལ་ཡུལ་དུ་ཏོག་ནད་ཅན་སྟོང་ཕྲག་ ༩༣ ལྷག་ཡོད་འདུག
གསར་འགོད་པ། བསྟན་འཛིན་ཕུར་བུ།
